Young Pipol Askem . . .

Hao Nao Mi Savve Preach Long Olketa Skulfren?

“Mi go aot for preach and seknomoa mi meetim samwan wea mi savve. Mi no savve tok nao! Partner bilong mi nao mas tok for mi.”​—Alberto.

“Mi savve dat haos bilong wanfala long class bilong mi stap long disfala road, so mi askem big brata bilong mi nao for story long evri haos. Gogo hem start for feel taed so hem askem mi for duim next door. Taem mi noknok batawea,hem nao long there! Mi fraet fogud!”​—James.

PLANTI taem young pipol ting man bae ‘lus mark’ sapos hem story abaotem religion. Bat, midolwan olketa tru Christian, olketa young wan tinghae long spesol privilege wea olketa garem for storyim biliv bilong olketa long nara pipol. Dastawe, planti thousand young Witness bilong Jehovah share insaed haos-tu-haos preaching waka. Bat samfala duim witim fraet bikos olketa ting maet olketa meetim samwan from skul. Jennifer hem talem: “Mi still fraet for meetim pipol wea mi go skul witim.” nomata hem lusim hae skul (secondary skul) samfala year finis.

Sapos iu wanfala young Christian, maet iu feel olsem tu samfala taem. Tru, iumi evriwan fraet for samwan rejectim iumi, so hem normal for wari taem iumi mas story abaotem Bible witim wanfala skulfren.a Bat no eni reason stap for letem wei for fraet hem stopem iu. Waswe, iu rememberim man insaed Bible wea nem bilong hem “Joseph from Arimathea”? Hem bilivim olketa samting wea hem lanem from Jesus. Nomata olsem, Bible storyim Joseph olsem “wanfala disaepol bilong Jesus bat hem secret wan bikos hem fraetem olketa Jew.” (John 19:38) Hao nao bae iu ting long wanfala fren wea laek for keepim wei wea iutufala fren olsem secret? (Luke 12:8, 9) So, iumi no sapraes hao God hem expectim evri Christian for “talemaot long pablik” faith bilong olketa. (Romans 10:10) Datwan minim for story witim olketa young wan long skul bilong iu tu.

Joseph bilong Arimathea hem winim fraet bilong hem taem hem go ask for berem body bilong Jesus. Hao nao iu savve winim fraet bilong iu?

Mekem Grow Wei for Barava Want for Preach

Aposol Paul hem no feel shame for talemaot faith bilong hem long nara pipol. Long Romans 1:15, hem storyim wei wea hem barava interest for talemaot message bilong Bible. Wanem nao mekem hem interest tumas olsem? Hem sei long verse 16: “Mi no shame long gud nius; tru tumas, hem nao paoa bilong God for givim salvation long evriwan wea garem faith.” Waswe long iu? Waswe, iu really pruvim truth long iuseleva finis? (Romans 12:2) Waswe, iuseleva barava sure message bilong Bible hem “paoa bilong God for salvation”?

Wei for attendim olketa Christian meeting witim dadi and mami bilong iu nomoa hem no inaf. Wanfala young wan wea nem bilong hem Deborah sei: “Hem isi for go nomoa long olketa meeting, bikos dadi and mami talem iu for go. Bat taem pipol askem mi olketa kwestin abaotem Bible, mi no savve hao for ansarem olketa.” Wanfala young wan wea nem bilong hem Mi Young sei olsem tu: “Mifala mas pruvim long mifala seleva hao diswan nao hem truth.”

Wanem nao savve muvim iu for sharem savve wea iu garem long Bible witim nara pipol? Studyim seleva. Wanfala young wan wea nem bilong hem Sean sei olsem: “Taem iu start for studyim Bible seleva, iu start for mekem truth samting bilong iuseleva. Iu study for iuseleva.” Hem tru, no evriwan garem fasin for laek for study. “Mi no laek for read,” Shevon hem talem. “So firstaem mi faendem hem hard for readim Wastaoa and Wekap! or for readim Bible evriday. Bat gogo, mi start for duim.”

Wanem nao kamaot from wei for waka hard for study olsem? Aposol Paul sei: “Faith kamap bihaen man herem samting.” (Romans 10:17) Taem faith and biliv bilong iu grow, tingting bilong iu bae change. Wanfala young girl from Brazil wea nem bilong hem Elisângela sei: “For olsem wanfala Christian hem wanfala honor, no samting for feel shame long hem.” Tru nao, taem faith bilong iu grow, diswan muvim iu for story long nara pipol—and olketa insaed class bilong iu tu. Paul hem sei: “Iumi. . . showimaot faith and dastawe iumi toktok.” (2 Corinthians 4: 13) And tu, hao nao iu savve “klin from blood” bilong nara pipol sapos iu no talemaot savve wea fit for givim laef long olketa young wan wea iu lukim evriday?—Acts 20:26, 27.

