“Barava Waka Hard for Jehovah”

1. Long tingting bilong pipol, wanem nao wanfala slave, and hao nao datwan hem difren from samting wea Rome 12:11 storyim?

LONG tingting bilong staka pipol, wanfala slave hem man wea boss kontrolem hem and no kaen long hem. Bat taem man hem wakaman or slave bilong God, datwan hem difren. Bible sei Christian savve chus for kamap slave bilong Boss wea lovem hem. Taem aposol Paul talem olketa Christian for “barava waka hard for Jehovah,” hem encouragem olketa for worshipim God bikos olketa lovem Hem. (Rome 12:11) For waka hard for Jehovah, wanem nao iumi mas duim? Wanem nao iumi savve duim mekem iumi no slave bilong Satan and world bilong hem? And wanem gud samting nao iumi kasem from iumi wakaman bilong Jehovah and gohed faithful for worshipim hem?

“MI LOVEM TUMAS BOSS BILONG MI”

2. (a) Why nao maet wanfala Israelite disaed for gohed waka olsem slave for boss bilong hem? (b) Sapos slave letem boss for mekem hol long ear bilong hem, wanem nao datwan showimaot?

² Law bilong God for Israel helpem iumi for minim wanem samting nao wakaman or slave bilong Jehovah mas duim. Wanfala Israelite slave savve kamap free insaed long mek-seven year wea hem waka for boss bilong hem. (Ex. 21:2) Bat sapos hem barava lovem datfala boss and no laek lusim hem, Law bilong Jehovah letem hem for stap witim hem. Datfala boss bae iusim wanfala sharp nila for mekem hol long ear bilong slave bilong hem. (Ex. 21:5, 6) Why nao hem duim datwan? Long Hebrew languis, wei for obey hem join witim wei for herem samting. So taem slave letem boss for mekem hol long ear bilong hem, datwan showimaot hem laek for gohed obeyim boss bilong hem. Diswan hem semsem witim dedication bilong iumi. Taem iumi dedicate long Jehovah, iumi showimaot iumi willing for obeyim hem bikos iumi lovem hem.

3. Why nao iumi dedicate long God?

³ Bifor iumi baptaes, iumi disaed for worshipim Jehovah, and kamap wakaman bilong hem. Taem iumi dedicate long hem, iumi promis for obeyim hem and duim wanem hem laekem. No eniwan forcem iumi for duim datwan. Olketa young wan bilong iumi tu baptaes bikos olketa seleva nao disaed for duim datwan and no bikos olketa laek for mekem dadi and mami bilong olketa hapi. Iumi evriwan disaed seleva for dedicate long Dadi bilong iumi Jehovah bikos iumi lovem hem. Aposol John sei: “Samting wea showimaot iumi lovem God, hem taem iumi obeyim olketa law bilong hem.”—1 John 5:3.

IUMI FREE, NOMATA IUMI SLAVE

4. Wanem nao iumi mas duim for “slave bilong God and duim stret samting”?

⁴ Iumi barava thankiu long Jehovah from hem givim iumi wanem iumi needim for kamap slave bilong hem! From iumi garem faith long ransom sakrifaes bilong Christ, iumi no slave bilong sin. Nomata iumi no perfect, iumi chus for obeyim Jehovah and Jesus and kamap slave bilong tufala. Paul explainim gud diswan long wanfala leta bilong hem. Hem sei: “Ting long iufala seleva olsem iufala dae finis and kamap free from sin nao. Tingim hao laef bilong iufala tu hem for duim samting wea God laekem bikos iufala olketa disaepol bilong Christ Jesus.” Then hem talem disfala warning: “Iufala savve finis, sapos evritaem iufala obeyim wanfala man, iufala slave bilong hem nao. So sapos iufala slave bilong sin, bae iufala dae. Bat sapos iufala slave bilong God and obeyim hem, bae iufala raeteous. Bat mi thankiu long God bikos iufala olketa slave bilong sin bifor, bat distaem iufala barava laek for obeyim God and followim samting wea hem teachim iufala. From iufala free nao from wei for slave long sin, iufala slave bilong God and duim stret samting.” (Rome 6:11, 16-18) Paul hem sei iumi shud “barava laek for obeyim God.” So taem iumi dedicate long Jehovah, iumi “slave bilong God and duim stret samting.”

