Jehovah, ‘Strongfala Haos Bilong Iumi Long Taem Bilong Trabol’
“Salvation bilong olketa raeteous wan hem from Jehovah; hem nao strongfala haos bilong olketa long taem bilong trabol.”—PSALM 37:39.
1, 2. (a) Jesus prea for wanem saed long olketa disaepol bilong hem? (b) Wanem nao will bilong God for pipol bilong hem?
JEHOVAH hem garem paoa wea winim evriwan. Hem garem paoa for protectim olketa faithful worshiper bilong hem long eni wei. Hem savve muvim pipol bilong hem long nara ples and putim olketa long wanfala sef ples wea peace hem stap. Nomata olsem, Jesus prea long Dadi bilong hem long heven for olketa disaepol bilong hem and sei: “Mi askem iu, no for tek aotem olketa from world, bat for lukaftarem olketa bikos long wicked wan.”—John 17:15.
2 Jehovah hem chus for no tek ‘aotem iumi from world.’ Bat, will bilong hem nao for iumi stap witim pipol long world mekem iumi savve talemaot message bilong hope and comfort long nara pipol. (Romans 10:13-15) Bat, olsem Jesus showim insaed prea bilong hem, taem iumi stap long disfala world, “wicked wan” savve attakim iumi. Olketa man wea no obey and olketa wicked spirit savve kosim bigfala pain and wei for safa, and olketa Christian tu savve kasem trabol.—1 Peter 5:9.
3. Nomata olketa faithful for worshipim Jehovah olketa mas feisim wanem, bat wanem comfort nao Word bilong God givim?
3 Taem iumi kasem olketa test olsem, hem normal for iumi garem feeling for wikdaon samfala taem. (Proverbs 24:10) Bible garem staka story abaotem olketa faithful wan wea kasem trabol. Man wea raetem psalm hem sei: “Staka trabol kasem man wea raeteous, bat Jehovah sevem hem from evriwan.” (Psalm 34:19) Tru tumas, olketa nogud samting savve happen long “raeteous wan” tu. Olsem David, samfala taem maet ‘olketa feeling bilong iumi dae and hem olsem iumi pisis evribit.’ (Psalm 38:8) Nomata olsem, iumi kasem comfort taem iumi savve “Jehovah hem stap klosap long olketa wea heart bilong olketa brek; and hem sevem olketa wea spirit bilong olketa karem bigfala hevi.”—Psalm 34:18; 94:19.
4, 5. (a) Olsem Proverbs 18:10 showimaot, wanem nao iumi mas duim for kasem protection bilong God? (b) Wanem nao samfala samting wea iumi savve duim for kasem help bilong God?
4 Jesus talem insaed prea bilong hem hao Jehovah hem lukaftarem iumi. For iumi hem “strongfala haos . . . long taem bilong trabol.” (Psalm 37:39) Buk bilong Proverbs iusim semkaen toktok taem hem sei: “Nem bilong Jehovah nao hem strongfala taoa. Man wea raeteous ran go long hem and kasem protection.” (Proverbs 18:10) Disfala scripture hem showimaot wanfala main truth abaotem loving kea wea Jehovah garem for olketa man. God barava protectim olketa raeteous wan wea strong for luk aotem hem. Hem olsem iumi ran go insaed long wanfala strongfala taoa for haed.
5 Taem iumi feisim olketa problem wea mekem iumi wari tumas, hao nao iumi savve ran go long Jehovah for protectim iumi? Bae iumi lukluk long thrifala important samting wea iumi savve duim for kasem help bilong Jehovah. First samting, iumi mas prea long Dadi bilong iumi long heven. Mek-tu samting, iumi shud followim wei wea holy spirit leadim iumi. And mek-thri, iumi mas stap anda long arrangement bilong Jehovah taem iumi luk aotem olketa nara Christian wea savve help for daonem wari bilong iumi.
Paoa Bilong Prea
6. For olketa tru Christian, prea hem wanem samting?
6 Samfala savveman saed long health sei prea hem olsem treatment taem man garem barava sorre feeling and hevi. Maet hem tru hao wei for prea savve helpem man taem hem kasem hevi for garem peace, long sem wei wea samfala naes saond bilong creation or long wei for rabem baksaed bilong man savve mekem man feel gud. Bat olketa tru Christian no ting long prea olsem hem just wanfala medicine for aotem nogud feeling. Iumi savve hao prea hem wei for story long Creator witim respect. Insaed long prea hem love and trust wea iumi garem for God. Tru tumas, prea hem part long worship bilong iumi.
