Gohed Followim Best Samting wea Iu Chusim!
“Sapos iumi laef or sapos iumi dae, iumi bilong Jehovah.”—ROM. 14:8.
1. Wanem nao best samting for duim wea Jesus teachim?
JEHOVAH laekem iumi for kasem olketa nambawan samting long laef. Pipol savve chus for duim eni samting long laef bilong olketa, bat wanfala samting nomoa hem best samting for duim. Hem nao for followim wanem God talem long Bible and for lane from example bilong Son bilong hem, Jesus Christ. Jesus teachim olketa follower bilong hem for worshipim God followim holy spirit and samting wea tru. Hem talem olketa tu for teachim pipol for kamap disaepol. (Matt. 28:19, 20; John 4:24) Taem iumi duim olketa samting wea Jesus talem, Jehovah hapi long iumi and blessim iumi.
2. Wanem nao staka pipol long first century duim taem olketa herem message abaotem Kingdom? Wanem nao hem minim for followim “datfala niu wei”?
2 Taem pipol wea “showimaot olketa laekem laef olowe” acceptim tru samting long Bible and baptaes, iumi savve sei long olketa, ‘Gohed followim best samting wea iufala chusim!’ (Acts 13:48) Long first century, staka thousand pipol from difren kantri acceptim truth and olketa baptaes for showimaot olketa lovem God. (Acts 2:41) Olketa disaepol hia followim “datfala niu wei.” (Acts 9:2; 19:23) Disfala toktok “niu wei” hem barava fitim bikos olketa wea kamap olketa disaepol bilong Christ duim samting wea showimaot olketa garem faith long Jesus Christ and followim example bilong hem.—1 Pet. 2:21.
3. Wanem nao mekem pipol bilong Jehovah disaed for baptaes, and haomas baptaes long tenfala year wea go pas finis?
3 Waka for teachim pipol for kamap disaepol hem barava kamap big long olketa last day and iumi duim diswan long winim 230 kantri. Long tenfala year wea go pas finis, winim 2,700,000 pipol disaed for worshipim Jehovah and baptaes for showimaot olketa dedicate long hem. Samting olsem 5,000 pipol nao baptaes evri week! Olketa hia baptaes bikos olketa lovem God, savve long Bible, and bilivim wanem Bible teachim. Taem iumi baptaes, datwan hem bigfala samting from hem mekem iumi barava fren gud witim Jehovah. Hem showimaot tu iumi trustim Jehovah for helpem iumi for faithful long hem, olsem hem helpem olketa wea worshipim hem long taem bifor for faithful.—Isa. 30:21.
Why Nao Iu Shud Baptaes?
4, 5. Storyim samfala gud samting wea iu bae kasem taem iu baptaes.
4 Maet iu lane abaotem God, changem samfala wei bilong iu, and distaem iu anbaptaes pablisa. Samting wea iu duim hem gud tumas. Bat waswe, iu prea finis long God for dedicate long hem, and iu laek for baptaes? From iu studyim Bible, maet iu savve finis hao iu shud iusim laef bilong iu for praisem Jehovah and no for followim wanem iuseleva nomoa laekem or for kasem olketa material samting. (Readim Psalm 148:11-13; Luke 12:15) So sapos iu baptaes, wanem nao samfala gud samting wea iu bae kasem?
5 Taem iu dedicate and baptaes, datwan nao bae mekem iu satisfae. Iu bae hapi bikos iu duim wanem God laekem. (Rom. 12:1, 2) Holy spirit bilong Jehovah bae helpem iu for garem olketa gudfala wei olsem peace and faith. (Gal. 5:22, 23) God bae herem olketa prea bilong iu and blessim iu taem iu followim wanem Bible talem. Iu bae hapi tumas taem iu duim ministry, and from iu duim wanem God hapi long hem datwan bae strongim hope bilong iu for laef olowe. Taem iu dedicate and baptaes, datwan tu showimaot iu barava laek for kamap wanfala Jehovah’s Witness.—Isa. 43:10-12.
