Duim Wanem God Laekem and Bae Iu Kasem Laef Olowe
“Jehovah, iu bae blessim evriwan wea raeteous. Iu bae hapi long olketa and diswan bae olsem big shield wea protectim olketa.”—PS. 5:12.
1, 2. Wanem nao Elijah askem datfala widow long Zarephath for duim, and hem promisim wanem?
WIDOW woman long Zarephath and son bilong hem hangre and profet Elijah tu hangre. Taem disfala widow redi for mekem fire for kuki, profet Elijah askem hem for wata and bred. Hem willing for givim Elijah wata for drink, bat hem garem “lelebet flour nomoa long big jar and lelebet oil nomoa long smol jar.” Hem talem profet Elijah hem no garem inaf kaikai for sharem.—1 Ki. 17:8-12.
2 Elijah sei long datfala woman: “Mekem wanfala smol raon cake for mi firstaem from flour wea stap, and tekem kam long mi, and bihaen iu savve mekem samting for iu and boy bilong iu. Jehovah wea hem God bilong Israel talem diswan, ‘Disfala flour bae no savve finis and disfala oil bae no savve finis tu.’ ”—1 Ki. 17:13, 14.
3. Wanem important samting nao iumi mas disaedem?
3 Datfala widow mas disaedem wanem for duim witim lalas kaikai wea hem garem, bat hem mas disaedem samting wea important winim datwan. Waswe, bae hem trustim Jehovah for lukaftarem hem and son bilong hem or bae hem tingim olketa material samting firstaem winim wei for mekem God hapi and fren gud witim hem? Iumi tu mas disaedem sem samting. Waswe, bae iumi showimaot iumi laek for mekem Jehovah hapi winim wei for garem staka material samting? Iumi garem staka reason for trustim and worshipim God. Samfala wei tu stap wea iumi savve followim mekem God hapi long iumi.
‘Fitim for Iumi Worshipim Jehovah’
4. Why nao hem fitim for iumi worshipim Jehovah?
4 Jehovah laekem olketa man for worshipim hem long wei wea hem laekem. Hem garem raet for askem iumi for duim datwan. Olketa wakaman bilong God long heven agree witim datwan. Olketa sei: “Jehovah, iu nao God bilong mifala. Iu wakem evri samting and iu givim laef long olketa samting hia bikos hem nao wanem iu laekem. So hem fitim for mifala praisem and mekhae long iu from bigfala paoa bilong iu.” (Rev. 4:11) From Jehovah wakem evri samting, hem fitim for iumi worshipim hem.
5. Why nao love wea God garem shud mekem iumi laek worshipim hem?
5 Nara reason why iumi shud worshipim Jehovah hem bikos hem barava lovem iumi. Bible sei: “God wakem man for garem olketa wei olsem hem. Hem wakem man and woman.” (Gen. 1:27) Iumi garem privilege for disaedem sapos iumi bae worshipim God or nomoa. Jehovah hem Dadi bilong iumi bikos hem givim laef long iumi. (Luke 3:38) Olsem gudfala dadi, hem provaedem evri samting wea olketa pikinini needim mekem olketa hapi. God “mekem sun hem shaen” and “hem mekem hem rain” mekem earth garem staka kaikai and luk naes.—Matt. 5:45.
6, 7. (a) Wanem nogud samting nao Adam mekem evriwan for kasem? (b) Wanem gud samting nao olketa wea laek for mekem God hapi bae kasem from dae bilong Jesus?
6 Jehovah sevem iumi from olketa nogud samting wea iumi kasem from sin. From Adam sin, hem olsem man for gambol wea stealim samting from famili mekem hem savve gambol. Bat famili kasem nogud samting from wanem hem duim. From Adam no obeyim Jehovah, hem mekem olketa pikinini bilong hem no kasem laef olowe. From hem selfish, datwan mekem olketa man for no perfect. Evriwan kasem sik, sorre, and gogo olketa dae. For mekem wanfala slave kamap free, samwan mas pei for datwan. Jehovah nao duim datwan for mekem iumi kamap free from olketa nogud samting hia. (Readim Romans 5:21.) Jesus duim wanem Dadi bilong hem laekem taem hem “givim laef bilong hem, wea datwan hem price for sevem pipol.” (Matt. 20:28) Klosap nao olketa wea duim wanem God laekem bae kasem evri gud samting from datwan.
