“Gohed for Followim Mi”
1 Staka pipol duim nomoa samting wea olketa seleva laekem, bat plande taem olketa no hapi. Bat, advaes bilong Jesus abaotem wei for willing for give hem mekem man kasem trufala hapi. (Acts 20:35) Hem sei: “Sapos eniwan want for kam followim mi, hem mas rejectim wei for tingim nomoa wanem hemseleva laekem . . . and gohed for followim mi.” (Mark 8:34) Diswan hem no minim for iumi rejectim wanem iumiseleva laekem samfala taem nomoa. Bat, hem minim for mekem Jehovah hapi evriday and no iumiseleva.—Rom. 14:8; 15:3.
2 Tingim example bilong aposol Paul. From hem lanem “nambawan savve abaotem . . . Christ Jesus,” Paul iusim laef bilong hem for duim moa samting saed long Kingdom, and hem finis for duim olketa samting wea hemseleva nomoa laekem. (Phil. 3:7, 8) Hem sei: “Bat, mi bae hapi tumas for give and givim miseleva evribit” for servem olketa narawan. (2 Cor. 12:15) Iumi each wan shud askem iumiseleva olsem: ‘Hao nao mi iusim taem, strong, savve, and olketa samting wea mi garem? Waswe, mi evritaem ting for duim olketa samting for mekem Jehovah hapi, or olketa samting wea miseleva nomoa laekem?’
3 Olketa Chance for Give: Evri year pipol bilong God iusim winim wan billion hour long waka for preach abaotem Kingdom wea savve mekem pipol kasem laef olowe. Olketa olo and young wan duim olketa difren kaen waka insaed long kongregeson for helpem olketa narawan. Pipol bilong God duim bigfala waka tu long taem bilong olketa assembly and convention, and tu, long construction and for fixim olketa building wea mekem tru worship kamap moa big. And tingim loving help wea olketa brata givim taem olketa serve long olketa Hospital Liaison Komiti and Patient Visitation Grup. Evri difren kaen waka hia wea iumi willing for duim hem wanfala blessing for olketa Christian brata bilong iumi!—Ps. 110:3.
4 Taem wanfala disaster or emergency hem kamap, datwan savve givim iumi olketa chance for givim help long olketa difren kaen wei. Bat staka taem iumi luksavve hao wanfala Christian brata or sista maet needim help or samwan for encouragem hem. (Prov. 17:17) Iumi followim example bilong Jesus taem iumi willing for helpem olketa narawan and mekem olketa samting saed long Kingdom kamap moa big. (Phil. 2:5-8) Iumi laek for waka hard for gohed duim olsem.