Helpem Nara Pipol for Acceptim Kingdom Message

“Agrippa sei long Paul: ‘Long shortfala taem iu bae muvim mi for kamap wanfala Christian.’”—ACTS 26:28.

1, 2. Why nao aposol Paul hem kam front long Governor Festus and King Herod Agrippa II?

LONG Caesarea long 58 C.E., King Herod Agrippa II and sista bilong hem Bernice visitim Governor Porcius Festus wea kam from Rome. Governor Festus hem invaetem tufala, and tufala kam “long stael wei” and “kam insaed kot rum witim olketa army komanda and olketa bigman bilong taon.” Then Festus hem givim komand for Christian aposol Paul for kam front long olketa. Wanem nao lead go long wei wea disfala follower bilong Jesus Christ hem kam front long Governor Festus for judgment?—Acts 25:13-23.

² Samting wea Festus talem long olketa guest bilong hem ansarem datfala kwestin. Hem sei: “King Agrippa and iufala evri man wea stap long hia witim mifala, iufala lukim disfala man wea staka Jew long Jerusalem and long hia, olketa singaot for hem mas no go ahed for laef. Bat mi luksavve hem no duim eniting wea mekem hem fit for dae. So taem disfala man seleva hem appeal long Caesar, mi disaed for sendem hem go. Bat mi no garem eniting wea klia for raetem long Lord bilong mi abaotem hem. So mi kolem hem kam front long iufala, and especially front long iu, King Agrippa, mekem bihaen iu lukim hem saed long law, mi bae garem samting for raet abaotem. Long tingting bilong mi hem no fitim for sendem wanfala prisoner and no explainim olketa samting wea pipol accusim long hem.”—Acts 25:24-27.

3. Why nao olketa bigman bilong religion accusim Paul?

³ Toktok bilong Festus showimaot hao Paul mas feisim olketa giaman toktok for sei hem againstim gavman—wea dae nao hem panis bilong diswan. (Acts 25:11) Bat, Paul hem no guilty. Olketa toktok hia kam from jealous fasin bilong olketa bigman bilong religion long Jerusalem. Olketa againstim waka wea Paul duim for talemaot Kingdom and olketa heitim wei wea hem helpem pipol for kamap follower bilong Jesus Christ. Paul ask for go front long Caesar so olketa tekem hem from Jerusalem witim strong security go long Caesarea, wea stap long saedsea. From there nao olketa bae tekem hem go long Rome.

4. Wanem toktok wea mekem iumi sapraes nao King Agrippa hem talem?

⁴ Tingim Paul long palace bilong governor, hem standap front long grup wea wanfala long olketa hem ruler bilong important part long Kingdom bilong Rome. King Agrippa tan go long Paul and sei: “Iu savve toktok.” Taem olketa word kamaot from mouth bilong Paul, wanfala spesol samting happen. Samting wea Paul talem hem start for affectim datfala king. Tru nao, King Agrippa hem sei: “Long shortfala taem iu bae muvim mi for kamap wanfala Christian.”—Acts 26:1-28.

5. Why nao toktok bilong Paul for Agrippa hem barava muvim hem?

⁵ Tingim datwan! From nambawan wei wea Paul hem toktok, paoa bilong Word bilong God hem affectim wanfala ruler. (Hebrews 4:12) Wanem samting saed long toktok bilong Paul nao muvim man hia? And wanem nao iumi savve lanem from Paul wea savve helpem iumi long waka for mek disaepol? Sapos iumi lukluk gud long toktok bilong hem, tufala main point showaot klia: (1) Paul hem muvim tingting bilong olketa taem hem tok. (2) Hem iusim gud savve bilong hem long Word bilong God, long sem wei wea man for build hem iusim gud wanfala tul.

Iusim Wei for Pullim Tingting

6, 7. (a) Taem Bible iusim toktok “pullim tingting,” wanem nao hem minim? (b) Hao nao man pullim tingting bilong pipol taem hem helpem olketa for acceptim wanfala Bible teaching?

⁶ Long buk bilong Acts, Greek word for pullim tingting hem kamap planti taem long olketa story abaotem Paul. Wanem mining nao diswan garem saed long waka bilong iumi for mek disaepol?