7 Jehovah duim staka samting winim eni narawan for mekem iumi hapi and garem gudfala laef. Iumi wea duim wanem Jehovah laekem bae lukim hao hem bae finisim evri nogud samting wea kasem olketa man. Jehovah bae showim long iumi wanwan “hem bae givim gud samting long olketa wea barava lukaotem hem.”—Heb. 11:6.
‘Pipol Bae Laek Givim Olketa Seleva’
8. Example bilong Isaiah teachim iumi wanem abaotem wei for worshipim God?
8 Iumi savve mekem Jehovah hapi taem iumi disaedem stret samting. Jehovah no forcem eniwan for worshipim hem. Long taem bilong profet Isaiah, God hem ask: “Hu nao bae mi sendem, and hu nao bae go for iumi?” Jehovah luksavve Isaiah garem raet for disaed seleva and hem respectim datwan. Tingim wei wea Isaiah hapi for sei: “Mi long hia! Sendem mi.”—Isa. 6:8.
9, 10. (a) Wanem nao shud mekem iumi for worshipim God? (b) Why nao hem fitim for iumi worshipim Jehovah witim full heart?
9 Iumi evriwan savve chus for worshipim God or nomoa. Jehovah laekem iumi for worshipim hem bikos iumi laek for duim datwan. (Readim Joshua 24:15.) God no hapi long olketa wea no laek for worshipim hem and hem no acceptim worship bilong olketa wea duim datwan for mekem narawan tinghae long olketa nomoa. (Col. 3:22) Sapos iumi letem olketa samting long world affectim worship bilong iumi and iumi no worshipim God witim ‘full heart,’ bae God no hapi long iumi. (Ps. 119:2) Jehovah luksavve hem gud for iumi worshipim hem witim full heart. Moses talem olketa Israelite for chusim laef long wei for ‘lovem Jehovah, lisin long hem, and barava followim hem.’—Deut. 30:19, 20.
10 King David singsing olsem long Jehovah: “Pipol bilong iu bae laek givim olketa seleva long day bilong iu for faet. Iu garem olketa young man wea holy and luk naes.” (Ps. 110:3) Staka pipol tinghae long selen and hapitaem olsem main samting long laef. Bat first samting long laef bilong olketa wea lovem Jehovah hem worship bilong olketa. Wei wea olketa strong for duim preaching waka showimaot wanem hem important long olketa. Olketa trustim Jehovah bae provaedem wanem olketa needim.—Matt. 6:33, 34.
Olketa Sakrifaes wea God Hapi Long Hem
11. Wanem gud samting nao olketa Israelite hope for kasem taem olketa givim sakrifaes long Jehovah?
11 Olketa Israelite followim Law bilong Moses for givim olketa sakrifaes wea God hapi long hem. Leviticus 19:5 sei: “Taem iufala mekem communion sakrifaes long Jehovah, duim diswan for mekem hem hapi long iufala.” Datfala sem buk sei tu: “Taem iufala mekem sakrifaes for talem thankiu long Jehovah, duim diswan for mekem hem hapi long iufala.” (Lev. 22:29) Taem olketa Israelite sakrifaesim olketa gudfala animal antap long altar bilong Jehovah, smoke wea go ap hem samting wea “smel naes” long tru God. (Lev. 1:9, 13) Hem hapi long olketa sakrifaes hia wea pipol wea lovem hem givim hem. (Gen. 8:21) Wanfala principle long Law tu hem fitim iumi distaem. Jehovah hapi long olketa wea givim olketa gudfala sakrifaes long hem. Wanem nao olketa sakrifaes wea hem acceptim? Tingim tufala samting hia: wei bilong iumi and wanem iumi talem.
