Samfala Ask Olsem
Waswe, Kingdom Bilong God Hem Long Heart Bilong Iu?
Long tingting bilong staka pipol, Kingdom hem stap long heart bilong man. Olsem example, The Catholic Encyclopedia hem sei: “Kingdom bilong God hem wei wea God hem rul insaed heart bilong iumi.” Olketa bigman bilong religion teachim diswan evritaem. Waswe, Bible teachim hao Kingdom bilong God hem stap long heart bilong olketa man?
Long tingting bilong samfala, Jesus nao first man for talem hao Kingdom bilong God hem stap long heart bilong olketa man. Hem tru, Jesus hem sei: “Kingdom bilong God hem stap midolwan long iufala.” (Luke 17:21) Samfala Bible transleison sei: “Kingdom bilong God hem insaed long iu.” Waswe, olketa transleison hia hem stret? Waswe, hem nao wanem Jesus hem minim taem hem sei “Kingdom bilong God hem stap midolwan long iufala”?
Firstaem, tingim wanem nao heart bilong man. Taem Bible storyim heart, hem minim tokpiksa heart, wea datwan hem tingting, feeling, and fasin bilong man. Tingim wanfala example long tingting wea pipol garem abaotem Kingdom. Plande teachim hao pipol savve changem fasin bilong olketa and kamap fit for nara pipol respectim bikos samting wea nambawan olsem Kingdom hem stap long heart bilong olketa. Hem tru, datwan hem here gud, bat waswe, hem stret?
Bible hem sei: “Heart hem savve trikim man winim eni nara samting and hem nating hol bak.” (Jeremiah 17:9) Jesus hem sei: “Olketa nogud tingting kam from insaed long man, from heart bilong hem, olsem tingting for duim dirty fasin, steal, killim man dae, adultery, kavet, and olketa wicked samting.” (Mark 7:20-22) Tingim diswan: Plande wei for safa hem bikos long heart bilong olketa man wea sin. So hem hard for Kingdom bilong God hem samting wea kamaot from heart bilong man! Tru nao, olketa fig no savve grow long wanfala nila grass, olsem tu, hem hard for Kingdom bilong God kamaot from heart bilong man.—Matthew 7:16.
Nara samting, tingim hu nao Jesus story long olketa taem hem talem datfala toktok long Luke 17:21. Verse bifor datwan hem sei: “Taem olketa Pharisee askem hem wanem taem kingdom bae kam, hem ansa.” (Luke 17:20) Olketa Pharisee hia olketa enemy bilong Jesus. Jesus talem stret hao olketa Pharisee hia wea garem hypocrite fasin, bae no go insaed Kingdom bilong God. (Matthew 23:13) So sapos olketa Pharisee bae no go insaed Kingdom, waswe, fitim for sei Kingdom hem long heart bilong olketa? Barava nomoa nao! So taem Jesus talem datfala toktok long verse 21, wanem nao hem minim?
Plande Bible transleita wea careful tumas long hao olketa transleitim Bible, iusim olketa word wea klosap semsem olsem New World Translation. Samfala Bible hia sei Kingdom hem stap “midolwan iufala.” Long wanem wei nao Kingdom bilong God hem stap midolwan olketa long datfala taem? Jesus nao datwan wea Jehovah God appointim for rul olsem King long datfala Kingdom, and hem barava stap midolwan olketa pipol hia. From hem man wea God markem for kamap King long future, hem teachim pipol abaotem Kingdom bilong God and hem duim tu olketa mirakol wea showimaot olketa samting wea datfala Kingdom bae duim. So long datfala wei nao, Kingdom hem stap midolwan long olketa.
So hem showaot klia hao no eni pruv stap long Bible for datfala teaching wea sei Kingdom bilong God hem long heart bilong pipol. Kingdom bilong God hem wanfala really gavman wea bae mekem paradaes kamap moa long earth, olsem olketa profet talem.—Isaiah 9:6, 7; Daniel 2:44.