Toktok Bilong Jehovah Hem Laef
Olketa Main Point From Wan and Tu Corinthians
APOSOL Paul hem barava wari abaotem olketa brata and sista long kongregeson long Corinth. Hem herem olketa brata long there savve raoa tumas. Olketa no aotem man wea durong from kongregeson. Datfala kongregeson raetem leta tu long Paul abaotem samfala samting. Dastawe Paul raetem tufala leta long olketa brata long Corinth. Long mek-thri missionary gogo bilong hem, hem raetem firstfala leta bilong hem long samting olsem 55 C.E., taem hem stap long Ephesus.
Luk olsem Paul raetem mek-tu leta long samfala month bihaen hem raetem firstfala leta. Plande samting wea happen long kongregeson long Corinth long datfala taem and living bilong pipol long datfala ples, hem semsem olsem distaem. Dastawe samting wea Paul talem long tufala leta hia hem savve barava helpem iumi distaem.—Heb. 4:12.
‘LUKAOT GUD, STRONG LONG SAMTING WEA IUFALA BILIVIM, GOHED STRONG’
Paul hem sei: “Iufala evriwan mas garem wan mind.” (1 Cor. 1:10) Iumi mas followim Jesus Christ, wea hem nao ‘faondeson wea stap finis,’ for garem olketa fasin bilong wanfala Christian. (1 Cor. 3:11-13) Paul storyim wanfala man long kongregeson wea durong. Hem sei: “Aotem datfala rabis man from iufala.” (1 Cor. 5:13) Hem sei tu: “Body hem no samting for iusim for durong, bat hem samting for iusim long waka bilong Lord.”—1 Cor. 6:13.
Paul talem gudfala kaonsel for olketa brata and sista long Corinth abaotem “olketa samting wea [olketa] raet kam long hem abaotem.” Hem story abaotem marit and wei for stap singol. (1 Cor. 7:1) Bihaen Paul storyim hedship wea olketa Christian mas followim long kongregeson, wei wea olketa Christian meeting mas no olobaot, and hao resurrection bae happen, hem tok olsem: “Iufala mas lukaot gud, strong long samting wea iufala bilivim, no fraet, and gohed strong.”—1 Cor. 16:13.
Ansa for Olketa Bible Kwestin:
1:21—Waswe, Jehovah iusim “krangge samting” for sevem pipol wea biliv? Nomoa. Nomata pipol long “world garem bigfala savve, olketa nating savve long God,” dastawe message wea God iusim for sevem pipol hem here krangge long olketa.—John 17:25.
5:5—Wanem nao hem minim “for givim go [rabis] man long Satan for hem finisim body, mekem spirit hem sev”? Taem man disfellowship from kongregeson bikos hem duim bigfala sin and no repent, hem go bak moa long rabis world bilong Satan. (1 John 5:19) Dastawe Bible sei olketa givim hem go long Satan. Taem olketa disfellowshipim hem, olketa aotem nogud samting wea savve spoelem kongregeson and sevem spirit bilong kongregeson, wea minim fasin and tingting wea followim God.—2 Tim. 4:22.
7:33, 34—Olketa wea marit wari abaotem olketa wanem “samting long world”? Paul hem storyim olketa samting wea man needim evriday, wea olketa Christian wea marit mas tingim tu. Olketa samting hia hem kaikai, kaleko, and ples for stap. Bat hem no minim olketa nogud samting long world wea olketa Christian mas no duim.—1 John 2:15-17.
11:26—Haomas taem nao iumi mas celebratem dae bilong Jesus, and iumi mas celebratem datwan “gogo kasem” wanem taem? Paul no talem for olketa Christian mas celebratem dae bilong Jesus staka taem. Bat hem sei long evritaem wea olketa anointed Christian kaikaim bred and drinkim wine, olketa “showimaot dae bilong Lord.” Olketa duim datwan wantaem nomoa long evri year, long Nisan 14. Olketa duim diswan “gogo kasem taem wea hem kam,” wea hem nao taem wea hem mekem olketa laef bak and go ap long heven.—1 Thess. 4:14-17.
13:13—Long wanem wei nao love hem barava winim faith and hope? Taem ‘samting wea iumi hope for hem,’ hem kamap tru, faith and hope wea iumi garem for datwan firstaem hem finis nao. (Heb. 11:1) Love hem barava winim faith and hope bikos hem no savve finis.
15:29—Wanem nao hem minim for “baptaes for kamap olketa wea dae”? Paul hem no sei for pipol wea laef mas baptaes for pipol wea dae finis and wea no baptaes. Taem Paul hem storyim “baptaes” long hia hem minim olketa anointed Christian mas stap faithful go kasem taem olketa dae and bihaen datwan olketa bae laef bak olsem spirit.
Wanem Nao Iumi Lanem?
1:26-31; 3:3-9; 4:7. Taem iumi tok praod abaotem Jehovah and no iumiseleva, datwan mekem kongregeson garem wan mind.
2:3-5. Corinth hem ples wea pipol kam for kasem bigfala education abaotem olketa Greek teaching. Taem Paul hem preach long there, hem no savve sapos pipol bae lisin long hem or nomoa. Nomata maet hem fraet lelebet and seksek tu, datwan no stopem hem for duim preaching waka wea God givim long hem. Iumi tu mas duim sem samting olsem Paul and no letem olketa hard samting mekem iumi hol bak for storyim gud nius abaotem Kingdom bilong God long evriwan. Olsem Paul duim, iumi tu savve askem Jehovah for helpem iumi.
