Gudfala Lukluk Bilong Iuseleva

LUKLUK bilong iu hem talem nara pipol planti samting abaotem iu. Jehovah lukim heart, bat klosap evritaem olketa man disaedem samting followim “samting wea eye nomoa lukim.” (1 Sam. 16:7) Taem iu klin and werem gudfala kaleko, narafala pipol bae lukim hao iu respectim iuseleva, and olketa bae moa willing for lisin long iu. Wei wea iu werem kaleko wea fitim bae mekhae long organization wea iu stand for hem and olketa wea lisin long iu bae garem gudfala tingting abaotem God bilong iu.

Olketa Instruction for Followim. Bible no talem staka rul saed long lukluk bilong iumi. Bat hem provaedem samfala principle wea balance wea savve helpem iumi for disaed long gudfala wei. Main samting nao hem wei wea iumi “duim evri samting for glory bilong God.” (1 Cor. 10:31) Wanem nao olketa principle saed long lukluk bilong iumiseleva?

First samting, Bible encouragem iumi for klin, long body and long kaleko. Long Law bilong hem for Israel bifor, Jehovah putim olketa mark saed long wei for klin. Olsem example, taem olketa priest duim waka, olketa mas swim and wasim kaleko bilong olketa long olketa taem wea set finis. (Lev. 16:4, 24, 26, 28) Olketa Christian distaem no stap anda long Law bilong Moses, bat olketa followim olketa principle bilong hem. (John 13:10; Rev. 19:8) Especially taem iumi go long ples bilong worship or tekpart long field ministry, body, breath, and kaleko bilong iumi mas klin mekem nara pipol no ting nogud long iumi. Olketa wea givim tok or share insaed olketa demonstration front long kongregeson shud showimaot gudfala example long diswan. Taem iumi mek sure lukluk bilong iumi hem fitim, diswan hem showimaot respect for Jehovah and organization bilong hem.

Mek-tu samting, Bible encouragem iumi for mekem grow fasin for showimaot respect and stretfala tingting. Aposol Paul encouragem olketa Christian woman for “werem kaleko witim fasin wea showimaot respect and stretfala tingting, no long wei for staelem hair and gold or pearl and samting wea kostim tumas selen, bat long wei wea fitim olketa woman wea sei olketa honorim God.” (1 Tim. 2:9, 10) Fasin wea showimaot respect and stretfala tingting olketa important tu saed long kaleko and lukluk bilong olketa man.

Man wea garem fasin wea showimaot respect hem no laek mekem nara pipol feel nogud and hem no laek for werem kaleko wea mekem pipol ting strong long hem. Balance tingting bae lead go long wei for disaed gud. Man wea showimaot olketa fasin olsem hem balance from hem respectim olketa standard bilong God. For garem kaen fasin olsem no minim man no savve werem kaleko wea luk naes, bat hem helpem iumi for garem gudfala tingting saed long lukluk and for stap klia long wei for ova tumas long stael kaleko and lukluk. (1 John 2:16) Hem gud for iumi followim olketa principle hia nomata iumi long ples bilong worship, tekpart long field ministry, or duim narafala samting. Evri kaleko wea iumi werem shud showimaot respect and stretfala tingting. Long skul or wakples, olketa chance for witnessing long eniwe taem bae kamap. Nomata iumi maet no werem semkaen kaleko olsem iumi werem long olketa meeting, convention, and assembly, kaleko bilong iumi mas gudfala, klin, and showimaot respect.

Hem tru, iumi evriwan no werem semkaen kaleko. Pipol laekem difren samting, and datwan hem fitim. Bat iumi mas evritaem followim olketa instruction long Bible.

Aposol Peter showim hao lukluk wea kamaot from “secret fasin bilong heart” hem moa important winim kaleko or wei for staelem hair. (1 Pet. 3:3, 4) Taem heart bilong iumi fulap witim love, hapi, peace, kaenfala fasin, and faith wea garem strong faondeson, olketa bae kamap olsem spiritual kaleko wea barava honorim God.

Mek-thri samting, Bible encouragem iumi for tingim sapos lukluk bilong iumi hem followim gudfala wei. Long 1 Timothy 2:9, hem storyim “gudfala wei for werem kaleko.” Nomata aposol Paul storyim kaleko bilong olketa woman, sem principle hem fitim olketa man. Samting wea followim gudfala wei hem luk gud and hem followim order. Nomata iumi garem planti material samting or nomoa, lukluk bilong iumi savve klin and stret.

Wanfala first samting wea nara pipol luksavve abaotem lukluk bilong iumi hem hair bilong iumi. Iumi mas komim gud. Kastom bilong ples and wanem kaen hair pipol garem savve affectim wei wea each man mekem hair bilong hem. Long 1 Corinthians 11:14, 15, iumi lukim kaonsel bilong aposol Paul saed long wei for staelem hair, wea luksavve long tufala samting hia. Bat, taem hair bilong wanfala man or woman givim idea hao hem trae for luk olsem samwan bilong opposite sex, diswan hem againstim olketa Bible principle.—Deut. 22:5.

