“Mi Showimaot Example for Iufala”
“Iufala shud kamap olketa teacher fitim taem hia.”—HEBREWS 5:12.
1. Why nao toktok long Hebrews 5:12 maet mekem wanfala Christian wari lelebet?
TAEM iu readim toktok wea kam from God long theme text bilong iumi, waswe, hem mekem iu wari lelebet abaotem iuseleva? Sapos olsem, hem no iu nomoa wea feel olsem. From iumi followim Christ, iumi savve iumi mas kamap olketa teacher. (Matthew 28:19, 20) Iumi savve hao hem important tumas distaem for iumi teach long gudfala wei. And iumi savve hao wei wea iumi teach savve barava affectim wei wea olketa student bilong iumi bae laef or dae! (1 Timothy 4:16) So, hem gud for iumi askem iumiseleva: ‘Waswe, mi savve teach long gudfala wei? Hao nao mi savve kamap moabeta?’
2, 3. (a) Hao nao wanfala teacher explainim faondeson bilong gudfala wei for teach? (b) Jesus showimaot wanem example for iumi saed long wei for teach?
2 Wari olsem shud no mekem iumi feel wikdaon. Sapos iumi ting long wei for teach olsem samting wea man needim samfala spesol teknik for duim, maet iumi feel olsem hem hard tumas for kamap moabeta. Bat, faondeson bilong gudfala wei for teach hem no teknik, bat samting wea barava moa important. Lukim samting wea wanfala teacher wea garem savve hem raet abaotem disfala subject: “For teach long gudfala wei hem no depend long olketa spesol teknik or wei, plan or spesol samting man duim. . . . Love nao main samting insaed gudfala wei for teach.” Hem tru, disfala man no storyim wei for teach saed long Bible. Nomata olsem, samting wea hem talem hem barava fitim teaching waka wea iumi olketa Christian duim. Long wanem wei?
3 Nambawan Example bilong wei for teach hem Jesus Christ, wea talem olketa follower bilong hem: “Mi showimaot example for iufala.” (John 13:15) Hem storyim example bilong hambol fasin, bat insaed example wea Jesus showim for iumi hem main waka wea hem duim taem hem man long earth—waka for teachim pipol gud nius bilong Kingdom bilong God. (Luke 4:43) Sapos iu mas chusim wanfala word nomoa wea fitim ministry bilong Jesus, for sure bae iu chusim datfala word “love.” (Colossians 1:15; 1 John 4:8) Jesus barava lovem Dadi bilong hem long heven, Jehovah. (John 14:31) Bat, olsem wanfala teacher, Jesus showimaot love long tufala wei moa. Hem lovem olketa truth wea hem teachim, and hem lovem pipol wea hem teachim. Bae iumi lukluk gud long tufala wei hia wea Jesus showimaot example for iumi.
Hem Lovem Truth Bilong God for Longtaem Finis
4. Hao nao Jesus mekem grow love for olketa teaching bilong Jehovah?
4 Tingting bilong wanfala teacher abaotem subject bilong hem savve barava affectim wei wea hem teach long gudfala wei or nomoa. Sapos hem no interest, datwan bae showaot and affectim olketa student bilong hem. Jesus barava interest long olketa spesol truth wea hem teachim abaotem Jehovah and Kingdom bilong Hem. Jesus garem deepfala love for disfala subject. Hem mekem grow datfala love taem hem wanfala student. Insaed longfala taem wea hem stap long heven bifor hem kamap man long earth, datfala only-born Son barava interest tumas for lane. Isaiah 50:4, 5 talem disfala toktok wea barava fitim: “Sovereign Lord Jehovah seleva givim mi tongue bilong olketa wea lane finis, mekem mi savve hao for ansarem man wea taed. Hem wekapem long evri morning; hem wekapem ear bilong mi for herem samting olsem man wea lane finis. Sovereign Lord Jehovah seleva hem openem ear bilong mi, and mi, long saed bilong mi, no bighed. Mi no go followim difren wei.”