2:16. Sapos iumi laek garem “tingting bilong Christ” iumi mas savve long wanem nao tingting bilong hem abaotem samting, and why nao hem ting olsem. Iumi mas garem sem tingting olsem hem, savve long olketa wei bilong hem, and followim hem. (1 Pet. 2:21; 4:1) Hem important tumas for iumi studyim gud laef and ministry bilong Jesus!
3:10-15; 4:17. Iumi mas lukluk gud long wei wea iumi teach and mekem pipol kamap disaepol, mekem iumi savve duim datwan long gudfala wei. (Matt. 28:19, 20) Sapos iumi no teachim gud olketa study bilong iumi, maet olketa no savve winim olketa samting wea testim faith bilong olketa. Datwan savve mekem iumi sorre fogud and nomata God sevem iumi, bat bae hem olsem samwan pullim iumi “aot from fire.”
6:18. For “ranawe from wei for durong” hem minim for no duim olketa samting wea join witim por·neiʹa. Hem minim tu for man no duim olketa samting wea savve mekem hem laek durong, olsem for lukluk long olketa rabis piksa, duim olketa samting wea no klin, tingting tumas abaotem sex, and for switim feeling bilong narawan.—Matt. 5:28; Jas. 3:17.
7:29. Olketa wea marit mas no tingim olketa seleva nomoa nogud gogo Kingdom waka hem no nambawan samting long laef bilong olketa nao.
10:8-11. Jehovah feel nogud tumas taem olketa Israelite komplen abaotem Moses and Aaron. Hem barava gud samting sapos hem no wei bilong iumi for komplen.
16:2. Sapos iumi planim firstaem haomas selen iumi bae givim for disfala preaching waka wea gohed evriwea long world bae iumi no miss for givim datwan evritaem.
‘GOHED STRETEM TINGTING BILONG IUFALA’
Paul talem olketa long Corinth for “forgivim and comfortim” wanfala man wea hem disfellowship bifor bat hem repent and kam bak long kongregeson. Firstfala leta wea Paul raetem long olketa hem mekem olketa sorre, bat Paul hem hapi bikos diswan mekem olketa “repent.”—2 Cor. 2:6, 7; 7:8, 9.
Paul talem olketa brata and sista long Corinth hao nomata olketa ‘gohed gud long evri samting,’ olketa mas ‘gohed gud long wei for give.’ Bihaen hem story for olketa wea againstim hem, hem talem diswan long evriwan: “Gohed for hapi, stretem tingting bilong iufala, comfortim narawan, garem wan mind, and stap gud witim narawan.”—2 Cor. 8:7; 13:11.
Ansa for Olketa Bible Kwestin:
2:15, 16—Long wanem wei nao iumi ‘samting wea smel naes tumas’? Iumi olsem bikos iumi duim samting wea Bible talem and preach abaotem message insaed Bible. Olketa nogud pipol olketa les long disfala “smel,” bat hem smel naes long Jehovah and pipol wea laek savve long Hem.
5:16—Long wanem wei nao olketa anointed Christian “no ting long man olsem pipol long world ting long man”? Olketa no favorim man bikos hem rich or long kala skin bilong hem, or wanem tribe or kantri hem kam from. Bat olketa tinghae long spiritual saed bilong olketa brata and sista bilong olketa.
11:1, 16; 12:11—Waswe, samting wea Paul talem long olketa long Corinth hem ova tumas? Nomoa. Bat bikos hem mas defendim waka bilong hem olsem aposol, maet samfala tingse hem tokplas and ova tumas.
12:1-4—Hu nao “go long paradaes”? Bible no storyim eni nara man wea lukim kaen vision olsem. Luk olsem Paul hem storyim samting wea kasem hemseleva bikos hem storyim disfala vision bihaen hem defendim waka bilong hem olsem aposol. Luk olsem paradaes wea Paul lukim hem spiritual paradaes wea Christian kongregeson stap insaed “long taem bilong end.”—Dan. 12:4.
Wanem Nao Iumi Lanem?
3:5. Disfala scripture showimaot Jehovah iusim Word bilong hem, holy spirit, and organization bilong hem for mekem olketa Christian fit for duim ministry. (John 16:7; 2 Tim. 3:16, 17) Hem gud for iumi studyim Bible and olketa buk bilong iumi, askem Jehovah evritaem for holy spirit, and go olowe long olketa Christian meeting and tekpart long olketa tu.—Ps. 1:1-3; Luke 11:10-13; Heb. 10:24, 25.
4:16. From Jehovah mekem ‘man strong evriday,’ iumi mas iusim gud olketa samting wea Jehovah givim long iumi. Datwan minim iumi mas strongim wei wea iumi fren witim God evriday.
4:17, 18. Iumi savve gohed for faithful long Jehovah sapos iumi tingim olketa ‘hardfala taem wea kasem iumi hem for lelebet taem and hem smol nomoa.’
5:1-5. Paul barava storyim gud tingting bilong olketa anointed Christian abaotem hope bilong olketa for laef long heven!
10:13. Iumi mas preach nomoa long territory bilong kongregeson. Iumi savve preach long narafala territory sapos olketa markem for iumi duim.
13:5. For ‘testim sapos iumi biliv yet,’ iumi mas lukluk long iumiseleva sapos iumi followim samting wea Bible talem or nomoa. For ‘showimaot iumi wanem kaen man,’ iumi mas luksavve sapos iumi barava fren gud witim God or nomoa. Diswan minim tu iumi mas “luksavve long samting wea stret and samting wea no stret,” and haomas samting nao iumi duim for God. (Heb. 5:14; Jas. 1:22-25) Taem iumi followim toktok bilong Paul, iumi savve gohed strong long truth.
[Piksa long page 26, 27]
Wanem nao disfala toktok hem minim: “Evritaem kaikaim disfala bred and drink long disfala kap”?—1 Cor. 11:26