Kamap Fren Bilong God for Olowe!

For mek fren hem needim waka; for go ahed for fren hem needim waka. Wei wea iu trae hard for kamap and stap olsem fren bilong God bae kasem planti blessing. Jesus talem olketa wea biliv long hem: “Truth bae mekem iufala free.” (John 8:32) Wanem nao datwan minim?

Iu savve kasem freedom distaem. Iu savve kamap free from olketa false teaching and laea story wea Satan spreadim. Iu savve kamap free from kaen laef wea no garem hope olsem bilong planti million pipol wea no savve long Jehovah. (Romans 8:22) Olketa fren bilong God stap klia tu from wei for “fraet long dae.”—Hebrews 2:14, 15.

Iu savve kasem freedom long niu world bilong God. Barava nambawan freedom nao iu savve kasem long future! Insaed datfala Paradaes earth, bae iu free from war, sik, and trabol. Free from poor living and hangre. Free from olo and dae. Free from fraet, hardfala living, and living wea no followim law. Bible talem olsem abaotem God: “Iu openem hand bilong iu and satisfaem need bilong evri samting wea laef.”—Psalm 145:16.

Olketa fren bilong God bae stap for olowe. Laef olowe hem wanfala spesol present wea God bae givim long evriwan wea laek for fren witim hem. (Romans 6:23) Tingim nomoa wanem nao laef wea no garem end savve minim for iu!

Iu bae garem taem for duim planti samting. Maet iu bae laek for lane hao for pleim wanfala music instrument. Or maet iu laek for lane for paintim piksa or for kamap wanfala carpenter. Iu maet laek for lane abaotem olketa animal and plant. Or maet iu laek for go and lukim olketa difren ples and pipol. Laef olowe bae mekem evriting hia savve kamap tru!

Iu bae garem taem for garem planti fren. For laef olowe bae mekem iu fit for savve long planti nara pipol wea kamap fren bilong God. Iu bae savve long olketa spesol savve and gudfala fasin bilong olketa, and olketa bae kamap fren bilong iu tu. Iu bae lovem olketa, and olketa bae lovem iu. (1 Corinthians 13:8) For garem laef wea no savve end bae givim iu taem for fren witim evriwan long earth! Bat best samting, wei wea iu fren witim Jehovah bae grow strong tumas taem olketa century go pas. Letem iu kamap fren bilong God for olowe!