Waswe, Iu Savve Finis?

Wanem nao mekem Pontius Pilate for fraetem Ceasar?

For forcem Roman Governor Pontius Pilate for killim dae Jesus, olketa bigman long Jew tok olsem: “Sapos iu letem disfala man go free, iu no fren bilong Caesar.” (John 19:12) Disfala man “Caesar” hem datfala Roman Emperor Tiberius. So wanem nao mekem Pilate for fraetem disfala Caesar?

Tiberius Caesar hem wanem kaen man? Samfala year bifor Jesus go long kot, The New Encyclopædia Britannica talem hao Tiberius, “hem man wea laekem nomoa for duim wanem hemseleva tingim and hem duim eni kaen rabis samting for kasem datwan.” Wei for fraet krangge muvim hem for spoelem and killim dae eniwan wea hem tingse hem no faithful long hem. Datfala buk gohed for talem hao, “olketa man for raetem story abaotem pipol long bifor tu bilivim hao Tiberius laekem tumas olketa hapitaem wea raf and wea mekhae long rabis wei. Nomata wanem kaen story kamaot wea lelebet here gud abaotem Tiberius, hem savve killim dae nomoa eniwan long nogud wei and long enitaem wea hem laekem.”

Dastawe, diskaen wei bilong Tiberius mekem Pilate for followim wanem olketa leader bilong Jew laekem and olketa orderim Pilate for killim dae Jesus.​—⁠John 19:​13-​16.

Why nao Jesus wasim leg bilong olketa aposol bilong hem?

Long Israel bifor, hem no wei bilong pipol for werem sandol. Bat for olketa wea werem sandol, hem mas garem smol rope for taengem raonem leg bilong olketa. From olketa road and garden garem mud or dust, datwan mekem leg bilong olketa savve dirty.

Hem wei bilong pipol for aotem sandol firstaem bifor olketa go insaed long haos. Hem kastom bilong olketa Israelite bifor for wasim leg bilong olketa wea visit kam. Owner bilong haos or wanfala wakaman savve duim disfala waka. Staka taem nao Bible storyim datkaen kastom. Tingim samting wea Abraham talem long olketa wea visitim hem: “Plis, bae mi tekem kam lelebet wata, and mifala mas wasim leg bilong iufala. Then rest lelebet andanit tree. And mi bae tekem kam pis bred, for strongim heart bilong iufala.”​—⁠Genesis 18:​4, 5; 24:32; 1 Samuel 25:41; Luke 7:​37, 38, 44.

From iumi savve abaotem kastom bilong olketa Israelite bifor, diswan helpem iumi for minim why nao Jesus wasim leg bilong olketa disaepol long datfala taem bilong Pasova. Long datfala taem, no eniwan stap for duim disfala waka, and no eni disaepol tu laek for duim datwan. So taem Jesus tekem basin wata and towel for wasim leg bilong olketa aposol, hem teachim olketa for garem love and for hambol.​—⁠John 13:​5-​17.