Jehovah, God Bilong Truth
“Iu nao baem mi bak, O Jehovah God bilong truth.”—PSALM 31:5.
1. Hao nao heven and earth taem no eni laea fasin stap?
LONGTAEM bifor kam, laea fasin no stap. Olketa perfect spirit creature stap long heven and servem Creator bilong olketa, datfala “God bilong truth.” (Psalm 31:5) No eni laea or giaman fasin stap. Jehovah hem tok tru evritaem long olketa spirit son bilong hem. Hem duim diswan from hem lovem and barava interest long olketa. Earth hem olsem tu long firstaem. Jehovah creatim firstfala man and woman, and hem evritaem story witim olketa long wei wea klia, isi for minim, and tru. Datwan mas wanfala nambawan taem!
2. Hu nao startim laea fasin, and why nao hem duim diswan?
2 Bat gogo, wanfala spirit son bilong God hem bighed for mekem hemseleva wanfala god wea againstim Jehovah. Disfala spirit creature, wea kamap Devil Satan, wantem olketa narawan for worshipim hem. For kasem goal bilong hem, hem nao startim laea fasin olsem wanfala wei wea hem savve kontrolem olketa narawan. From hem duim diswan, hem kamap “man for tok laea and father bilong laea fasin.”—John 8:44.
3. Wanem nao Adam and Eve duim taem Satan laea long olketa, and wanem nao kamaot from datwan?
3 Thru long wanfala snek, Satan talem datfala first woman, Eve, hao sapos hem no obeyim komand bilong God and hem kaikaim datfala tambu frut, bae hem no dae. Hem laea stret. Satan talem hem tu hao sapos hem kaikaim datwan bae hem kamap olsem God, bae hem savve long gud and nogud samting. Datwan tu laea. Nomata no eniwan tok laea long Eve bifor, hem mas luksavve hao samting wea datfala snek talem hem no agree witim samting wea God talem hasband bilong hem, Adam. Nomata olsem, hem chus for bilivim toktok bilong Satan, no Jehovah. From Satan barava giamanim hem, hem tekem datfala frut and kaikaim. Bihaen, Adam tu kaikaim datfala frut. (Genesis 3:1-6) Olsem Eve, Adam no herem eniwan tok laea bifor, nomata olsem, samting Satan talem long Eve no giamanim Adam. (1 Timothy 2:14) Thru long samting wea hem duim, Adam showimaot hem rejectim Creator bilong hem. Samting wea olketa man kasem from diswan hem barava nogud tumas. From Adam no obey, sin and dae—witim nogud fasin and bigfala wei for safa—kasem evri pikinini bilong hem.—Romans 5:12.
4. (a) Wanem nao olketa laea wea Satan talem long Eden? (b) Wanem nao iumi mas duim for no letem Satan giamanim iumi?
4 Laea fasin hem kamap big tu. Iumi mas luksavve hao laea toktok bilong Satan long garden bilong Eden hem wanfala attak againstim fasin bilong Jehovah for honest. Satan sei God giamanim firstfala man and woman for stopem tufala for kasem gudfala samting. Bat, datwan no tru. Adam and Eve no kasem eni gud samting from wei wea tufala no obey. Tufala dae olsem Jehovah talem. Nomata olsem, Satan go ahed for tok laea againstim Jehovah, gogo, planti handred year bihaen, aposol John raetem hao Satan “giamanim olketa man long earth.” (Revelation 12:9) For no letem Devil Satan giamanim iumi, iumi mas garem full trust hao Jehovah and Word bilong hem tru evribit. Hao nao iu savve mekem grow and strongim trust bilong iu long Jehovah and strongim iuseleva againstim giaman wei and olketa laea toktok bilong Enemy bilong hem?
Jehovah Hem Savve Long Truth
5, 6. (a) Wanem savve nao Jehovah hem garem? (b) Hao nao savve bilong olketa man taem iumi markem witim savve bilong Jehovah?
5 Bible evritaem talem hao Jehovah nao datwan wea “creatim evri samting.” (Ephesians 3:9) Hem nao “Datwan wea wakem heven and earth and sea and evri samting insaed long olketa.” (Acts 4:24) From Jehovah hem Creator, hem savve long truth abaotem evri samting. Olsem example: Tingim wanfala man wea designim and then buildim haos bilong hemseleva, hem nao putim ap evri timba and hammerim evri nila. Bae hem savve long evri part bilong datfala haos winim eni nara man. Pipol barava savve long samting wea olketa seleva nao designim and wakem. Long sem wei, Creator hem savve long evri samting abaotem creation bilong hem.
