“Luk Aotem Eniwan wea Fit”

Damascus hem wanfala bigfala taon long first century. Staka frut tree nao stap raonem, wea hem ples for rest bilong pipol wea travel kam from east. No longtaem bihaen Jesus Christ hem dae, wanfala Christian kongregeson kamap long Damascus. Samfala member insaed datfala kongregeson hem olketa Jew wea kamap follower bilong Jesus long Festival bilong Pentecost long Jerusalem long 33 C.E. (Acts 2:5, 41) Samfala disaepol from Judea muv kam long Damascus maet taem persecution kamap bihaen olketa sutim Stephen long ston.—Acts 8:1.

Maet long 34 C.E., wanfala Christian from Damascus wea nem bilong hem Ananias kasem wanfala barava spesol assignment. Lord sei long hem: “Getap, go long street wea garem nem Straight, and long haos bilong Judas lukim wanfala man wea garem nem Saul, bilong Tarsus. Lukim! hem prea.”—Acts 9:11.

Datfala street wea nem bilong hem Straight, hem 1.5 kilometer long and hem stap long midol long Damascus. From disfala piksa from mek-19 century wea iumi lukim long disfala page, iumi savve minim lukluk bilong datfala taon long taem bifor. From wei wea olketa designim datfala taon, hem mas tekem Ananias longfala taem for luk aotem haos bilong Judas. Gogo, Ananias hem faendem datfala haos, and from datwan Saul kamap aposol Paul, wanfala wea strong for talemaot gud nius.—Acts 9:12-19.

Jesus hem sendem aot olketa disaepol bilong hem and talem olketa for “luk aotem eniwan wea fit” saed long gud nius. (Matthew 10:11) Luk olsem, Ananias trae for faendem Saul. Olsem Ananias, Olketa Jehovah’s Witness barava hapi for faendem olketa wea fit and olketa hapi tumas taem pipol acceptim gud nius bilong Kingdom. For faendem olketa hem barava mekem waka hia win.—1 Corinthians 15:58.

[Piksa long page 32]

Datfala“Street wea olketa kolem Straight” distaem

[Piksa Credit Line long page 32]

From the book La Tierra Santa, Volume II, 1830