“Distaem Nao Hem Taem for God Blessim Iumi”
“Distaem nao hem taem for God blessim iumi, and distaem nao hem taem for God sevem iumi.”—2 COR. 6:2.
1. Why nao iumi need for luksavve long important waka wea iumi mas duim firstaem?
“TAEM hem stap for evri samting, and evri samting wea iumi laek for duim hem garem taem wea barava fitim datwan.” (Eccl. 3:1) Solomon sei hem important for luksavve long best taem for duim samting, olsem for wakem garden, go long nara ples, duim bisnis, or for story witim narawan. Iumi tu need for luksavve wanem nao important waka wea iumi mas duim firstaem. Iumi mas luksavve wanem nao important samting long laef bilong iumi.
2. Hao nao iumi savve taem Jesus preach hem luksavve wanem hem mas duim?
2 Taem Jesus stap long earth, hem luksavve wanem hem mas duim and wanem pipol need for savve long hem. Hem luksavve wanem nao important samting for hem mas duim. Hem savve hem taem for staka profesi abaotem Messiah kamap tru. (1 Pet. 1:11; Rev. 19:10) Hem garem waka for mekem pipol savve hem nao Messiah wea God promisim. Hem mas talemaot tru samting abaotem Kingdom and hipimap olketa wea bae rul witim hem long future. And hem mas startim Christian kongregeson wea olketa long kongregeson nao bae gohed for preach long evri farawe ples and teachim pipol for kamap disaepol.—Mark 1:15.
3. From Jesus luksavve long important waka wea hem mas duim, datwan mekem hem for duim wanem?
3 From Jesus luksavve long important waka wea hem mas duim, datwan mekem hem strong for duim wanem Dadi bilong hem laekem. Hem talem olketa disaepol: “Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” (Luke 10:2; Mal. 4:5, 6) Jesus chusim 12-fala disaepol, then bihaen hem chusim nara 70 man for preach. Hem talem olketa wanem for duim and for talem pipol: “Kingdom bilong God hem kam klosap nao.” Bible sei: “Taem Jesus talem olketa samting hia finis long twelvfala disaepol bilong hem, hem go moa long olketa nara taon for teachim pipol and preach long olketa.”—Matt. 10:5-7; 11:1; Luke 10:1.
4. Wanem nao Paul duim wea showimaot hem followim Jesus Christ?
4 Jesus showimaot nambawan example for evriwan wea followim hem. Hem strong for duim preaching waka and lovem God. Aposol Paul mekhae long diswan taem hem sei long olketa brata and sista: “Iufala mas followim wei bilong mi, olsem mi tu followim wei bilong Christ.” (1 Cor. 11:1) Wanem nao Paul duim wea showimaot hem followim Christ? Main samting, hem waka hard for preachim gud nius. Long olketa leta wea Paul raetem for olketa kongregeson, iumi readim olketa toktok olsem “iufala mas no lesy bat iufala mas duim gud waka bilong iufala,” “barava waka hard for Jehovah,” “evritaem busy long waka bilong Lord,” and “eni samting wea iufala duim, duim witim full heart and strong bilong iufala.” (Rom. 12:11; 1 Cor. 15:58; Col. 3:23) Paul nating forgetim taem wea Lord Jesus Christ showaot long hem long road wea go for Damascus and disfala toktok bilong Jesus wea disaepol Ananias talem long hem: “Mi chusim disfala man for talemaot nem bilong mi long pipol long olketa difren kantri and long olketa king and olketa son bilong Israel tu.”—Acts 9:15; Rom. 1:1, 5; Gal. 1:16.
“Taem for God Blessim Iumi”
5. Wanem nao mekem Paul strong for duim ministry?
5 Taem iumi readim buk bilong Acts, iumi luksavve Paul hem strong and no fraet for duim ministry. (Acts 13:9, 10; 17:16, 17; 18:5) Paul luksavve hem stap long wanfala important taem. Hem sei: “Distaem nao hem taem for God blessim iumi, and distaem nao hem taem for God sevem iumi.” (2 Cor. 6:2) Long 537 B.C.E., God blessim olketa Israelite wea prisoner long Babylon bikos olketa go bak long hom bilong olketa. (Isa. 49:8, 9) Bat taem Paul talem datfala toktok, wanem nao hem tingim? Olketa nara verse long 2 Corinthians bae helpem iumi for savve wanem hem tingim.