6 Long naesfala wei profet Isaiah storyim hao big nao savve bilong Jehovah. Hem sei: “Hu nao datwan wea measurem wata long hand bilong hem, and measurem size bilong heven witim waed bilong hand bilong hem and measurem aot dust bilong earth, or weim olketa maunten and olketa hill long wanfala scale? Hu nao measurem big bilong spirit bilong Jehovah, and hu nao man wea savve givim kaonsel long hem for mekem hem savve long eni samting? Hu nao hem story tugeta witim for mekem hem minim samting, or hu nao teachim hem abaotem wei bilong justice, or teachim hem savve, or mekem hem savve long barava wei for really minim gud?” (Isaiah 40:12-14) Tru nao, Jehovah hem “God bilong savve” and hem “perfect long savve.” (1 Samuel 2:3; Job 36:4; 37:16) Sapos iumi markem datwan witim savve bilong iumi, savve bilong iumi hem smol fogud! Nomata olketa man savve long planti samting, savve bilong iumi abaotem creation hem no kasem nomata “smolfala part long olketa wei bilong [God].” Hem olsem iumi markem “smolfala toktok” witim “maeti thunder.”—Job 26:14.
7. David luksavve long wanem abaotem savve bilong Jehovah, and diswan minim iumi mas luksavve long wanem samting?
7 From Jehovah creatim iumi, hem stret for sei hem savve gud long iumi. King David luksavve long diswan. Hem raet: “O Jehovah, iu lukluk gud insaed long mi, and iu savve gud long mi. Iu nao savve long taem wea mi sidaon and taem wea mi standap. Iu luksavve long tingting bilong mi from farawe. Iu markem finis evri gogo bilong mi and ples wea mi leidaon, and iu savve finis long evri wei bilong mi. Lukim! O Jehovah, no eni word savve stap long tongue bilong mi wea iu no savve finis long hem.” (Psalm 139:1-4) David hem luksavve hao olketa man garem free will—God givim iumi freedom for disaed for obey or no obeyim hem. (Deuteronomy 30:19, 20; Joshua 24:15) Nomata olsem, Jehovah savve gud long iumi winim wei wea iumi savve long iumiseleva. Hem laekem best samting for iumi, and hem fit for directim evriting iumi duim. (Jeremiah 10:23) Tru nao, Jehovah moa fit winim eni teacher, savveman, or man for givim kaonsel for teachim iumi truth and mekem iumi wise and hapi.
Jehovah Hem Tok Tru Evritaem
8. Hao nao iumi savve Jehovah hem tok tru evritaem?
8 Nomata man hem savve long wanem hem tru, datwan no minim hem bae tok tru evritaem. Olsem example, Devil chus for no “hol strong long truth.” (John 8:44) Long narasaed, Jehovah hem “fulap witim . . . truth.” (Exodus 34:6) Bible showimaot evritaem hao Jehovah hem honest. Aposol Paul talem hao “God kanduit laea.” (Hebrews 6:18; Titus 1:2) Wei for tok tru evritaem hem important part bilong fasin bilong God. Iumi savve depend long Jehovah and trustim hem bikos hem tok tru evritaem; no enitaem hem giamanim olketa loyal wan bilong hem.
9. Hao nao nem bilong Jehovah join witim truth?
9 Nem bilong Jehovah showimaot hem tok tru evritaem. Nem bilong hem minim “Hem Mekem Kamap.” Diswan showimaot hao Jehovah nao Datwan wea isisi fulfillim evri promis bilong hem. No eniwan moa fit for duim datwan. From Jehovah nao Most Hae Wan, no eniting savve blokem purpose bilong hem for fulfill. Jehovah hem tok tru evritaem, and tu, hem nomoa garem paoa and wisdom for mekem evri toktok bilong hem kamap tru.
10. (a) Hao nao Joshua lukim wei wea Jehovah hem tok tru evritaem? (b) Wanem nao olketa promis bilong Jehovah wea iu lukim fulfill?
