Message wea Iumi Mas Talemaot

“FRAET LONG TRUFALA GOD AND OBEYIM OLKETA KOMANDMENT BILONG HEM”

LONGTAEM bifor taem bilong olketa Christian, Jehovah talem faithful Abraham abaotem arrangement bilong hem for “evri nation bilong earth” blessim olketa seleva. (Gen. 22:18) Hem muvim Solomon tu for raet abaotem wanfala barava important responsibility bilong evri man: “Fraet long trufala God and obeyim olketa komandment bilong hem. From diswan nao full responsibility bilong man.” (Eccl. 12:13) Bat hao nao bae pipol long evri nation lane abaotem olketa samting hia?

Nomata long full history samfala pipol wea bilivim word bilong God stap, Bible showimaot hao bigfala witnessing waka abaotem gud nius wea bae barava kasem evri nation bae kamap long “day bilong Lord.” Diswan hem start long 1914. (Rev. 1:10) Revelation 14:6, 7 talem hao long datfala taem wanfala barava important announcement wea olketa angel leadim bae go aot “long evri nation and tribe and languis and pipol.” Olketa bae kasem encouragement for: “Fraet long God and givim hem glory, from hour bilong judgment bilong hem kam finis nao, and so worshipim Datwan wea mekem heven and earth and sea and evri wata.” Hem will bilong God for pipol herem disfala message. Iumi garem privilege for share long datfala waka.

Datfala “Trufala God.” Taem Jehovah hem talemaot, “Iufala nao olketa witness bilong mi,” hem long taem wea kwestin abaotem hu nao God hem kamap. (Isa. 43:10) Message wea mas go aot hem no for talem pipol olketa mas garem wanfala religion or mas biliv long wanfala god. Bat, olketa need for kasem chance for lanem hao Creator bilong heven and earth nomoa hem trufala God. (Isa. 45:5, 18, 21, 22; John 17:3) Trufala God nomoa savve talem samting abaotem future wea iumi savve trustim. Hem privilege bilong iumi for showim pipol hao wei wea word bilong Jehovah hem fulfill bifor hem strongfala reason for iumi trustim evri samting wea hem promisim for future.—Josh. 23:14; Isa. 55:10, 11.

Hem tru, planti wea iumi witness long olketa worshipim olketa nara god or sei olketa no worshipim eni god. For mekem olketa willing for lisin long iumi, maet iumi need for startim story long samting wea iumi and olketa tu interest long hem. Example long Acts 17:22-31 savve helpem iumi. Lukim wei wea nomata aposol Paul hem tingim feeling bilong pipol, hem talemaot klia hao evri man mas givim ansa long datfala God wea hem Creator bilong heven and earth.

Talemaot Nem Bilong God. No hol bak for mekem pipol savve long nem bilong God. Jehovah lovem nem bilong hem. (Ex. 3:15; Isa. 42:8) Hem laekem pipol for savve long datfala nem. Hem mekem nambawan nem bilong hem kamap winim 7,000 taem insaed Bible. Hem responsibility bilong iumi for mekem pipol savve long datfala nem.—Deut. 4:35.

Future bilong evri man hem depend long wei wea olketa savve long Jehovah and singaot long hem long faith. (Joel 2:32; Mal. 3:16; 2 Thess. 1:8) Bat, klosap evri pipol no savve long Jehovah. Insaed diswan hem staka wea sei olketa worshipim God bilong Bible. Nomata sapos olketa garem Bible and readim, maet olketa no savve long nem bilong God bikos samfala niu transleison aotem datwan. Only samting wea samfala pipol savve abaotem datfala nem Jehovah hem wei wea olketa bigman bilong olketa talem olketa for no iusim.

Hao nao iumi savve mekem pipol savve long nem bilong God? Best wei nao hem for showim olketa from Bible—Bible bilong olketa seleva sapos fitim. Long samfala transleison, datfala nem hem stap planti thousand taem. Long samfala narawan, hem maet stap nomoa long Psalm 83:18 or Exodus 6:3-6, or long footnote long Exodus 3:14, 15 or 6:3. Long olketa scripture wea firstfala languis text iusim nem bilong God, samfala transleison raetem long difren wei olketa word olsem “Lord” and “God.” Taem olketa niu transleison aotem nem bilong God evribit, maet iu need for iusim wanfala Bible transleison wea moa old for pruvim diswan long pipol. Long samfala kantri iu savve showim nem bilong God insaed samfala song bilong religion or long raeting wea stap long samfala building.