6. Taem iumi baptaes, wanem nao datwan showimaot?
6 Taem iumi dedicate and baptaes, iumi showimaot long pipol iumi bilong Jehovah nao. Aposol Paul sei: “No eniwan long iumi laef for mekhae long iumiseleva nomoa and no eniwan long iumi hem dae for mekhae long iumiseleva nomoa. Sapos iumi laef, iumi laef for Jehovah, and sapos iumi dae, iumi dae for Jehovah. So sapos iumi laef or sapos iumi dae, iumi bilong Jehovah.” (Rom. 14:7, 8) From God tingim iumi wanwan, hem letem iumi chusim wanem iumiseleva laekem. Taem iumi disaed strong for givim laef bilong iumi long God bikos iumi lovem hem, datwan mekem hem hapi. (Prov. 27:11) Taem iumi baptaes, datwan showimaot iumi dedicate finis long God and showimaot long pipol tu Jehovah nao rulim iumi. Iumi showimaot iumi sapotim wei wea Jehovah nomoa fit for rul. (Acts 5:29, 32) Jehovah tu bae saedem iumi. (Readim Psalm 118:6.) Taem iumi baptaes, datwan mekem iumi kasem staka gud samting wea savve helpem iumi fren gud witim God distaem and long future tu.
Olketa wea Baptaes Bae Garem Christian Famili Raonem World
7-9. (a) Wanem promis nao Jesus talem long olketa wea lusim evri samting and followim hem? (b) Long wanem wei nao promis bilong Jesus long Mark 10:29, 30 kamap tru distaem?
7 Aposol Peter sei long Jesus: “Bat waswe long mifala? Mifala lusim evri samting and followim iu.” (Matt. 19:27) Peter laek savve wanem nao hem and olketa nara disaepol bae kasem long future. Olketa lusim staka samting mekem olketa savve iusim laef bilong olketa for preach abaotem Kingdom. (Matt. 4:18-22) Wanem nao Jesus promisim olketa?
8 Long buk bilong Mark, samting wea Jesus talem showimaot olketa disaepol bae garem Christian famili raonem world. Hem sei: “Eniwan wea lusim haos or olketa brata or sista or mami or dadi or pikinini or olketa garden bikos long mi and bikos long datfala gud nius bae kasem bak staka samting distaem winim wanem olketa lusim. Bae olketa kasem olketa haos and olketa brata and sista and mami and pikinini and olketa garden, and tu, pipol bae spoelem olketa. Then long world wea bae kam, bae olketa kasem laef olowe.” (Mark 10:29, 30) Olsem Jesus promisim, olketa Christian long first century olsem Lydia, Aquila, Priscilla, and Gaius, olketa provaedem “haos” for olketa brata stap long hem and olketa kamap “olketa brata and sista and mami” bilong olketa tu.—Acts 16:14, 15; 18:2-4; 3 John 1, 5-8.
9 Samting wea Jesus talem barava kamap tru distaem. “Olketa garden” wea olketa follower bilong Jesus lusim hem minim waka wea olketa duim for kasem selen. Staka missionary, Bethelite, international servant, and narawan willing for lusim diswan mekem olketa savve duim samfala samting moa for helpem Kingdom waka kamap big long olketa nara kantri. Staka brata and sista lusim hom bilong olketa mekem olketa savve garem simpol laef. Iumi hapi for herem experience bilong olketa hao Jehovah lukaftarem olketa and hao samting wea olketa duim for Jehovah hem mekem olketa hapi. (Acts 20:35) Nara samting tu, evriwan wea baptaes wea insaed long Christian famili raonem world savve kasem gud samting taem olketa mekem ‘kingdom and olketa samting wea God sei hem stret hem first samting long laef bilong olketa.’—Matt. 6:33.
Stap Long “Sef Ples” Bilong God
10, 11. Wanem nao “sef ples bilong Barava Haefala God,” and hao nao iumi savve stap long there?
10 Nara blessing wea iumi kasem taem iumi dedicate and baptaes hem privilege for stap long “sef ples bilong Barava Haefala God.” (Readim Psalm 91:1.) Hem wanfala tokpiksa ples wea Jehovah protectim iumi from eni samting wea savve spoelem wei wea iumi fren witim hem. Pipol wea no ting long samting olsem God ting long hem and wea no trustim hem, olketa no savve long disfala “sef ples.” Taem iumi duim samting followim wanem iumi promisim and barava trustim Jehovah, hem olsem iumi sei long hem: “Iu nao sef ples and iu nao strongim mi. Iu nao God bilong mi wea mi trustim.” (Ps. 91:2) Jehovah God hem kamap sef ples bilong iumi. (Ps. 91:9) No eni ples hem sef winim disfala sef ples bilong Jehovah!