12. God bae no acceptim ‘sakrifaes’ bilong iumi sapos iumi duim wanem?
12 Aposol Paul sei long olketa long Rome: “Givim body bilong iufala olsem wanfala sakrifaes wea laef and holy and wea God savve hapi long hem. Long wei olsem, bae iufala worshipim God witim gudfala tingting.” (Rom. 12:1) For mekem God hapi, iumi mas keepim body bilong iumi holy. Sakrifaes wea iumi givim long God bae iusles nomoa sapos iumi iusim tobacco, bilnat, drug, or ova tumas long alcohol. (2 Cor. 7:1) From “man wea durong hem sin againstim body bilong hem,” wei for duim eni samting olsem bae mekem Jehovah no acceptim sakrifaes wea hem givim. (1 Cor. 6:18) For mekem God hapi, ‘iumi mas holy long evri samting wea iumi duim.’—1 Pet. 1:14-16.
13. Why nao hem fitim for iumi praisem Jehovah?
13 Nara sakrifaes wea mekem Jehovah hapi hem wanem iumi talem. Olketa wea lovem Jehovah evritaem talem gud samting abaotem hem long nara pipol and taem olketa stap seleva. (Readim Psalm 34:1-3.) Taem iu readim Psalms 148 go kasem 150, bae iu luksavve thrifala psalm hia encouragem iumi for praisem Jehovah. Tru tumas, “hem fitim for olketa wea raeteous praisem hem.” (Ps. 33:1) Jesus Christ sei hem important for praisem God taem iumi preachim gud nius.—Luke 4:18, 43, 44.
14, 15. Hosea encouragem olketa Israelite for givim wanem kaen sakrifaes, and hao nao Jehovah ting long datwan?
14 Wei for gohed strong for preach hem showimaot iumi lovem Jehovah and laek for duim samting wea hem hapi long hem. Tingim wanem profet Hosea talem long olketa Israelite wea duim false worship and wea datwan mekem Jehovah no hapi. (Hos. 13:1-3) Hosea talem olketa for barava ask olsem: “Plis [Jehovah], forgivim sin bilong mifala and acceptim prea bilong mifala, and bae mifala praisem iu.”—Hos. 14:1, 2.
15 Wanem nao tingting bilong Jehovah abaotem olketa wea mekem olketa sakrifaes hia? Hem sei: “Mi bae lovem olketa from mi laek for duim datwan.” (Hos. 14:4) Jehovah hem forgivim, acceptim, and fren gud witim olketa wea givim olketa sakrifaes olsem.
16, 17. Hao nao Jehovah hem feel taem faith bilong iumi mekem iumi for preachim gud nius?
16 Hem important part long tru worship for praisem Jehovah taem iumi story witim pipol. Man wea raetem psalm barava tinghae long diswan dastawe hem sei: “Plis Jehovah, hapi long olketa sakrifaes wea mi givim for praisem iu.” (Ps. 119:108) Waswe long distaem? Isaiah profesi abaotem samting wea staka pipol distaem bae duim. Hem sei: “Olketa bae praisem Jehovah long olketa pipol. . . . God bae acceptim [olketa sakrifaes] wea olketa mekem antap long altar bilong hem.” (Isa. 60:6, 7) Datfala profesi kamap tru distaem bikos staka million pipol gohed for praisem God. ‘Diswan hem olsem wanfala sakrifaes wea olketa givim long God. Olketa iusim mouth bilong olketa for talemaot nem bilong hem long nara pipol.’—Heb. 13:15.
17 Waswe long iu? Waswe, iu givim olketa sakrifaes wea God hapi long hem? Sapos nomoa, waswe, bae iu changem samfala samting and start for talemaot nem bilong Jehovah long nara pipol? Taem iu garem faith and start for preachim gud nius, sakrifaes wea iu givim bae “winim buluka wea [man] savve sakrifaesim long Jehovah.” (Readim Psalm 69:30, 31.) Sakrifaes wea iu givim bae “smel naes” long Jehovah and hem bae hapi long iu. (Ezek. 20:41) Iu tu bae barava hapi.
