Taem Iumi Showimaot Respect, Diswan Mekhae Long Jehovah
“Evri samting wea [Jehovah] duim hem mekhae long hem.”—PS. 111:3.
1, 2. Wanem nao olketa kwestin wea iumi bae storyim long disfala study?
HEM fitim for pipol respectim God bikos Bible hem sei ‘God hem duim samting wea nambawan.’ (Ps. 104:1) Aposol Paul talem pipol savve respectim man tu sapos hem duim samting wea showimaot respect. Hem sei olsem abaotem lukluk bilong olketa Christian woman: “Olketa woman mas werem kaleko wea showimaot respect and wea no ova tumas. And olketa mas no staelem tumas hair bilong olketa or werem staka gold or pearl or kaleko wea kostim big selen.” (1 Tim. 2:9) Bat for iumi “mekhae” long Jehovah, iumi no tingim lukluk bilong iumi nomoa bat iumi mas duim samfala nara samting tu wea showimaot respect.—Ps. 111:3.
2 Jehovah nomoa hem fitim for iumi barava mekhae long hem winim eni nara man. From iumi pipol wea dedicate long hem, toktok and samting wea iumi duim mas showimaot iumi respectim hem. Bat wanem nao mekem iumi man savve fit for showimaot respect? Wanem nao olketa samting wea showimaot Jehovah hem nambawan? From iumi savve God hem nambawan, datwan shud mekem iumi duim wanem? From Jesus Christ tu hem man wea showimaot respect, wanem nao iumi savve lanem from hem? And wanem nao iumi savve duim for showimaot respect?
Wanem Nao Mekem Iumi Savve Fit for Showimaot Respect?
3, 4. (a) From Jehovah tinghae long iumi, wanem nao iumi mas duim? (b) Profesi long Psalm 8:5-9 hem piksarem hu? (Lukim footnote.) (c) Olketa hu nao Jehovah tinghae long olketa long bifor?
3 From God wakem iumi man for garem olketa semkaen fasin olsem hem, dastawe iumi savve fit for showimaot respect. Taem Jehovah talem Adam for lukaftarem earth, datwan showimaot Jehovah tinghae long hem. (Gen. 1:26, 27) Bihaen Adam hem sin, Jehovah talem moa hem waka bilong olketa man for lukaftarem earth. Datwan showimaot God hem tinghae yet long olketa man. (Readim Psalm 8:5-9.)a From Jehovah tinghae long iumi man, iumi tu mas respectim hem long wei for mekhae long nambawan nem bilong hem.
4 Jehovah hem barava tinghae long pipol wea worshipim hem. From Abel givim sakrifaes wea God hapi long hem, God hem tinghae long Abel, bat hem no hapi long sakrifaes wea Cain givim. (Gen. 4:4, 5) Jehovah talem Moses for talem olketa Israelite for ‘trustim’ Joshua bikos hem nao bae changem Moses for leadim olketa. (Num. 27:20) Bible sei olsem abaotem Solomon: “Jehovah mekem Solomon kamap nambawan front long evri Israelite. And hem mekem hem hae winim evri nara king long Israel wea rul firstaem long hem.” (1 Chron. 29:25) God bae mekhae long olketa anointed Christian wea resurrect. Olketa hia faithful for talemaot “hao rul bilong [God] hem nambawan.” (Ps. 145:11-13) From olketa “nara sheepsheep” bilong Jesus praisem Jehovah, Jehovah tinghae long spesol waka wea olketa duim tu.—John 10:16.
Olketa Samting wea Showimaot Jehovah Hem Nambawan
5. Wanem nao mekem Jehovah hem barava nambawan?
5 David hem storyim God hem barava hae winim olketa man. Hem sei: “Lord bilong mifala Jehovah, nem bilong iu barava nambawan long full earth. Skae hem barava praisem iu!” (Ps. 8:1) From bifor kam taem Jehovah no wakem yet “skae and earth” go kasem taem wea God bae mekem earth kamap paradaes and evri man no sin nao, and for olowe, Jehovah God nao hem Nambawan man long universe wea iumi mas respectim.—Gen. 1:1; 1 Cor. 15:24-28; Rev. 21:1-5.
