Kwestin From Reader
Wanem nao Jesus minim taem hem sei long Nicodemus: “No eni man hem go ap long heven bat man wea kam daon from heven, hem Son bilong man”?—John 3:13.
Long datfala taem Jesus hem stap long earth, and hem no go bak yet long heven. Bat, information wea iumi garem abaotem Jesus, and olketa nara samting wea join witim toktok bilong hem savve helpem iumi for minim datfala toktok.
Jesus stap witim Dadi bilong hem long heven dastawe hem savve sei hao hem “kam daon from heven.” Bat long taem wea God markem, hem putim laef bilong Son bilong hem insaed bele bilong Mary, and diswan lead go for Jesus born olsem man. (Luke 1:30-35; Galatians 4:4; Hebrews 2:9, 14, 17) Bihaen Jesus dae, God bae resurrectim hem for kamap wanfala spirit person and hem go bak long heven for stap witim Jehovah. Dastawe, klosap long taem olketa bae killim Jesus dae, hem savve prea olsem: “Dadi, givim mi sem glory wea mi garem taem mi stap witim iu bifor, taem disfala world no stap yet.”—John 17:5; Romans 6:4, 9; Hebrews 9:24; 1 Peter 3:18.
Long datfala taem wea Jesus story witim Nicodemus, wea hem wanfala Pharisee and teacher long Israel, Jesus no go bak yet long heven. And no eni nara man dae and go ap long heven. Jesus talem hao nomata John Baptaesa, wea hem profet bilong God wea winim olketa nara profet, bat “man wea no important tumas insaed long kingdom bilong heven hem winim hem.” (Matthew 11:11) And aposol Peter explainim hao nomata King David wea faithful hem dae finis, hem stap yet long grev bilong hem. David nating go long heven. (Acts 2:29, 34) Reason why olketa wea dae bifor Jesus, olsem David, John Baptaesa, and olketa nara man wea faithful no go long heven, hem bikos olketa hia dae bifor Jesus startim and openem wei for olketa man for garem chance for resurrect and go long heven. Aposol Paul raet hao Jesus wea olsem first wan, hem “openem . . . wanfala niu wei wea lead go long laef” long heven.—Hebrews 6:19, 20; 9:24; 10:19, 20.
So, from Jesus no dae and resurrect yet, wanem nao hem minim taem hem sei long Nicodemus: “No eni man hem go ap long heven bat man wea kam daon from heven, hem Son bilong man”? (John 3:13) Ting raonem full story wea Jesus storyim witim Nicodemus.
Taem disfala bigman bilong Jew hem kam haed for lukim Jesus long naet, Jesus sei olsem long hem: “Tru nao mi talem iu, Sapos man no born moa, hem kanduit lukim kingdom bilong God.” (John 3:3) Nicodemus askem hem: ‘Hao nao olsem? Hao nao man savve born mek-tu taem?’ Hem no minim disfala teaching bilong God abaotem wei for go insaed Kingdom bilong God. Waswe, hem savve lanem eni samting from diswan? No eni nara man savve teachim hem eni samting abaotem diswan bikos no eniwan go finis long heven and fit for explainim hao for go insaed Kingdom. Jesus nomoa savve duim datwan. Hem savve teachim Nicodemus and olketa narawan bikos Hem kam daon from heven and dastawe hem fit for teachim pipol abaotem olketa samting hia.
Kwestin saed long disfala scripture hem showimaot wanfala important point abaotem wei for studyim Word bilong God. Iumi shud no garem daot abaotem wanfala verse bikos maet luk olsem hem hard for minim. Iumi mas markem samting wea Bible talem long wanfala scripture witim olketa nara scripture wea join witim datwan. And tu, staka taem olketa verse wea stap raonem savve helpem iumi for faendem stretfala mining for wanfala scripture wea maet lelebet hard for minim.