11 Sapos iumi stap long “sef ples” bilong Jehovah datwan showimaot iumi fren gud witim Jehovah tu. Disfala wei for fren gud witim Jehovah hem start taem iumi dedicate long hem and baptaes. Bihaen iumi baptaes, iumi savve gohed fren gud witim God long wei for studyim Bible, prea long hem, and barava obeyim hem. (Jas. 4:8) Jesus nao barava fren gud witim Jehovah winim eni nara man, and hem evritaem trustim Jehovah. (John 8:29) So gohed for trustim Jehovah bikos hem laek helpem iumi for duim wanem iumi promisim and hem fit for helpem iumi tu. (Eccl. 5:4) Olketa samting wea God givim for helpem iumi fren gud witim hem showimaot hem lovem iumi tumas and hem laekem iumi for gohed worshipim hem.
Tinghae Long Spiritual Paradaes
12, 13. (a) Wanem nao disfala spiritual paradaes? (b) Wanem nao maet iumi savve duim for helpem olketa niu wan?
12 Taem iumi dedicate and baptaes, diswan mekem iumi tu for stap long spiritual paradaes. Disfala spiritual paradaes hem wei wea iumi stap gud witim olketa Christian brata and sista and fren gud witim Jehovah God. Diswan hem spesol samting. (Ps. 29:11; Isa. 54:13) No eni samting long world hem olsem disfala spiritual paradaes wea iumi stap insaed. Iumi barava luksavve long diswan taem iumi lukim olketa brata and sista from olketa difren kantri, languis, and kastom hipap tugeta long olketa international convention. Olketa stap gud tugeta, garem wan mind, and lovem narawan.
13 Spiritual paradaes wea iumi stap long hem, hem difren from world distaem wea barava nogud. (Readim Isaiah 65:13, 14.) Taem iumi talemaot message abaotem Kingdom, iumi garem privilege for helpem narawan for kam insaed long disfala spiritual paradaes. Hem privilege tu for helpem olketa niu wan long kongregeson wea savve kasem gud samting taem iumi trainim olketa long ministry. Maet olketa elder markem iumi for helpem olketa niu wan, olsem Aquila and Priscilla “helpem [Apollos] for minim gud moa teaching bilong God.”—Acts 18:24-26.
Gohed Lane From Example Bilong Jesus
14, 15. Wanem nao olketa gudfala reason why iumi shud gohed lane from example bilong Jesus?
14 Staka gudfala reason stap why iumi shud gohed for lane from example bilong Jesus. Bifor Jesus kam long earth, hem waka witim Dadi bilong hem for staka thousand year. (Prov. 8:22, 30) Hem savve best samting for man chusim nao hem for worshipim God and storyim olketa tru samting long Bible long narawan. (John 18:37) Jesus savve sapos man chus for duim difren samting, datwan bae showimaot hem tingim hemseleva nomoa and hem bae no kasem gud samting for olowe. Jesus savve taem hem kam long earth, pipol bae spoelem hem and killim hem dae. (Matt. 20:18, 19; Heb. 4:15) From Jesus showimaot example for iumi, hem lanem iumi hao for gohed faithful long God.
15 No longtaem bihaen Jesus baptaes, Satan traem hem bikos hem laekem Jesus for lusim best samting wea hem chusim, bat hem nating savve mekem Jesus for no faithful long God. (Matt. 4:1-11) Diswan helpem iumi for luksavve nomata wanem Satan duim, iumi savve gohed faithful long God. Satan bae laek traem olketa wea laek for baptaes or olketa wea just baptaes. (1 Pet. 5:8) Maet olketa long famili bilong iumi againstim iumi bikos olketa herem olketa laea story abaotem Olketa Jehovah’s Witness and tingse samting wea olketa duim hem for protectim iumi. Olketa test olsem savve mekem iumi showimaot olketa gudfala wei, olsem for respectim narawan and no tok raf taem iumi ansarem olketa kwestin bilong olketa and taem iumi preach long olketa. (1 Pet. 3:15) So olketa samting hia savve mekem olketa wea lisin long iumi kasem gud samting.—1 Tim. 4:16.
Barava Followim Best Samting wea Iu Chusim!
16, 17. (a) Wanem thrifala samting nao savve mekem iumi kasem laef olowe wea Deuteronomy 30:19, 20 storyim? (b) Wanem nao Jesus, John, and Paul talem wea mekhae long wanem Moses talem?