6. Why nao man wea raetem psalm hem sei Jehovah hem nambawan?
6 Taem man wea raetem psalm hem lukim staka star long skae, datwan mekem hem barava tinghae long God. Hem sapraes taem hem lukim hao ‘skae hem olsem wanfala tent’ wea luk naes tumas, and hem sei Jehovah hem nambawan from hem savve tumas for wakem olketa samting. (Readim Psalm 104:1, 2.) Olketa samting wea Jehovah wakem wea iumi savve lukim olketa barava mekhae long hem nomata iumi no savve lukim hem.
7, 8. Wanem nao Jehovah wakem wea showimaot hem nambawan?
7 Tingim Milky Way galaxy wea earth bilong iumi hem stap insaed. Hem garem staka star, planet, and olketa solar system. Taem iumi markem earth bilong iumi witim evri samting hia, hem barava smol olsem pis sand nomoa. Disfala Milky Way galaxy hem garem winim 100 billion star! Hem bae tekem staka year sapos iu laek kaontem evri star hia.
8 Sapos Milky Way galaxy nomoa garem 100 billion star, waswe long olketa nara galaxy long universe? Haomas star nao stap long universe? Namba bilong olketa hem barava narawe nao. Nomata olsem, Jehovah “hem kaontem evri star, and hem savve long nem bilong evriwan.” (Ps. 147:4) Taem iu lukim olketa nambawan samting wea Jehovah wakem, waswe, diswan mekem iu barava laek for mekhae long nambawan nem bilong hem?
9, 10. Wanem samting abaotem bred nao showimaot Jehovah garem bigfala savve?
9 Distaem bae iumi story abaotem wanfala samting wea iumi evriwan savve kaikaim, wea hem nao bred. Nomata Jehovah nao “wakem skae and earth” hem givim tu “kaikai long olketa wea hangre.” (Ps. 146:6, 7) Olketa samting wea Jehovah wakem hem nambawan. Wanfala nao hem olketa plant wea seed bilong olketa iumi savve wakem bred long hem. (Readim Psalm 111:1-5.) Bred nao hem main kaikai bilong staka pipol long bifor, olsem olketa Israelite. Nomata maet pipol no ting long bred olsem spesol kaikai, wei wea yeast hem mekem flour for rise hem wanfala barava spesol samting.
10 Long bifor, olketa Israelite savve wakem bred from flour wea kam from wheat or barley and olketa mixim datwan witim wata. Samfala taem olketa mixim yeast insaed tu. Taem iumi mixim flour, wata, and yeast, barava spesol samting nao happen. Iumi no savve minim gud tu wanem nao mekem olketa samting hia kamap bred taem iumi mixim olketa tugeta olsem. And hem spesol tu taem olketa samting insaed bele bilong iumi savve smasem bred wea iumi kaikaim. Dastawe man wea raetem psalm hem sei: “Jehovah, iu wakem staka samting tumas! Evri samting wea iu wakem showimaot iu garem bigfala savve”! (Ps. 104:24) Waswe, iu tu laek praisem Jehovah olsem?
From Iu Savve God Hem Nambawan, Datwan Shud Mekem Iu Duim Wanem?
11, 12. Taem iumi ting raonem olketa samting wea God wakem, wanem gud samting nao bae iumi kasem?
11 Nomata iumi no wanfala savveman wea minim gud gogo bilong olketa samting long skae or wei wea flour hem rise, iumi savve olketa samting hia spesol. Bat for iumi tinghae long wei wea Creator hem barava nambawan, iumi mas ting raonem olketa samting wea hem wakem. Sapos iumi ting raonem olketa samting hia, wanem gud samting nao bae iumi savve kasem? For ansarem diswan, iumi mas ting raonem narafala samting wea Jehovah hem duim.
