Bible Buk Namba 47—2 Corinthians
Man wea Raetem: Paul
Ples Hem Raetem: Macedonia
Taem Hem Finis Raetem: c. 55 C.E.
MAET disfala taem hem gogo for end bilong hot season long 55 C.E. Samfala problem still stap insaed Christian kongregeson long Corinth wea mekem aposol Paul wari. No longtaem go nomoa hem raetem firstfala leta bilong hem go long olketa long Corinth. Long datfala taem hem sendem Titus go long Corinth for help for hipimap olketa holy wan long Judea and tu maet for lukim hao nao olketa long Corinth bae ting long firstfala leta. (2 Cor. 8:1-6; 2:13) Hao nao olketa ting long leta hia? Paul hem feel gud for savve hao leta hia muvim olketa for sorre and repent! Titus nao go bak long Paul long Macedonia witim disfala gudfala report, and distaem heart bilong aposol barava fulap witim love for olketa Christian wea hem lovem long Corinth.—7:5-7; 6:11.
2 So Paul raet go moa long olketa long Corinth. Paul raetem disfala mek-tu leta wea garem feeling and strongfala toktok from Macedonia and luk olsem Titus nao tekem go. (9:2, 4; 8:16-18, 22-24) Wanfala samting wea Paul wari abaotem wea muvim hem for raet, hem olketa “stael aposol” wea stap midolwan long olketa bilong Corinth, wea hem sei olketa hia “olketa false aposol, olketa giaman wakman.” (11:5, 13, 14) Spiritual saed bilong disfala niu kongregeson hem stap long danger, and olketa tok daonem paoa wea Paul garem olsem wanfala aposol. Dastawe, olketa long Corinth needim tumas disfala mek-tu leta.
3 Paul hem sei: “Diswan hem mek-thri taem mi redi for kam long iufala.” (2 Cor. 12:14; 13:1) Hem plan bifor for visitim olketa for mek-tu taem long taem wea hem raetem firstfala leta bilong hem, bat nomata hem redi, disfala “mek-tu taem for hapi” hem no kamap. (1 Cor. 16:5; 2 Cor. 1:15) Paul hem kasem there wanfala taem nomoa, for 18 month long 50-52 C.E., taem Christian kongregeson hem start long Corinth. (Acts 18:1-18) Nomata olsem, Paul fulfillim disfala idea bilong hem for visitim Corinth moa. Taem hem long Greece for thrifala month, maet long 56 C.E., hem stap samfala taem long Corinth, and from there nao hem raetem leta bilong hem for olketa long Rome.—Rom. 16:1, 23; 1 Cor. 1:14.
4 Tu Corinthians witim Wan Corinthians and olketa narafala buk wea Paul raetem olketa tru evribit and fit for kamap part bilong Bible. So iumi fit for lukluk moa insaed long kongregeson long Corinth and kasem gudfala samting from toktok bilong God wea kam thru long Paul wea hem givim kaonsel long olketa and iumi tu.
WEI WEA HEM HELPEM IUMI
18 Wei wea Paul tinghae long Christian ministry wea showaot long Tu Corinthians hem muvim and encouragem iumi! Letem iumi lukluk long hem olsem Paul. Christian minister wea kasem savve from God hem no man wea salem Word bat from honest fasin nao muvim hem. Samting wea mekem hem fit for gohed hem no eni samting wea eniwan raetem long pepa, bat from frut wea hem kasem long ministry. Hem tru, nomata ministry hem nambawan samting, diswan mas no mekem man bighed. Olketa servant bilong God wea no perfect garem disfala service wea garem hae price insaed long olketa dish wea olketa wakem from graon wea savve brek, mekem pipol savve lukim gud hao disfala paoa hem bilong God. So iumi mas garem hambol fasin taem iumi acceptim nambawan privilege for kamap minister bilong God, and hem barava kaenfala fasin wea iumi no fit for kasem from God for serve olsem “minister wea stand for Christ”! Dastawe encouragement bilong Paul barava fitim for “no acceptim kaenfala fasin bilong God wea iumi no fit for kasem and long semtaem no tingim why nao iumi kasem datwan”!—2:14-17; 3:1-5; 4:7; 5:18-20; 6:1.
19 Paul barava provaedem gudfala example for olketa Christian minister followim. Wanfala samting, hem tinghae and studyim olketa Hebrew Scripture, evritaem talem toktok from olketa, story abaotem, and showim wei for iusim olketa. (2 Cor. 6:2, 16-18; 7:1; 8:15; 9:9; 13:1; Isa. 49:8; Lev. 26:12; Isa. 52:11; Ezek. 20:41; 2 Sam. 7:14; Hos. 1:10) And tu, olsem wanfala overseer, hem showimaot deepfala feeling for olketa sheepsheep, taem hem sei: “Long saed bilong mi bae mi hapi for give and givim miseleva evribit for soul bilong iufala.” Record showaot hao hem barava givim hemseleva for olketa brata bilong hem. (2 Cor. 12:15; 6:3-10) Hem no kamap taed long hard waka bilong hem taem hem teach, givim encouragement, and mekem evri samting stret insaed long kongregeson long Corinth. Hem givim klia warning againstim wei for stap long darkness, taem hem sei long olketa bilong Corinth: “No join tugeta long wei wea no balance witim pipol wea no biliv.” Bikos hem garem strongfala love for olketa, hem no laek for lukim tingting bilong olketa kamap nogud, “olsem snek hem giamanim Eve long trik bilong hem,” and so hem encouragem olketa olsem: “Gohed for testim sapos iufala stap insaed long faith, gohed for pruvim iufala wanem kaen man.” Hem muvim olketa for give long bigfala wei olsem Christian, hem showim olketa hao “God lovem man wea hapi for givim samting,” and hemseleva showimaot wei for thankiu long God for disfala nambawan free present. Tru nao, witim love olketa brata long Corinth stap insaed long heart bilong Paul, and strongfala service wea hem duim for olketa hem mark bilong wanfala overseer wea garem strong and wea luksavve and redi. Barava nambawan example for iumi distaem!—6:14; 11:3; 13:5; 9:7, 15; 3:2.
20 Aposol Paul showimaot stretfala tingting for iumi taem hem point go long “Father bilong olketa kaenfala mercy and God bilong evri comfort” olsem trufala ples for kasem strong long taem bilong test. Hem nao “comfortim iumi long evri test bilong iumi” mekem iumi savve stand strong for kasem laef insaed niu world bilong hem. Paul point tu long nambawan hope for “wanfala building from God, wanfala haos wea olketa no wakem witim hand, wea for olowe long heven,” and hem sei: “So sapos eniwan hem wan mind witim Christ, hem wanfala niufala creation; olketa oldfala samting finis nao, lukim! olketa niufala samting kamap.” Tu Corinthians garem olketa gudfala toktok bilong trust for olketa, wea olsem Paul, wea bae kasem Kingdom long heven.—1:3, 4; 5:1, 17.