⁷ Vine’s Expository Dictionary of New Testament Words hem talem hao long firstfala languis bilong Christian Greek Scripture, “pullim tingting” hem minim for “win ovarem” or “changem tingting bilong man witim toktok wea affectim hem saed long gud or nogud samting.” Bae iumi minim moa diswan sapos iumi lukluk long main mining bilong disfala toktok. Hem minim wei for trust. So, sapos iu pullim tingting bilong wanfala man for acceptim wanfala Bible teaching, iu mekem hem trustim datwan, so hem garem faith long wei wea datfala teaching hem tru. So, hem no inaf for just talem man wanem Bible sei for mekem hem bilivim datwan and duim samting followim datwan. Man wea lisin long iu mas barava bilivim dat wanem iu talem hem tru, nomata hem wanfala pikinini, wanfala neiba, wakfren, skulfren, or wanfala relative.—2 Timothy 3:14, 15.

8. Wanem nao insaed long wei for mekem man bilivim wanfala tru samting from Bible?

⁸ Hao nao iu savve mekem wanfala man for bilivim samting wea iu talem from Word bilong God hem tru? For changem tingting bilong pipol wea hem story long olketa, Paul hem iusim wei for pullim tingting, stretfala pruv, and strongfala wei for ask.a So iu no talem nomoa hao datfala samting hem tru bat iu need for givim stretfala pruv for saportim toktok bilong iu. Hao nao iu savve duim diswan? Mek sure toktok bilong iu hem barava kam from Word bilong God and no tingting bilong man nomoa. And tu, iusim samfala extra pruv for saportim toktok wea iu sure hem stret witim Bible. (Proverbs 16:23) Olsem example, sapos iu sei hao olketa man wea obey bae enjoyim laef insaed wanfala paradaes earth, saportim datfala toktok witim olketa Bible scripture olsem Luke 23:43 or Isaiah 65:21-25. Hao nao iu savve givim moa pruv for saportim datfala point wea kam from Bible? Iu savve iusim olketa example wea datwan wea lisin hem minim. Maet iu talem hem abaotem hapi wea man kasem wea no kostim selen, olsem taem sun go daon and luk naes tumas, flaoa wea smel naes, frut wea teist gud tumas, or taem wanfala mami bird hem lukaftarem olketa pikinini bilong hem. Helpem hem for minim hao olketa hapi olsem pruvim dat Creator laekem iumi for enjoyim laef long earth.—Ecclesiastes 3:11, 12.

9. Hao nao iumi savve showimaot balance fasin long preaching waka bilong iumi?

⁹ Taem iu trae for pullim tingting bilong samwan for acceptim wanfala Bible teaching, mas careful for no letem strongfala feeling mekem iu here olsem iu ova tumas or bossim hem, and diswan satem mind and heart bilong man wea lisin long iu. Ministry Skul buk hem talem disfala warning: “Hem hard for pipol acceptim wei for talem stret hao biliv bilong olketa hem rong, nomata iumi pruvim witim planti Scripture. Olsem example, for tok strong againstim olketa holiday wea pipol laekem tumas olsem heathen samting, maet hem no changem feeling bilong olketa. Sapos iu pullim tingting long balance wei maet iu garem moa chance for helpem olketa.” Why nao iumi shud trae for pullim tingting bilong pipol? Ministry Skul buk sei moa: “Gudfala wei for pullim tingting hem encouragem pipol for story, mekem pipol ting raonem bihaen, and hem openem wei for story moa long future. Hem savve strong for muvim pipol.”—Colossians 4:6.

Wei for Pullim Tingting wea Muvim Heart

10. Long wanem wei nao Paul startim wei for defendim hemseleva front long Agrippa?

¹⁰ Distaem iumi lukluk gud long wei wea Paul defendim hemseleva long Acts chapter 26. Lukim hao hem startim toktok bilong hem. Long introduction, Paul faendem tru reason for praisem Agrippa, nomata datfala king duim dirty fasin witim sista bilong hem Bernice. Paul sei: “Abaotem evri samting wea olketa Jew accusim long mi, King Agrippa, mi hapi mi bae defendim miseleva tuday front long iu, main reason from iu savve gud long evri kastom and tu olketa problem midolwan olketa Jew. Dastawe mi barava askem iu for herem mi long patient wei.”—Acts 26:2, 3.

