“Showimaot Welkam Long Each Other”

PHOEBE, wanfala Christian long taem bilong olketa aposol, hem feisim wanfala problem. Hem travel from Cenchreae long Greece for go long Rome, bat hem no savve long eni brata wea stap long datfala taon. (Romans 16:1, 2) Edgar Goodspeed, wanfala man for transleitim Bible hem sei: “Taem Rome hem rul pipol barava wicked and raf. Olketa resthaos barava no fitim for olketa woman wea garem gudfala fasin for stap insaed, especially wanfala Christian woman.” So wea nao bae Phoebe stap?

Long taem wea Bible storyim, pipol savve travel long staka ples. Jesus Christ and olketa disaepol bilong hem tu duim datwan, mekem olketa preachim gud nius evriwea long Judea and Galilee. No longtaem bihaen, olketa Christian missionary olsem Paul go for talemaot message long staka ples raonem Mediterranean Sea, and tu, long Rome wea hem nao kapitol taon. Wea nao olketa Christian hia savve stap taem olketa travel insaed or aotsaed long area bilong olketa Jew? Taem olketa luk aotem ples for stap, wanem nao samfala problem wea olketa feisim? Wanem nao iumi savve lanem from olketa abaotem wei for showimaot welkam?

“Tuday Bae Mi Stap Long Haos Bilong Iu”

Wei for welkamim pipol hem wei bilong olketa trufala worshiper bilong Jehovah start kam from taem bifor. Olsem example, Abraham, Lot, and Rebekah duim diswan. (Genesis 18:1-8; 19:1-3; 24:17-20) Taem Job talemaot tingting bilong hem abaotem olketa stranger, hem sei: “Man from difren ples bae no sleep aotsaed, door bilong mi open for man wea travel.”—Job 31:32.

Planti taem, sapos pipol wea travel laekem nara Israelite for invaetem olketa long haos, olketa savve weit long wanfala pablik ples long taon. (Judges 19:15-21) Man wea ownim haos savve wasim leg bilong olketa wea travel kam and givim kaikai. And tu, hem savve givim kaikai for olketa animal bilong olketa. (Genesis 18:4, 5; 19:2; 24:32, 33) Sapos olketa wea travel no laek putim hevi long man wea ownim haos, olketa bae tekem kam bred and wine bilong olketa seleva, and tu, grass and kaikai for olketa donkey bilong olketa. Samting wea olketa needim nomoa hem ples for sleep.

Nomata Bible no storyim tumas wea nao Jesus stap taem hem gogo for preach, iumi savve hem and olketa disaepol bilong hem mas sleep samwea. (Luke 9:58) Taem hem kasem Jericho, Jesus talem Zacchaeus: “Tuday bae mi stap long haos bilong iu.” Zacchaeus “hapi tumas” for Jesus kam long haos bilong hem. (Luke 19:5, 6) Planti taem Jesus stap long haos bilong olketa fren bilong hem Martha, Mary, and Lazarus long Bethany. (Luke 10:38; John 11:1, 5, 18) And luk olsem taem Jesus kasem Capernaum, hem stap long haos bilong Simon Peter.—Mark 1:21, 29-35.

Samting wea Jesus talem for 12-fala aposol bilong hem showimaot wanem kaen welkam olketa savve expectim from pipol long Israel. Jesus talem olketa olsem: “No tekem gold or silver or copper for paos bilong iufala, or basket for kaikai for gogo bilong iufala, or tufala kaleko, or sandol or stik; from wakman fit for kasem kaikai bilong hem. Nomata wanem taon or vilij iufala go insaed, luk aotem eniwan wea fit, and stap long there go kasem taem iufala go.” (Matthew 10:9-11) Hem savve pipol wea garem gudfala heart bae welkamim olketa disaepol and givim kaikai, ples for stap, and olketa nara samting olketa needim.

Bat long future olketa wea gogo for preach long olketa difren ples mas lukaftarem olketa seleva. From pipol bae les long olketa follower bilong hem and olketa bae go preach long olketa area aotsaed long Israel, Jesus sei olsem: “Man wea garem paos mas tekem, and basket kaikai tu.” (Luke 22:36) For talemaot gud nius olketa mas travel and stap long olketa difren ples.

“Garem Fasin for Showimaot Welkam”

Long Rul Bilong Rome long datfala taem olketa garem staka gudfala road and hem taem bilong peace. Diswan mekem pipol isi for travel evritaem.a Staka tumas savve travel, dastawe olketa barava needim ples for stap. So, olketa main road garem olketa resthaos. Start from wanfala resthaos man mas travel full day for kasem narawan. Nomata olsem, The Book of Acts in Its Graeco-Roman Setting talem olsem: “Samting wea olketa buk talem abaotem olketa resthaos hia hem barava nogud. Olketa buk hia storyim hao olketa ples hia barava brekdaon, no klin, samtaem no garem chair, tebol, or bed for sleep, and garem olketa bed-bug. Saed long kaikai and wata hem no mas gud, man no fit for trustim olketa boss and wakman, olketa rabis man savve kam stap, and dirty fasin hem big tumas.” Hem klia, man wea garem gudfala fasin bae no stap long olketa kaen ples olsem.

