Kwestin From Reader
Waswe, iumi savve talem barava taem long day wea olketa soldia nilam Jesus Christ long post?
Pipol askem datfala kwestin bikos luk olsem samting wea Mark talem abaotem dae bilong Jesus hem difren from wanem aposol John talem. Mark sei: “Long mek-thri hour nao olketa [soldia] nilam Jesus long datfala post.” (Mark 15:25) Bat John sei Pilate givim Jesus go long olketa Jew for nilam hem long post long “samting olsem mek-six hour.” (John 19:14-16) Olketa Bible savveman talem plande difren reason why tufala scripture hia difren. Bat no staka information stap long Bible for explainim why tufala scripture hia no talem sem samting. Nomata olsem, wei for minim hao pipol bifor ting long taem bae helpem iumi.
Long first century, olketa Jew sei 12-fala hour nao hem daylaet. Olketa markem datwan taem sun hem kamap. (John 11:9) “Mek-thri hour” hem start long 8 klok go kasem 9 klok long morning and “mek-six hour” hem start long 11 klok go kasem 12 klok long midolday. Hem tru, from year garem olketa difren season, taem wea sun hem kamap and go daon hem difren. And pipol savve markem taem followim wea nao sun hem stap. Dastawe Christian Greek Scripture no barava talem stret wanem taem long day nao wanfala samting hem happen, bat plande taem hem sei samting hem happen long samting olsem mek-thri hour, mek-six hour, or mek-naen hour. (Matt. 20:3, 5; Acts 10:3, 9, 30) Bat samfala scripture barava talem stret taem long day wea samting hem happen sapos datwan hem main samting long story. Olsem example, long John 4:52, hem sei samting hem happen long “mek-seven hour.”
Matthew, Mark, Luke, and John talem sem samting wea happen long day wea Jesus dae. Fofala evriwan sei long early morning olketa priest and olketa bigman hipap tugeta and bihaen, olketa tekem Jesus go long Pontius Pilate. (Matt. 27:1; Mark 15:1; Luke 22:66; John 18:28) Matthew, Mark, and Luke storyim hao long mek-six hour taem Jesus hange long post, evriwea start for dark nao and “datwan gohed kasem mek-naen hour.”—Matt. 27:45, 46; Mark 15:33, 34; Luke 23:44.
Bat tingim nara samting wea savve helpem iumi for savve long taem wea olketa soldia nilam Jesus long post. Long bifor, pipol savve whipim man bifor olketa nilam hem long post. Samfala taem pipol whipim man nogud gogo hem dae. Taem olketa whipim Jesus, luk olsem olketa whipim hem nogud dastawe narawan nao mas karem datfala post wea olketa bae nilam Jesus long hem. (Luke 23:26; John 19:17) Sapos wei for whipim man hem first samting wea olketa soldia savve duim, luk olsem bihaen olketa soldia whipim Jesus, tu-thri hour nao go pas bifor olketa nilam hem long post. So maet Mark tingim taem wea olketa whipim Jesus, and John tingim taem wea olketa nilam Jesus long post. Maet hem nao reason why Mark and John talem difren taem long day wea olketa soldia nilam Jesus long post.
Aposol John raetem Gospel bilong hem staka year bihaen Matthew, Mark, and Luke raetem Gospel bilong olketa. So hem savve long wanem olketa raetem. Hem tru, John storyim taem long day wea luk olsem hem difren from wanem Mark talem, bat datwan showimaot John no copyim wanem Mark raetem. God iusim holy spirit for leadim John and Mark for raetem Gospel bilong olketa. Nomata Bible no barava talem reason why tufala scripture hia hem difren, iumi savve trustim wanem olketa Gospel talem.