11. Hao nao toktok bilong Paul for Agrippa hem showimaot respect, and hao nao gudfala samting kamap?

¹¹ Waswe, iu lukim hao Paul hem luksavve long hae position bilong Agrippa taem hem kolem hem King? Diswan showimaot respect, and from Paul chusim toktok long wisefala wei, hem givim honor long Agrippa. (1 Peter 2:17) Datfala aposol hem luksavve hao Agrippa hem wanfala savveman saed long olketa kastom and law bilong olketa Jew wea stap anda long hem and sei hem hapi from hem savve defendim hemseleva front long wanfala ruler wea garem savve olsem. Paul, wanfala Christian, hem no act olsem hem moa hae winim Agrippa, wea hem no wanfala Christian. (Philippians 2:3) Bat, Paul ask strong long datfala king for lisin long hem long patient wei. So, Paul hem mekem wei redy for Agrippa, and olketa narawan wea lisin, for moa isi for acceptim samting wea hem redy for talem. Hem leim wanfala faondeson, wanfala samting wea evriwan agree long hem, for buildim olketa point bilong hem antap.

12. Long waka for talemaot Kingdom, hao nao iumi savve muvim heart bilong olketa wea lisin long iumi?

¹² Olsem Paul taem hem story long Agrippa, iumi want for muvim heart bilong olketa wea lisin, from introduction go kasem conclusion, taem iumi story abaotem Kingdom message. Iumi savve duim diswan taem iumi showimaot trufala respect for man wea iumi preach long hem and showimaot trufala interest long living and tingting bilong hem.—1 Corinthians 9:20-23.

Iusim Word Bilong God Witim Savve

13. Hao nao iu, olsem Paul, savve muvim olketa wea lisin long iu?

¹³ Paul wantem olketa wea lisin for followim datfala gud nius. (1 Thessalonians 1:5-7) For duim datwan, hem trae for muvim tokpiksa heart bilong olketa, main samting wea muvim man. Taem iumi go ahed for storyim wei wea Paul defendim hemseleva front long Agrippa, lukim hao Paul ‘iusim word bilong God long stretfala wei’ taem hem storyim olketa samting wea Moses and olketa profet talem.—2 Timothy 2:15.

14. Explainim hao nao Paul iusim wei for pullim tingting taem hem stap front long Agrippa.

¹⁴ Paul savve Agrippa hem wanfala Jew long nem nomoa. From savve bilong Agrippa saed long Judaism, Paul sei insaed long preaching waka bilong hem, hem “talem nomoa samting wea olketa Profet and Moses tu talem bae kamap” saed long dae and resurrection bilong Messiah. (Acts 26:22, 23) Paul askem Agrippa stret olsem: “Waswe, King Agrippa, iu bilivim olketa Profet?” Agrippa feisim problem nao. Sapos hem sei hem rejectim olketa profet, nem bilong hem olsem wanfala Jew wea biliv bae kamap nogud. Bat sapos hem agree witim tingting bilong Paul, hem bae showimaot long pablik hem agree witim aposol and maet olketa kolem hem wanfala Christian. Paul hem wise for ansarem kwestin bilong hemseleva long wei olsem: “Mi savve iu bilivim.” Hao nao heart bilong Agrippa muvim hem for ansa? Hem ansa: “Long shortfala taem iu bae muvim mi for kamap wanfala Christian.” (Acts 26:27, 28) Nomata Agrippa no kamap wanfala Christian, message bilong Paul affectim heart bilong hem long samfala wei.—Hebrews 4:12.

15. Hao nao Paul hem startim wanfala kongregeson long Thessalonica?

¹⁵ Waswe, iu lukim hao insaed wei wea Paul storyim gud nius hem talemaot toktok and tu hem pullim tingting bilong man? From Paul ‘iusim word bilong God long stretfala wei,’ samfala wea herem hem no lisin nomoa bat start for biliv tu. Samting olsem hem happen long Thessalonica, wea Paul hem luk aotem olketa Jew and Gentile wea fraet long God long synagogue. Story long Acts 17:2-4 hem sei: “For fitim kastom bilong Paul hem go long olketa, and long thrifala Sabbath day hem iusim olketa Scripture for pullim tingting bilong olketa, hem explainim and pruvim from olketa scripture hao Christ mas safa and laef bak from dae . . . From diswan samfala long olketa kamap pipol wea biliv.” Paul hem pullim tingting. Hem storyim gud, explainim, and pruvim from olketa Scripture hao Jesus nao hem datfala Messiah wea pipol weitim for longtaem finis. Samting wea kamaot? Wanfala kongregeson bilong olketa wea biliv hem start.

