Kwestin From Reader
Taem Jesus talem olketa follower bilong hem for ‘give and no hope for kasem bak extra selen (interest) for selen wea narawan tekem,’ waswe, hem minim olketa mas no askem bak full selen wea olketa givim?
Hem gud for tingim Law Bilong Moses for minim toktok bilong Jesus wea stap long Luke 6:35. Long there God givim komand long olketa Israelite for givim selen olsem kaon long nara Israelite wea kasem problem saed long selen and wea needim help. (Exodus 22:25; Leviticus 25:35-37; Matthew 5:42) Taem olketa duim diswan olketa mas no ask for extra selen for selen wea olketa givim mekem olketa savve kasem profit. Bat, disfala selen hem for helpem eniwan wea garem need or kasem bigfala trabol. Olsem iumi savve, wei for mek selen long taem wea neiba kasem hard taem saed long selen, hem no showimaot love. Nomata olsem, hem no rong for man wea givim selen for askem bak full selen wea hem givim, or for tekem datfala samting wea man wea kaon hem promis for givim sapos hem fail for peim bak kaon.—Deuteronomy 15:7, 8.
Jesus hem sapotim Law and hem storyim go moa taem hem sei man wea givim help mas no hope bae hem “kasem bak eni samting.” Olsem olketa Israelite, samfala taem olketa Christian safa from hard taem saed long selen or samfala nara samting wea savve mekem olketa no garem wanem olketa needim. Sapos wanfala Christian brata kasem hard taem olsem and hem ask for help, waswe, fitim for man helpem hem? Ia, trufala love bae muvim wanfala Christian for laek helpem wanfala brata wea kasem hard taem saed long selen from no hemseleva nao kosim disfala problem. (Proverbs 3:27) Maet iu savve givim help long brata wea garem need, nomata sapos selen wea iu givim maet no big olsem selen wea hem savve kasem from iu olsem kaon.—Psalm 37:21.
Long first century C.E, aposol Paul and Barnabas kasem waka for tekem olketa donation from olketa Christian long Asia Minor for go long olketa brata long Judea, wea short long kaikai. (Acts 11:28-30) Distaem tu, taem disaster kamap, olketa Christian savve sendem olketa present long olketa brata bilong olketa wea garem need. Taem olketa duim olsem, hem mekem nara pipol praisem God. (Matthew 5:16) Man wea willing for give need for ting raonem tingting and samting wea kasem diswan wea ask for help. Why nao hem garem need? Hem important for tingim olketa toktok bilong Paul hia: “Sapos eniwan no laek for waka, no letem hem kaikai.”—2 Thessalonians 3:10.
Sapos wanfala brata no barava garem need bat hem ask for kaonem selen for helpem hem for lelebet taem, maet hem olraet for givim hem selen wea bae iu no ask for extra selen for selen wea iu givim. Long taem olsem, sapos man wea kaonem selen hem garem tingting for peim bak full kaon hia, diswan no againstim toktok bilong Jesus wea stap long Luke 6: 35. Mas raetem wanfala agreement, and man wea kaon mas trae hard evritaem for peim bak kaon followim wanem tufala agree long hem. For tok stret, Christian love shud muvim man wea kaonem selen for peim bak selen hia long sem wei wea love nao muvim narawan for givim selen.
Man wea tingting for givim selen (or givim present) mas lukluk gud tu long need bilong famili bilong hemseleva. Olsem example, waswe, diswan bae affectim wei wea hem fit for provaedem need bilong famili bilong hem olsem Bible encouragem man for duim? (2 Corinthians 8:12; 1 Timothy 5:8) Nomata olsem, olketa Christian luk aotem chance for showimaot love long narawan long wei wea fitim olketa Bible principle.—James 1:27; 1 John 3:18; 4:7-11.