Jehovah Nao Savve Mekem Iu Free

“Lukluk gud long datfala perfect law wea mekem man free.”​—JAS. 1:25.

WASWE, IU SAVVE MINIM KAM?

Wanem law nao mekem pipol for free, and hu nao kasem gud samting from datfala law?

Wanem nao iumi mas duim sapos iumi laek for barava free?

Olketa wea gohed faithful bae free long wanem wei long future?

1, 2. (a) Wanem nao happen long world distaem, and why nao olsem? (b) Long future, olketa wea worshipim Jehovah bae free long wanem wei?

DISTAEM staka pipol greedy, raf, and no respectim olketa law. (2 Tim. 3:1-5) Datwan mekem olketa gavman putim staka law moa, garem moa policeman, and iusim olketa security camera for lukluk long pipol. Long samfala kantri pipol putim alarm long haos, olketa garem staka lok, and electric fence tu for protectim olketa. Staka pipol fraet for lusim haos long naet and no letem pikinini for plei seleva long aotsaed. Pipol no feel free distaem, and luk olsem diswan bae hem worse moa long future.

² Long garden bilong Eden, Satan sei olketa man savve free sapos olketa independent and no stap anda long Jehovah. Evri samting wea happen long world start long datfala taem showimaot Satan hem laea! Staka pipol safa distaem bikos pipol followim tingting bilong olketa seleva and no duim wanem God laekem. From world hem nogud tumas, diswan mekem olketa wea worshipim Jehovah tu safa. Nomata olsem, iumi savve long future olketa man bae no slave moa long sin and dae, and olsem Bible talem “olketa bae free olsem olketa pikinini bilong God.” (Rom. 8:21) Jehovah redyim pipol bilong hem distaem for kamap free olsem. Long wanem wei nao hem duim datwan?

3. Wanem law nao Jehovah givim long iumi, and wanem nao tufala kwestin wea iumi bae storyim?

³ For redyim pipol bilong hem for kamap free olsem, Jehovah givim iumi “datfala perfect law wea mekem man free.” (Readim James 1:25.) Bat staka pipol no ting long olketa law olsem samting wea bae mekem olketa free. Olketa ting long olketa law olsem samting wea stopem olketa for no duim samting. So wanem nao “datfala perfect law wea mekem man free”? Long wanem wei nao datfala law savve mekem iumi free?

DATFALA LAW WEA MEKEM IUMI FREE

4. Wanem nao “datfala perfect law wea mekem man free,” and hu nao kasem gudfala samting from datwan?

⁴ “Datfala perfect law wea mekem man free” hem no Law bilong Moses, bikos Jehovah givim Law bilong Moses long olketa Israelite mekem olketa luksavve olketa sin. And tu, Christ nao hem mekem evri samting wea Law storyim hem kam tru. (Matt. 5:17; Gal. 3:19) So wanem nao datfala law wea James hem story abaotem? Hem story abaotem “law bilong Christ,” wea Bible kolem tu, “law bilong faith” and “datfala law wea mekem pipol free.” (Gal. 6:2; Rom. 3:27; Jas. 2:12) So “datfala perfect law” hem nao evri samting wea Jehovah laekem iumi for duim. Olketa anointed Christian and “nara sheepsheep” tu kasem gudfala samting from datfala law.—John 10:16.

5. Why nao hem no hard for followim “datfala perfect law”?

⁵ “Datfala perfect law” hem no olsem olketa law bilong staka kantri. Olketa law and principle bilong “datfala perfect law” hem simpol nomoa and no hard for man minim or followim. (1 John 5:3) Jesus sei: “Hem no hard for iufala waka witim mi, and iufala savve karem samting wea mi askem iufala for karem.” (Matt. 11:29, 30) Nara samting wea mekem “datfala perfect law” hem difren tu, hem no wanfala big list wea olketa raetem evri samting wea stret and no stret, bat love nao faondeson bilong hem and hem stap long heart and tingting bilong pipol.—Readim Hebrew 8:6, 10.

