Hem Nao Wakaman wea Jehovah Hapi Long Hem!
“Olketa! Hem nao wakaman bilong mi . . . wea mi hapi long hem!”—ISA. 42:1.
1. From Memorial hem klosap nao, wanem nao hem gud for iumi tingting strong long hem, and why nao olsem?
FROM Memorial hem klosap nao, hem gud for iumi tingting strong long wanem aposol Paul talem. Hem sei: “Lukluk gud long Jesus, datfala Main Leader and Man wea mekem faith bilong iumi kamap perfect.” Paul sei moa: “Tru tumas, tingting strong long datfala man wea gohed strong nomata olketa sinner barava tok nogud long hem wea datwan spoelem olketa seleva nomoa, mekem iufala no kamap taed and no wikdaon.” (Heb. 12:2, 3) Sapos olketa anointed Christian and olketa nara sheepsheep tingting strong long wei wea Jesus faithful and dae for olketa man, datwan bae helpem olketa for gohed worshipim Jehovah and “no wikdaon.”—Markem witim Galatians 6:9.
2. Wanem nao iumi savve lanem from olketa profesi wea Isaiah talem abaotem Son bilong God?
2 Jehovah iusim profet Isaiah for talem olketa profesi abaotem Son bilong hem. Olketa profesi hia bae helpem iumi for “lukluk gud long Jesus, datfala Main Leader and Man wea mekem faith bilong iumi kamap perfect.”a Olketa profesi talem olketa samting abaotem wei bilong Jesus, olketa nogud samting wea bae kasem hem, hao hem dae for iumi, and kamap King. Olketa profesi hia bae helpem iumi for minim gud Memorial wea bae kamap long Thursday, April 9, bihaen sun go daon.
Bible Showimaot Hu Nao Datfala Wakaman
3, 4. (a) Long buk bilong Isaiah, hu nao datfala “wakaman”? (b) Wanem nao olketa nara scripture wea showimaot Jesus nao datfala Wakaman long Isaiah chapter 42, 49, 50, 52, and 53?
3 Datfala word “wakaman” hem stap long staka scripture long buk bilong Isaiah. Long samfala scripture hia, datfala wakaman nao hem profet Isaiah. (Isa. 20:3; 44:26) Samfala taem hem minim nation bilong Israel, wea nara nem bilong hem Jacob. (Isa. 41:8, 9; 44:1, 2, 21) Bat hu nao disfala Wakaman wea olketa nambawan profesi long Isaiah chapter 42, 49, 50, 52, and 53 storyim? Christian Greek Scripture showimaot klia hu nao datfala Wakaman bilong Jehovah wea olketa chapter hia storyim. Buk bilong Acts story abaotem taem wea wanfala bigman long Ethiopia hem readim wanfala profesi hia taem holy spirit leadim Philip for go lukim hem. Bihaen datfala bigman hem readim Isaiah 53:7, 8, hem askem Philip: “Plis, iu talem mi, Hu nao disfala profet tok abaotem? Hem tok abaotem hemseleva or hem tok abaotem nara man?” Philip no weit moa bat hem talem datfala man hao datfala Wakaman wea Isaiah story abaotem, hem nao Messiah, Jesus.—Acts 8:26-35.
4 Taem Jesus baby yet, holy spirit mekem datfala raeteous man Simeon for talem hao “Jesus” bae kamap “laet for mekem olketa wea no Jew savve lukim samting.” Isaiah 42:6 and 49:6 nao talem profesi abaotem diswan. (Luke 2:25-32) Profesi long Isaiah 50:6-9 talem tu hao olketa man bae barava spoelem Jesus long naet wea olketa kotem hem. (Matt. 26:67; Luke 22:63) Bihaen Pentecost 33 C.E., aposol Peter talem stret hao Jesus nao datfala “Wakaman” bilong Jehovah. (Isa. 52:13; 53:11; readim Acts 3:13, 26.) Wanem nao iumi savve lanem from olketa profesi hia wea story abaotem Messiah?
Jehovah Lanem Wakaman Bilong Hem
5. Wanem nao datfala Wakaman lanem?
5 Long wanfala profesi wea Isaiah talem, hem storyim wei wea Jehovah and firstborn Son bilong hem fren gud tugeta taem Son hia stap long heven bifor hem kam long earth. (Readim Isaiah 50:4-9.) Datfala Wakaman tu storyim wei wea Jehovah gohed for lanem hem. Hem sei: “Hem wekapem mi for mi herem samting wea hem bae teachim long mi.” (Isa. 50:4) Long datfala taem wea Wakaman hia stap long heven, hem lisin long Dadi bilong hem Jehovah taem hem lanem hem, and hem kamap wanfala disaepol wea stap anda long hem. Hem spesol samting for datfala Wakaman lane from Man wea wakem universe!