For pipol wea worshipim olketa nara god, iu savve iusim Jeremiah 10:10-13 long New World Translation long gudfala wei. Hem talem no nem bilong God nomoa bat hem explainim klia tu hu nao hem.

No haedem datfala nem Jehovah long wei for iusim olketa title olsem “God” and “Lord,” olsem Christendom duim. Diswan no minim iu mas iusim datfala nem long start bilong evri story. From samfala pipol againstim iumi, bae olketa stopem story sapos iumi duim olsem. Bat bihaen iu startim story finis, no hol bak for iusim nem bilong God.

Hem interesting samting hao Bible iusim nem bilong God staka taem moa winim olketa title olsem “Lord” and “God.” Nomata olsem, olketa man wea raetem Bible no trae for iusim nem bilong God long evri sentence. Olketa iusim long wei wea fitim and showimaot respect. Diswan hem gudfala example for iumi followim.

Fasin Bilong Man wea Garem Datfala Nem. Nomata wei wea God garem nem bilong hemseleva hem wanfala important truth, staka moa samting stap for lane abaotem hem.

For lovem Jehovah and singaot long hem long faith, pipol need for savve wanem kaen God nao hem. Taem Jehovah talemaot nem bilong hem long Moses long Maunt Sinai, Hem duim moa samting winim wei for talem moa datfala word “Jehovah.” Hem mekhae long samfala nambawan fasin bilong Hem. (Ex. 34:6, 7) Datwan hem example for iumi followim.

Nomata sapos iu witness long man wea interest or iu givim olketa tok long kongregeson, taem iu storyim olketa Kingdom blessing, storyim wanem nao olketa blessing hia showimaot abaotem datfala God wea mekem olketa promis olsem. Taem iu storyim olketa komandment bilong hem, mekhae long wisdom and love wea showaot long olketa. Talem klia hao olketa mark bilong God hem for helpem iumi, no for putim hevi long iumi. (Isa. 48:17, 18; Mic. 6:8) Storyim hao evri difren wei wea Jehovah showimaot paoa bilong hem showim iumi samting abaotem fasin and olketa mark and purpose bilong hem. Mekhae long balance wei wea Jehovah showimaot olketa fasin bilong hem. Letem pipol herem iu taem iu talemaot feeling bilong iu for Jehovah. Love bilong iu for Jehovah savve muvim nara pipol for garem semkaen love.

Message for taem bilong iumi wea hem important tumas hem for encouragem pipol evriwea for fraet long God. Thru long samting iumi talem, iumi shud trae for muvim pipol for garem diskaen fasin for fraet long God. Diswan minim gudfala wei for fraet, for honorim Jehovah, and for garem deep respect for hem. (Ps. 89:7) Hem minim iumi mas luksavve long Jehovah olsem barava hae Judge and hao future laef bilong iumi hem depend long wei wea hem appruvim iumi. (Luke 12:5; Rom. 14:12) So, wei for fraet olsem hem join witim deep love for hem, and from diswan, strongfala feeling for laek mekem hem hapi. (Deut. 10:12, 13) Fasin for fraet long God muvim iumi tu for heitim nogud samting, obeyim olketa komandment bilong God, and for worshipim hem witim full heart. (Deut. 5:29; 1 Chron. 28:9; Prov. 8:13) Hem protectim iumi from wei for trae for servem God and semtaem lovem olketa samting bilong disfala world.—1 John 2:15-17.

Nem Bilong God—“Wanfala Strongfala Taoa.” Pipol wea barava savve long Jehovah kasem bigfala protection. Diswan hem no from olketa iusim nem bilong hem or savve long samfala fasin bilong hem nomoa. Hem bikos olketa trustim Jehovah seleva. Proverbs 18:10 sei olsem abaotem olketa: “Nem bilong Jehovah hem wanfala strongfala taoa. Man wea raeteous ran go long hem and kasem protection.”

