Evening Kaikai Bilong Lord Garem Wanem Mining for Iu?
“Eniwan wea kaikaim disfala bred or drinkim disfala kap bilong Lord long wei wea no fitim bae guilty long saed bilong body and blood bilong Lord.”—1 CORINTHIANS 11:27.
1. Wanem nao barava important samting wea bae kamap long year 2003, and hao nao hem start?
BARAVA important samting wea bae kamap long year 2003 bae hem happen bihaen sun go daon long April 16. Olketa Jehovah’s Witness bae hipap long datfala taem for keepim Memorial bilong dae bilong Jesus Christ. Olsem firstfala study article showim, Jesus startim disfala celebration, wea nara nem bilong hem tu Evening Kaikai Bilong Lord, bihaen hem and olketa aposol bilong hem celebratem Passover long Nisan 14, 33 C.E. Bred and wine long Memorial piksarem body bilong Christ wea no garem sin and blood wea hem pourimaot—only sakrifaes wea savve baem bak olketa man from sin and dae wea olketa born witim.—Romans 5:12; 6:23.
2. Wanem warning nao stap long 1 Corinthians 11:27?
2 Olketa wea kaikaim bred and drinkim wine long Memorial mas duim long wei bilong respect. Aposol Paul talemaot diswan klia taem hem raet for olketa Christian long Corinth, wea no celebratem Evening Kaikai Bilong Lord long stretfala wei. (1 Corinthians 11:20-22) Paul raet olsem: “Eniwan wea kaikaim disfala bred or drinkim disfala kap bilong Lord long wei wea no fitim bae guilty long saed bilong body and blood bilong Lord.” (1 Corinthians 11:27) Wanem nao mining bilong toktok hia?
Samfala wea Celebratem Long Wei wea No Fitim
3. Wanem nao planti Christian long Corinth duim long taem bilong celebration bilong Evening Kaikai Bilong Lord?
3 Planti Christian long Corinth share insaed long Memorial long wei wea no fitim. Olketa divaed midolwan long olketa seleva, and for lelebet taem, samfala tekem kam kaikai bilong olketa and kaikaim bifor or taem meeting go ahed, and planti taem olketa kaikai and drink tumas. Olketa no luksavve saed long mind and long spiritual wei. Diswan mekem olketa “guilty long saed bilong body and blood bilong Lord.” Olketa narawan wea no kaikai long datfala evening kamap hangre and diswan mekem olketa no lisin gud. Tru nao, planti join insaed diswan long wei wea no showimaot respect and wei for luksavve hao diswan hem serious samting. Dastawe olketa kasem judgment!—1 Corinthians 11:27-34.
4, 5. Why nao wei for lukluk gud long seleva hem important for olketa wea evritaem kaikaim bred and drinkim wine long Memorial?
4 Taem Memorial hem kamap evri year, hem important for olketa wea kaikaim bred and drinkim wine for lukluk gud long seleva. For share long stretfala wei long disfala kaikai, olketa mas healthy long spiritual wei. Eniwan wea showimaot fasin for no respect, or maet lukdaonem tu sakrifaes bilong Jesus stap long danger for ‘finis evribit from pipol bilong God,’ olsem wanfala Israelite wea no klin wea join insaed long kaikai wea evriwan kaikaim tugeta.—Leviticus 7:20; Hebrews 10:28-31.
5 Paul hem markem Memorial olsem wanfala kaikai wea evriwan kaikaim tugeta long Israel bifor. Hem story long olketa wea share for kaikai tugeta witim Christ and then hem sei: “Iufala kanduit drink long kap bilong Jehovah and kap bilong olketa demon; iufala kanduit kaikai long ‘tebol bilong Jehovah’ and tebol bilong olketa demon.” (1 Corinthians 10:16-21) Sapos samwan wea evritaem savve kaikaim bred and drinkim wine long Memorial hem duim bigfala sin, hem shud talemaot diswan long Jehovah and tu askem spiritual help bilong olketa older man insaed kongregeson. (Proverbs 28:13; James 5:13-16) Sapos hem really repent and showimaot datwan, bae hem no share insaed diswan long wei wea no fitim.—Luke 3:8.