12 David hem sei olsem abaotem olketa nambawan samting wea Jehovah duim for helpem pipol bilong Hem: “Evritaem bae mi tingting strong long paoa bilong iu and olketa nambawan samting wea iu duim.” (Ps. 145:5) Sapos iumi studyim Bible and ting raonem, datwan showimaot iumi tinghae long olketa samting wea God duim for helpem pipol bilong hem. Wanem gud samting nao bae iumi kasem from diswan? Bae iumi tinghae go moa long God from hem nambawan. Olsem David, bae iumi tu mekhae long Jehovah and talem disfala toktok: “Mi bae talemaot long pipol olketa nambawan samting wea iu duim.” (Ps. 145:6) Taem iumi ting raonem olketa nambawan samting wea God duim, bae iumi fren gud go moa witim hem and bae iumi laek tumas for storyim hem long nara pipol. Waswe, iu gohed strong for preachim gud nius and helpem pipol for tinghae long olketa nambawan samting wea Jehovah God duim?
Jesus Barava Showimaot God Hem Nambawan
13. (a) Wanem nao Jehovah givim long Son bilong hem wea Daniel 7:13, 14 storyim? (b) Jesus hem wanem kaen King?
13 Jesus Christ gohed strong for preachim gud nius and hem mekhae tu long nambawan Dadi bilong hem long heven. Jehovah tinghae long spesol Son bilong hem taem hem mekem hem ‘kamap King long kingdom’ bilong hem. (Readim Daniel 7:13, 14.) Nomata olsem, Jesus no bighed. Bat hem King wea kaen tumas and hem luksavve wanem iumi fit for duim and no fit for duim. Hem tinghae long iumi tu. Tingim samting wea Jesus duim taem hem kasem pipol wea olketa nara man ting daonem olketa.
14. Long Israel bifor, wanem nao tingting bilong pipol long man wea garem leprosy?
14 Long bifor, pipol wea garem leprosy olketa savve safa longtaem bifor olketa dae. Sik hia savve isisi kaikaim body bilong man. Long tingting bilong pipol, man wea garem leprosy hem hard for gud bak nao olsem man wea dae finis hem hard for laef bak tu. (Num. 12:12; 2 Ki. 5:7, 14) Pipol sei man wea garem leprosy hem no klin, dastawe olketa heitim hem and raosem hem from community. Sapos man wea garem leprosy hem wakabaot long road and hem lukim pipol, hem mas singaot olsem: “Mi no klin, mi no klin!” (Lev. 13:43-46) Pipol ting long man wea garem leprosy olsem hem man wea dae finis. Record bilong olketa Jew talem hao sapos man wea garem leprosy hem go pas long eni man long road, hem mas stap samting olsem 1.7 meter from man hia. Olketa sei wantaem wanfala bigman bilong religion hem sutim ston long wanfala man wea garem leprosy nomata hem farawe yet, bikos hem no laekem man hia for kam klosap long hem.
15. Wanem nao Jesus duim long wanfala man wea garem leprosy?
15 Bat tingim samting wea Jesus duim taem wanfala man wea garem leprosy barava askem Jesus for healim hem. (Readim Mark 1:40-42.) Jesus no raosem datfala man olsem hao olketa nara man savve duim, bat hem kaen long hem and tingim hem. Jesus luksavve datfala man barava laekem samwan for helpem hem. From Jesus barava feel sorre long datfala man, hem kwiktaem duim samting. Hem tasim datfala man and healim hem.
16. Wanem nao iu lanem from wei wea Jesus tingim pipol?
16 From iumi olketa Christian, wanem nao iumi savve duim for mekhae long Jehovah olsem Jesus? Iumi mas tinghae long evri man and respectim olketa, nomata olketa garem sik, olketa young or olo, or olketa bigman or man nating. (1 Pet. 2:17) Olketa hasband, dadi and mami, and olketa elder long kongregeson mas respectim olketa wea olketa lukaftarem. Datwan bae helpem olketa hia wea olketa lukaftarem for no ting daonem olketa seleva. Bible hem talem for evri Christian mas duim diswan. Hem sei: “Iufala mas lovem iufala evriwan, olsem olketa brata. Iufala mas tinghae long olketa nara man winim iufala seleva.”—Rom. 12:10.