10 Joshua hem wanfala long planti man wea lukim olketa spesol samting wea pruvim Jehovah hem tok tru evritaem. Joshua stap long Egypt taem Jehovah mekem tenfala trabol, wea hem talem firstaem, long datfala nation. Witim samfala nara samting, Joshua lukim wei wea olketa promis bilong Jehovah hem fulfill taem hem sevem olketa Israelite from Egypt and leadim olketa go long Promis Land, and winim olketa strongfala Caananite army wea againstim olketa. Taem hem klosap for dae, Joshua talem olketa older man long nation bilong Israel: “Iufala barava savve witim full heart bilong iufala and witim full soul bilong iufala hao no eni toktok long evri gudfala toktok wea God bilong iufala Jehovah talem long iufala hem fail. Evriwan kamap tru for iufala. No eni toktok hia hem fail.” (Joshua 23:14) Nomata iu no lukim olketa mirakol wea Joshua lukim, waswe, iu experiencem insaed laef bilong iu wei wea olketa promis bilong God tru?
Jehovah Showimaot Truth
11. Wanem nao pruvim Jehovah hem want for storyim truth long olketa man?
11 Tingim wanfala dadi or mami wea garem bigfala savve bat hem nating story witim olketa pikinini bilong hem. Iumi barava thankiu hao Jehovah hem no olsem. Long loving wei Jehovah hem story witim olketa man, and hem no hol bak for duim diswan. Bible kolem hem “Barava Nambawan Teacher.” (Isaiah 30:20) From loving-kaeness bilong hem, hem story tu witim olketa wea no laek for lisin long hem. Olsem example, Ezekiel kasem assignment for preach long olketa wea Jehovah savve finis bae no lisin. Jehovah hem sei: “Son bilong man, go insaed midolwan long haos bilong Israel, and iu mas talem toktok bilong mi long olketa.” Then hem givim warning: “Olketa bae no want for lisin long iu, from olketa no want for lisin long mi; bikos evriwan long haos bilong Israel olketa bighed and garem praodfala heart.” Datwan hem wanfala hard assignment, bat Ezekiel faithful for fulfillim and taem hem duim olsem hem showimaot fasin bilong Jehovah for kea long pipol. Sapos iu garem wanfala hard preaching assignment and iu depend long God, iu savve sure hem bae strongim iu olsem hem strongim profet bilong hem Ezekiel.—Ezekiel 3:4, 7-9.
12, 13. Long olketa wanem difren wei nao God story witim olketa man?
12 Jehovah wantem “evri difren kaen man mas sev and kasem stretfala savve bilong truth.” (1 Timothy 2:4) Hem story kam thru long olketa profet, olketa angel, and tu, thru long Son bilong hem wea hem lovem tumas, Jesus Christ. (Hebrews 1:1, 2; 2:2) Jesus hem sei long Pilate: “For diswan nao mi born kam, and for diswan nao mi kam insaed long world, for mi mas witness abaotem truth. Evriwan wea stap long saed bilong truth hem lisin long voice bilong mi.” Pilate garem nambawan chance for lanem truth abaotem samting wea Jehovah provaedem for salvation stret from Son bilong God. Nomata olsem, Pilate no stap long saed bilong truth, and hem no laek lane from Jesus. Bat, long wei for daot Pilate hem ansa: “Wanem nao truth?” (John 18:37, 38) Hem missim nambawan chance! Nomata olsem, planti lisin long truth wea Jesus talemaot. Hem sei long olketa disaepol bilong hem: “Hapi nao eye bilong iufala bikos hem lukim, and ear bilong iufala bikos hem herem.”—Matthew 13:16.
13 Jehovah keepim truth sef insaed long Bible and hem mek sure pipol evriwea savve kasem datwan. Evri samting Bible talem hem tru. Hem storyim olketa fasin, purpose, and komand bilong God, and tu, tru samting saed long olketa man. Jesus sei long prea long Jehovah: “Word bilong iu nao truth.” (John 17:17) Diswan minim Bible hem wanfala spesol buk. Hem nomoa buk wea God wea savve long evri samting muvim olketa man for raetem. (2 Timothy 3:16) Hem wanfala spesol present for olketa man, samting wea olketa servant bilong God barava tinghae long hem. Hem wise for iumi readim evriday.
Hol Strong Long Truth
14. Wanem nao samfala samting wea Jehovah sei hem bae duim, and why nao iumi shud bilivim hem?
14 Iumi shud ting strong long samting wea Jehovah talem iumi insaed Word bilong hem. Hem tok tru abaotem hemseleva, and bae hem duim samting wea hem sei hem bae duim. No eni reason stap for iumi no trustim God. Iumi fit for bilivim Jehovah taem hem sei hem bae “pei bak long olketa wea no savve long God and olketa wea no obeyim gud nius abaotem Lord bilong iumi Jesus.” (2 Thessalonians 1:8) Iumi savve trustim Jehovah tu taem hem sei hem lovem olketa wea aftarem raeteous fasin, taem hem sei hem bae givim laef olowe long olketa wea showimaot faith, and taem hem sei hem bae finisim pain, singaot, and dae tu. Jehovah strongim hao iumi savve trustim disfala last promis bilong hem taem hem givim disfala instruction long aposol John: “Raetem, from olketa toktok hia hem faithful and tru.”—Revelation 21:4, 5; Proverbs 15:9; John 3:36.