Attend Olsem Sekson wea Lukluk Witim Respect
6. God hem markem privilege for kaikaim bred and drinkim wine long Evening Kaikai Bilong Lord for hu nao?
6 Waswe, olketa wea duim gud samting distaem for remnant bilong 144,000 brata bilong Christ shud kaikaim bred and drinkim wine long Evening Kaikai Bilong Lord? (Matthew 25:31-40; Revelation 14:1) Nomoa. God hem givim datfala spesol privilege for olketa wea kasem anointing witim holy spirit for kamap “ruler witim Christ.” (Romans 8:14-18; 1 John 2:20) So, wanem nao position bilong olketa wea hope for laef olowe insaed wanfala paradaes earth anda long Kingdom rul? (Luke 23:43; Revelation 21:3, 4) Bikos olketa no garem hope for go long heven for rul witim Jesus, olketa attendim Memorial olsem sekson wea lukluk witim respect.—Romans 6:3-5.
7. Hao nao olketa Christian long first-century savve olketa shud kaikaim bred and drinkim wine long Memorial?
7 Olketa tru Christian long first century kasem anointing witim holy spirit. Planti long olketa fit for iusim tu-thri mirakol present bilong spirit, olsem wei for tok long olketa difren languis. So, hem no hard for olketa olsem for savve hao spirit nao anointim olketa and olketa shud kaikaim bred and drinkim wine long Memorial. Bat, long taem bilong iumi, man savve hem kasem anointing witim spirit from disfala toktok wea kam from God: “From evriwan wea spirit bilong God leadim, olketa nao son bilong God. From iufala no kasem spirit wea mekem iufala slave and fraet moa, bat iufala kasem spirit wea adoptim iufala olsem olketa son, wea thru long disfala spirit nao iumi singaot: ‘Abba, Father!’ ”—Romans 8:14, 15.
8. Hu nao piksarem “wheat” and “rabis grass” wea Matthew chapter 13 hem storyim?
8 Insaed olketa year wea go pas, olketa tru anointed wan grow olsem “wheat” insaed field bilong “olketa rabis grass,” or olketa giaman Christian. (Matthew 13:24-30, 36-43) Start kam long olketa year bilong 1870, datfala “wheat” hem showaot klia, and samfala year bihaen olketa anointed Christian overseer kasem disfala toktok: “Olketa elder . . . shud putim front long olketa wea hipap [for Memorial] olketa mark hia,—(1) faith long blood [bilong Christ]; and (2) dedication long Lord and service bilong hem, nomata olketa mas dae from diswan. Olketa shud invaetem evriwan wea garem sem mind and wea dedicate for share long waka for celebratem dae bilong Lord.”—Studies in the Scriptures, Series VI, The New Creation, page 473.a
Luk Aotem “Nara Sheep”
9. Hao nao olketa start for luksavve long hu nao “great crowd” long 1935, and hao nao diswan affectim samfala wea kaikaim bred and drinkim wine long Memorial?
9 Gogo, organization bilong Jehovah start for tingting strong long olketa narawan wea join witim olketa anointed follower bilong Christ. Wanfala big samting happen saed long diswan long olketa year bihaen 1930. Bifor datfala taem, pipol bilong God ting long datfala “big crowd” bilong Revelation 7:9 olsem mek-tu spiritual sekson wea bae joinim 144,000 anointed wan wea resurrect long heven—olsem olketa bridesmaid or fren bilong waef bilong Christ. (Psalm 45:14, 15; Revelation 7:4; 21:2, 9) Bat long May 31, 1935, wanfala tok wea kamap long convention bilong Olketa Jehovah’s Witness long Washington, D.C., U.S.A., explainim from Bible hao datfala “big crowd” (“great multitude,” King James Version) hem minim datfala “nara sheep” wea stap long taem bilong end. (John 10:16) Bihaen datfala convention, samfala wea kaikaim bred and drinkim wine long Memorial stop for duim datwan bikos olketa luksavve hope bilong olketa hem for stap long earth, and no go ap long heven.