5. Wanem nao iumi evriwan mas faet againstim, and why nao olsem?

⁵ From iumi dedicate long God, iumi mas faet againstim tufala samting. First samting, hem wei wea iumi no perfect. Paul tu faet againstim diswan. Hem sei: “Mi barava lovem law bilong God long heart bilong mi, bat mi luksavve nara law wea stap long body bilong mi hem againstim law wea stap long mind bilong mi. Nara law hia hem law bilong sin wea stap long body bilong mi and hem bossim mi.” (Rome 7:22, 23) From iumi no perfect, iumi mas gohed for faet againstim olketa nogud samting wea body laekem. Aposol Peter sei: “Iufala pipol wea free bat iufala mas iusim datwan for duim waka bilong God and no iusim datwan olsem excuse for duim nogud samting.”—1 Pet. 2:16.

6, 7. Hao nao Satan mekem olketa samting long disfala world luk naes tumas?

⁶ Mek-tu samting wea iumi mas faet againstim hem disfala world wea olketa demon nao kontrolem. Satan hem ruler bilong disfala world and hem iusim staka difren samting for trae spoelem wei wea iumi faithful long Jehovah and Jesus. Satan switim iumi for kamap olsem pipol long world bikos hem laekem iumi for slave bilong hem. (Readim Ephesus 6:11, 12.) Wanfala samting wea hem duim nao, hem mekem olketa samting long disfala world luk naes tumas. Aposol John warnim iumi olsem: “Sapos eniwan lovem world, hem no lovem Dadi long heven. Diswan hem bikos wei bilong man for laekem nogud samting wea body and eye bilong hem laekem, witim tu wei for man show-off witim samting wea hem garem, hem wei bilong pipol long disfala world. Olketa samting hia no kam from Dadi long heven bat hem kam from pipol long world.”—1 John 2:15, 16.

⁷ Evriwea long world pipol laek garem staka material samting. Satan mekem pipol tingse sapos olketa garem staka selen bae olketa hapi. Staka bigfala stoa tu stap wea salem enikaen difren samting. Advertisement bilong olketa bisnis mekem pipol tingse main important samting hem for garem staka material samting and for duim hapitaem olowe. Olsem example, plande taem olketa advertisem holiday long nara kantri wea man mas travel and holiday witim pipol wea no garem tingting bilong Jehovah. Tru nao, iumi evritaem kasem hevi from disfala world for garem kaen living wea pipol long world nao sei hem gud.

8, 9. Why nao hem danger for laekem tumas olketa material samting?

⁸ Long first century, Peter warnim olketa Christian abaotem samfala long kongregeson wea garem tingting bilong pipol long world. Hem sei: “Olketa laekem tumas for kaikai, drink, and garem olketa wild party, nomata long daytaem tu. Olketa olsem wanfala dirty mark and taem olketa kaikai witim iufala, hem mekem olketa hapi tumas sapos olketa savve iusim olketa laea teaching for trikim narawan. Olketa talem olketa samting wea here important, bat hem iusles nomoa. Olketa iusim olketa samting wea body laekem, witim tu wei for nating shame for duim rong samting, for switim olketa niu disaepol wea ranawe from olketa wea duim olketa nogud samting. Olketa nogud pipol hia talem promis long olketa wea followim toktok bilong olketa and sei olketa hia bae free. Batawea, olketa seleva nao slave bilong sin bikos man wea narawan kontrolem hem, hem slave bilong datfala man.”—2 Pet. 2:13, 18, 19.

⁹ Sapos iumi trae for satisfaem ‘samting wea eye laekem,’ wea minim for kasem evri samting wea iumi laekem, iumi bae no free. Bat bae iumi slave bilong Satan, wea rulim disfala world. (1 John 5:19) Hem danger for laekem tumas olketa material samting bikos gogo iumi savve olsem slave long olketa samting hia. Sapos diswan kasem iumi, bae hem no isi for iumi kamap free.