7. Wanem nao hem minim for garem trust taem iumi prea, and hao nao olketa prea olsem savve helpem iumi for deal witim olketa problem bilong iumi?
7 Taem iumi prea iumi mas garem trust long Jehovah. Aposol John hem raet olsem: “Iumi garem disfala wei for trustim hem, hao, nomata wanem samting iumi askem wea fitim will bilong hem, hem herem iumi.” (1 John 5:14) Jehovah, wea Barava Hae, datfala only tru God wea garem paoa winim evri narawan, hem barava lisin long strongfala prea bilong olketa wea worshipim hem. For savve hao loving God bilong iumi herem taem iumi talem olketa wari and problem long hem barava comfortim iumi.—Philippians 4:6.
8. Why nao olketa faithful Christian shud no hol bak or feel olsem olketa no fit taem olketa prea long Jehovah?
8 Olketa faithful Christian shud no hol bak, feel olsem olketa no fit, or no garem trust taem olketa prea long Jehovah. Hem tru, taem iumi feel nogud long iumiseleva or garem staka problem, maet iumi no garem feeling for laek story witim Jehovah long prea. Long olketa taem olsem, iumi shud remember hao Jehovah “feel sorre long pipol bilong hem wea safa” and hem “comfortim olketa wea feel sorre.” (Isaiah 49:13; 2 Corinthians 7:6) Taem bilong wari and trabol nao hem taem wea iumi barava need for tan go long Dadi bilong iumi long heven olsem strongfala haos bilong iumi.
9. Long wanem wei nao faith hem insaed long wei wea iumi prea long God?
9 For kasem gud samting evribit from privilege bilong prea, iumi mas garem really faith. Bible hem sei “man wea kam long God mas biliv hem stap and hem kamap datwan wea givim reward long olketa wea barava luk aotem hem.” (Hebrews 11:6) Faith hem moa samting winim wei for bilivim dat God “hem stap.” Man wea garem faith wea real mas biliv strong long wei wea God fit and want for givim reward long iumi sapos iumi obeyim hem long full laef. “Eye bilong Jehovah hem lukluk long olketa raeteous wan, and ear bilong hem lisin long prea bilong olketa.” (1 Peter 3:12) Wei for evritaem luksavve long loving kea bilong Jehovah for iumi hem mekem prea bilong iumi garem spesol mining.
10. Olketa prea bilong iumi mas waswe sapos iumi want for kasem strong long spiritual wei from Jehovah?
10 Jehovah lisin long olketa prea bilong iumi taem iumi prea witim full heart. Man wea raetem psalm hem sei: “Mi singaot witim full heart bilong mi. Ansarem mi, O Jehovah.” (Psalm 119:145) No olsem olketa prea wea pipol bilong staka religion baeheartim, olketa prea bilong iumi no talem sem samting olowe wea no kam from heart and man no really interest long hem. Taem iumi prea long Jehovah witim “full heart” bilong iumi, olketa word wea iumi iusim garem bigfala mining and goal. Sapos iumi talem kaen strong prea olsem, iumi bae start for kasem help from iumi torowem ‘hevi bilong iumi long Jehovah.’ From Bible promis olsem, “hem nao bae strongim” iumi.—Psalm 55:22; 1 Peter 5:6, 7.
Spirit Bilong God Hem Helper Bilong Iumi
11. Wanem nao wanfala wei wea Jehovah ansarem iumi taem iumi “go ahed for ask” for help bilong hem?
11 Jehovah hem no Datwan wea Herem prea nomoa bat hem ansarem tu. (Psalm 65:2) David raet olsem: “Long taem wea mi kasem trabol bae mi singaot long iu, from iu bae ansarem mi.” (Psalm 86:7) Dastawe Jesus encouragem olketa disaepol bilong hem for “go ahed for ask” for help bilong Jehovah bikos ‘Dadi long heven’ bae “givim holy spirit long olketa wea askem hem.” (Luke 11:9-13) Tru tumas, paoa bilong God hem wanfala helper, wea comfortim pipol bilong hem.—John 14:16.
