• “Olketa Nambawan Samting Bilong God” Nao Muvim Iumi
    Wastaoa—2002 | August 1

    • Muvim Olketa for Duim Samting!

      4. Wanem profesi bilong Joel nao fulfill long day bilong Pentecost 33 C.E.?

      4 Bihaen olketa kasem holy spirit, stretawe olketa disaepol long Jerusalem start for sharem gud nius bilong salvation witim nara pipol, olketa first wan nao, crowd wea hipap long datfala morning. Preaching bilong olketa hem fulfillim wanfala spesol profesi wea Joel, son bilong Pethuel, raetem eit handred year bifor: “Mi bae pourimaot spirit bilong mi long evri difren kaen pipol, and olketa son bilong iufala and olketa dota bilong iufala bae talemaot profesi. And olketa olo man bilong iufala bae garem olketa dream. And olketa young man bilong iufala bae lukim olketa vision. And mi bae pourimaot spirit bilong mi tu long olketa man servant and girl servant long datfala taem . . . bifor bigfala day bilong Jehovah wea fit for mekem man fraet hem kam.”—Joel 1:1; 2:28, 29, 31; Acts 2:17, 18, 20.

      5. Long wanem wei nao olketa Christian long first-century profesi? (Lukim footnote.)

      5 Waswe, diswan minim God bae mekem kamap wanfala full genereson bilong olketa profet, olketa man and woman, wea olsem David, Joel, and Deborah, and iusim olketa for talemaot samting wea bae kamap long future? Nomoa. Wei wea olketa Christian ‘son and dota, olketa man servant and girl servant’ bae profesi hem minim spirit bilong Jehovah bae muvim olketa for talemaot “olketa nambawan samting” wea Jehovah duim finis and bae duim. So, olketa bae serve olsem olketa wea toktok for Most Hae.a Bat, hao nao diswan affectim datfala crowd?—Hebrews 1:1, 2.