10. Wanem nao hope and olketa responsibility bilong “nara sheep”?
10 Especially from 1935, waka hem kamap for luk aotem olketa bilong “nara sheep,” wea garem faith long datfala ransom, dedicatem olketa seleva long God, and saportim datfala anointed “smol flock” for duim Kingdom preaching waka. (Luke 12:32) Olketa nara sheep hia hope for stap long earth for olowe, bat long olketa nara samting, olketa olsem remnant bilong olketa wea bae rul insaed Kingdom. Long sem wei wea olketa stranger long Israel bifor worshipim Jehovah and stap anda long Law, nara sheep distaem acceptim olketa Christian responsibility, olsem for preachim gud nius witim olketa member bilong spiritual Israel. (Galatians 6:16) Long sem wei wea wanfala stranger no savve kamap king or priest long Israel, no eniwan long olketa nara sheep hia savve rul insaed Kingdom long heven or serve olsem priest.—Deuteronomy 17:15.
11. Why nao date wea samwan hem baptaes hem maet showimaot wanem hope nao hem garem?
11 So, long olketa year bilong 1930, hem start for kamap klia hao God chusim finis olketa wea bae go long heven. For planti year nao, wei for faendem nara sheep, sekson wea garem hope for stap long earth, hem go ahed. Sapos wanfala anointed wan hem no faithful, samwan wea servem God long faithful wei for longfala taem olsem wanfala bilong nara sheep nao bae changem ples bilong hem insaed long datfala sekson bilong 144,000.
Why Samfala Mistek and Garem Rong Hope
12. From olketa wanem samting nao man mas stop for kaikaim bred and drinkim long Memorial, and why?
12 Olketa anointed Christian barava sure olketa garem hope for go long heven. Bat waswe sapos samfala wea no garem disfala hope kaikaim bred and drinkim wine long taem bilong Memorial? From olketa start nao for luksavve olketa no garem hope for go long heven, conscience bilong olketa bae muvim olketa for no tekpart moa. God bae no appruvim eniwan wea sei hem samwan wea garem hope for king and priest long heven taem hem savve hem no garem datfala hope. (Romans 9:16; Revelation 20:6) Jehovah killim dae Levite Korah from hem praod for aftarem waka bilong Aaron olsem priest. (Exodus 28:1; Numbers 16:4-11, 31-35) Sapos eni Christian luksavve hem mistek for kaikaim bred and drinkim wine long Memorial, hem shud finis for tekem and long hambol wei askem Jehovah for forgivim hem.—Psalm 19:13.
13, 14. Why nao samfala maet mistek for tingse olketa garem hope for go long heven?
13 Why nao samfala mistek for sei olketa garem hope for go long heven? Wei wea partner bilong olketa dae or nara nogud samting maet mekem olketa lus interest for laef long earth. Or maet olketa laekem sem hope olsem wanfala klos fren wea sei hem wanfala anointed Christian. Tru nao, God no markem eniwan for chusim olketa narawan for disfala privilege. And hem no anointim olketa wea bae rul insaed Kingdom long wei for mekem olketa herem olketa voice witim message wea talem datwan.
14 Idea bilong false religion hao evri gud pipol go long heven maet leadim samfala for tingse olketa garem hope for go long heven. Dastawe, iumi need for luk aot long wei for letem olketa rong tingting bilong bifor or nara reason for affectim iumi. Olsem example, samfala maet askem olketa seleva: ‘Waswe, mi iusim medicine wea affectim olketa feeling bilong mi? Waswe, mi man wea fasin bilong mi hem for garem deep feeling long samting gogo mi mistek nao for tingse mi wanfala anointed?’
15, 16. Why nao samfala maet rong for tingse olketa anointed wan?