“DATFALA PERFECT LAW” SAVVE MEKEM IUMI FREE

6, 7. (a) Wanem nao iumi savve talem abaotem olketa law bilong Jehovah? (b) Olketa wea obeyim “datfala perfect law,” olketa free for duim wanem samting?

⁶ Olketa law wea Jehovah givim for olketa man hem for protectim pipol and mekem pipol kasem gud samting. Tingim olketa law wea Jehovah putim for kontrolem evri samting long universe, wea wanfala example nao hem law bilong gravity. Pipol no komplen and sei olketa law hia spoelem olketa, bat olketa luksavve olketa kasem gud samting from olketa law hia. Long sem wei, iumi kasem gud samting from “datfala perfect law” bilong Christ wea teachim iumi wanem Jehovah sei hem stret and no stret.

⁷ Datfala law wea mekem man free hem protectim iumi and taem iumi followim iumi free for duim eni samting wea iumi laek for duim wea hem stret. Bae iumi no spoelem iumi seleva or olketa narawan tu taem iumi followim datfala law. So sapos iumi laek for free for duim eni samting wea iumi laekem, iumi mas laekem stret samting, wea minim samting wea Jehovah laekem. Iumi mas lane for laekem samting wea Jehovah laekem and heitim wanem hem heitim, and datfala law wea mekem man free nao bae hem helpem iumi for lane for duim datwan.—Amos 5:15.

8, 9. Olketa wea followim datfala law wea mekem man free kasem wanem gud samting? Storyim example.

⁸ From iumi no perfect, hem no isi for iumi kontrolem feeling for laek duim rong samting. Bat sapos iumi followim datfala law wea mekem man free, datwan savve helpem iumi for free long distaem tu. Olsem example, wanfala man wea nem bilong hem Jay, hem man for smoke. Taem Jay start for studyim Bible, hem luksavve God no hapi long wei for smoke. Jay mas disaedem sapos hem bae letem wanem body laekem for kontrolem hem, or bae hem obeyim Jehovah. Hem chus for duim wanem God laekem, nomata hem barava no isi for lusim smoke. Hao nao feeling bilong hem bihaen hem lusim smoke? Hem sei: “Mi hapi tumas and feel olsem mi free nao.”

⁹ Jay hem luksavve nomata pipol long world duim eni samting wea body laekem, olketa slave nomoa long sin. Bat olketa wea obeyim olketa law bilong God wea mekem man free, olketa letem holy spirit nao for leadim olketa and from datwan olketa kamap free and bae kasem “laef and peace.” (Rom. 8:5, 6) Wanem nao strongim Jay mekem hem savve lusim smoke? Hem lusim smoke from God nao helpem hem, no from strong bilong hemseleva. Hem sei: “Mi study seleva evritaem long Bible, mi prea for holy spirit, and mi kasem help from olketa brata and sista long kongregeson.” Thrifala samting hia savve helpem iumi tu for barava kamap free. Bae iumi storyim hao nao olsem.

LUKLUK GUD LONG BIBLE

10. Wanem nao hem minim for man “lukluk gud” long law bilong God?

¹⁰ James 1:25 hem sei: “Man wea lukluk gud long datfala perfect law wea mekem man free, and wea gohed for duim wanem law talem . . . hem bae hapi.” Greek word wea iumi transleitim “lukluk gud” hem minim wei for man bendaon and traem best for lukluk gud long wanfala samting. So sapos iumi laekem datfala law wea mekem man free for kasem tingting and heart bilong iumi, iumi nao mas traem best for studyim gud Bible evritaem and ting raonem wanem iumi studyim.—1 Tim. 4:15.

11, 12. (a) Wanem nao Jesus talem wea show imaot iumi mas followim truth long evri part long laef bilong iumi? (b) Olketa young wan mas keakea long wanem samting? Storyim piksa long page 9.

