Wanem Nao Kingdom Bilong God?

“Disfala gud nius abaotem kingdom . . . ”—MATTHEW 24:14.

LONG Lord’s Prea wea Jesus talem long Sermon long Maunten, Jesus askem God: “Mifala laekem kingdom bilong iu for kam.” Staka million pipol baeheartim and talem datfala prea evritaem. Wanfala encyclopedia sei hem “main prea wea evri Christian iusim long worship.” Bat staka wea talem Lord’s Prea no savve wanem nao datfala Kingdom or wanem nao Kingdom bae duim.—Matthew 6:9, 10.

Iumi no sapraes long datwan. Wei wea olketa bigman bilong religion explainim datfala Kingdom hem mekem pipol no minim, olketa konfius, and no savve agree. Wanfala man raetem hao Kingdom bilong God hem “join witim paoa bilong God, . . . samting insaed long man wea mekem hem savve long God . . . , wanfala samting wea olketa man and woman experiencem witim God for sevem olketa.” Nara man hem sei mining bilong olketa teaching abaotem Kingdom hem “instruction abaotem church.” And Catholic Encyclopaedia sei: “Kingdom bilong God [hem] stret samting and peace and hapi long Holy Spirit.”

Long page 2 bilong disfala magasin bae iu lanem wanem nao datfala Kingdom. Hem sei: “Kingdom bilong God,  . . . hem wanfala gavman long heven. Klosap nao disfala gavman bae finisim evri nogud samting and mekem earth kamap paradaes.” Bae iumi storyim hao Bible sapotim datfala toktok.

Olketa wea Bae Rulim Full Earth

Kingdom hem wanfala gavman wea king nao rulim. Jesus Christ wea laef bak, hem nao King long Kingdom bilong God. Profet Daniel lukim vision abaotem taem wea Jesus bae kamap King long heven, and hem sei: “Mi lukim vision long naet, and mi lukim witim olketa cloud long skae samwan wea olsem son bilong man [Jesus] hem kam. Hem kam long Man from taem bifor kam [Jehovah God], and olketa tekem hem klosap long hem. Son bilong man hia kasem paoa for rul and glory and kingdom, mekem evri pipol, kantri, and languis mas stap anda long hem. Rul bilong hem bae stap for olowe and no eniwan bae finisim kingdom bilong hem.”—Daniel 7:13, 14.

Bible buk Daniel storyim tu God bae mekem datfala Kingdom for stap olowe, and hem bae finisim evri gavman bilong man, and no eniwan bae finisim datwan. Daniel chapter 2 storyim dream wea king bilong Babylon kasem from God, wea hem lukim wanfala mamaeti image wea stand for olketa world paoa wea bae kamap. Profet Daniel nao explainim datfala dream. Hem sei: “Long olketa last day . . . God bilong heven bae startim wanfala kingdom wea bae nating finis and no eni pipol moa tekova long datfala kingdom. Hem bae smasem and finisim evri kingdom hia, and hem nomoa bae stap olowe.”—Daniel 2:28, 44.

Datfala King long Kingdom bilong God hem no rul seleva. Taem Jesus duim ministry bilong hem long earth, hem promisim olketa faithful aposol bilong hem, and olketa narawan, olketa bae laef bak long heven and sidaon long olketa throne. (Luke 22:28-30) Hem no minim olketa really throne bikos olsem Jesus talem, datfala Kingdom bae stap long heven. Bible storyim olketa hia kam from “evri tribe and languis and pipol and kantri.” Olketa bae ‘kamap olketa king and priest bilong God bilong iumi, and bae kamap olketa king for rulim disfala earth.’—Revelation 5:9, 10.

Why Nius Abaotem Kingdom Hem Gud

Tingim hao Christ Jesus bae rul ovarem olketa “pipol, kantri, and languis” and olketa wea bae rul witim hem bae “kamap olketa king for rulim disfala earth.” So hu nao bae stap anda long disfala Kingdom? Olketa wea herem gud nius and duim samting followim wanem olketa lanem. Olketa wea laef bak long earth and wea garem hope for laef olowe tu bae stap anda long Kingdom.

Bible storyim klia olketa blessing wea pipol bae enjoyim anda long datfala Kingdom. Samfala blessing nao hem olsem:

“Hem bae finisim olketa war long full earth. Hem brekem bow and pisisim spia. Hem bonem olketa wagon long fire.”—Psalm 46:9.

“And olketa bae buildim haos and stap insaed; and olketa bae plantim grape planteison and kaikaim frut bilong hem. Olketa bae no build and narafala man nao stap insaed; olketa bae no plant and narawan nao kaikaim.”—Isaiah 65:21, 22.