For olketa man, klinfala lukluk maet minim olketa mas shave. Long olketa ples wea pipol respectim man wea garem mustache, man wea garem mas katem gud.

Mek-foa samting, lukluk bilong iumi mas no showimaot iumi lovem world and wei bilong hem. Aposol John givim warning: “No lovem world or olketa samting insaed long world.” (1 John 2:15-17) Disfala world hem fulap witim planti difren wei for wantem samting saed long sin. Samfala wea John storyim hem samting wea body wea sin wantem and wei for showimaot olketa material samting wea man garem. Bible storyim tu spirit for bighed, or wei for no obeyim olketa wea garem paoa. (Prov. 17:11; Eph. 2:2) Olketa wei for tingting and feeling olsem planti taem showaot thru long lukluk and wei wea pipol werem kaleko. From diswan, kaleko and lukluk bilong olketa maet no showimaot respect, maet showimaot body, ova tumas, olabaot, or no wari long tingting bilong nara pipol. Olsem olketa servant bilong Jehovah, iumi stap klia long kaleko wea showimaot olketa wei olsem wea no fitim wanfala Christian.

Winim wei for followim world saed long kaleko and lukluk, hem moabeta for followim example bilong olketa man and woman long Christian kongregeson wea mature long spiritual wei! Olketa young man wea garem goal for kamap pablik speaker savve luk followim kaleko bilong olketa wea kasem mark finis for givim pablik tok. Evriwan savve lane from example bilong olketa wea loyal for share long pablik ministry for planti year finis.—1 Tim. 4:12; 1 Pet. 5:2, 3.

Mek faev samting, taem iumi disaedem wanem nao fitim, iumi shud tingim hao “Christ tu no mekem hemseleva hapi.” (Rom. 15:3) Will bilong God hem main important samting long Jesus. Jesus putim tu wei for helpem nara pipol firstaem long samting wea hemseleva maet laekem. Sapos iumi luksavve hao samfala kaleko and lukluk bae stopem pipol for lisin long iumi long ples wea iumi duim preaching, wanem nao iumi shud duim? For followim hambol spirit bilong Christ savve helpem iumi for disaed long wisefala wei. Aposol Paul givim principle wea fitim: “Mifala no givim eni reason for mekem man stambol.” (2 Cor. 6:3) For followim datwan iumi maet stap klia long samfala kaleko or wei for staelem hair wea maet satem mind bilong pipol wea iumi want for witness long olketa.

Wei for Standap. Gudfala lukluk bilong iumi minim tu wei for standap stret. Hem tru, no evriwan standap long sem wei, and iumi no want for followim wanfala rul. Nomata olsem, hem interesting hao insaed Bible, for standap stret hem showimaot hao man respectim hemseleva and garem wei for tingim gud saed. (Lev. 26:13; Luke 21:28) Nomata olsem, maet from hem bendaon long waka for staka year or maet from hem olo or wik long body, wanfala brata or sista maet no fit for standap stret or maet needim samting for saportim hem. Bat for man wea fit, wei for standap stret taem hem tok long nara pipol hem gudfala wei for stopem pipol for tingse hem no interest or hem shame. Long sem wei, nomata hem no rong for wanfala speaker for putim hand bilong hem long speaker stand long samfala taem, hem luk moabeta long audience sapos hem no lean go long speaker stand.

Samting wea Iu Iusim Mas Luk Gud. Hem no lukluk bilong iumi nomoa wea mas klin and gud bat samting wea iumi iusim long ministry tu mas klin and gudfala.

Tingim Bible bilong iu. No evriwan long iumi fit for kasem niufala Bible taem Bible bilong iumi luk olo tumas. Nomata olsem, nomata hao long nao iumi garem Bible bilong iumi, hem mas luk olsem iumi lukaftarem gud.

Planti difren wei stap for putim buk insaed basket, bat hem mas luk gud. Waswe, enitaem iu lukim pepa foldaon from Bible taem wanfala pablisa hem redy for readim scripture long haosholder or maet taem wanfala brata givim tok long kongregeson? Waswe, hem disturbim iu? Sapos wei wea olketa pepa stap insaed Bible hem mekem pipol tingim datwan nomoa, maet wei for keepim olketa pepa long difren ples hem mekem samting wea iu iusim luk gud. Luksavve tu hao, long kastom bilong samfala ples, for putim Bible or nara Bible pablikeson long floor hem no showimaot respect.

Wei for garem gudfala lukluk shud important samting long iumi. Hem affectim tu hao nara pipol ting long iumi. Bat, winim datwan, iumi mas ting strong long diswan bikos iumi want for “mekem teaching bilong Man wea Sevem iumi, God, luk gud tumas long evri samting.”—Titus 2:10.