5, 6. (a) Wanem nao happen long Jesus taem hem baptaes, and hao nao datwan affectim hem? (b) Saed long wei for iusim Word bilong God, hao nao Jesus and Satan barava difren from each other?
5 Taem hem grow kam olsem wanfala man long earth, Jesus go ahed for lovem wisdom bilong God. (Luke 2:52) Then, taem hem baptaes, wanfala spesol samting happen long hem. Luke 3:21 hem sei: “Heven hem open.” Luk olsem, long datfala taem, Jesus rememberim laef bilong hem bifor, taem hem stap long heven. Bihaen, hem stap long wilderness and no kaikai for 40 day. Hem masbi hapi for gud for ting raonem instruction wea hem lanem finis from Jehovah long heven. Bat, no longtaem bihaen, love bilong hem for olketa truth bilong God kasem test.
6 Taem Jesus hem taed and hangre, Satan lukaotem wei for testim hem. Iumi lukim hao tufala son bilong God hia barava difren from each other! Tufala evriwan talem toktok wea kam from olketa Hebrew Scripture—bat witim tingting wea difren evribit. Satan twistim Word bilong God, and long wei wea no showimaot respect, hem iusim for olketa selfish goal bilong hemseleva. Satan hem bighed and barava heitim olketa truth bilong God. Long narasaed, Jesus iusim olketa Scripture long wei wea showimaot hem lovem olketa, and hem iusim Word bilong God long stretfala wei insaed evri ansa bilong hem. Jesus hem stap finis for longfala taem bifor God muvim olketa man for raetem olketa toktok hia, bat hem barava respectim olketa. Olketa nao olketa spesol truth from Dadi bilong hem long heven! Hem talem Satan hao toktok wea kam from Jehovah, hem moa important winim kaikai. (Matthew 4:1-11) Tru nao, Jesus lovem evri truth wea Jehovah teachim hem. Bat, hao nao hem showimaot datfala love olsem wanfala teacher?
Lovem Olketa Truth wea Hem Teachim
7. Why nao Jesus stap klia long wei for mekem samfala teaching bilong hemseleva?
7 Wei wea Jesus lovem olketa truth wea hem teachim hem showaot klia evritaem. Tingim, hem bae isi tumas for hem garem olketa idea bilong hemseleva. Hem garem bigfala savve and wisdom. (Colossians 2:3) Nomata olsem, hem evritaem remindim olketa wea lisin long hem hao evri samting wea hem teachim, no kam from hemseleva, bat from Dadi bilong hem long heven. (John 7:16; 8:28; 12:49; 14:10) Hem barava lovem olketa truth bilong God, dastawe hem nating ting for changem witim tingting bilong hemseleva.
8. Long start bilong ministry bilong hem, hao nao Jesus showimaot example for evritaem depend long Word bilong God?
8 Taem Jesus startim pablik ministry bilong hem, hem kwiktaem showimaot example long wei wea hem duim olketa samting. Tingim firstaem wea hem talem pipol bilong God hao hem nao datfala promis Messiah. Waswe, hem just kam front long olketa crowd, talemaot hao hem nao Christ, and then duim olketa spesol mirakol for pruvim datwan? Nomoa. Hem go long wanfala synagogue, wea pipol bilong God evritaem readim olketa Scripture. Hem readim big profesi from Isaiah 61:1, 2 and explainim hao datwan story abaotem hem. (Luke 4:16-22) Olketa mirakol wea hem duim help for pruvim hao Jehovah nao saportim hem. Nomata olsem, hem evritaem depend long Word bilong God taem hem teach.