Iusim gud olketa chance for encouragem nara pipol for trustim Jehovah. (Ps. 37:3; Prov. 3:5, 6) Kaen trust olsem minim man garem faith long Jehovah and olketa promis bilong hem. (Heb. 11:6) Taem pipol ‘singaot long nem bilong Jehovah’ from olketa savve hem nao Sovereign Bilong Universe, lovem olketa wei bilong hem, and biliv evribit hao trufala salvation savve kam from hem nomoa, then—Word bilong God promisim iumi—olketa bae sev. (Rom. 10:13, 14) Taem iu teachim pipol, helpem olketa for mekem grow kaen faith olsem long evri part long laef.

Planti pipol feisim olketa problem wea big tumas. Olketa maet no lukim eni ansa. Encouragem olketa for lanem wanem nao will bilong Jehovah, for trustim hem, and for live followim samting olketa lanem. (Ps. 25:5) Encouragem olketa for prea strong for help bilong God and for talem thankiu long hem for olketa blessing. (Phil. 4:6, 7) Taem olketa savve long Jehovah, no from samting olketa readim long Bible nomoa, bat from olketa luksavve tu long wei wea olketa promis bilong hem fulfill long laef bilong olketa seleva, olketa bae start for feel sef from olketa barava minim nem bilong Jehovah.—Ps. 34:8; Jer. 17:7, 8.

Iusim gud evri chance for helpem pipol for minim and tinghae long wei wea hem wise for fraet long trufala God, Jehovah, and keepim olketa komandment bilong hem.

“WITNESS ABAOTEM JESUS”

BIHAEN resurrection bilong hem and bifor hem go bak long heven, Jesus Christ givim instruction for olketa disaepol bilong hem taem hem sei: “Iufala bae witness for mi . . . go kasem evri farawe ples long earth.” (Acts 1:8) Bible storyim olketa loyal servant bilong God long taem bilong iumi olsem olketa wea “garem waka for witness abaotem Jesus.” (Rev. 12:17) Waswe, iu strong for givim datfala witness?

Planti pipol wea sei olketa biliv long Jesus no savve long eniting abaotem laef bilong hem bifor hem kam long earth olsem wanfala man. Olketa no minim hao hem wanfala really man taem hem stap long earth. Olketa no savve long mining bilong wei wea hem Son bilong God. Olketa no savve gud long part wea hem duim insaed wei wea purpose bilong God hem fulfill. Olketa no savve wanem nao hem duim distaem, and olketa no luksavve hao samting hem bae duim long future bae affectim laef bilong olketa. Maet samfala mistek for tingse Olketa Jehovah’s Witness no biliv long Jesus. Hem privilege bilong iumi for trae for helpem pipol savve long truth abaotem evri samting hia.

Samfala nara pipol no biliv eni really man olsem Jesus wea Bible story abaotem hem laef bifor. Samfala tingse Jesus hem wanfala important man nomoa. Planti rejectim idea hao hem Son bilong God. For “witness abaotem Jesus” long kaen pipol olsem, iumi need for trae hard, and garem patient and kaenfala fasin.

Nomata wanem nao tingting bilong olketa wea lisin long iu, olketa mas kasem savve abaotem Jesus Christ for kasem gud samting from arrangement bilong God for laef olowe. (John 17:3) Will bilong God hem for evriwan “talemaot Jesus Christ nao hem Lord” and stap anda long paoa bilong hem. (Phil. 2:9-11) So, iumi mas duim samting taem iumi meetim pipol wea garem rong idea bat wea strong for bilivim or wea barava againstim. Nomata samfala taem iumi savve free for story abaotem Jesus Christ—nomata long first kol—samfala narataem maet iumi need for tingting gud abaot wanem nao for talem for helpem olketa wea lisin for start for garem stretfala tingting abaotem hem. And tu, maet iumi need for tingim hao for storyim samfala difren saed bilong datfala subject taem iumi visitim man moa long future. Nomata olsem, maet hem hard for iumi storyim evri samting saed long diswan go kasem taem iumi conductim hom Bible study witim hem.—1 Tim. 2:3-7.