WAKA WEA MEKEM MAN HAPI AND SATISFAE

10, 11. (a) Hu nao olketa main wan wea Satan attakim? (b) Hao nao wei for aftarem hae education savve spoelem olketa young Christian?

¹⁰ Satan evritaem attakim olketa wea no garem savve. Olketa main wan hem attakim hem young pipol. Hem no hapi for lukim wanfala young wan or eni narawan chus for slave bilong Jehovah. Satan no laekem olketa wea dedicate long Jehovah for gohed lovem God and faithful long hem.

¹¹ Taem boss mekem hol long ear bilong slave bilong hem, masbi hem soa long datfala slave. Bat bihaen, evriwan savve lukim datfala mark wea showimaot slave hia disaed for stap olowe witim boss bilong hem. Olsem tu, hem no isi for olketa young wan chusim samting wea difren from nara pipol. Olsem example, Satan mekem pipol tingse for hapi and satisfae, man mas garem bigfala waka. Bat for iumi olketa Christian hapi and satisfae, worship bilong Jehovah mas main important samting long laef bilong iumi. Jesus sei: “Olketa wea luksavve olketa needim God bae hapi.” (Matt. 5:3) Olketa Christian dedicate long Jehovah for duim wanem hem laekem, no wanem Satan laekem. Olketa readim Bible and ting raonem datwan “evri day and evri naet.” (Readim Psalm 1:1-3.) Bat Christian wea aftarem hae education bae no garem staka taem for ting raonem Bible and worshipim Jehovah.

12. Long staka kantri, olketa young pipol free for disaedem wanem samting?

¹² Long bifor, wanfala slave wea Christian savve kasem hard taem sapos boss bilong hem no worshipim God. Long firstfala leta wea Paul raetem for olketa long Corinth, hem sei: “Waswe, God kolem iu taem iu wanfala slave? Iu no warim datwan, bat sapos eni chance for iu free, hem gud for iu free nao.” (1 Cor. 7:21) Sapos boss bilong datfala slave no kaen long hem, betawei slave hia kamap free sapos hem kasem chance for duim datwan. Distaem, long staka kantri, law hem markem haomas year olketa pikinini mas go long skul. Bihaen datwan nao olketa student savve disaed for gohed skul or nomoa. Sapos wanfala Christian hem disaed for aftarem hae education for garem bigfala waka, datwan savve spoelem wei wea hem free for duim full-taem service.—Readim 1 Corinth 7:23.

HAE EDUCATION OR BEST EDUCATION?

13. Wanem kaen education nao savve barava helpem pipol bilong Jehovah?

¹³ Paul talem disfala warning for olketa Christian long Colossae: “No letem olketa iusles toktok and tingting bilong man for trapim iufala. Olketa samting hia join witim kastom bilong olketa man and olketa iusles samting bilong disfala world nomoa. Olketa no kam from Christ.” (Col. 2:8) Staka teacher teachim ‘olketa iusles toktok and tingting bilong man wea join witim kastom bilong olketa man.’ Staka taem olketa student wea kasem hae education lanem olketa iusles samting olsem and no samting wea bae helpem olketa long laef. Bat olketa Christian chusim kaen education wea bae helpem olketa for garem simpol laef mekem olketa savve worshipim God. Olketa ting strong long kaonsel bilong Paul for Timothy, wea sei: “Iumi savve kasem barava gud samting from wei for faithful long God sapos iumi satisfae nomoa long wanem iumi garem. So sapos iumi garem kaikai, kaleko, and ples for stap, iumi mas satisfae nomoa witim olketa samting hia.” (1 Tim. 6:6, 8) Olketa tru Christian no aftarem hae education for kamap wanfala savveman long disfala world, bat olketa waka hard for kasem olketa ‘leta wea pruvim olketa fit,’ long wei for busy long ministry.—Readim 2 Corinth 3:1-3.