Bat, samfala young Christian no feel fit for story long nara pipol abaotem Bible. Wanfala young wan wea nem bilong hem Joshua sei: “Sapos iu no savve wanem for talem, iu bae no enjoyim wei for preach.” Wei for garem deep savve long Bible bae helpem iu for iusim long gudfala wei. (2 Timothy 2:15) Insaed olketa kongregeson bilong Olketa Jehovah’s Witness, olketa young wan savve go long olketa elder and askem help for mekem grow savve for teach. Wanfala young wan from Germany wea nem bilong hem Matthias sei: “Taem mi start for really story witim pipol—and no just offerim Bible pablikeson nomoa—mi start for enjoyim preaching waka.”

Last samting, iu savve prea long God for helpem iu story witim wei for no fraet. (Acts 4:29) Aposol Paul seleva hem kasem help bilong God long diswan. Long 1 Thessalonians 2:2, hem sei: “Mifala kasholem fasin for no fraet thru long God bilong iumi for talem iufala gud nius bilong God witim bigfala wei for stragol.” Wanfala buk sei nara transleison bilong diswan hem, “God tekaotem fraet from heart bilong mifala.” So hem gud tumas for prea and askem God for tekaotem fraet from heart bilong iu.

Talemaot Hu Nao Iu

For join witim datfala prea, iu savve duim wanfala samting wea showimaot iu no fraet. Wanfala young girl from England wea nem bilong hem Chic, sei olsem: “Talem olketa skulfren bilong iu hao iu wanfala Christian.” Iu no laek for olsem wanfala ‘secret disaepol.’ Wanfala young wan wea nem bilong hem Rebecca sei bifor, hem savve fraet tumas for meetim samwan wea hem savve long hem taem hem duim preaching waka. Bat hem sei “sapos iu talem olketa iu wanfala Christian and hao iu savve go from haos tu haos, samfala taem bae olketa ask, ‘So, bae enitaem iu kam long haos bilong mi?’ ”

Bat iu no need for weit for olketa chance for preach. Lukaotem olketa chance for story abaotem faith bilong iu long skul. Rememberim olketa kwestin wea aposol Paul askem: “Hao nao olketa bae showimaot faith long man wea olketa no here abaotem? Hao nao olketa bae herem sapos no eniwan preach?” (Romans 10:14) Iu nao best wan for helpem olketa insaed class bilong iu for herem truth. Wanfala young wan wea nem bilong hem Iraida lukim diswan: “Skul hem wanfala territory wea mifala nomoa savve kasem.” Planti young wan mekius long chance for preach long enitaem.

Bat, samfala taem olketa skul assignment givim iu chance for sharem truth bilong Bible. Wanfala girl from England wea nem bilong hem Jaimie sei: “Mifala storyim evolution long science class, and mi talem olketa biliv bilong mi. Wanfala boy mekfani long mi and sei Olketa Jehovah’s Witness no garem savve and no fit for go skul. Bat, stretawe olketa nara pikinini long class saportim mi.” Luk olsem wei wea hem garem gud nem olsem wanfala Christian hem kasem gud samting. Jaimie sei moa: “From diswan, mi givim wanfala copy bilong buk Is There a Creator Who Cares About You? long wanfala girl insaed class bilong mi.”b

Wanfala girl long Romania wea nem bilong hem Roxana talem semkaen experience: “Teacher bilong mi sei class bae story abaotem alcohol, tobacco, and olketa drug. So mi tekem go March 22, 2000, issue bilong Awake! long subject ‘How You Can Quit Smoking.’ Wanfala girl insaed class bilong mi lukim datfala magasin, tekem, and no laek givim bak long mi. Bihaen hem readim, hem sei hem disaed strong for finis from smoke.”

Maet iu no evritaem kasem experience olsem. Bat Ecclesiastes 11:6 encouragem iumi: “Long morning plantim seed bilong iu and go kasem evening no letem hand bilong iu for rest; from iu no savve wea nao bae iu win.” Nomata sapos no eniwan interest, wei for sharem wanem iu bilivim long skul bae putim faondeson for gudfala story sapos enitaem iu meetim wanfala skulfren long haos-tu-haos ministry. Jessica, wanfala young girl from England sei: “Wei for witness long olketa wea iu savve from skul hem moa isi bikos iu savve finis long olketa.” Maet iu sapraes hao samfala skulfren bilong iu interest tumas for savve long olketa biliv bilong iu.

Hem tru, no evriwan bae hapi for story witim iu. Bat Jesus givim disfala gudfala advaes: “Long eni ples wea pipol no welkamim iufala or lisin long toktok bilong iufala, taem iufala go aot from datfala haos . . . sekem dust from leg bilong iufala.” (Matthew 10:14) Diswan minim iu no ting iu nao olketa rejectim. Long wei bilong peace lusim hem and luk for samwan wea moa willing for lisin. Gogo bae iu faendem olketa wea garem honest heart wea hangre for truth and willing for lisin. Waswe, bae iu hapi tumas sapos wanfala hia hem skulfren bilong iu? Sapos olsem, iu bae hapi tumas from iu winim fraet bilong iu for sharem faith bilong iu witim olketa insaed class bilong iu.

[Olketa footnote]

[Blurb long page 12]

“Taem iu start for studyim Bible seleva, iu start for mekem truth samting bilong iuseleva.”​—Sean.

[Piksa long page 10]

No fraet for talemaot iu wanfala Christian

[Piksa long page 10]

Planti taem olketa class assignment givim chance for sharem olketa Bible truth