6. Wanem nao datfala Wakaman talem wea showimaot hem barava stap anda long Dadi bilong hem?
6 Long datfala profesi, Wakaman hia storyim hao Dadi bilong hem Jehovah hem “Lord bilong evri samting.” Diswan showimaot hao datfala Wakaman hem luksavve Jehovah nao fit for rulim evri samting. Samting wea hem talem showimaot hem barava stap anda long Dadi bilong hem. Hem sei: “Jehovah wea hem Lord bilong evri samting, hem nao lanem mi. Mi no againstim hem and mi no go followim difren wei.” (Isa. 50:5) Hem ‘stap witim Jehovah and hem wanfala nambawan wakaman’ taem tufala wakem universe and olketa man. Disfala “nambawan wakaman” hem ‘hapi from hem stap witim Jehovah. Hem hapi long earth bilong God from graon bilong hem givim kam plande samting. Bat samting wea Son bilong God laekem tumas nao hem olketa man.’—Prov. 8:22-31.
7. Why nao Jesus savve Dadi bilong hem bae helpem hem taem hem kasem hard taem?
7 From Jesus lanem staka samting from Jehovah and hem lovem tumas olketa man, datwan helpem hem for feisim olketa nogud samting wea kasem hem taem hem stap long earth. Hem hapi evritaem for duim wanem Dadi bilong hem laekem, nomata long taem wea pipol duim nogud samting long hem tu. (Ps. 40:8; Matt. 26:42; John 6:38) Jesus savve Dadi bilong hem hapi long hem and bae helpem hem taem hem kasem hard taem. Jesus fit for talem disfala toktok wea Isaiah talem: “God hem stap klosap long mi and hem talem hao mi stret nomoa. Hu nao bae tok againstim mi? . . . Jehovah wea hem Lord bilong evri samting nao bae helpem mi.” (Isa. 50:8, 9) Jehovah barava helpem disfala faithful Wakaman bilong hem taem hem duim ministry bilong hem, olsem nara profesi bilong Isaiah showimaot.
Ministry wea Datfala Wakaman Duim
8. Wanem nao pruvim Jesus hem man wea Jehovah “chusim” wea Isaiah 42:1 storyim?
8 Bible hem talem wanem nao happen taem Jesus baptaes long 29 C.E. Hem sei: “Holy spirit . . . kam daon long hem, and wanfala toktok from skae hem sei: ‘Iu nao Son bilong mi wea mi barava lovem. Mi hapi tumas long iu.’” (Luke 3:21, 22) Jehovah talemaot klia hu nao man wea hem “chusim,” wea Isaiah story abaotem. (Readim Isaiah 42:1-7.) Taem Jesus duim ministry bilong hem, hem barava duim nao wanem datfala profesi hem storyim. Matthew tu talem datfala toktok wea stap long Isaiah 42:1-4. Hem talem hao Jesus nao datfala man wea Isaiah storyim.—Matt. 12:15-21.
9, 10. (a) Wanem nao Jesus duim olsem Isaiah 42:3 talem? (b) Wanem nao “olketa stretfala samting” wea Jesus duim taem hem stap long earth? Wanem taem nao bae hem “stretem evri samting long earth”?
9 Olketa bigman bilong Jew religion bifor tok daonem pipol. (John 7:47-49) Olketa raf long pipol gogo pipol hia olsem ‘olketa longfala grass wea bend finis’ and olsem ‘wick wea laet bilong hem klosap dae.’ Bat Jesus hem no olsem. Hem kaen long pipol wea poor and olketa wea safa. (Matt. 9:35, 36) Hem tok kaen long olketa and hem talem olketa: “Kam long mi, iufala wea waka hard and wea karem hevi samting, mekem mi savve strongim iufala.” (Matt. 11:28) Jesus “duim stretfala samting” tu. Hem teachim pipol abaotem wanem Jehovah talem hem stret and wanem hem no stret. (Isa. 42:3) Hem storyim tu hao olketa wea followim Law bilong God mas garem gudfala tingting and sorre long pipol. (Matt. 23:23) Jesus duim stretfala samting tu taem hem preach. Hem preach long pipol wea rich and pipol wea poor.—Matt. 11:5; Luke 18:18-23.