12. Hao nao spirit bilong God savve helpem iumi taem luk olsem olketa problem big tumas?
12 Nomata taem iumi feisim olketa test, spirit bilong God savve givim iumi “paoa wea winim wanem iumi garem.” (2 Corinthians 4:7) Aposol Paul, wea stand strong long staka hard samting sei olsem: “Long evri samting mi kasem strong from datwan wea givim paoa long mi.” (Philippians 4:13) Long sem wei tu, staka Christian distaem kasem moa strong long spiritual wei and saed long feeling taem olketa prea strong. Staka taem, olketa problem wea luk olsem olketa big tumas savve luk smol nomoa taem iumi kasem help from spirit bilong God. From strong wea iumi kasem from God, iumi savve talem disfala sem toktok olsem aposol Paul: “Iumi kasem hevi long evri kaen wei, bat iumi no brek daon evribit; iumi konfius, bat iumi no barava lus hope; iumi kasem persecution, bat iumi no stap seleva; olketa torowem iumi go daon, bat iumi no finis evribit.”—2 Corinthians 4:8, 9.
13, 14. (a) Hao nao Jehovah hem kamap strongfala haos bilong iumi thru long Word bilong Hem? (b) Hao nao iu kasem help finis from iu followim olketa Bible principle?
13 Holy spirit tu muvim olketa man for raetem Bible and hem keepim Bible sef for helpem iumi. Long wanem wei nao Jehovah olsem wanfala strongfala haos for iumi long taem bilong trabol thru long Word bilong hem? Wanfala wei nao hem givim iumi wisdom wea helpem man and wei for tingting gud. (Proverbs 3:21-24) Bible hem trainim tingting bilong iumi and mekem wei wea iumi ting raonem samting kamap moabeta. (Romans 12:1) Thru long wei for readim and studyim Word bilong God evritaem, and tu for followim, iumi savve “trainim paoa . . . for luksavve long olketa stret samting and rong samting.” (Hebrews 5:14) Maet iu luksavve finis hao olketa Bible principle helpem iu for disaedem samting long wise wei taem iu feisim olketa hard taem. Bible mekem iumi wise wea savve helpem iumi for faendem olketa gudfala ansa long olketa problem wea mekem iumi safa.—Proverbs 1:4.
14 Word bilong God givim iumi nara samting wea savve strongim iumi—hope for kasem salvation. (Romans 15:4) Bible sei olketa nogud samting bae no go ahed for happen for olowe. Nomata wanem kaen trabol iumi kasem, olketa for lelebet taem nomoa. (2 Corinthians 4:16-18) Iumi garem “hope for laef olowe wea God, wea kanduit laea, promisim longtaem kam finis.” (Titus 1:2) Sapos iumi hapi long datfala hope, and evritaem tingim nambawan future wea Jehovah promisim, iumi savve go ahed strong long taem bilong trabol.—Romans 12:12; 1 Thessalonians 1:3.
Kongregeson—Wanfala Wei wea Love Bilong God Showaot
15. Hao nao olketa Christian savve helpem each other?
15 Nara samting wea Jehovah provaedem wea savve helpem iumi long taem bilong trabol hem wei for kaban insaed long Christian kongregeson. Bible hem sei: “Wanfala trufala fren hem showimaot love evritaem, and hem wanfala brata wea born for taem bilong trabol.” (Proverbs 17:17) Word bilong God encouragem evriwan insaed kongregeson for showimaot honor and lovem each other. (Romans 12:10) Aposol Paul hem raet olsem: “Letem man go ahed for luk aotem, no gudfala samting for hemseleva, bat for narafala man.” (1 Corinthians 10:24) For garem kaen tingting olsem savve helpem iumi for tingting strong long wanem nara pipol needim and no long olketa hard samting bilong iumiseleva. Taem iumi helpem nara pipol, olketa kasem gud samting and tu iumi kasem hapi and wei for satisfae wea mekem olketa hevi bilong iumi moa isi for karem.—Acts 20:35.
16. Hao nao each Christian savve encouragem narawan?
16 Olketa man and woman wea mature long spiritual wei savve duim important waka for strongim olketa narawan. For duim olsem, olketa mas garem fasin wea mekem pipol feel free for story witim olketa and olketa stanbae evritaem. (2 Corinthians 6:11-13) Kongregeson hem kasem gud samting taem evriwan no forget for praisem olketa young wan, buildimap olketa niu wan, and encouragem olketa wea feel sorre. (Romans 15:7) Love for olketa brata bae helpem iumi tu for stap klia long wei for no trustim each other. Iumi shud no kwiktaem for sei wei wea man kasem hard taem hem showaot hem wik long spiritual saed. Dastawe Paul encouragem olketa Christian for “tok kaen long olketa soul wea feel sorre.” (1 Thessalonians 5:14) Bible showimaot hao olketa faithful Christian tu kasem trabol.—Acts 14:15.