9. Taem hem story witim olketa Pharisee, hao nao Jesus showimaot loyal love for Word bilong God?
9 Taem olketa wea againstim Jesus challengem hem, hem no trae for winim olketa saed long savve, nomata datwan bae isi tumas for hem. Bat, hem letem Word bilong God pruvim hao olketa rong. Olsem example, tingim taem wea olketa Pharisee sei olketa follower bilong Jesus brekem Sabbath law bikos olketa pikim samfala grain and kaikaim taem olketa wakabaot long wanfala field. Jesus hem ansa olsem: “Waswe, iufala no readim samting wea David duim taem hem and olketa man bilong hem hangre?” (Matthew 12:1-5) Hem tru, olketa Pharisee hia wea tingse olketa seleva raeteous, maet readim finis datfala story wea stap long 1 Samuel 21:1-6. Sapos olsem, olketa fail for luksavve long wanfala important leson insaed long datwan. Bat, Jesus no just readim datfala story nomoa. Hem ting raonem and acceptim olketa principle wea man savve lanem from datwan. Hem lovem olketa principle wea Jehovah teachim thru long datfala story. So hem iusim datwan and wanfala example from Law bilong Moses, for showimaot hao datfala Law hem balance. Long sem wei, loyal love bilong Jesus muvim hem for defendim Word bilong God againstim olketa bigman bilong religion wea twistim mining bilong olketa Scripture for kasem gud samting for olketa seleva, or haedem andanit olketa kastom bilong man.
10. Hao nao Jesus fulfillim olketa profesi wea storyim gudfala wei wea hem bae teach?
10 From Jesus lovem truth wea hem teachim, hem teach long interesting wei wea showimaot feeling. Olketa profesi talem hao Messiah bae toktok witim ‘naesfala wei long lip bilong hem,’ and bae iusim “toktok wea naes tumas.” (Psalm 45:2; Genesis 49:21) Jesus fulfillim olketa profesi hia long wei wea message bilong hem evritaem interesting and klia and hem iusim “naesfala toktok” taem hem teachim olketa truth wea hem barava lovem. (Luke 4:22) For sure feeling bilong Jesus bae showaot long feis bilong hem, and eye bilong hem mas shaen from hem barava interest long subject bilong hem. Hem masbi wanfala nambawan samting for lisin long hem, and iumi garem datwan olsem example for followim taem iumi story witim nara pipol abaotem samting wea iumi lanem!
11. Why nao savve bilong Jesus for teach no mekem hem kamap praod?
11 Waswe, Jesus kamap praod from hem savve tumas for toktok and garem bigfala savve abaotem olketa truth bilong God? Planti taem diswan hem happen long olketa man wea teach. Bat, remember, Jesus hem wise long wei wea showimaot hem fraet long God. Hard for man praod sapos hem garem wisdom olsem, bikos “wisdom stap witim olketa wea garem fasin for no ova tumas.” (Proverbs 11:2) Narafala samting tu stopem Jesus for kamap praod.
Jesus Lovem Pipol wea Hem Teachim
12. Hao nao Jesus showimaot hem no wantem olketa follower bilong hem for fraetem hem?
12 Deepfala love wea Jesus garem for pipol hem showaot long wei wea hem teach. No enitaem wei wea hem teach mekem pipol feel fraet or olsem olketa no fit, no olsem olketa man distaem wea praod tumas. (Ecclesiastes 8:9) Bihaen Peter lukim Jesus duim wanfala mirakol, hem sapraes tumas and hem foldaon front long Jesus. Bat Jesus no laekem olketa follower bilong hem for fraetem hem. Long kaenfala wei, hem sei, “No fraet” and then hem story long Peter abaotem barava spesol waka for mek-disaepol wea Peter bae share insaed. (Luke 5:8-10) Jesus laekem love wea olketa disaepol garem for olketa spesol truth bilong God for muvim olketa, no from olketa fraet long teacher.
13, 14. Long olketa wanem wei nao Jesus showimaot hem tingim feeling bilong pipol?
13 Love bilong Jesus for pipol wea hem teachim hem showaot tu long wei wea hem tingim feeling bilong olketa. “Taem hem lukim olketa pipol hem feel sorre long olketa, from olketa garekil and stap olabaot olsem olketa sheep wea no garem eni shepherd.” (Matthew 9:36) Hem feel sorre bikos olketa no stap gud and hem laek for helpem olketa.
