Kingdom Gud Nius Hem Wanem Samting?
Last year long 235 kantri raonem world, 6,035,564 pipol, young and olo, iusim 1,171,270,425 hour for storyim disfala samting long nara pipol. Witim wei for talemaot, olketa givim long hand bilong pipol winim 700 million literature wea explainim disfala samting. Olketa givimaot tu staka thousand kaset and videokaset for pullim interest bilong pipol long disfala samting. Wanem nao “disfala samting”?
“DISFALA SAMTING” hem gud nius abaotem Kingdom bilong God. Tru nao, wei wea olketa preachim “disfala gud nius bilong kingdom” distaem hem winim enitaem bifor long history bilong man.—Matthew 24:14.
Olketa wea duim disfala preaching and teaching waka wea kamap evriwea long world hem olketa volunteer. Long tingting bilong world, maet olketa no luk fit for duim disfala waka. So wanem nao mekem olketa no fraet and win? Main samting nao hem paoa bilong Kingdom gud nius, bikos hem nius abaotem olketa blessing wea olketa man bae kasem. Evri man barava laekem olketa blessing hia—hapi, free from hard living saed long selen, gudfala gavman, peace and sef living, and datfala samting wea man hard for bilivim—laef olowe! Diswan hem barava gud nius for pipol wea lukaotem mining and purpose bilong laef. Yes, sapos iu acceptim and followim disfala Kingdom gud nius, iu bae kasem evri blessing hia and samfala moa.
Wanem Nao Datfala Kingdom?
Bat, wanem nao datfala Kingdom wea olketa talemaot olsem gud nius? Hem datfala Kingdom wea olketa teachim staka million for prea for hem, hem nao: “Dadi bilong mifala wea stap long heven, letem nem bilong iu kamap holy. Letem kingdom bilong iu kam. Letem will bilong iu kamap long earth, olsem long heven.”—Matthew 6:9, 10.
Hem datfala Kingdom wea Hebrew profet Daniel tok abaotem winim 2,500 year bifor, taem hem raet: “God bilong heven bae startim wanfala kingdom wea bae nating savve finis. And datfala kingdom bae no go long eni narafala pipol. Hem bae smasem and finisim evri kingdom hia, and hemseleva nao bae stap olowe.”—Daniel 2:44.
So, disfala gud nius hem abaotem Kingdom, or gavman, wea thru long hem God bae finisim evri wicked fasin and then rul ovarem full earth long peace. Hem bae fulfillim firstfala purpose bilong Creator for man and earth.—Genesis 1:28.
“Kingdom Bilong Heven Hem Kam Klosap Nao”
Klosap 2,000 year bifor, first man for talemaot Kingdom gud nius hem wanfala man wea lukluk and wei bilong hem kasholem interest bilong staka pipol. Datfala man hem John datfala Baptaesa, son bilong Jew priest Zechariah and waef bilong hem, Elizabeth. John werem kaleko from hair bilong camel, witim leather strap raonem bele bilong hem, olsem profet Elijah, wea piksarem hem. Bat message bilong hem nao kasholem interest bilong staka pipol. Hem talemaot: “Repent, from kingdom bilong heven hem kam klosap nao.”—Matthew 3:1-6.
Olketa wea lisin long John nao olketa Jew wea sei olketa worshipim trufala God, Jehovah. Olsem wanfala nation, olketa kasem Law covenant thru long Moses samting olsem 1,500 year bifor. Datfala nambawan temple still stap yet long Jerusalem, wea olketa savve offerim olketa sakrifaes followim Law. Olketa Jew feel sure worship bilong olketa hem stret long eye bilong God.
Bat, taem olketa herem John, samfala start for luksavve hao religion bilong olketa hem no olsem wanem olketa tingim. Greek kastom and teaching go insaed teaching bilong Jew religion. Olketa biliv and kastom bilong man spoelem, and aotem tu, datfala law wea Moses kasem from God. (Matthew 15:6) From olketa followim olketa leader bilong religion wea no garem mercy and garem hardfala heart, God no acceptim nao worship bilong staka long olketa. (James 1:27) Olketa need for repent from sin bilong olketa againstim God and againstim datfala Law covenant.
Long datfala taem, staka Jew ting for lukim promis Messiah, or Christ, and samfala no sure abaotem John: “Maet hem nao Christ?” Bat, John denyim diswan and leadim olketa long difren man, wea hem sei olsem abaotem hem: “Mi no fit for taemapem rope bilong sandol bilong hem.” (Luke 3:15, 16) Taem hem firstaem showim Jesus long olketa disaepol bilong hem, John hem sei: “Lukim, Lamb bilong God wea tekem awe sin bilong world!”—John 1:29.
Diswan hem barava gudfala nius, bikos John hem really showim evri pipol datfala wei for laef and hapi—Jesus, datwan wea “tekem awe sin bilong world.” Olsem olketa pikinini bilong Adam and Eve, evri man born anda long sin and dae wea spoelem man tumas. Romans 5:19 sei: “Thru long wei wea wanfala man [Adam] no obey, planti kamap sinner, long sem wei tu, thru long wei wea wanfala man [Jesus] obey, planti bae kamap raeteous.” Jesus, olsem datfala lamb long sakrifaes, hem ‘tekem awe sin’ and changem bak sorre living bilong olketa man. Bible hem sei: “Pei bilong sin hem dae, bat present wea God givim hem laef olowe thru long Christ Jesus Lord bilong iumi.”—Romans 6:23.
Olsem perfect man—tru nao, nambawan man wea winim evri nara man—Jesus start for preachim gud nius. Toktok bilong Bible long Mark 1:14, 15 talem iumi: “Nao bihaen olketa putim John long prison Jesus hem go long Galilee, hem preach abaot disfala gud nius bilong God and hem sei: ‘Appointed taem hem fulfill, and kingdom bilong God hem kam klosap. Repent, iufala pipol, and garem faith long disfala gud nius.’”
Olketa wea acceptim message bilong Jesus and showim faith long gud nius kasem bigfala blessing. John 1:12 sei: “Long planti pipol wea acceptim [Jesus], hem openem wei for olketa for kamap olketa pikinini bilong God, from olketa showimaot faith long nem bilong hem.” From olketa pikinini, or son, bilong God, olketa gogo nao for kasem reward bilong laef olowe.—1 John 2:25.
Bat datfala privilege for kasem olketa Kingdom blessing hem no for olketa long first century nomoa. Olsem iumi talem finis, olketa talemaot and teachim disfala gud nius bilong Kingdom bilong God long full earth distaem. So olketa Kingdom blessing stap yet distaem. Wanem nao iu mas duim for kasem olketa blessing olsem? Nextfala article bae minim kam datwan.