16. Hao nao iu savve faendem bigfala hapi long wei for talemaot Kingdom?

¹⁶ Waswe, iu savve kamap moabeta for savve hao for muvim tingting taem iu explainim Word bilong God? Sapos olsem, bae iu kasem moa hapi long waka bilong iu for preachim and teachim pipol abaotem Kingdom bilong God. Diswan hem samting wea happen long olketa wea followim olketa idea for iusim Bible olowe taem olketa talemaot gud nius long preaching waka.

17. For showim hao wei for iusim Bible long ministry bilong iumi hem gud samting, storyim experience bilong iuseleva or main point bilong experience long disfala paragraf.

¹⁷ Wanfala example, wanfala traveling overseer bilong Olketa Jehovah’s Witness raet olsem: “Staka brata and sista distaem holem Bible long hand bilong olketa taem olketa witness from door tu door. Diswan helpem olketa pablisa for readim wanfala scripture long planti pipol wea olketa meetim. Hem helpem haosholder and pablisa tu for tingim Bible, and no just olketa magasin and buk, saed long ministry bilong iumi.” Tru, for holem Bible or nomoa taem iumi duim preaching waka hem depend long difren kaen samting, olsem wei bilong pipol long area bilong iumi. Nomata olsem, iumi shud wantem pipol for ting long iumi olsem pipol wea iusim Word bilong God for pullim tingting bilong pipol for acceptim Kingdom message.

Garem Tingting Bilong God Abaotem Ministry

18, 19. (a) Hao nao God ting long ministry bilong iumi, and why nao iumi shud garem and mekem grow tingting bilong hem? (b) Wanem nao bae helpem iumi for win for duim olketa return visit? (Lukim box wea garem title “Hao for Win for Duim Return Visit,” long page 16.)

¹⁸ Narafala wei for kasem heart bilong olketa wea lisin long iumi hem for garem tingting bilong God abaotem ministry and tu for patient. Will bilong God hem for evri kaen man “kasem stretfala savve bilong truth.” (1 Timothy 2:3, 4) Waswe, datwan nao samting iumi wantem? Jehovah hem patient tu, and patient fasin bilong hem givim samfala chance for planti repent. (2 Peter 3:9) So, taem iumi faendem samwan wea willing for lisin long message bilong Kingdom, maet iumi need for go bak long olketa planti taem for mekem grow datfala interest. For lukim olketa seed bilong truth hem grow needim taem and patient fasin. (1 Corinthians 3:6) Datfala box wea garem title “Hao for Win for Duim Return Visit” hem givim olketa idea for mekem kaen wei for interest olsem for grow. Remember, living bilong pipol—olketa problem and samting wea happen—hem change evritaem. Maet iumi need for go bak planti taem for faendem olketa long haos, bat hard waka bilong iumi hem no iusles. Iumi want for givim olketa chance for herem message bilong God abaotem salvation. So, prea long Jehovah God for wisdom for mekem grow savve bilong iu for pullim tingting long waka wea iu duim for helpem nara pipol acceptim message bilong Kingdom.

¹⁹ Taem iumi faendem wanfala man wea want for herem moa samting abaotem message bilong Kingdom, wanem moa iumi olketa Christian wakman savve duim? Next article bilong iumi bae storyim datwan.

[Footnote]

Waswe, Iu Remember?

• Why nao wei wea Paul hem defendim hemseleva front long King Agrippa hem win?

• Hao nao message bilong iumi hem muvim heart bilong man?

• Wanem nao bae helpem iumi for iusim Word bilong God long gudfala wei wea kasem heart bilong man?

• Hao nao iumi savve ting abaotem ministry long sem wei olsem God?

[Box/Olketa Piksa long page 16]

Hao for Win for Duim Return Visit

• Showimaot trufala interest long pipol wanwan.

• Chusim naesfala Bible subject for story abaotem.

• Redyim haosholder for next visit.

• Go ahed tingim datfala man bihaen iu lusim hem.

• Go bak kwiktaem, maet insaed wan or tufala day, for mekem interest bilong hem go ahed.

• Tingim evritaem hao goal bilong iu hem for startim wanfala hom Bible study.

• Prea for Jehovah mekem datfala interest grow.

[Piksa long page 15]

Paul iusim wei for pullim tingting taem hem front long Governor Festus and King Agrippa