Toktok Bilong Jehovah Hem Laef
Olketa Main Point From Buk Bilong Mark
LONG fofala Gospel, Mark nao no garem staka chapter. John Mark raetem disfala buk long samting olsem 30 year bihaen Jesus Christ hem dae and laef bak moa. Hem storyim staka spesol samting wea Jesus duim insaed thri and haf year ministry bilong hem.
John Mark raetem disfala buk for pipol wea no Jew olsem olketa bilong Rome. Hem storyim hao Jesus, Son bilong God hem duim olketa mirakol and hem strong for preach. Hem mekhae long olketa samting wea Jesus hem duim and no olketa samting hem teachim. Sapos iumi ting raonem gud Bible buk bilong Mark, faith bilong iumi long Messiah bae strong, and diswan bae muvim iumi for strong for talemaot message abaotem God long Christian ministry.—Heb. 4:12.
NAMBAWAN MINISTRY LONG GALILEE
Long 14-fala verse nomoa Mark storyim olketa samting wea John Baptaesa duim and 40-fala day wea Jesus stap long wilderness. Bihaen datwan hem storyim olketa gudfala samting wea Jesus duim long ministry bilong hem long Galilee. From Mark plande taem iusim disfala toktok “stretawe” hem showimaot olketa story wea hem talem hem barava important.—Mark 1:10, 12.
Hem no kasem thrifala year and Jesus preach long Galilee thrifala taem finis. Mark storyim plande samting followim taem wea olketa happen. Hem no storyim disfala Sermon long Maunten and plande toktok bilong Jesus wea long tumas.
Ansa for Olketa Bible Kwestin:
1:15—Hem “taem wea God markem” for wanem? Jesus talem hao hem taem nao for hem start duim ministry. Jesus wea God chusim finis for kamap King hem stap long datfala taem, dastawe Kingdom bilong God hem kam klosap nao. Preaching waka wea hem duim hem muvim pipol wea laekem truth for duim olketa samting wea mekem God hapi.
1:44; 3:12; 7:36—Why nao Jesus no laekem pipol for niusim olketa mirakol wea hem duim? Jesus laekem pipol for lukim seleva hao hem nao Christ and disaedem samting followim datwan, and no herem nomoa olketa story wea ova tumas from olketa narawan. (Isa. 42:1-4; Matt. 8:4; 9:30; 12:15-21; 16:20; Luke 5:14) Wanfala taem, Jesus talem wanfala man bilong Gerasenes wea garem demon bifor for go long hom bilong hem and storyim samting hem duim for hem long olketa relative bilong hem. Jesus no savve story witim pipol bilong Gerasenes from olketa no laekem hem for kam long ples bilong olketa. Pipol bae no warim tumas olketa pigpig wea dae bikos Jesus duim gudfala samting long man wea garem demon bifor.—Mark 5:1-20; Luke 8:26-39.
2:28—Why nao Jesus hem “Lord bilong sabbath tu”? Aposol Paul talem hao “Law hem wanfala shadow bilong olketa gudfala samting wea bae kam.” (Heb. 10:1) Olsem Law talem, Sabbath hem kamap bihaen sixfala day for waka and Jesus healim staka pipol long Sabbath. Diswan piksarem wei for rest wea no eni samting bae spoelem and olketa nara gud samting olketa man bae kasem long Thousand Year Rul bilong Christ bihaen Satan hem finis for rul long nogud wei. Dastawe King long datfala Kingdom hem “Lord bilong sabbath.”—Matt. 12:8; Luke 6:5.
3:5; 7:34; 8:12—Hao nao Mark savve long feeling bilong Jesus? Mark hem no wanfala long 12-fala aposol and hem no gudfala fren bilong Jesus. Tingting wea pipol garem nao Mark hem fren bilong Peter, so Peter nao storyim diswan long hem.—1 Pet. 5:13.
6:51, 52—Wanem nao “mining bilong olketa bred” wea olketa disaepol no minim? Tu-thri hour go finis, Jesus feedim 5,000 man and samfala woman and samfala pikinini witim faevfala bred and tufala fish nomoa. Samting wea olketa disaepol shud minim abaotem “mining bilong olketa bred” hem hao Jehovah God nao givim paoa long Jesus for duim olketa mirakol. (Mark 6:41-44) Sapos olketa minim bigfala paoa wea God givim long Jesus, olketa bae no sapraes tumas taem hem wakabaot long sea.
8:22-26—Why nao Jesus isisi mekem man wea blind for lukluk moa? Maet Jesus duim olsem from hem tingim datfala man. From eye bilong hem dark for longfala taem, isisi wei wea Jesus mekem hem for lukluk maet helpem hem getius for luk long laet bilong sun wea braet tumas.
