Paul Organizem Relief Contribution for Olketa Holy Wan
SPIRITUAL samting hem main important samting long olketa tru Christian. Nomata olsem, olketa tinghevi tu long wei for kea for physical living bilong nara pipol. Planti taem olketa helpem pipol wea kasem hard taem. Love for brata muvim olketa Christian for helpem olketa bilong sem biliv wea garem need.—John 13:34, 35.
Love for olketa spiritual brata and sista bilong hem muvim aposol Paul for organizem wanfala kolekson midolwan olketa kongregeson long Achaia, Galatia, Macedonia, and distrik bilong Asia. Wanem nao mekem olketa need for duim diswan? Hao nao olketa organizem disfala relief program? Hao nao saport bilong evriwan? And why nao iumi shud interest long samting wea kamap?
Living Bilong Jerusalem Kongregeson
Bihaen Pentecost 33 C.E., olketa Jew and proselyte from difren ples wea kamap disaepol long Pentecost stap long Jerusalem for lelebet taem moa for lane moa abaotem datfala tru faith. Fitim need, olketa wea worship witim olketa hapi for helpem olketa hia long hevi bilong wei for stap moa. (Acts 2:7-11, 41-44; 4:32-37) Problem midolwan olketa Jew maet mekem big moa disfala need bikos olketa Jew wea tinghae long kantri mekem bighed fasin and raf sekson wea spoelem pipol kamap. Bat, for mekem no eni disaepol bilong Christ hangre, evriday olketa givimaot need bilong olketa widow wea garem need. (Acts 6:1-6) Herod barava persecutim datfala kongregeson, and midolwan 40 C.E. and 50 C.E., bigfala hangre spoelem Judea. For olketa disaepol bilong Jesus, evriting hia maet kosim wanem Paul kolem wei for “safa,” “trabol,” and wei wea pipol bae “stealim evri samting wea [olketa] ownim.”—Hebrews 10:32-34; Acts 11:27–12:1.
Long samting olsem 49 C.E., living hem still nogud. So, bihaen olketa agree for Paul iusim moa taem for preach long olketa Gentile, Peter, James, and John encouragem hem for “rememberim olketa wea poor.” Diswan nao wanem Paul trae for duim.—Galatians 2:7-10.
Organizem Datfala Kolekson
Paul lukaftarem wanfala selen for olketa poor Christian long Judea. Long samting olsem 55 C.E., hem talem olketa long Corinth: “Abaotem disfala kolekson for olketa holy wan, olsem mi talem long olketa kongregeson long Galatia, iufala tu duim sem samting. Long firstfala day bilong evri week, letem iufala wanwan long haos bilong hem putim samfala selen wea fitim living bilong hem . . . [Then] evri man iufala appruvim insaed long olketa leta, olketa hia bae mi sendem for tekem go olketa kaenfala present bilong iufala long Jerusalem.” (1 Corinthians 16:1-3) Long year bihaen Paul sei Macedonia and Achaia share for givim relief. And taem olketa sendem olketa samting hia long Jerusalem, wei wea samfala from distrik bilong Asia stap showimaot maet olketa kongregeson from there tu givim contribution.—Acts 20:4; 2 Corinthians 8:1-4; 9:1, 2.
Olketa nating forcem eniwan for givim moa samting winim wanem hem savve givim. Bat, wanem kamap hem wei for givim extra samting for balancem wei for short midolwan olketa holy wan long Jerusalem and Judea. (2 Corinthians 8:13-15) “Letem each wan duim wanem hem disaedem long heart bilong hem,” Paul hem sei, “no from eniwan pushim or forcem hem, from God lovem man wea hapi for give.”—2 Corinthians 9:7.
Datfala aposol talem olketa bilong Corinth gudfala reason for no hol bak. Jesus ‘kamap poor for saed bilong olketa, mekem olketa savve kamap rich’ long spiritual wei. (2 Corinthians 8:9) Tru nao, olketa bae want for followim wei bilong hem for give. And tu, from God mekem olketa rich “for evrikaen kaenfala fasin,” hem fitim for olketa help for givim need bilong olketa holy wan.—2 Corinthians 9:10-12.
Wei for Tingting Bilong Olketa wea Give
Iumi savve lanem planti samting abaotem willing wei for give taem iumi lukim wei for tingting bilong olketa wea givim relief long olketa holy wan. Datfala kolekson hem showimaot moa samting winim wei for kea long olketa narawan wea worshipim Jehovah. Hem showimaot hao olketa Jew and Gentile Christian olsem wanfala famili. Wei for offerim and acceptim olketa contribution markem wan mind and wei for fren midolwan olketa Gentile and Jew hia. Wei wea olketa share hem long material and spiritual wei tu.—Romans 15:26, 27.
Maet Paul no firstaem invaetem olketa Christian from Macedonia for give—olketa tu barava poor. Bat, olketa “go ahed for beg for disfala privilege for give.” Nomata “long taem bilong wanfala bigfala test wea mekem olketa safa,” olketa hapi for give “winim wanem olketa seleva garem”! (2 Corinthians 8:1-4) Luk olsem bigfala test bilong olketa hem wei wea pipol accusim olketa for followim wanfala religion wea Rome tambuim. Dastawe nao olketa minim feeling bilong olketa brata bilong olketa long Judea, wea safa long sem samting.—Acts 16:20, 21; 17:5-9; 1 Thessalonians 2:14.
