Go for Preach Long Galilee

Datfala first day wea Jesus and fofala disaepol bilong hem stap long Capernaum olketa barava busy. Long evening, pipol long Capernaum tekem kam olketa wea sik for Jesus healim olketa. No enitaem Jesus stap seleva.

Long next morning, taem hem dark yet, Jesus hem wekap and go aotsaed. Hem go long wanfala ples wea kwaet, wea hem savve prea long Dadi bilong hem. Bat hem stap seleva for shortfala taem nomoa. Taem “Simon and olketa wea go witim hem” luksavve Jesus no stap, olketa go “lukaotem hem.” Maet Simon Peter nao leadim olketa bikos Jesus hem stap long haos bilong hem.—Mark 1:36; Luke 4:38.

Taem olketa faendem Jesus, Peter hem sei: “Evriwan lukaotem iu ia.” (Mark 1:37) Pipol long Capernaum laekem Jesus for gohed stap witim olketa. Olketa barava tinghae long wanem hem duim, so “olketa trae stopem hem for no lusim olketa.” (Luke 4:42) Bat waswe, Jesus kam long earth for duim olketa mirakol nomoa? And bae hem duim waka bilong hem long datfala area nomoa? Wanem nao hem sei?

Jesus sei long olketa disaepol: “Iumi go long olketa nara taon klosap, mekem mi savve preach long there tu, bikos hem nao wanem mi kam for duim.” Hem sei tu long pipol wea laekem hem for stap witim olketa: “Mi mas talemaot gud nius abaotem Kingdom bilong God long olketa nara taon tu, bikos hem nao why God sendem mi kam.”—Mark 1:38; Luke 4:43.

Datwan showimaot wanfala main reason why Jesus kam long earth hem for preach abaotem Kingdom bilong God. Datfala Kingdom bae mekhae long nem bilong Dadi bilong hem, and stretem evri nogud samting wea kasem olketa man. Olketa mirakol wea Jesus duim pruvim God nao sendem hem kam. Staka handred year bifor, Moses tu duim olketa nambawan samting for pruvim God nao sendem hem.—Exodus 4:1-9, 30, 31.

So Jesus lusim Capernaum for go preach long olketa nara taon, and fofala disaepol bilong hem go witim hem. Fofala hia nao hem Peter and brata bilong hem Andrew, witim John and brata bilong hem James. Long week bifor nomoa Jesus askem olketa for gogo witim hem.

Preaching waka wea Jesus duim long Galilee witim fofala disaepol hem nambawan! “Evriwea long Syria,” wea insaed diswan hem tenfala taon wea olketa kolem Decapolis go kasem narasaed long Jordan River, “pipol herem nius abaotem samting wea hem duim.” (Matthew 4:24, 25) Staka pipol from olketa ples hia, and long Judea tu, go followim Jesus and olketa disaepol bilong hem. Olketa tekem kam long hem olketa wea sik. Jesus duim wanem olketa laekem. Hem healim olketa wea sik and raosem demon from samfala tu.