Olketa Leson for Iumi:
2:18; 7:11; 12:18; 13:3. Mark explainim olketa kastom, olketa word, olketa teaching, and olketa ples wea pipol wea no Jew bae no savve long hem. Hem storyim hao olketa Pharisee savve “followim kastom for no kaikai long samfala day,” hao corban minim “wanfala present bilong God,” hao olketa Sadducee “talem man no savve laef bak moa,” and hao sapos man stap long “Maunten bilong Olives,” hem savve “lukim” temple. Hem no storyim olketa wea kam from laen bilong Messiah bikos olketa Jew nomoa bae laek for savve long datwan. Iumi savve followim samting wea Mark hem duim. Taem iumi preach, teach or duim tok long kongregeson, iumi shud tingim living bilong olketa wea lisin long iumi.
3:21. Olketa relative bilong Jesus no worshipim Jehovah. Dastawe Jesus savve long feeling bilong man wea olketa narawan long famili againstim hem or mekfani long hem from hem worshipim Jehovah.
3:31-35. Taem Jesus baptaes, hem kamap spiritual Son bilong God, and “Jerusalem antap” hem mami bilong hem. (Gal. 4:26) Start long datfala taem, olketa wea barava spesol long Jesus hem olketa disaepol bilong hem, and no olketa relative. Diswan lanem iumi hao olketa spiritual samting nao shud important long iumi.—Matt. 12:46-50; Luke 8:19-21.
8:32-34. Iumi shud no lisin long olketa wea talem iumi for isisi nomoa. Man wea followim Christ “mas rejectim wei for tingim nomoa wanem hemseleva laekem.” Hem nao, for no aftarem samting for hemseleva. Hem shud willing for “karem post for man safa long hem.” Diswan hem minim for safa, kasem shame, persecution, or maet dae from hem wanfala Christian. And hem mas “gohed for followim” olketa samting wea Jesus duim. Wanfala disaepol mas garem and gohed for showimaot wei for givim hemseleva olsem Christ Jesus hem duim.—Matt. 16:21-25; Luke 9:22, 23.
9:24. Iumi shud no fraet for storyim long nara pipol olketa samting iumi lanem from Bible or for prea long God for strongim faith bilong iumi.—Luke 17:5.
LASTFALA MONTH
Klosap long end bilong 32 C.E., Jesus “go long Judea and narasaed long Jordan,” and staka pipol go long hem. (Mark 10:1) Bihaen hem preach long there, hem go long Jerusalem.
Long Nisan 8, Jesus hem long Bethany. Taem hem kaikai, wanfala woman kapsaetem oil wea smel naes long hed bilong hem. Start long taem Jesus raedem donkey long Jerusalem go kasem taem hem laef bak moa, Mark story followim taem wea olketa samting happen.
Ansa for Olketa Bible Kwestin:
10:17, 18—Why nao Jesus stretem tingting bilong man wea sei Hem “Gudfala Teacher”? Jesus givim glory long Jehovah and showim hao trufala God nao duim olketa gud samting dastawe hem no laekem datfala man for talem hem “Gudfala Teacher.” Jesus showimaot tu hao Jehovah God nao creatim evri samting and hem nomoa fit for talem wanem samting hem gud and wanem samting hem nogud.—Matt. 19:16, 17; Luke 18:18, 19.
14:25—Wanem nao Jesus minim taem hem tok olsem long olketa aposol bilong hem wea faithful: “Mi bae no drinkim moa eni samting bilong datfala grape tree go kasem day wea mi bae drinkim niu wan insaed kingdom bilong God”? Jesus no minim wine hem stap long heven. Samfala taem wine piksarem wei for hapi, so Jesus storyim hem bae hapi taem hem stap witim olketa anointed follower bilong hem long Kingdom.—Ps. 104:15; Matt. 26:29.
14:51, 52—Hu nao young man wea “ranawe naked”? Mark nomoa storyim diswan, so luk olsem hem storyim hemseleva.
15:34—Waswe, Jesus no garem faith taem hem tok olsem: “God bilong mi, God bilong mi, why nao iu lusim mi?” Nomoa. Iumi no savve why nao Jesus tok olsem. Maet hem luksavve hao Jehovah no protectim hem long datfala taem. Diswan minim faith bilong hem bae kasem bigfala test. Maet Jesus tok olsem for mekem kamap tru samting wea Psalm 22:1 storyim abaotem hem.—Matt. 27:46.
Olketa Leson for Iumi:
10:6-9. God laekem olketa wea marit for stap tugeta for olowe. Dastawe olketa hasband and olketa waef shud trae hard for followim wanem Bible talem for stretem eni problem wea kamap long marit and no kwiktaem for divorce.—Matt. 19:4-6.
12:41-44. Samting widow woman wea poor hem duim teachim iumi for givim selen for sapotim tru worship.
[Piksa long page 29]
Why nao Jesus talem disfala man for storyim long olketa relative evri samting wea hem duim long hem?