“[God] bae aotem evri tias from eye bilong olketa, and no eniwan bae dae moa, and no eniwan bae sorre or krae or feel pain moa. Olketa samting long bifor bae nomoa nao.”—Revelation 21:3, 4.

“Long datfala taem, eye bilong olketa wea blind bae open, and ear bilong olketa wea earpas bae no sat moa. Long datfala taem, man wea cripple bae klaemap olsem wanfala deer, and tongue bilong man wea no savve toktok bae singaot witim hapi.”—Isaiah 35:5, 6.

“Taem bae kam wea evriwan wea stap insaed long grev bae herem toktok bilong [Jesus] and laef bak. Olketa wea duim gud samting bae kasem laef olowe, bat God bae judgem olketa wea duim nogud samting.”—John 5:28, 29.

“God bae givim earth long olketa wea hambol, and olketa bae hapi fogud bikos olketa stap gud.”—Psalm 37:11.

Tru tumas, olketa scripture hia storyim gud nius! And olketa profesi long Bible wea kamap tru showimaot klosap nao Kingdom bae rulim full earth long stretfala wei.

Wanem Nao Datfala Gud Nius?

“Disfala gud nius . . . ”—MATTHEW 24:14.

OLKETA Christian mas preachim “gud nius abaotem kingdom” taem olketa storyim long olketa narawan, and storyim datfala Kingdom hem gavman wea bae rulim earth long stretfala wei. Bat Bible iusim toktok “gud nius” abaotem olketa nara samting tu. Example hem olsem, “gud nius abaotem wei for sev” (Psalm 96:2); “gud nius bilong God” (Romans 15:16); and “gud nius abaotem Jesus Christ.”—Mark 1:1.

Diswan minim, datfala gud nius hem evri tru samting wea Jesus storyim and wea olketa disaepol raet abaotem. Bifor Jesus go ap long heven, hem talem olketa follower bilong hem: “So iufala go and teachim pipol long evri kantri for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit. Teachim olketa for followim evri samting wea mi laekem iufala for duim.” (Matthew 28:19, 20) So waka bilong olketa tru Christian hem no just for talem olketa narawan abaotem Kingdom, olketa mas trae tu for helpem pipol kamap disaepol.

Waswe, olketa religion duim diswan? From staka pipol no minim wanem nao datfala Kingdom, olketa no savve teachim narawan tru samting abaotem datwan. Olketa preachim nomoa olketa samting wea mekem pipol feel gud olsem for garem faith long Jesus, and God savve forgivim sin. Olketa trae tu for kasem olketa niu member long church long wei for duim olketa gud samting for pipol, or wakem olketa hospital, skul, and haos for pipol wea poor. Diswan savve mekem staka for joinim olketa, bat olketa no kamap olketa trufala Christian wea laek duim wanem Jesus teachim.

Wanfala savveman sei: “Staka savveman long Bible and bigman long religion savve iumi shud teachim pipol for kamap disaepol bilong Jesus and for duim evri samting wea Jesus talem. . . . Wanem Jesus talem abaotem diswan hem barava klia. Bat iumi no duim wanem hem talem. Iumi no traem best for duim datwan. And hem luk olsem iumi no savve hao for duim datwan.”

And tu, taem olketa duim survey long 250 Catholic long America, 95 percent agree wei for preachim disfala gud nius hem samting wea olketa shud duim for showimaot faith bilong olketa. Nomata olsem, klosap evriwan tingse best wei for duim datwan hem no for tok abaotem gud nius, bat for showimaot gudfala example for olketa narawan followim. Wanfala woman wea olketa interviewim hem sei: “Wei for talemaot Gud Nius hem no for storyim nomoa, bat wei bilong iumi nao bae showimaot datfala Gud Nius.” Datfala U.S. Catholic magasin, wea duim disfala survey, sei staka pipol no willing for talemaot wanem olketa bilivim “bikos olketa shame long samting wea church hem duim. Distaem staka bigman long church spoelem olketa pikinini and narawan saed long sex, and samfala teaching bilong church olketa no savve pruvim and hem savve kosim problem for olketa member bilong hem tu.”

Wanfala bishop bilong Methodist church sorre for talem hao pipol long church bilong hem olketa divaed and konfius. Olketa fraet for duim waka wea olketa shud duim, and wei bilong olketa hem semsem nomoa olsem olketa nara pipol wea no garem sem biliv. From hem feel nogud, hem tok olsem: “Hu nao olketa wea duim gud disfala waka for talemaot Kingdom?”

Bishop hia no talem ansa long datfala kwestin. Bat ansa hem stap. Bae iu faendem ansa long nextfala article.

[Blurb long page 6]

Datfala gud nius hem abaotem Kingdom bilong God and for sev long wei for garem faith long Jesus Christ