Nomata firstaem Paul iusim strong bilong olketa long Corinth for give olsem example for encouragem olketa long Macedonia, datfala strong wikdaon nao. Distaem disfala aposol talem kaenfala fasin bilong olketa long Macedonia for muvim olketa long Corinth. Hem lukim need for remindim olketa hao hem taem nao for finisim wanem olketa startim wan year bifor. Wanem nao happen?—2 Corinthians 8:10, 11; 9:1-5.
Titus nao startim kolekson long Corinth, bat olketa problem kamap wea spoelem diswan. Bihaen hem story witim Paul long Macedonia, Titus go bak witim tufala moa for encouragem kongregeson long Corinth and finisim kolekson. Samfala maet sei Paul trae for mekius long olketa long Corinth. Maet diswan nao why hem sendem thrifala man for finisim datfala kolekson and recommendim each wan long olketa. “Mifala stap klia from wei for eni man long mifala garem blame long disfala kaenfala wei for give wea mifala lukaftarem,” Paul hem sei. “From mifala ‘provaedem long honest wei, no front long eye bilong Jehovah nomoa, bat front long eye bilong olketa man tu.’”—2 Corinthians 8:6, 18-23; 12:18.
Tekem Go Contribution
Kasem 56 C.E., olketa redy for tekem selen wea olketa donatem go long Jerusalem. Paul bae go witim sekson wea olketa wea give chusim. Acts 20:4 hem sei: “Olketa wea go witim hem hem Sopater son bilong Pyrrhus bilong Beroea, Aristarchus and Secundus bilong Thessalonica, and Gaius bilong Derbe, and Timothy, and from distrik bilong Asia Tychicus and Trophimus.” Luk olsem, midolwan long olketa tu hem Luke, wea maet stand for olketa Christian long Philippi. So, samting olsem naen pipol nao go long datfala gogo.
“Evri kolekson mas big fogud,” savveman Dieter Georgi hem sei, “bikos sapos nomoa, then evri hard waka and kost bilong datfala lastfala waka wea Paul and olketa wea go witim hem duim hem bae no fitim sapos hem smol.” Datfala sekson hem no just for security reason bat tu for protectim Paul from eniwan wea bae accusim hem long wei for no honest. Olketa wea go hia stand for olketa Gentile kongregeson front long olketa holy wan long Jerusalem.
Disfala sekson, wea gogo long ship from Corinth kasem Syria, fit for kasem Jerusalem long Passover. Bat, from olketa herem wanfala plan for killim dae Paul, plan hem change. (Acts 20:3) Maet olketa enemy bilong hem plan for killim hem dae long sea.
Paul warim olketa difren samting. Bifor hem go, hem raet long olketa Christian long Rome for prea ‘for olketa wea no biliv long Judea no kasholem hem and for mekem ministry bilong hem for Jerusalem maet kamap samting wea olketa holy wan acceptim.’ (Romans 15:30, 31) Nomata olketa holy wan bae sure for kasem olketa contribution witim bigfala feeling for thankiu, Paul wari abaotem trabol wea maet kamap taem hem arrive midol long olketa Jew.
Tru nao, datfala aposol tingim olketa poor wan evritaem. Nomata Bible no talem wanem taem olketa givim go datfala contribution, wei wea olketa givim hem apim wei for garem wan mind and mekem olketa Gentile Christian fit for showim olketa brata bilong olketa long Judea wei wea olketa thankiu for olketa spiritual riches wea olketa kasem from olketa. Taem Paul kasem temple no longtaem bihaen hem arrive, diswan mekem wanfala raoa kamap and olketa arrestim hem. Bat gogo diswan givim hem chance for witness long olketa governor and king.—Acts 9:15; 21:17-36; 23:11; 24:1–26:32.
Olketa Contribution Bilong Iumi Distaem
From taem bilong first century, staka samting hem change—bat olketa main principle nao nomoa. Hem stret hao olketa Christian kasem information abaotem olketa need saed long selen. Eni contribution olketa givim for olketa wea garem need mas kam from willing heart, wea love for God and man nao shud muvim olketa for duim olsem.—Mark 12:28-31.
Evri samting wea insaed wei for givim relief long olketa holy wan long first century showimaot iumi mas organize gud and mas barava careful for honest taem iumi deal witim olketa contribution. Hem tru, Jehovah God hem savve long olketa need, and hem provaed for olketa servant bilong hem mekem olketa savve go ahed for sharem gud nius abaotem Kingdom witim nara pipol nomata hard taem. (Matthew 6:25-34) Bat, iumi evriwan savve duim part bilong iumi, nomata wanem kaen living iumi garem. Long disfala wei, ‘datfala man wea garem staka samting bae no garem tumas samting, and datfala man wea garem lelebet bae no barava short.’—2 Corinthians 8:15.