15 Tu-thri maet askem olketa seleva olsem: ‘Waswe, mi want for main man? Waswe, mi aftarem hae position distaem or wanfala wea bae rul witim Christ long future?’ Taem olketa long first century kasem hope for rul insaed Kingdom, no evriwan garem spesol responsibility insaed long kongregeson. And olketa wea garem hope for go long heven no aftarem hae position or tokplas abaotem wei wea olketa anointed. Olketa showimaot hambol fasin bilong pipol wea garem “mind bilong Christ.”—1 Corinthians 2:16.
16 Samfala maet tingse olketa garem hope for go long heven bikos olketa garem staka savve insaed long Bible. Bat wei for kasem anointing witim spirit no minim man garem barava spesol savve, bikos Paul hem givim instruction and kaonsel long samfala anointed wan tu. (1 Corinthians 3:1-3; Hebrews 5:11-14) God garem wanfala arrangement for givimaot spiritual kaikai for evri pipol bilong hem. (Matthew 24:45-47) So no eniwan shud ting wei wea hem wanfala anointed Christian minim hem garem haefala wisdom winim olketa wea garem hope for stap long earth. Wei wea man savve tumas for ansarem olketa Bible kwestin, witness, or givim Bible tok no minim hem kasem anointing witim spirit. Samfala Christian wea garem hope for stap long earth savve tumas long evri samting hia tu.
17. Wei for kasem anointing witim spirit hem depend long wanem and long hu nao?
17 Sapos wanfala brata ask abaotem hope for go long heven, wanfala elder or mature Christian savve storyim diswan witim hem. Bat, wanfala man no savve disaedem diswan for narawan. Man wea barava garem disfala hope no need for askem nara pipol sapos hem garem hope olsem. Olketa anointed wan “kasem niufala wei for born, no long seed wea savve dae, bat long seed wea no savve dae, thru long word bilong God wea laef and wea stap for olowe.” (1 Peter 1:23) Thru long spirit and Word bilong hem, God plantim datfala “seed” wea mekem datfala man kamap “wanfala niufala creation,” wea garem hope for go long heven. (2 Corinthians 5:17) And Jehovah nao chus. Wei for kasem anointing “hem depend, no long man wea wantem or long man wea ran, bat long God.” (Romans 9:16) So hao nao man savve sure hem garem hope for go long heven?
Wei wea Olketa Sure
18. Hao nao spirit bilong God givim witness witim spirit bilong olketa anointed wan?
18 Witness bilong spirit bilong God pruvim long olketa anointed Christian hao olketa garem hope for go long heven. Paul hem raet olsem: “Iufala kasem spirit wea adoptim iufala olsem olketa son, wea thru long disfala spirit nao iumi singaot: ‘Abba, Father!’ Datfala spirit seleva givim witness witim spirit bilong iumi hao iumi nao olketa pikinini bilong God. So, sapos iumi olketa pikinini, iumi garem right olsem son tu: right wea kam from God, bat right wea semsem witim Christ, sapos iumi safa tugeta mekem iumi savve kasem glory tugeta.” (Romans 8:15-17) Anda long paoa bilong holy spirit, spirit bilong olketa, or strongfala feeling bilong olketa anointed wan muvim olketa for ting long samting wea Bible talem abaotem olketa spiritual pikinini bilong Jehovah olsem hem fitim olketa. (1 John 3:2) Spirit bilong God mekem olketa feel olsem olketa son bilong hem and putim insaed long olketa wanfala spesol hope. (Galatians 4:6, 7) Tru nao, laef olowe long earth olsem perfect man witim olketa famili member and fren hem naes tumas, bat datwan hem no hope wea God givim long olketa. Thru long spirit bilong hem, God putim insaed long olketa barava strongfala hope for go long heven dastawe olketa willing for lusim evriwan wea olketa lovem and hope for stap long earth.—2 Corinthians 5:1-5, 8; 2 Peter 1:13, 14.