14 Lukim narafala taem wea Jesus tingim feeling bilong nara man. Taem wanfala woman wea safa from wei wea blood ran olowe kam long hem insaed wanfala crowd and tasim botom long kaleko bilong hem, datfala woman kasem mirakol healing. Jesus feelim paoa go aot from hem, bat hem no lukim hu nao kasem healing. Hem laekem tumas for faendem datfala woman. Why nao olsem? No for tok long hem from hem brekem Law or olketa rul bilong olketa scribe and Pharisee, olsem woman hia maet wari abaotem. Nomoa, bat Jesus sei long hem: “Dota, faith bilong iu healim iu. Go long peace, and garem gudfala health nao from nogud sik bilong iu.” (Mark 5:25-34) Lukim feeling long datfala toktok. Hem no just sei, “Kasem healing.” Bat, hem sei: “Garem gudfala health nao from nogud sik bilong iu.” Long hia Mark iusim wanfala word wea savve minim “whipim,” kaen wei for whipim man wea barava spoelem hem. So Jesus luksavve hao sik bilong datfala woman mekem hem safa, and maet bigfala pain saed long body and feeling. Hem tingim feeling bilong hem.
15, 16. Wanem nao samfala samting wea happen long ministry bilong Jesus wea showaot hem mekhae long gudfala fasin bilong pipol?
15 Jesus showimaot love for pipol tu long wei for mekhae long gudfala fasin bilong olketa. Tingim samting wea happen taem hem meetim Nathanael, wea kamap wanfala aposol bihaen. “Jesus lukim Nathanael kakam long hem and hem sei olsem abaotem hem: ‘Lukim, wanfala Israelite wea no eni laea samting stap long hem.’” Long mirakol wei, Jesus luk insaed heart bilong Nathanael and from datwan hem lanem staka samting abaotem hem. Hem tru, Nathanael nating perfect. Hem garem olketa wik point, olsem iumi evriwan. Taem hem herem pipol story abaotem Jesus, hem tok stret and sei: “Waswe, eni gudfala samting savve kamaot from Nazareth?” (John 1:45-51) Nomata man maet talem planti samting abaotem Nathanael, Jesus chus for mekhae long gud samting, honest fasin bilong hem.
16 Long sem wei, taem wanfala bigman long army—maet wanfala Gentile, wanfala man from Rome—hem kam and askem Jesus for healim slave bilong hem wea sik, Jesus savve datfala soldia garem olketa wik point. Long datfala taem, wanfala bigman long army maet garem living bifor wea fulap witim raf fasin, wei for killim dae man, and giaman worship. Bat Jesus mekhae long gudfala samting—strongfala faith bilong datfala man. (Matthew 8:5-13) Bihaen, taem Jesus story long datfala badfala man wea hange long torture stake saed long hem, Jesus no hotem hem from hem wanfala criminal, bat hem encouragem hem witim hope for future. (Luke 23:43) Jesus barava savve hao wei for judgem or tingim nogud samting abaotem nara pipol bae mekem olketa feel wikdaon. For sure, wei wea hem mekhae long gudfala fasin bilong pipol encouragem planti for trae for kamap moabeta.
Willing for Servem Pipol
17, 18. Hao nao wei wea Jesus acceptim assignment for kam long earth showaot hem willing for servem nara pipol?
17 Nara strongfala pruv wea showimaot Jesus lovem pipol wea hem teachim hem wei wea hem willing for servem olketa. Taem hem stap long heven bifor, Son bilong God laekem tumas olketa man. (Proverbs 8:30, 31) Olsem “Word,” or man for toktok for Jehovah, maet hem deal witim olketa man planti taem. (John 1:1) Bat, insaed reason why hem lusim hae position bilong hem long heven and “mekem hemseleva kamap smol and kamap olsem wanfala slave,” hem for teachim olketa man. (Philippians 2:7; 2 Corinthians 8:9) Taem hem stap long earth, Jesus no expectim eniwan for servem hem. Bat, hem sei: “Son bilong man hem kam, no for olketa servem hem, bat for serve and for givim soul bilong hem olsem ransom for baem bak planti pipol.” (Matthew 20:28) Jesus fulfillim datfala toktok evribit.