Respectim Jehovah Taem Iumi Worshipim Hem
17. Wanem nao Bible talem wea showimaot iumi mas respectim Jehovah taem iumi worshipim hem?
17 Iumi mas barava respectim Jehovah taem iumi worshipim hem. Ecclesiastes 5:1 hem sei: “Taem iu go long haos bilong trufala God, iu mas lukluk gud long wei bilong iu.” Moses and Joshua mas aotem shoe bilong olketa taem olketa standap long ples wea holy. (Ex. 3:5; Josh. 5:15) Olketa duim datwan for showimaot respect. Olketa priest long Israel tu mas werem andapants ‘for kavarem private part’ bilong olketa. (Ex. 28:42, 43) Diswan hem for pipol no lukim private part bilong olketa taem olketa duim sakrifaes long altar. Evriwan long famili bilong olketa priest tu mas werem kaleko wea showimaot respect.
18. Hao nao iumi savve showimaot respect long worship bilong iumi?
18 From iumi pipol wea worshipim Jehovah, iumi mas showimaot respect long evri samting wea iumi duim long laef bilong iumi. Sapos iumi laekem pipol for respectim iumi, iumi tu mas respectim olketa. Iumi no duim diswan for olketa man lukim nomoa, bat iumi duim from heart bilong iumi bikos hem nao wanem Jehovah lukluk long hem. (1 Sam. 16:7; Prov. 21:2) Iumi showimaot respect long wei bilong iumi, tingting bilong iumi, hao iumi stap witim nara pipol, and hao iumi ting long iumiseleva tu. Tru tumas, taem iumi toktok or duim eni samting, iumi mas showimaot respect. Iumi laek followim toktok wea aposol Paul talem abaotem wei and lukluk bilong olketa tru Christian, taem hem sei: “Iumi no laek duim eni samting wea savve spoelem tingting bilong eniwan, bikos iumi no laekem eni man for tok spoelem waka wea iumi duim. Bat long evri samting wea iumi duim, iumi showimaot iumi olketa wakman bilong God.” (2 Cor. 6:3, 4) ‘Long evri samting wea iumi duim, iumi mekhae long teaching bilong God wea sevem iumi.’—Titus 2:10.
Showimaot Respect Evritaem
19, 20. (a) Wanem nao iumi savve duim for showimaot iumi tinghae long pipol? (b) Wanem nao iumi laek for duim evritaem?
19 Olketa anointed Christian wea “stand for Christ,” olketa showimaot respect. (2 Cor. 5:20) Olketa “nara sheepsheep” wea faithful for sapotim olketa anointed Christian hia, olketa talemaot message abaotem datfala Messiah Kingdom. Eni man wea stand for gavman long kantri bilong hem bae hem no fraet for sapotim datfala gavman. Dastawe iumi tu mas no fraet for sapotim gavman bilong God, wea hem nao datfala Kingdom. (Eph. 6:19, 20) And taem iumi talemaot “gud nius abaotem gudfala samting” long pipol, datwan showimaot iumi tinghae long olketa.—Isa. 52:7.
20 Taem iumi showimaot respect, datwan bae mekhae long God. (1 Pet. 2:12) Iumi mas evritaem showimaot respect long God, long taem wea iumi worshipim hem, and long olketa nara brata and sista tu. And Jehovah bae hapi tumas taem iumi showimaot respect long worship bilong iumi from hem nao God wea nambawan.
[Footnote]
a Olketa samting wea David talem long mek-8 Psalm hem piksarem tu Jesus Christ wea no born sin.—Heb. 2:5-9.
Wanem Nao Ansa Bilong Iu?
• Taem iumi tinghae long wei wea Jehovah hem barava nambawan, datwan shud mekem iumi duim wanem?
• Wanem nao iumi lanem from samting wea Jesus duim long man wea garem leprosy?
• Wanem nao samfala samting wea iumi savve duim for showimaot iumi respectim Jehovah?
[Piksa long page 12]
Wanem nao Jehovah duim wea showimaot hem tinghae long Abel?
[Piksa long page 14]
Wanfala nambawan samting wea Jehovah wakem nao hem bred
[Piksa long page 15]
Wanem nao iumi lanem from samting wea Jesus duim long man wea garem leprosy?
[Piksa long page 16]
Taem iumi worshipim Jehovah, iumi mas showimaot respect