¹¹ Nara samting tu, iumi mas gohed for duim samting wea Bible talem. Iumi mas followim truth long evri part long laef bilong iumi. Jesus sei olsem long samfala wea bilivim wanem hem talem: “Sapos iufala followim teaching bilong mi, iufala barava disaepol bilong mi nao. Iufala bae savve long samting wea tru, and datwan bae mekem iufala free.” (John 8:31, 32) Wanfala Bible dictionary hem sei “savve” long disfala scripture hem minim wei for luksavve tu why datfala savve hem important long laef bilong iumi. So hem stret for sei iumi savve long truth sapos iumi followim truth long evri part long laef bilong iumi. Sapos olsem, “toktok bilong God” nao helpem iumi gohed “duim gud samting” and changem samfala wei bilong iumi mekem iumi followim wei bilong Dadi bilong iumi long heven.—1 Thess. 2:13.

¹² Tingim olketa kwestin hia: ‘Waswe, mi barava savve long truth? Waswe, mi followim truth long evri part long laef bilong iumi? Or waswe, mi laek for duim yet samfala samting wea pipol long world duim?’ Wanfala sista wea mami and dadi bilong hem Witness sei taem hem young hem bilivim Jehovah hem stap bat hem no barava savve gud long hem. Hem sei: “Mi no heitim samting wea Jehovah heitim. Mi no ting samting wea mi duim hem important long Jehovah. And mi no prea long hem for helpem mi taem mi kasem problem. Mi depend long savve bilong miseleva, bat distaem mi luksavve datwan hem krangge bikos long datfala taem mi no savve nomoa long eni samting.” Gogo, datfala sista luksavve tingting bilong hem barava no stret, and hem changem samfala samting long laef bilong hem. Hem start for regular pioneer tu.

HOLY SPIRIT SAVVE MEKEM IU FREE

13. Long wanem wei nao holy spirit bilong God mekem iumi free?

¹³ Long 2 Corinth 3:17 hem sei: “Olketa wea kasem holy spirit bilong Jehovah, olketa free.” Long wanem wei nao holy spirit mekem iumi free? Hem helpem iumi for garem “love, hapi, peace, and for patient. Hem mekem man for kaen long narawan, duim gudfala samting, garem faith, hambol, and kontrolem seleva.” (Gal. 5:22, 23) Sapos man no garem olketa wei hia, wea main wan nao love, hard for hem barava free. Olketa samting wea happen long world distaem showimaot diswan hem tru. Bihaen aposol Paul storyim olketa wei hia wea holy spirit mekem man for garem, hem sei: “No eni law hem tambuim olketa samting hia.” Wanem nao diswan hem minim? No eni law savve stopem olketa man for showimaot olketa wei hia. (Gal. 5:18) Jehovah laekem iumi for gohed kamap moabeta for showimaot olketa wei hia, and for duim datwan for olowe.

14. Long olketa wanem wei nao pipol long world olketa kamap slave?

¹⁴ Olketa wea followim tingting bilong pipol long world and duim eni samting wea body laekem, olketa tingse olketa free. (Readim 2 Peter 2:18, 19.) Bat olketa no luksavve olketa slave nomoa bikos olketa gavman mas garem staka law for kontrolem olketa samting wea pipol hia duim. Paul hem sei: “Law hem no for man wea raeteous bat hem for olketa wea brekem law and wea bighed.” (1 Tim. 1:9, 10) Olketa slave long sin tu, bikos olketa duim “olketa nogud samting wea body laekem,” and body hem olsem wanfala nogud boss. (Eph. 2:1-3) Olsem ants wea laek kaikaim honey bat datwan kamap wanfala trap wea olketa pas insaed, pipol hia wea duim wanem body laekem olketa kamap slave long sin.—Jas. 1:14, 15.

KONGREGESON MEKEM IU FREE

15, 16. Wanem gud samting nao iumi kasem start long taem wea iumi join insaed kongregeson, and hao nao datwan mekem iumi free?