18 Long hambol wei, Jesus servem olketa wea hem teachim and no hol bak for givim hemseleva for olketa. Hem baeleg raonem full Promis Land, hem wakabaot for planti handred kilometer for preach long planti moa pipol. Hem evritaem hambol and pipol feel free for kam long hem, no olsem olketa Pharisee and scribe wea praod. Evri difren kaen pipol—olketa bigman, soldia, lawyer, woman, pikinini, olketa wea poor, sik, and tu olketa wea community rejectim—no fraet and want for kam long hem. Nomata hem perfect, Jesus hem wanfala man wea savve kamap taed and hangre. Bat, nomata taem hem taed or need for rest or garem kwaet taem for prea, hem tingim need bilong nara pipol firstaem.—Mark 1:35-39.
19. Hao nao Jesus showimaot example for deal long hambol, patient and kaenfala wei witim olketa disaepol bilong hem?
19 Jesus hem willing tu for servem olketa disaepol bilong hem. Hem duim olsem taem hem teachim olketa long kaenfala and patient wei. Taem olketa slow for minim samfala important leson, hem no givap, kamap kros, or hotem olketa. Hem go ahed for faendem olketa niu wei for helpem olketa for minim. Olsem example, tingim hao planti taem olketa disaepol raoa abaotem hu nao nambawan long olketa. Planti taem, go kasem naet bifor olketa killim hem dae, Jesus faendem olketa niu wei for teachim olketa for deal witim each other long hambol wei. Saed long hambol fasin, and evri nara samting, Jesus fit for sei: “Mi showimaot example for iufala.”—John 13:5-15; Matthew 20:25; Mark 9:34-37.
20. Hao nao wei wea Jesus hem teach hem barava difren from olketa Pharisee, and wanem nao mekem datfala wei gud tumas?
20 Lukim wei wea Jesus no talem olketa disaepol bilong hem wanem nao example; hem “showimaot example.” Hem teachim olketa thru long example bilong hem. Hem no tok daon long olketa olsem man wea hae winim olketa, olsem hem tingse hem wanfala bigman wea hem no fitim for hemseleva duim samting wea hem talem olketa for duim. Hem nao wei bilong olketa Pharisee. Jesus sei abaotem olketa, “Olketa talem bat nating savve duim.” (Matthew 23:3) Long hambol wei Jesus showim olketa student bilong hem mining bilong olketa teaching bilong hem taem hemseleva live followim olketa. So taem hem encouragem olketa follower bilong hem for garem living wea simpol and wea free from wei for aftarem material samting, olketa barava minim hem. Olketa luksavve hao toktok bilong hem tru: “Olketa fox garem ples for sleep and olketa bird garem ples for sleep tu, bat Son bilong man no garem eni ples for putim hed bilong hem for sleep.” (Matthew 8:20) Jesus servem olketa disaepol bilong hem long hambol wei wea hem givim example for olketa.
21. Wanem nao bae iumi storyim long nextfala article?
21 Hem klia tumas hao Jesus hem nambawan Teacher wea winim evri nara teacher! Wei wea hem lovem samting wea hem teachim and pipol wea hem teachim hem showaot klia long olketa wea garem honest heart wea lukim and lisin long hem. Hem klia tu long iumi distaem wea lukluk gud long example bilong hem. Bat, hao nao iumi savve followim perfect example bilong Christ? Nextfala article bae storyim datfala kwestin.
Hao Nao Bae Iu Ansa?
• Wanem nao faondeson bilong gudfala wei for teach, and hu nao showimaot example bilong diswan?
• Long olketa wanem wei nao Jesus showimaot love for olketa truth wea hem teachim?
• Hao nao Jesus showimaot love for pipol wea hem teachim?
• Olketa wanem example nao showimaot hao Jesus hem hambol and willing for servem olketa wea hem teachim?
[Piksa long page 12]
Hao nao Jesus showimaot hem lovem olketa principle insaed Word bilong God?