Dastawe, Bible gohed for encouragem olketa Christian for showimaot welkam for narawan. Paul encouragem olketa Christian long Rome olsem: “Helpem olketa holy wan taem olketa needim samting. Garem fasin for showimaot welkam.” (Romans 12:13) Hem sei olsem long olketa Jew Christian: “No forget for showimaot welkam, from thru long disfala fasin samfala, nomata olketa no savve, olketa welkamim olketa angel.” (Hebrews 13:2) Peter encouragem olketa nara brata for “showimaot welkam long each other and no komplen.”—1 Peter 4:9.

Bat, samfala taem hem no fitim for showimaot welkam. Saed long “evriwan wea laek followim tingting bilong hemseleva and no followim teaching bilong Christ,” aposol John sei: “No invaetem hem insaed long haos bilong iufala or sei hello long hem. From man wea sei hello long hem, hem share long wicked fasin bilong hem.” (2 John 9-11) Paul raet olsem abaotem olketa wea no laek for repent: “No kaban witim eniwan wea olketa kolem wanfala brata wea duim fornication or wea hem greedy or worshipim idol or tok againstim narafala man or wea savve drunk or forcem narawan for givim selen. Nomata for kaikai witim man olsem, iufala mas no duim.”—1 Corinthians 5:11.

Samfala man haedem hu nao olketa and samfala narawan, trae for mekius long kaenfala fasin bilong olketa tru Christian. Wanfala buk wea olketa raetem samting olsem 200 year bihaen Christ wea olketa kolem The Didache, or Teaching of the Twelve Apostles, hem sei hao olketa wea gogo for preach savve stap for “wan or tufala day.” Bihaen datwan, taem hem go “hem savve tekem kaikai nomoa . . . Bat sapos hem askem selen, hem wanfala false profet.” Buk hia sei moa: “Sapos hem laek stap witim iufala and hem savve long wanfala waka, hem mas waka for sapotim hemseleva. Bat sapos hem no savve long eni waka, provaedem samting for hem duim, bat garem fasin for luksavve, mekem no eniwan stap nating and mekius long wei wea hem wanfala Christian. Sapos hem no willing, hem showimaot hem mekius long Christian Wei; keakea long kaen man olsem.”

Aposol Paul careful for no putim hevi long olketa wea hem stap witim long olketa taon wea hem kasem. Hem wakem tent for sapotim hemseleva. (Acts 18:1-3; 2 Thessalonians 3:7-12) For helpem olketa Christian wea travel, olketa firstfala Christian savve raetem leta. Paul raet olsem abaotem Phoebe: “Mi laekem iufala for savve long sista bilong iumi Phoebe, . . . mekem iufala savve welkamim hem long Lord . . . and mekem iufala savve helpem hem long eni samting wea hem needim.”—Romans 16:1, 2.

Olketa Blessing Bilong Wei for Showimaot Welkam

Olketa firstfala Christian missionary barava trustim Jehovah for lukaftarem evri need bilong olketa. Bat waswe, olketa fit for expectim olketa brata for welkamim olketa? Lydia welkamim Paul and olketa narawan long haos bilong hem. Long Corinth, Paul stap long haos bilong Aquila and Priscilla. Wanfala man for lukaftarem prison wea stap long Philippi givim kaikai for Paul and Silas. Jason welkamim Paul long Thessalonica. Long Caesarea, Philip nao invaetem hem. And followim road wea gogo from Caesarea for Jerusalem, Mnason nao invaetem hem. Taem hem gogo for Rome, olketa brata long Puteoli nao welkamim hem. Datwan mas barava nambawan chance for olketa wea welkamim hem for kasem spiritual samting!—Acts 16:33, 34; 17:7; 18:1-3; 21:8, 16; 28:13, 14.

Savveman Frederick F. Bruce sei olsem: “Samting wea muvim evriwan hia for helpem Paul, hem wei wea olketa lovem Paul and Christ wea hem waka for hem. Olketa savve wei wea olketa helpem Paul hem really minim olketa helpem Christ.” Datwan hem nambawan samting for muvim man for welkamim narawan.

Pipol still need for garem fasin for showimaot welkam distaem. Olketa Jehovah’s Witness welkamim staka thousand brata bilong olketa wea travel raon for duim waka bilong Jehovah. Samfala Kingdom pablisa iusim selen bilong olketa seleva for gogo long olketa difren ples for talemaot gud nius. Iumi kasem gudfala samting sapos iumi invaetem olketa olsem long haos bilong iumi, nomata iumi no garem staka samting. Kaenfala wei for welkamim man hem maet minim for sharem nomoa wanem kaikai iumi garem. Diswan savve givim iumi nambawan chance for “encouragem narawan” and for showimaot love long olketa brata bilong iumi and God bilong iumi. (Romans 1:11, 12) Long olketa taem olsem man wea showimaot welkam kasem nambawan samting from “moa hapi kamaot from wei for givim samting winim wei for kasem samting.”—Acts 20:35.

[Footnote]

[Piksa long page 23]

Olketa Christian “garem fasin for showimaot welkam”