Important Waka Bilong Jesus Insaed Purpose Bilong God. Iumi need for helpem pipol minim hao iumi kanduit fren witim God long wei wea hem appruvim sapos iumi no garem faith long Jesus Christ, from Jesus hem “wei” and ‘no eniwan savve kam long Dadi bat only thru long hem.’ (John 14:6) Sapos wanfala man no luksavve long important waka wea Jehovah givim for firstborn Son bilong hem, hem kanduit minim Bible. Why nao olsem? Bikos Jehovah mekem disfala Son main wan for fulfillim olketa purpose bilong Hem. (Col. 1:17-20) Olketa Bible profesi join witim diswan. (Rev. 19:10) Jesus Christ nao wan wea God iusim for provaedem ansa for evri problem wea kamaot from bighed fasin bilong Satan and sin bilong Adam.—Heb. 2:5-9, 14, 15.

For minim waka bilong Christ, man mas luksavve hao olketa man garem problem wea olketa seleva no savve stretem. Iumi evriwan born long sin. Diswan savve affectim iumi long planti difren wei insaed laef bilong iumi. Bat gogo, iumi dae from diswan. (Rom. 3:23; 5:12) Story raonem diswan taem iu witness long pipol. Then storyim hao long loving wei thru long ransom sakrifaes bilong Jesus Christ, Jehovah mekem wei for pipol wea showimaot faith long datwan for sev from sin and dae. (Mark 10:45; Heb. 2:9) Diswan openem wei for olketa kamap perfect and enjoyim laef olowe. (John 3:16, 36) No eni nara samting savve duim diswan. (Acts 4:12) Nomata taem iu teach long kongregeson or man wanwan, duim moa samting winim wei for talem evri point hia. Long patient and kaenfala wei, helpem olketa wea lisin for garem feeling for thankiu for part wea Christ hem duim olsem Man for Baem Bak iumi. Taem man hem tinghae long diswan, hem savve affectim tingting, fasin, and olketa goal long laef bilong hem.—2 Cor. 5:14, 15.

Hem tru, Jesus givim laef bilong hem olsem sakrifaes wanfala taem nomoa. (Heb. 9:28) Nomata olsem, distaem hem serve olsem Hae Priest. Helpem olketa narawan for minim diswan. Waswe, olketa kasem hevi, feel wikdaon, safa, or kasem problem from pipol wea stap raonem olketa no showimaot kaenfala fasin? Taem Jesus stap long earth, hem kasem evri samting hia. Hem minim feeling bilong iumi. From iumi no perfect, waswe, iumi feelim need for kasem mercy bilong God? Sapos iumi prea for God forgivim iumi long faondeson bilong sakrifaes bilong Jesus, hem kamap “wanfala for helpem iumi witim Father.” Olsem man wea kea, hem “askem samting for iumi.” (1 John 2:1, 2; Rom. 8:34) Long faondeson bilong sakrifaes bilong Jesus and from waka bilong hem olsem Hae Priest, iumi savve kam long “throne bilong kaeness bilong Jehovah wea man no fit for kasem,” for kasem help long barava taem. (Heb. 4:15, 16) Nomata iumi no perfect, help wea Jesus givim olsem Hae Priest helpem iumi servem God witim klin conscience.—Heb. 9:13, 14.

And tu, Jesus garem bigfala paoa olsem wan wea God markem for kamap Hed bilong Christian kongregeson. (Matt. 28:18; Eph. 1:22, 23) Olsem Hed, hem givim direction wea iumi needim wea fitim will bilong God. Taem iu teachim olketa narawan, helpem olketa for minim hao Jesus Christ, and no eni man, hem Hed bilong kongregeson. (Matt. 23:10) Start from taem wea iu meetim olketa wea interest, invaetem olketa long olketa kongregeson meeting, wea iumi studyim Bible witim help from information wea kam thru long “faithful and wise slave.” Explainim hu nao datfala “slave” and tu hu nao Masta, mekem olketa luksavve long hedship bilong Jesus. (Matt. 24:45-47) Introducem olketa long olketa elder, and explainim olketa mark long Bible wea olketa hia mas kasem. (1 Tim. 3:1-7; Titus 1:5-9) Explainim hao olketa elder no ownim kongregeson bat olketa helpem iumi for wakabaot followim olketa step bilong Jesus Christ. (Acts 20:28; Eph. 4:16; 1 Pet. 5:2, 3) Helpem olketa interest wan hia for luksavve hao wanfala sekson wea organize anda long hedship bilong Christ hem stap evriwea long world.

