Waswe, Iu Remember?
Waswe, iu kasem gud samting from olketa Wastaoa magasin wea iu readim finis no longtaem go nomoa? Trae for tingim ansa for olketa kwestin hia:
• Wanem taem nao olketa man wea studyim olketa star kam for lukim Jesus?
Wanfala study Bible hem sei: “Olketa Magi no kam for lukim Jesus long naet wea hem born olsem olketa shepherd duim. Olketa kam lukim Jesus samfala month bihaen hem born.” Olketa lukim Jesus long haos bilong hem taem hem “pikinini” nao. (Matt. 2:7-11) Sapos olketa Magi hia givim Jesus gold and olketa nara present wea kostim staka selen long naet wea hem born, bae hem hard for Mary offerim tufala bird nomoa olsem sakrifaes long temple 40 day bihaen!—1/1, page 31.
• Wanem nao plande pipol savve duim for mekem laef bilong olketa kamap moabeta?
Maet iu ask, ‘Waswe, mi savve changem samfala samting and mekem laef bilong mi moa simpol?’ Amy hem duim datwan. Nomata hem kasem bigfala selen, hem no hapi. Hem luksavve hao wei wea hem aftarem waka long disfala world klosap mekem hem lusim biliv bilong hem. Dastawe hem disaed for putim Kingdom firstaem and hem pioneer for tu-thri year. Amy hem sei: “Distaem mi barava satisfae and datwan nao samting wea mi nating garem” taem mi iusim full taem bilong mi for waka for world.—1/15, page 19.
• Wanem samting nao savve helpem mami for satisfae?
Plande mami distaem garem waka for selen. Samfala duim olsem mekem olketa savve kasem samting wea famili needim, and samfala duim diswan bikos olketa laek kasem bigfala selen or olketa laek baem staka naes samting. Olketa nara mami waka bikos olketa laekem tumas waka wea olketa duim. Bible talem hao olketa mami garem important waka long famili. Bigfala waka wea olketa duim hem long taem pikinini hem baby. Samfala disaed for waka lelebet nomoa or lusim waka bilong olketa mekem olketa savve duim moa samting for famili. From olketa duim olsem, diswan mekem olketa barava satisfae.—2/1, page 28-31.
• Hu nao disfala “genereson” wea Jesus storyim long Matthew 24:34?
Klosap evritaem wea Jesus iusim datfala word “genereson,” hem story long wicked pipol or hem storyim wicked pipol wea stap long taem bilong hem. Bat hem no duim olsem taem hem story long olketa disaepol bilong hem, wea klosap nao holy spirit bae anointim olketa. Olketa nao bae savve long trufala mining bilong Matthew 24:32, 33. So masbi Jesus hem storyim olketa anointed follower bilong hem long first century and olketa wea stap distaem tu.—2/15, page 23-4.
• Olsem Galatians 3:24 storyim, long wanem wei nao Law hem kamap samting for leadim iumi?
Long taem bifor, wanfala slave wea masta trustim nao hem protectim pikinini and hem duim samting wea dadi laekem for pikinini bilong hem. Law tu hem protectim olketa Jew from samting wea savve spoelem olketa, wea wanfala nao hem law wea tambuim wei for maritim pipol wea no worshipim Jehovah. Bat olsem datfala slave wea lukaftarem pikinini, datfala Law hem no for olowe, bat hem helpem olketa Israelite go kasem taem Christ hem kam.—3/1, page 18-21.
• Olsem James 3:17 talem, wei bilong iumi mas hao?
For iumi klin long olketa wei bilong iumi, iumi mas kwiktaem lusim eni rabis samting. (Gen. 39:7-9) Iumi tu mas stap gud witim olketa nara pipol, no tok raf and no duim eni samting for mekem raoa kamap. So hem gud for iumi wanwan askem iumiseleva: ‘Waswe, pipol savve long mi olsem man for raoa or man for stopem raoa? Waswe, mi evritaem no hapi long samting wea olketa narawan duim? Waswe, mi kwiktaem feel nogud or mekem olketa narawan for feel nogud? Or waswe, mi kwiktaem forgive and no forcem olketa narawan for laekem wei bilong mi?’—3/15, page 24-5.
• Why nao Jesus isisi healim wanfala man wea blind? (Mark 8:22-26)
Bible no talem why nao hem duim olsem. Bat maet Jesus isisi healim datfala man wea blind mekem hem getius long wei for lukluk wea hem niu samting long hem. Diswan hem showimaot love wea Jesus garem for datfala man wea blind.—4/1, page 30.