Kwestin From Reader
Thrifala Gospel storyim komplen abaotem wei wea Jesus kasem anointing witim oil wea kost tumas. Waswe, evri aposol nao komplen, or Judas nomoa?
Olketa storyim samting wea happen insaed Gospel bilong Matthew, Mark, and John. Luk olsem Judas nao lead long wei for komplen, and tu-thri long olketa nara aposol agree witim hem. Samting wea happen hia showimaot why iumi shud hapi for garem fofala story bilong Gospel. Samting wea evriwan raetem hem stret, bat no evriwan talem sem information. Taem iumi markem olketa story wea semsem, iumi bae kasem full information abaotem samting wea happen.
Datfala story long Matthew 26:6-13 talem iumi ples—haos bilong Simon, datfala man wea garem leprosy, long Bethany—bat hem no talem nem bilong woman wea start for pourim oil antap long hed bilong Jesus. Matthew sei: “Taem olketa lukim diswan olketa disaepol feel kros” and komplen hao olketa savve sellim diswan and givim selen long poor pipol.
Story bilong Mark garem planti long olketa information hia. Bat hem talem tu hao woman hia brekem open datfala botol. Hem garem oil wea hem “trufala nard,” kaen wea kam from India. Abaotem datfala komplen, Mark reportim hao “samfala talemaot kros,” and “olketa barava feel nogud long hem.” (Mark 14:3-9) So tufala story hia showimaot hao no wanfala aposol nomoa komplen. Bat hao nao hem start?
John, man wea lukim samting wea happen, addim samfala important information moa. Hem talem nem bilong woman hia—Mary, sista bilong Martha and Lazarus. John provaedem tu disfala information wea saportim winim wei for againstim story: “Hem pourim oil long leg bilong Jesus and draem leg bilong hem witim hair bilong hem.” Taem iumi joinim tugeta evri story hia, iumi fit for luksavve hao Mary nao mas wan wea pourim datfala oil, wea John sei hem “trufala nard,” long hed and leg bilong Jesus. John hem barava klos long Jesus and savve feel kros sapos man no showimaot respect long Hem. Iumi read olsem: “Judas Iscariot, wanfala long olketa disaepol bilong hem, wea klosap for givim hem go long enemy, sei: ‘Why nao samwan no sellim disfala oil wea smel naes for thri handred denarii and givim datfala selen long poor pipol?’”—John 12:2-8.
Hem tru, Judas hem “wanfala long olketa disaepol bilong hem,” bat iu savve minim kros bilong John from samwan wea garem position olsem hem plan for givim go Jesus long enemy. Man for transleit Dr. C. Howard Matheny sei olsem abaotem John 12:4: “Taem olketa sei ‘klosap for’ [or, “redy for”] and disfala toktok ‘for givim go long enemy’ showimaot samting wea happen followim order or wanfala akson wea go hed. Diswan showimaot hao wei wea Judas givim go Jesus long olketa enemy hem no samting wea hem just tingim insaed shortfala taem nomoa bat hem tingting abaotem and planim for staka day finis.” John sei tu hao wei wea Judas komplen hem “no from hem tingim olketa wea poor, bat from hem man for steal and keepim box bilong selen and savve aotem olketa selen wea olketa putim insaed.”
So luk olsem disfala man for steal, Judas, hem nao startim disfala komplen from hem bae garem moa samting for stealim sapos olketa sellim oil hia wea kost tumas and putim selen insaed box wea hem karem. Wans Judas startim disfala komplen, olketa nara aposol tu maet joinim hem for komplen abaotem samting wea luk olsem hem stret. Bat, Judas nao main man wea startim datfala komplen.