19. Wanem mining nao niu covenant garem insaed laef bilong wanfala anointed Christian?
19 Olketa anointed Christian barava sure long hope bilong olketa for go long heven, and wei wea olketa insaed long datfala niu covenant. Jesus storyim datwan taem hem startim Memorial and sei: “Disfala kap minim niu covenant wea kamap from blood bilong mi, wea mi bae pourimaot for iufala.” (Luke 22:20) Olketa wea insaed long datfala niu covenant nao hem God and olketa anointed wan. (Jeremiah 31:31-34; Hebrews 12:22-24) Jesus hem mediator. Bikos datfala niu covenant hem kamap thru long blood wea Christ hem kapsaetem, datfala niu covenant hem tekem from olketa nation—no from olketa Jew nomoa—wanfala pipol for nem bilong Jehovah and hem mekem olketa kamap part long “seed” bilong Abraham. (Galatians 3:26-29; Acts 15:14) Disfala “covenant for olowe” provaedem wei for evri spiritual Israelite for resurrect for laef wea olketa kanduit dae long heven.—Hebrews 13:20.
20. Olketa anointed wan insaed wanem covenant witim Christ?
20 Olketa anointed wan feel sure long hope bilong olketa. Olketa insaed long nara covenant, datfala Kingdom covenant tu. Jesus sei olsem abaotem wei wea olketa share witim Christ: “Iufala nao olketa wea stap witim mi long olketa test bilong mi; and mi mekem wanfala covenant witim iufala, olsem Father bilong mi hem mekem wanfala covenant witim mi, for wanfala kingdom.” (Luke 22:28-30) Disfala covenant midolwan Christ and olketa king wea bae rul witim hem stap for olowe.—Revelation 22:5.
Memorial—Wanfala Taem Bilong Blessing
21. Hao nao iumi savve kasem barava gudfala samting from taem bilong Memorial?
21 Planti blessing nao kamap long taem bilong Memorial. Iumi savve kasem gud samting from Bible reading wea olketa markem for disfala taem. Hem nambawan taem tu for prea, for ting raonem laef bilong Jesus long earth and dae bilong hem, and tu for join insaed long waka for preachim Kingdom. (Psalm 77:12; Philippians 4:6, 7) Wei for celebratem diswan mekem iumi rememberim love wea God and Christ showimaot saed long ransom sakrifaes bilong Jesus. (Matthew 20:28; John 3:16) Diswan givim iumi hope and comfort and shud strongim iumi for aftarem wanfala gogo wea followim Christ. (Exodus 34:6; Hebrews 12:3) Memorial shud strongim iumi tu for fulfillim dedication bilong iumi olsem olketa servant bilong God and for olsem olketa loyal follower bilong Son bilong hem.
22. Wanem nao nambawan present bilong God for olketa man, and wanem nao wanfala wei for showimaot thankiu for datwan?
22 Jehovah givim iumi olketa nambawan present! (James 1:17) Iumi garem instruction insaed Word bilong hem, help bilong spirit bilong hem, and hope for laef olowe. Main nambawan present bilong God hem sakrifaes bilong Jesus for olketa sin bilong olketa anointed wan and for evri narawan wea showimaot faith. (1 John 2:1, 2) So dae bilong Jesus hem hao important long iu? Waswe, bae iu stap midolwan olketa wea showimaot thankiu for datwan taem olketa hipap bihaen sun go daon long April 16, 2003, for celebratem Evening Kaikai Bilong Lord?
[Footnote]
a Olketa Jehovah’s Witness nao pablisim bat distaem olketa no printim moa.
Wanem Nao Olketa Ansa Bilong Iu?
• Hu nao shud kaikaim bred and drinkim wine long Memorial?
• Why nao datfala “nara sheep” lukluk nomoa witim respect taem olketa attendim Evening Kaikai Bilong Lord?
• Hao nao olketa anointed Christian savve olketa shud kaikaim bred and drinkim wine long Memorial bilong dae bilong Christ?
• Taem bilong Memorial hem gudfala taem for wanem?
[Graph/Olketa Piksa long page 18]
(For fully formatted text, see publication)
Memorial Attendance
IN MILLIONS
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Piksa long page 18]
Waswe, bae iu stap for Evening Kaikai Bilong Lord dis year?
[Olketa Piksa long page 21]
Taem bilong Memorial hem gudfala taem for duim moa Bible reading and waka for preach abaotem Kingdom