Long olketa Gospel, iumi lanem hao taem Jesus kam long Jerusalem no longtaem bifor hem dae, olketa disaepol bilong hem praisem hem olsem “Datwan wea kam olsem King long nem bilong Jehovah!” (Luke 19:38) Taem pipol studyim Bible long wei wea moa deep, olketa lanem hao distaem Jehovah hem givim Jesus paoa for rul wea affectim pipol bilong evri nation. (Dan. 7:13, 14) Taem iu givim olketa tok long kongregeson or conductim olketa study, helpem pipol minim and tinghae long wanem nao rul bilong Jesus shud minim for iumi evriwan.

Strongim hao living bilong iumi hem showimaot sapos iumi barava bilivim Jesus Christ hem King and sapos iumi willing for stap anda long rul bilong hem. Mekhae long waka wea Jesus assignim olketa follower bilong hem for duim, bihaen hem kamap King. (Matt. 24:14; 28:18-20) Storyim samting wea Jesus, datfala Nambawan Man for Givim Kaonsel, hem sei abaotem wanem nao important samting long laef. (Isa. 9:6, 7; Matt. 6:19-34) Mekhae long spirit wea datfala Prince Bilong Peace sei olketa follower bilong hem bae showimaot. (Matt. 20:25-27; John 13:35) Careful for no judgem samting wea narawan duim, bat encouragem olketa for ting raonem wanem nao waka bilong olketa hem showimaot abaotem wei wea olketa stap anda long rul bilong Christ. Taem iu duim olsem, talem hao iu tu need for duim sem samting.

Putim Christ Olsem Faondeson. Bible markem waka for mekem wanfala Christian disaepol olsem waka for buildim samting wea garem Jesus Christ olsem faondeson. (1 Cor. 3:10-15) For duim diswan, helpem pipol for savve long Jesus long wei wea Bible storyim hem. Careful, nogud olketa luk go long iu olsem wan wea olketa followim. (1 Cor. 3:4-7) Helpem olketa for luk go long Jesus Christ.

Sapos iu putim gudfala faondeson, olketa student bae minim hao Christ leavim wanfala example for iumi “followim gud olketa step bilong hem.” (1 Pet. 2:21) For build antap long datwan, encouragem olketa student for readim olketa Gospel, no olsem trufala history nomoa bat olsem example for followim. Helpem olketa for tinghevi long tingting and fasin bilong Jesus. Encouragem olketa for lukim feeling bilong Jesus for Father bilong hem, wei wea hem deal witim olketa temptation and hard taem, hao hem stap anda long God, and wei wea hem deal witim olketa man long planti difren samting wea happen. Mekhae long datfala waka wea Jesus duim evritaem. Then, taem wanfala student mas disaedem samting or hem kasem olketa test long laef bilong hem, hem bae askem hemseleva: ‘Wanem nao Jesus bae duim sapos diswan kasem hem? Waswe, samting wea mi bae duim bae showimaot mi tinghae long wanem hem duim for mi?’

Taem iu givim tok long kongregeson, no tingse iu no need for barava mekhae long Jesus from olketa brata bilong iu garem finis faith long hem. Samting iu talem bae garem moa mining sapos iu build antap long datfala faith. Taem iu storyim olketa meeting, joinim datwan witim waka bilong Jesus olsem Hed bilong kongregeson. Taem iu storyim field ministry, mekhae long spirit wea Jesus showimaot taem hem duim ministry bilong hem, and showim hao datwan join witim waka wea Christ, olsem King, hem duim for hipimap pipol for stap laef and go insaed long niu world.

Hem klia hao pipol needim moa samting winim wei for lanem olketa main truth abaotem Jesus. For kamap olketa trufala Christian, pipol mas showimaot faith long hem and garem trufala love for hem. Kaen love olsem muvim pipol for loyal for obey. (John 14:15, 21) Hem helpem pipol for stand strong long faith taem olketa kasem trabol, for go ahed wakabaot followim olketa step bilong Christ long full laef bilong olketa, for pruvim hao olketa mature Christian wea barava “garem rut and stap strong antap long faondeson.” (Eph. 3:17) For followim kaen wei olsem givim glory long Jehovah, God and Father bilong Jesus Christ.

“DISFALA GUD NIUS BILONG KINGDOM”

TAEM hem givim information abaotem saen wea markem taem wea hem bae stap moa and end bilong disfala system, Jesus talem profesi olsem: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matt. 24:14.