16 Samting olsem 1,500 year bifor Jesus kam long earth, Moses encouragem olketa Israelite for chusim best samting wea bae helpem olketa long datfala taem. Hem sei: “Tuday mi askem skae and earth for olsem witness front long iufala, mekem iufala savve chusim laef or chusim dae. Sapos iufala chusim laef, iufala bae kasem gud samting. Sapos iufala chusim dae, bae iufala kasem nogud samting. So iufala mas chusim laef mekem iufala and olketa pikinini bilong iufala savve gohed laef. Iufala mas lovem God bilong iufala Jehovah, lisin long hem, and barava followim hem.” (Deut. 30:19, 20) Gogo olketa Israelite no faithful long God. Nomata olsem, iumi savve followim yet thrifala samting wea Moses talem wea savve mekem iumi kasem laef olowe. Jesus and olketa narawan talem moa thrifala samting hia.
17 First samting, ‘iumi mas lovem God bilong iumi Jehovah.’ Iumi showimaot iumi lovem God taem iumi followim olketa stretfala wei bilong hem. (Matt. 22:37) Mek-tu samting, ‘iumi mas lisin long Jehovah’ long wei for studyim Bible and obeyim olketa law bilong hem. (1 John 5:3) Hem minim iumi mas go evritaem long olketa meeting, bikos hem nao ples wea iumi savve herem wanem Bible talem. (Heb. 10:23-25) Mek-thri samting, ‘iumi mas barava followim Jehovah.’ Nomata wanem samting nao kasem iumi, iumi mas evritaem showimaot faith long God and followim Son bilong hem.—2 Cor. 4:16-18.
18. (a) The Watch Tower long 1914 hem talem wanem samting abaotem truth long datfala taem? (b) Iumi shud ting hao long wei wea iumi minim olketa scripture distaem?
18 Iumi kasem staka gud samting from iumi followim olketa tru samting long Bible! Long 1914, The Watch Tower storyim disfala important samting: “Iumi hapi and kasem gud samting, iaman? God bilong iumi hem faithful, iaman? Sapos eniwan savve long samting wea gud winim diswan, letem hem followim datwan. Sapos eniwan long iufala faendem eni samting wea gud winim diswan, mifala laekem iufala for talem mifala tu. Iumi no savve long eni samting wea gud winim wanem iumi lanem long Bible . . . Iumi no savve talem eni samting nao abaotem wei wea stretfala savve abaotem tru God mekem iumi stap gud tugeta, hapi, and kasem blessing. Samting wea iumi lanem abaotem wisdom bilong God, wei wea hem evritaem duim stret samting, paoa bilong hem, and love bilong hem barava mekem iumi satisfae. No eni samting moa iumi need for lukaotem. Iumi laek for gohed lane abaotem God bilong iumi nomoa.” (The Watch Tower, December 15, 1914, page 377-378) Iumi tu tinghae long tru samting wea iumi lanem and wei wea iumi barava minim gud olketa scripture. Tru tumas, iumi distaem shud barava hapi from iumi “followim laet wea Jehovah showim long iumi.”—Isa. 2:5; Ps. 43:3; Prov. 4:18.
19. Sapos man fit for baptaes, why nao hem shud duim datwan kwiktaem?
19 Sapos iu laek for “followim laet wea Jehovah showim long iumi” bat iu no dedicate long God and no baptaes yet, duim samting distaem. Trae hard for followim olketa samting long Bible wea bae mekem iu fit for baptaes. Tingim hao wei for baptaes hem spesol wei wea iu savve showimaot long God and long Christ hao iu tinghae long wanem tufala duim. Givim laef bilong iu long Jehovah from hem nao barava spesol samting wea iu savve givim long hem. Followim example bilong Jesus for showimaot long God iu laek for duim wanem hem laekem. (2 Cor. 5:14, 15) Datwan nao best samting wea iu savve chusim!
Wanem Nao Ansa Bilong Iu?
• Taem iumi baptaes, wanem nao datwan showimaot?
• Wanem nao olketa gud samting wea iumi kasem taem iumi dedicate and baptaes?
• Why nao hem barava important for lane from example bilong Jesus?
v• Wanem nao bae helpem iumi for barava followim best samting wea iumi chusim?
[Piksa long page 25]
Taem iu baptaes, iu showimaot iu chusim best samting
[Piksa long page 26]
Waswe, iu stap long ‘sef ples bilong God’?