17. Wanem nao olketa chance wea iumi garem for strongim wei for fren witim olketa nara Christian?
17 Taem bilong olketa Christian meeting hem gudfala chance for iumi givim comfort and encouragem each other. (Hebrews 10:24, 25) Disfala loving wei for helpem each other hem no for taem bilong olketa kongregeson meeting nomoa. Pipol bilong God luk aotem olketa chance for kaban tugeta long narataem tu. Taem olketa problem wea mekem man wari kamap, bae iumi stanbae for helpem each other bikos strongfala wei for fren hem stap finis. Aposol Paul hem raet olsem: “No eni wei for divaed mas kamap long body, bat olketa part bilong hem mas kea for narawan . . . And sapos wanfala part hem safa, evri narafala part safa witim hem; or sapos wanfala part hem kasem glory, evri narafala part hapi witim hem.”—1 Corinthians 12:25, 26.
18. Wanem tingting nao iumi shud stap klia long hem taem iumi feel wikdaon?
18 Samfala taem maet iumi feel wikdaon tumas for enjoyim wei for kaban witim olketa nara Christian. Iumi shud againstim kaen feeling olsem mekem iumi savve go ahed for kasem help and comfort wea olketa nara brata savve givim. Bible givim iumi disfala warning: “Man wea stap seleva bae tingim nomoa samting wea hemseleva laekem; bae hem againstim evri gudfala wisdom.” (Proverbs 18:1) Wei wea olketa brata and sista bilong iumi stap hem showimaot God hem kea for iumi. Sapos iumi luksavve long disfala loving samting wea hem provaedem, bae iumi kasem help long taem bilong trabol.
Evritaem Tingim Gud Saed
19, 20. Hao nao Bible helpem iumi for rejectim wei for ting long nogud saed bilong samting?
19 Taem wei for feel wikdaon and sorre kamap, hem isi for tingim nogud saed bilong samting. Olsem example, taem samfala kasem trabol, maet olketa daotem spiritual saed bilong olketa, and sei hard taem hia hem wanfala saen wea showimaot God no hapi long olketa. Bat, iumi mas remember hao Jehovah no testim eniwan witim “nogud samting.” (James 1:13) Bible hem sei: “Heart bilong [God] hem no spoelem man or mekem olketa man feel sorre.” (Lamentations 3:33) Nomoa nao, Jehovah hem feel sorre tumas taem olketa servant bilong hem safa.—Isaiah 63:8, 9; Zechariah 2:8.
20 Jehovah hem “Dadi bilong olketa kaenfala mercy and God bilong evri comfort.” (2 Corinthians 1:3) Hem kea for iumi, and hem bae apim iumi long taem wea hem markem. (1 Peter 5:6, 7) Wei for evritaem luksavve long love wea God garem for iumi bae helpem iumi for evritaem tingim gud saed, and hapi tu. James hem raet olsem: “Tingim olsem hapi samting, olketa brata bilong mi, taem iufala kasem olketa difren kaen test.” (James 1:2) Why nao olsem? Hem ansa: “Bikos long taem wea God appruvim hem, hem bae kasem crown bilong laef, wea Jehovah hem promisim for olketa wea go ahed for lovem hem.”—James 1:12.
21. Nomata wanem hard samting iumi kasem, wanem promis nao God talem long olketa wea showimaot olketa faithful long hem?
21 Jesus bin warnim iumi hao insaed long world bae iumi kasem trabol. (John 16:33) Nomata olsem, Bible promisim hao “trabol or pain or persecution or hangre or wei for naked or danger” bae no separatem iumi from love bilong Jehovah and love bilong Son bilong hem. (Romans 8:35, 39) Iumi kasem bigfala comfort from iumi savve eni trabol wea iumi kasem hem for lelebet taem nomoa! Bat long distaem wea iumi weitim end bilong wei for olketa man safa, loving Dadi bilong iumi Jehovah, hem lukaftarem iumi. Sapos iumi ran long hem for protectim iumi, bae hem kamap “wanfala haefala sef ples for eniwan wea kasem hevi, wanfala hae sef ples long taem bilong trabol.”—Psalm 9:9.
Wanem Nao Iumi Lanem?
• Olketa Christian shud expectim wanem long disfala wicked world?
• Hao nao olketa strong prea bilong iumi savve strongim iumi taem iumi feisim olketa test?
• Long wanem wei nao spirit bilong God hem wanfala helper?
• Wanem nao iumi savve duim for helpem each other?
[Piksa long page 18]
Iumi mas luk aotem Jehovah olsem iumi ran go insaed wanfala strongfala taoa
[Olketa Piksa long page 20]
Olketa wea mature long spiritual wei praisem and encouragem narawan long evri chance wea kamap