15. Wanem nao samfala laea wea Satan hem iusim?
15 Satan hem difren evribit from Jehovah. Hem no givim laet long pipol, bat hem giamanim olketa. For kasem goal bilong hem for mekem pipol tanawe from klinfala worship, Satan iusim planti difren laea. Olsem example, Satan laekem iumi for biliv God no interest for kam klos long iumi and hem no kea abaotem wei wea pipol long earth safa. Bat, Bible showimaot hao Jehovah hem barava kea for olketa man and hem barava sorre long nogud fasin and wei for safa. (Acts 17:24-30) Satan laekem pipol for bilivim tu hao hem iusles for aftarem olketa spiritual samting. Bat, Bible promisim iumi hao “God hem no wicked mekem hem forgetim waka bilong iufala and love wea iufala showimaot for nem bilong hem.” And tu, Bible talem klia hao “hem kamap man wea givim reward long olketa wea barava luk aotem hem.”—Hebrews 6:10; 11:6.
16. Why nao olketa Christian mas evritaem luk aot and hol strong long truth?
16 Aposol Paul talem hao Satan hem ‘god bilong disfala system wea blindim mind bilong olketa wea no biliv, for mekem laet bilong nambawan gud nius bilong Christ, wea hem image bilong God, for no showaot.’ (2 Corinthians 4:4) Olsem hem duim long Eve, Devil Satan barava giamanim samfala pipol. Olketa narawan followim wei bilong Adam, wea no obeyim God, no from Satan giamanim hem, bat from hem min for chusim wei olsem. (Jude 5, 11) Dastawe, hem important tumas for olketa Christian evritaem luk aot and hol strong long truth.
Jehovah Laekem “Faith wea No Hypocrite”
17. Wanem nao iumi mas duim for Jehovah appruvim iumi?
17 From Jehovah hem honest long evri wei bilong hem, hem expectim olketa wea worshipim hem for olsem tu. Man for raetem psalm hem sei: “O Jehovah, hu nao bae guest insaed tent bilong iu? Hu nao bae stap insaed long holy maunten bilong iu? Man wea wakabaot long stretfala wei and duim raeteous fasin and talem trufala toktok insaed long heart bilong hem.” (Psalm 15:1, 2) Wei wea olketa Jew wea singim olketa word hia storyim holy maunten bilong Jehovah bae mekem olketa tingim Maunt Zion, ples wea King David tekem kam ark bilong covenant long tent wea hem putimap long there. (2 Samuel 6:12, 17) Datfala maunten and tent bae mekem olketa tingim ples wea Jehovah hem stap long tokpiksa wei. Hem nao ples wea pipol savve kam front long God for prea for hem appruvim olketa.
18. (a) For kamap fren bilong God, wanem nao iumi mas duim? (b) Wanem nao bae iumi storyim long nextfala article?
18 Eniwan wea laek for fren witim Jehovah mas tok tru “insaed long heart bilong hem,” no witim mouth bilong hem nomoa. Olketa tru fren bilong God mas garem honest heart and mas showimaot “faith wea no hypocrite,” bikos trufala fasin hem kam from heart. (1 Timothy 1:5; Matthew 12:34, 35) Man wea fren bilong God hem no garem fasin for trikim or giamanim man, bikos “Jehovah barava heitim man wea giaman.” (Psalm 5:6) Olketa Jehovah’s Witness evriwea long earth trae hard for followim wei bilong God bilong olketa for tok tru evritaem. Long nextfala article iumi bae lukluk gud long disfala subject.
Hao Nao Bae Iu Ansa?
• Why nao Jehovah hem savve long truth abaotem evri samting?
• Wanem nao showimaot Jehovah hem tok tru evritaem?
• Hao nao Jehovah showimaot truth?
• Saed long truth, wanem nao iumi mas duim?
[Olketa Piksa long page 10]
God bilong truth hem savve long evri samting abaotem creation bilong hem
[Olketa Piksa long page 12, 13]
Olketa promis bilong Jehovah bae kamap