‘Jehovah Bae Blessim Evriwan wea Raeteous’
18, 19. (a) Wanem nao tingting bilong staka pipol abaotem wei for worshipim God? (b) Sapos man duim samting wea God no hapi long hem, wanem nao bae hem kasem?
18 Staka pipol distaem tu garem sem tingting olsem olketa long taem bilong Malachi. Olketa sei: “Hem iusles for worshipim God. Mifala duim wanem hem talem bat mifala nating kasem gud samting!” (Mal. 3:14) Pipol hia laekem tumas olketa material samting, dastawe olketa tingse plan bilong God bae no kamap tru and olketa law no fitim olketa. Olketa ting long wei for preachim gud nius olsem samting wea weistim taem and wea nogud long olketa.
19 Kaen tingting olsem start kam long Eden. Satan laea long Eve mekem hem no tinghae long gud samting wea Jehovah givim and for no laek mekem Jehovah hapi. Distaem tu Satan trae for mekem pipol bilivim olketa bae no kasem gud samting taem olketa duim wanem God laekem. Bihaen, Adam and Eve luksavve wei wea tufala no mekem God hapi mekem tufala for dae. Olketa wea followim nogud example bilong Adam and Eve bae luksavve long diswan tu.—Gen. 3:1-7, 17-19.
20, 21. (a) Wanem nao widow long Zarephath duim, and wanem gud samting nao hem kasem? (b) Hao nao iumi savve followim example bilong datfala widow and why nao olsem?
20 Tingim nogud samting wea Adam and Eve kasem and comparem datwan witim gud samting wea Elijah and widow woman long Zarephath kasem. Taem datfala woman herem gud samting wea Elijah talem, hem wakem bred and givim firstaem long Elijah. Then Jehovah duim wanem hem promisim. Bible sei: “Evri day widow hia witim son bilong hem and Elijah garem inaf kaikai for kaikaim. Flour wea stap insaed long big jar hem no savve finis, and oil wea stap insaed smol jar no savve finis tu, olsem Jehovah talem long Elijah.”—1 Ki. 17:15, 16.
21 Datfala widow long Zarephath duim samting wea samfala pipol nomoa willing for duim distaem. Hem trustim God bae sevem hem, and God lukaftarem hem. Disfala story and olketa nara story long Bible showimaot iumi shud trustim Jehovah. (Readim Joshua 21:43-45; 23:14.) Samting wea pipol bilong Jehovah duim distaem showimaot Jehovah bae nating lusim olketa wea duim wanem hem laekem.—Ps. 34:6, 7, 17-19.a
22. Why nao hem important for kwiktaem duim samting wea God laekem?
22 Klosap nao day bilong God for judgem pipol bae kasem “evriwan wea stap long disfala earth.” (Luke 21:34, 35) No eniwan fit for haed long datfala day. No eni riches or material samting hem winim wei for herem disfala toktok bilong Judge wea God markem: “Iufala wea Dadi bilong mi long heven blessim iufala, iufala kam. Dadi bilong mi bae givim long iufala datfala kingdom wea hem redyim for iufala.” (Matt. 25:34) Tru tumas, ‘Jehovah bae blessim evriwan wea raeteous. Hem bae hapi long olketa and diswan bae olsem big shield wea protectim olketa.’ (Ps. 5:12) Iumi shud gohed duim wanem God laekem!
[Footnotes]
a Lukim Wastaoa, March 15, 2005, page 13, paragraf 15, and August 1, 1997, page 20-25.
Waswe, Iu Tingim Yet?
• Why nao hem fitim for iumi worshipim Jehovah witim full heart?
• Olketa wanem sakrifaes distaem nao mekem Jehovah hapi?
• Why nao iumi shud praisem God?
• Why nao iumi shud duim samting wea God hapi long hem?
[Piksa long page 13]
Elijah askem widow long Zarephath for disaedem wanem?
[Piksa long page 15]
Wanem gud samting nao iumi kasem taem iumi praisem Jehovah?
[Piksa long page 17]
Wei for trustim Jehovah bae mekem iu kasem gud samting
[Piksa long page 16]