14. Long Philippi 3:8, hao nao tingting bilong Paul abaotem wei for slave bilong God and Christ?

¹⁴ Iumi savve lane from example bilong Paul. Teacher bilong Paul hem Gamaliel, wanfala Pharisee wea teachim Law. Education wea Paul kasem hem olsem university education distaem. Bat wanem nao tingting bilong Paul taem hem comparem datwan witim privilege for slave bilong God and Christ? Hem sei: “Long tingting bilong mi, evri samting hia hem iusles nomoa bikos datfala savve abaotem Lord bilong mi Christ Jesus, hem barava winim olketa samting hia.” Then hem sei: “Mi willing for lusim evri samting hia bikos long Christ, and long tingting bilong mi, olketa samting hia rabis nomoa. Mi tingting olsem mekem mi savve kasem gud samting from Christ.” (Phil. 3:8) Tingting bilong Paul savve helpem olketa young Christian and dadi and mami bilong olketa for mekem gudfala disison abaotem education. (Lukim olketa piksa.)

KASEM GUD SAMTING FROM BEST EDUCATION

15, 16. Wanem kaen education nao iumi kasem from organization bilong Jehovah, and wanem nao main goal bilong datwan?

¹⁵ Staka taem, wanem kaen samting nao gohed long olketa university? Plande taem olketa student againstim gavman and olketa wea garem paoa. (Eph. 2:2) Bat organization bilong Jehovah givim best education insaed long kongregeson wea evriwan stap gud tugeta and garem wan mind. Evri week iumi evriwan savve kasem gud samting from Theocratic Ministry Skul. Olketa nara skul stap tu wea savve helpem iumi. Olsem example, Bible Skul for Olketa Singol Brata hem for olketa singol brata wea pioneer, and Bible Skul for Olketa Hasband and Waef hem for olketa pioneer wea marit. Evri skul hia helpem iumi for obeyim Dadi bilong iumi long heven, Jehovah.

¹⁶ Iumi savve iusim Watch Tower Publications Index or Watchtower Library long CD-ROM for faendem staka nambawan samting long Bible. Main goal bilong Bible education wea iumi kasem hem for helpem iumi worshipim Jehovah. Iumi lane tu for helpem olketa narawan for fren witim God. (2 Cor. 5:20) Then olketa tu savve teachim nara pipol.—2 Tim. 2:2.

REWARD BILONG WAKAMAN

17. Sapos iumi chusim best education, wanem gud samting nao iumi kasem?

¹⁷ Long tokpiksa bilong Jesus abaotem silver selen, boss hem praisem tufala wakaman wea faithful for duim waka bilong tufala. Diswan mekem boss and tufala wakaman hia hapi. For showimaot hem hapi long tufala, hem givim tufala samfala waka moa. (Readim Matthew 25:21, 23.) Sapos iumi chusim best education iumi savve hapi and satisfae. Olsem example, Michael kasem hae mark long skul so olketa teacher meet witim hem for encouragem hem for go long university. Olketa sapraes taem Michael chus for duim wanfala short course nomoa wea bae mekem hem fit for sapotim hemseleva taem hem regular pioneer. Waswe, hem sorre long disison bilong hem? Nomoa, hem barava tinghae long Bible education wea hem kasem from hem pioneer and hem elder long kongregeson. Hem sei: “Olketa blessing and privilege wea mi kasem hem barava winim selen wea maet mi kasem sapos mi go long eni university. Mi hapi tumas from mi disaed for no duim datwan.”

18. Why nao iu laek for chusim best education?

¹⁸ Education wea winim eni nara education nao, hem education wea teachim iumi wanem Jehovah laekem and wea helpem iumi for slave bilong hem. Disfala education hem mekem iumi garem hope “for no slave moa long sin and dae,” and gogo bae iumi “free olsem olketa pikinini bilong God, wea datwan hem nambawan samting.” (Rome 8:21) Winim eni nara samting, hem best wei for showimaot iumi lovem Dadi bilong iumi, Jehovah.—Ex. 21:5.