Wanem nao disfala message wea mas kasem evri ples long earth? Hem abaotem datfala Kingdom wea Jesus teachim iumi for prea long God for hem, taem hem sei: “Letem kingdom bilong iu kam.” (Matt. 6:10) Revelation 11:15 storyim hem olsem “kingdom bilong Lord [Jehovah] bilong iumi and Christ bilong hem,” bikos paoa for rul hem kam from Jehovah and hem givim long Christ olsem King. Bat lukim hao message wea Jesus sei hem for taem bilong iumi hem moa big winim wanem olketa follower bilong hem long first century preachim. Olketa talem pipol: “Kingdom bilong God hem kam klosap long iufala.” (Luke 10:9) Jesus, datwan wea kasem anointing olsem King, hem stap midol long olketa. Bat olsem Matthew 24:14 showimaot, Jesus talem profesi hao long full world wanfala announcement bae go aot abaotem nara important samting saed long wei wea purpose bilong God hem fulfill.

Profet Daniel kasem vision abaotem diswan. Hem lukim “samwan wea olsem son bilong man,” Jesus Christ, hem kasem from “Man From Taem Bifor Kam,” Jehovah God, “paoa for rul and honor and kingdom, mekem evri pipol, nation and languis mas servem hem.” (Dan. 7:13, 14) Datfala samting wea affectim full universe hem happen long heven long year 1914. Bihaen, olketa torowem datfala Devil and olketa demon bilong hem kam daon long earth. (Rev. 12:7-10) Hem start bilong olketa last day bilong disfala old system. Bat bifor hem finis evribit, disfala announcement hao Messiah King bilong Jehovah hem rul distaem from throne bilong hem long heven, hem go aot long full world. Pipol long evri ples herem diswan. Samting olketa duim hem showimaot tingting bilong olketa abaotem Most Hae olsem Ruler long “kingdom bilong olketa man.”—Dan. 4:32.

Hem tru, moa samting bae happen—planti moa! Iumi go ahed for prea, “Letem kingdom bilong iu kam,” bat hem no from iumi tingse Kingdom bilong God hem no kamap yet. Bat, hem bikos iumi laekem datfala Kingdom long heven for fulfillim olketa profesi olsem Daniel 2:44 and Revelation 21:2-4. Bae hem changem disfala earth for kamap wanfala paradaes wea fulap witim pipol wea lovem God and narafala pipol. Taem iumi preachim “disfala gud nius bilong kingdom,” iumi storyim olketa hope hia for future. Bat iumi talem pipol tu hao Jehovah hem givim finis full paoa for rul long Son bilong hem. Waswe, iu strongim disfala gud nius taem iu witness abaotem Kingdom?

Explainim Kingdom. Hao nao iumi savve fulfillim assignment bilong iumi for talemaot Kingdom bilong God? Maet iumi mekem pipol interest long wei for startim story long planti difren subject, bat no longtaem bihaen hem shud klia hao message bilong iumi hem abaotem Kingdom bilong God.

Important part bilong disfala waka hem for readim or talem toktok bilong olketa scripture wea storyim datfala Kingdom. Taem iu storyim Kingdom, mek sure olketa wea iu story witim minim wanem nao datwan. Maet iu need for talem moa samting winim wei for sei Kingdom bilong God hem wanfala gavman. Maet hem hard for samfala pipol tingim wanfala gavman wea olketa no savve lukim. Maet iu story raonem diswan long samfala difren wei. Olsem example, iumi no savve lukim gravity, bat hem affectim laef bilong iumi long bigfala wei. Iumi no savve lukim Datwan wea mekem law bilong gravity, bat hem klia hem garem bigfala paoa. Bible kolem hem “King bilong olowe.” (1 Tim. 1:17) Or maet iu sei hao long wanfala big kantri, planti pipol no kasem kapitol taon, or barava lukim ruler bilong olketa. Olketa lane abaotem samting olsem thru long olketa nius report. Long sem wei, Bible, wea stap long winim 2,200 languis, hem talem iumi abaotem Kingdom bilong God; hem storyim hu nao garem paoa and wanem nao datfala Kingdom hem duim. Purpose bilong Wastaoa, wea hem stap long moa languis winim eni nara magasin, hem for “Talemaot Kingdom Bilong Jehovah,” olsem front page hem talem.

