KWESTIN FROM READER

Why nao Bible sei olketa Jew long first century “weitim” Messiah for kam?

Long taem wea John Baptaesa duim ministry bilong hem “evriwan weitim Christ for kam [and] olketa garem tingting olsem abaotem John: ‘Maet man hia nao hem Christ.’” (Luke 3:15) Why nao maet olketa Jew tingse Messiah bae showaot long datfala taem? Samfala reason stap for diswan.

Bihaen Jesus born, angel bilong Jehovah kam long olketa man wea lukaftarem sheepsheep bilong olketa klosap long Bethlehem. ⁽¹⁾ Datfala angel sei: “Wanfala man wea bae sevem iufala hem born tuday long datfala taon wea David tu hem born long hem. Disfala man hem Christ, wea hem nao Lord.” (Luke 2:8-11) Bihaen datwan, “staka nara angel kam standap witim datfala angel. Olketa mekhae long God and sei:a ‘Praisem God wea stap long heven, and pipol long earth wea mekem God hapi bae garem peace.’”—Luke 2:13, 14.

Taem olketa man wea lukaftarem sheepsheep herem datwan, stretawe olketa go long Bethlehem. Olketa faendem Joseph and Mary and baby Jesus, and “olketa storyim samting wea angel talem olketa abaotem pikinini hia.” From diswan, “evriwan wea herem samting wea olketa man hia talem barava sapraes tumas.” (Luke 2:17, 18) Disfala toktok “evriwan wea herem” showimaot olketa man hia storyim disfala nius long nara pipol tu, and no long Joseph and Mary nomoa. Taem olketa man for lukaftarem sheepsheep go bak long hom bilong olketa, olketa gohed “mekhae long God and praisem hem for evri samting wea olketa herem and lukim, wea hem happen barava olsem angel talem long olketa.” (Luke 2:20) Olketa no haedem olketa gud samting wea olketa herem abaotem Christ!

Mary followim Law bilong Moses and tekem kam Jesus wea hem firstborn son bilong hem long Jerusalem for showim hem long Jehovah. Taem Anna, wea hem wanfala profet lukim Jesus hem “prea for talem thankiu long God, and hem storyim pikinini hia long evriwan wea weit for God sevem Jerusalem.” ⁽²⁾ (Luke 2:36-38; Ex. 13:12) So staka pipol herem nius pikinini wea bae kamap Messiah hem born nao.

Bihaen, “olketa man from East wea lukluk long olketa star for trae savve long samting wea bae happen, olketa kam long Jerusalem. Olketa ask olsem: ‘Wea nao disfala pikinini wea bae hem king bilong olketa Jew? Mifala lukim star bilong hem taem mifala stap long East, and mifala kam for baodaon long hem.’” (Matt. 2:1, 2) Taem King Herod herem diswan “hem barava feel nogud and hem wari tumas. And evriwan long Jerusalem olsem tu. So Herod kolem kam olketa hed priest and olketa man wea teachim law. Hem askem olketa abaotem wea nao bae datfala Christ hem born.” ⁽³⁾ (Matt. 2:3, 4) So staka pipol herem nius baby wea bae kamap Messiah hem born nao!b

Luke 3:15, wea iumi storyim finis showimaot samfala Jew tingse maet John Baptaesa nao hem datfala Christ. Bat samting wea John talem showimaot tingting bilong olketa hem no stret. Hem sei: “Datfala man wea bae kam hem garem paoa winim mi, and mi no fit for aotem sandol bilong hem bikos mi man nating nomoa. Man hia bae baptaesim iufala long holy spirit and long fire.” (Matt. 3:11) Masbi toktok bilong John mekem pipol interest tumas for savve hu nao datfala Messiah.

Waswe, profesi long Daniel 9:24-27 abaotem 70-fala week nao helpem olketa Jew long first century for luksavve long taem wea Messiah bae showaot? Maet olsem, bat iumi no savve pruvim datwan. Long datfala taem, pipol garem staka difren tingting abaotem mining bilong datfala profesi, and wei wea olketa minim diswan hem difren from hao iumi minim distaem.c

Wanfala sekson bilong Jew religion wea olketa kolem Essenes, sei tufala Messiah bae showaot klosap 490 year hem finis, bat iumi no savve sapos olketa sei olsem from samting wea olketa lanem from profesi bilong Daniel. Nomata olsem, hard for olketa nara Jew followim tingting bilong wanfala smol sekson olsem.

Long mek-tu century C.E., samfala Jew sei datfala 70-fala week hem start taem firstfala temple hem distroe long 607 B.C.E. and hem finis taem mek-tu temple hem distroe long 70 C.E. Olketa nara Jew sei datfala 70-fala week hem finis long taem bilong olketa Maccabee long mek-tu century B.C.E. So olketa Jew no agree long wanem taem nao datfala 70-fala week hem start and hem finis.

Sapos olketa aposol and olketa nara Christian long first century C.E. luksavve long stretfala mining bilong profesi abaotem 70-fala week, bae olketa storyim datwan for pruvim Messiah hem showaot long barava taem. Bat no eni pruv hem stap for showimaot olketa storyim datwan.

Hem important tu for tingim diswan: Plande taem olketa wea raetem olketa Gospel storyim hao samfala samting wea happen long Jesus Christ hem samting wea olketa profesi long olketa Hebrew Scripture talem finis. (Matt. 1:22, 23; 2:13-15; 4:13-16) Bat no eniwan long olketa storyim hao datfala profesi abaotem 70-fala week hem join witim taem Jesus showaot long earth.

So no eni pruv showimaot pipol long taem bilong Jesus luksavve long stretfala mining bilong profesi abaotem 70-fala week. Nomata olsem, olketa Gospel storyim olketa nara samting wea pruvim pipol long datfala taem “weitim” Messiah.