¹⁵ Iu no apply for joinim kongregeson, olsem man savve apply for joinim wanfala club, bat iu kamap member bilong kongregeson bikos Jehovah nao leadim iu kam. (John 6:44) Why nao hem chusim iu? Waswe, hem chusim iu bikos iu man wea fraet long God and evritaem duim stret samting? Maet iu sei: “Nomoa, long datfala taem mi no olsem!” So why nao God hem chusim iu? Hem luksavve iu bae willing for obeyim law bilong hem and letem hem leadim iu. Start long taem wea iu join insaed kongregeson, Jehovah gohed teachim iu and helpem iu. Hem mekem iu kamap free from olketa laea teaching bilong false religion, and hem teachim iu for followim olketa wei bilong Christ. (Readim Ephesus 4:22-24.) From diswan, iu garem privilege for insaed long wanfala sekson wea olketa nomoa pipol wea barava free.—Jas. 2:12.

¹⁶ Tingim diswan: Taem iu stap witim pipol wea lovem Jehovah long full heart, waswe, iu fraet? Taem iu story witim olketa brata and sista long Kingdom Hall, waswe, iu wari nogud samwan stealim basket bilong iu? Nomoa nao! Iu feel sef and free. Waswe, bae iu feel olsem tu sapos iu stap witim difren pipol long eni nara ples? Nomoa nao! Wei wea iu feel free witim pipol bilong Jehovah distaem hem samting wea iu bae enjoyim long bigfala wei moa long future.

“FREE OLSEM OLKETA PIKININI BILONG GOD”

17. Wanem nao bae happen long taem wea “olketa son bilong God bae showaot”?

¹⁷ Paul hem storyim wei wea Jehovah bae mekem pipol bilong hem long earth kamap free. Hem sei: “Evri samting wea God wakem barava weitim taem wea olketa son bilong God bae showaot.” Hem sei moa: “Olketa samting wea hem wakem [bae] no slave moa long sin and dae. From datwan olketa bae free olsem olketa pikinini bilong God, wea datwan hem nambawan samting.” (Rom. 8:19-21) “Olketa samting wea [God] wakem” hem minim olketa man wea garem hope for laef olowe long earth, and wea bae kasem gud samting taem olketa anointed “son bilong God bae showaot.” Olketa anointed Christian long heven bae showaot taem olketa helpem Christ for finisim olketa nogud pipol, and sevem “wanfala big crowd” for laef insaed long niu world.—Rev. 7:9, 14.

18. Long wanem wei nao bae olketa man kamap moa free?

¹⁸ Long datfala taem olketa man bae free long wanfala nambawan wei. Olketa bae free from Satan and olketa demon bilong hem. (Rev. 20:1-3) Datwan bae barava gud tumas! Start long datfala taem, 144,000 king and priest bae iusim sakrifaes bilong Christ for helpem olketa man for kamap perfect and barava free from sin. (Rev. 5:9, 10) Bihaen olketa man kasem lastfala test, olketa wea faithful bae kasem samting wea Jehovah laekem long firstaem. Olketa bae “free olsem olketa pikinini bilong God, wea datwan hem nambawan samting.” Tingim diswan! Long datfala taem, bae hem no hard for iu duim wanem God sei hem stret. Body, heart, and tingting bilong iu bae perfect, and iu bae fit for showimaot olketa wei bilong God long perfect wei.

19. Wanem nao iumi mas gohed duim sapos iumi laek for “free olsem olketa pikinini bilong God”?

¹⁹ Waswe, iu laek for “free olsem olketa pikinini bilong God”? Sapos iu laekem datwan, letem “datfala perfect law wea mekem man free” hem gohed leadim tingting and heart bilong iu. Iu mas evritaem studyim gud Bible. Followim truth long evri part long laef bilong iu. Prea long God for holy spirit. Evritaem hipap witim kongregeson and kasem spiritual kaikai wea Jehovah givim long iumi. No letem Satan trikim iu and mekem iu tingse olketa law bilong God hem strict tumas, olsem hem duim long Eve. Nomata Satan hem kleva tumas, next study bae showimaot iumi fit for no letem hem winim iumi bikos “iumi savve finis long olketa nogud plan bilong hem.”—2 Cor. 2:11.

[Olketa Piksa long page 9]

Waswe, mi laek for duim yet samfala samting wea pipol long world duim?

[Olketa Piksa long page 9]

Waswe, mi followim truth long evri part long laef bilong mi?