For helpem pipol minim wanem nao Kingdom, maet iu laek storyim samfala samting wea olketa wantem olketa gavman for provaedem: freedom from wari abaotem selen, peace, freedom from crime, no favorim eni sekson, education, and gud samting saed long health. Showim hao Kingdom bilong God nomoa bae givim olketa samting hia and evri nara gudfala samting wea olketa man wantem.—Ps. 145:16.

Trae for muvim feeling bilong pipol for want for stap anda long datfala Kingdom, wea Jesus Christ rul olsem King. Storyim olketa mirakol wea hem duim olsem example bilong samting hem bae duim olsem King long heven. Evritaem storyim olketa naesfala fasin wea hem showimaot. (Matt. 8:2, 3; 11:28-30) Explainim hao hem givim laef bilong hem for iumi and hao bihaen, God resurrectim hem for laef wea kanduit dae long heven. From there nao hem rul olsem King.—Acts 2:29-35.

Strongim hao Kingdom bilong God hem rul from heven distaem. Bat iu mas luksavve hao planti pipol no tingse samting wea olketa kasem and lukim hem pruvim Kingdom bilong God hem rul. Luksavve long datwan and askem olketa sapos olketa savve wanem nao Jesus Christ talem bae pruvim datfala Kingdom hem stap. Mekhae long samfala part bilong datfala saen long Matthew chapter 24, Mark chapter 13, or Luke chapter 21. Then askem why nao olketa samting olsem bae kamap long earth taem Christ hem kamap King long heven. Point go long Revelation 12:7-10, 12.

Olsem example for pruvim wanem nao Kingdom bilong God hem duim, readim Matthew 24:14 and storyim program bilong Bible education wea go ahed long full world distaem. (Isa. 54:13) Talem pipol abaotem olketa difren skul wea helpem Olketa Jehovah’s Witness—wea garem faondeson long Bible, and no garem eni fee. Explainim hao, witim haos-tu-haos ministry bilong iumi, iumi offerim olketa free hom Bible study long olketa famili and pipol wanwan insaed winim 230 kantri. No eni gavman bilong man hem fit for provaedem bigfala education program olsem for pipol bilong hem and for pipol long full earth tu. Invaetem pipol for kam long Kingdom Hall, for attendim olketa assembly and convention bilong Olketa Jehovah’s Witness, for lukim pruv hao kaen education olsem hem affectim laef bilong pipol.—Isa. 2:2-4; 32:1, 17; John 13:35.

Bat, waswe, bae haosholder luksavve hao diswan affectim laef bilong hemseleva? Long kaenfala wei maet iu talem hao visit bilong iu hem for storyim chance wea evriwan garem for chusim laef anda long Kingdom bilong God. Hao? Long wei for lanem wanem nao God laekem iumi for duim and for live followim datwan distaem.—Deut. 30:19, 20; Rev. 22:17.

Helpem Narawan Putim Kingdom Firstaem. Nomata bihaen man acceptim Kingdom message, hem mas disaedem samfala samting. Hao important nao bae Kingdom bilong God long laef bilong hem? Jesus encouragem olketa disaepol bilong hem for “go ahed . . . lukaotem firstaem kingdom.” (Matt. 6:33) Hao nao iumi savve helpem nara Christian for duim olsem? Taem iumiseleva kamap gudfala example and long wei for storyim olketa chance for duim olsem. Maet, long wei for askem man sapos hem bin ting raonem samfala wei and for sharem olketa experience wea showim wanem nao olketa narawan duim. For storyim olketa Bible story long wei wea mekem love bilong man for Jehovah moa deep. Strongim wei wea Kingdom hem wanfala really samting. Strongim hao datfala waka for talemaot Kingdom hem barava important. Planti taem, best samting hem for no talem pipol wanem olketa need for duim, bat muvim feeling bilong olketa for laek duim datwan.

Tru tumas, main samting wea datfala barava important message wea iumi evriwan mas talemaot hem mekhae long hem, hem Jehovah God, Jesus Christ, and datfala Kingdom. Iumi mas mekhae long olketa important truth saed long olketa hia taem iumi witness long pablik, long olketa kongregeson bilong iumi, and long laef bilong iumi wanwan. Taem iumi duim olsem, iumi showimaot hao iumi barava kasem gud samting from Theocratic Ministry Skul education bilong iumi.