10 Isaiah talem tu hao datfala man wea Jehovah “chusim” bae “stretem evri samting long earth.” (Isa. 42:4) Hem King bilong Messiah Kingdom distaem, and klosap nao hem bae finisim evri gavman long disfala world and hem nao bae rulim pipol long stretfala wei. Hem bae mekem niu world kamap, wea “evriwan wea duim stret samting nao bae stap long hem.”—2 Pet. 3:13; Dan. 2:44.
Hem Kamap “Laet” and “Wanfala Agreement”
11. Long wanem wei nao Jesus hem “laet for pipol long olketa difren ples” long first century and long distaem?
11 Jesus duim samting wea Isaiah 42:6 talem. Hem kamap “laet for pipol long olketa difren ples.” Taem hem duim ministry bilong hem, hem preachim gud nius abaotem Kingdom firstaem long olketa Jew. (Matt. 15:24; Acts 3:26) Bat Jesus tok olsem: “Mi nao laet for pipol long disfala world.” (John 8:12) Hem kamap laet for olketa Jew and for nara pipol tu taem hem preachim gud nius abaotem Kingdom long olketa and givim perfect laef bilong hem for evri man. (Matt. 20:28) Bihaen hem laef bak moa, hem talem olketa disaepol bilong hem for preach abaotem hem “go kasem evri farawe ples long earth.” (Acts 1:8) Taem Paul and Barnabas duim ministry bilong olketa, olketa talem datfala toktok “laet for pipol long olketa difren ples.” Olketa sei olketa tu laet for pipol taem olketa preachim gud nius long pipol wea no Jew. (Acts 13:46-48; markem witim Isaiah 49:6.) Olketa anointed Christian and olketa nara sheepsheep gohed yet for duim datfala waka for preachim gud nius. Olketa helpem pipol for garem faith long Jesus, wea hem nao “laet for pipol long olketa difren ples.”
12. Long wanem wei nao Jehovah givim Wakaman bilong hem olsem “wanfala agreement for pipol”?
12 Long datfala sem profesi, Jehovah talem olsem long Wakaman wea hem chusim: “Mi nao bae protectim iu and iu nao bae kamap wanfala agreement for pipol.” (Isa. 42:6) Satan trae hard for killim dae Jesus and for mekem hem no finisim ministry wea hem kam for duim long earth. Bat Jehovah protectim hem go kasem taem wea hem mas dae. (Matt. 2:13; John 7:30) Bihaen datwan, Jehovah mekem Jesus laef bak moa and givim Jesus olsem “wanfala agreement” for pipol long earth. Datfala promis showimaot hao datfala faithful Wakaman bilong God bae gohed shaen olsem “laet for pipol long olketa difren ples,” mekem pipol savve fren gud witim God and no stap long darkness.—Readim Isaiah 49:8, 9.b
13. Long wanem wei nao Jesus sevem “olketa wea sidaon long ples wea hem dark” taem hem duim ministry bilong hem? Waswe long distaem?
13 Olsem datfala promis hem showimaot, Wakaman wea Jehovah chusim bae “mekem eye bilong olketa wea blind for lukluk moa,” “mekem man wea stap long prison wea dark tumas for hem kamap free,” and sevem “olketa wea sidaon long ples wea hem dark.” (Isa. 42:7) Jesus duim diswan taem hem duim ministry bilong hem. Hem preachim gud nius abaotem Kingdom and hem showimaot kastom bilong olketa Jew hem barava no stret. (Matt. 15:3; Luke 8:1) Taem hem duim datwan, hem mekem olketa Jew lusim giaman religion and kamap olketa disaepol bilong hem. (John 8:31, 32) Jesus helpem tu staka million pipol wea no Jew for savve long truth. Hem talem olketa disaepol bilong hem for “go and teachim pipol long evri kantri for kamap disaepol bilong [hem].” Hem talem olketa tu hem bae stap witim olketa “go kasem taem wea world hem gogo for finis.” (Matt. 28:19, 20) Nomata Christ Jesus stap long heven, hem lukaftarem disfala preaching waka wea gohed long full world.
Jehovah Mekem Datfala “Wakaman” Kasem Hae Position
14, 15. Why nao Jehovah givim hae position long Jesus? Long wanem wei nao Jehovah duim datwan?
14 Long nara profesi wea story abaotem disfala Wakaman, Jehovah hem sei: “Wakaman bilong mi bae duim samting wea showimaot hem minim datwan. Hem bae kasem hae position and bae hem kasem position wea barava hae.” (Isa. 52:13) Jehovah givim hae position long Son bilong hem bikos hem stap anda long Dadi bilong hem from hem luksavve Jehovah nao fit for rul and from hem faithful nomata hem kasem barava bigfala test.
15 Aposol Peter tok olsem abaotem Jesus: “Jesus hem go ap long heven and hem sidaon long raet saed bilong God. Olketa angel and olketa wea kasem position and olketa wea kasem paoa mas stap anda long hem.” (1 Pet. 3:22) Aposol Paul tu talem olsem: “Hem hambol and hem obeyim God gogo hem dae taem olketa nilam hem long wanfala post. From diswan nao, God givim wanfala barava hae position long hem and givim hem datfala nem wea hae winim evri nara nem, mekem long nem bilong Jesus evriwan mas nildaon, olketa long heven and long earth and andanit long graon. And evri man mas talemaot hao Jesus Christ hem Lord mekem diswan mekhae long God wea hem Dadi.”—Phil. 2:8-11.
16. Wanem “barava hae position” nao Jesus kasem long 1914? Wanem nao hem duim start kam long datfala taem?
16 Long 1914, Jehovah mekem Jesus “kasem barava hae position.” Jehovah mekem hem King bilong Messiah Kingdom. (Ps. 2:6; Dan. 7:13, 14) Start kam long datfala taem, Christ hem “go midolwan long olketa enemy bilong [hem] and [hem] kasem bigfala paoa ovarem olketa.” (Ps. 110:2) First samting wea hem duim, hem faetem Satan and olketa demon bilong hem and hem torowem olketa kam daon long earth. (Rev. 12:7-12) Bihaen datwan, Jesus duim semkaen samting wea Cyrus duim bifor. Hem mekem olketa anointed Christian kamap free from “Bigfala Babylon.” (Rev. 18:2; Isa. 44:28) Hem leadim tu disfala preaching waka wea gohed evriwea long world. Disfala waka hipimap olketa anointed Christian wea “stap yet” and staka million “nara sheepsheep” wea waka witim disfala “smol sekson bilong olketa sheepsheep.”—Rev. 12:17; John 10:16; Luke 12:32.
17. Wanem nao iumi lanem taem iumi studyim olketa profesi wea Isaiah talem abaotem datfala “wakaman”?
17 Taem iumi studyim olketa nambawan profesi hia long buk bilong Isaiah, datwan mekem iumi tinghae go moa long King bilong iumi, Christ Jesus, wea dae for iumi. From hem stap anda long Dadi bilong hem taem hem duim ministry bilong hem long earth, datwan showimaot hem lanem staka samting from Dadi bilong hem taem hem stap long heven. Hem showimaot hem nao “laet for pipol long olketa difren ples” taem hem duim ministry bilong hem and leadim disfala preaching waka wea gohed kam kasem distaem. Study bihaen bae storyim nara profesi abaotem Wakaman bilong Jehovah. Hem bae storyim hao datfala Wakaman bae safa and dae for iumi. Hem gud for iumi “tingting strong” long olketa samting hia from Memorial hem klosap nao.—Heb. 12:2, 3.
[Olketa Footnote]
a Isaiah 42:1-7; 49:1-12; 50:4-9; and 52:13 go kasem 53:12 nao storyim olketa profesi hia.
b Lukim buk Isaiah’s Prophecy—Light for All Mankind II, page 136-145 wea storyim disfala profesi long Isaiah 49:1-12.
Review
• Hu nao datfala “wakaman” wea olketa profesi long Isaiah storyim, and hao nao iumi savve?
• Wanem nao datfala Wakaman lanem from Jehovah?
• Long wanem wei nao Jesus hem “laet for pipol long olketa difren ples”?
• Long wanem wei nao Jehovah givim hae position long datfala Wakaman?
[Piksa long page 21]
Philip talemaot hao “wakaman” wea Isaiah storyim nao hem Jesus, datfala Messiah
[Piksa long page 23]
Jesus kaen long pipol wea poor and olketa wea safa
[Piksa long page 24]
Jehovah mekem Jesus kasem hae position and mekem hem King long Messiah Kingdom