6, 7. Wanem nambawan privilege nao olketa anointed Christian kasem distaem, and hu nao waka witim olketa?
6 Long leta wea Paul raetem, hem story abaotem nambawan privilege wea hem and olketa anointed Christian kasem. (Readim 2 Corinthians 5:18-20.) Hem sei God givim “wanfala waka long [olketa] for helpem pipol fren bak witim hem.”
7 Start long taem wea Adam and Eve sin, olketa man no fren witim Jehovah. (Rom. 3:10, 23) Datwan mekem olketa man safa and dae bikos olketa no savve long God and olketa plan bilong hem. Paul sei: “Iumi savve evri samting wea God wakem gohed for krae long heart and safa tugeta kam kasem distaem.” (Rom. 8:22) Bat God duim olketa samting for mekem olketa man fren bak moa witim hem. Hem nao datfala ministry wea God givim long Paul and olketa anointed Christian bifor. Olketa wea showimaot faith long Jesus luksavve hem ‘taem for God blessim and sevem olketa.’ Olketa anointed Christian and “olketa nara sheepsheep” wea waka witim olketa, gohed for talem pipol “hem taem nao for God blessim iumi.”—John 10:16.
8. From God talem olketa man for fren bak moa witim hem, hao nao datwan hem nambawan samting?
8 Wei wea God talem pipol for fren bak moa witim hem, hem nambawan samting bikos nomata Adam and Eve spoelem datwan, God nao duim samting for stretem. (1 John 4:10, 19) Wanem nao hem duim? Paul sei: “Waka hia hem for iumi talem pipol God iusim Christ for mekem pipol savve fren bak witim hem, and hem bae no tingim moa sin bilong olketa. Iumi mas talem olketa tu, God givim disfala waka long iumi for talem pipol olketa savve fren bak witim God.”—2 Cor. 5:19; Isa. 55:6.
9. Wanem nao Paul duim for showimaot hem tinghae long wei wea God kaen and sorre long pipol?
9 From Jehovah givim Son bilong hem for dae for olketa man, olketa wea showimaot faith savve kasem forgiveness for olketa sin and fren bak moa witim God. Hem givim waka long olketa man for talem pipol long evri ples for fren bak witim God. (Readim 1 Timothy 2:3-6.) From Paul savve long plan bilong God and luksavve hem stap long wanfala important taem, datwan mekem hem for waka hard for “helpem pipol fren bak witim [God].” Plan bilong Jehovah nating change. Hem laekem olketa man distaem for fren bak moa witim hem. Disfala toktok bilong Paul, ‘distaem nao hem taem for God blessim and sevem iumi’ hem barava fitim taem bilong iumi. Jehovah barava kaen tumas and sorre long iumi!—Ex. 34:6, 7.
“No Ting Nating Long Why God Hem Kaen”
10. Wanem nao olketa anointed Christian long bifor and distaem duim from olketa luksavve hem “taem for God sevem iumi”?
10 Olketa wea “wan mind witim Christ” nao first wan for kasem gud samting from disfala chance for fren bak moa witim God. (2 Cor. 5:17, 18) ‘Taem for God sevem olketa’ hem start long Pentecost 33 C.E. Start long datfala taem, olketa kasem waka for “talem pipol olketa savve fren bak witim God.” Olketa anointed Christian distaem tu gohed for duim waka for “helpem pipol fren bak witim [God].” Olketa luksavve fofala angel wea aposol John lukim long vision “satem fofala wind long earth mekem no eni wind savve blow kam long earth.” So distaem nao hem “taem for God sevem iumi” and “blessim iumi.” (Rev. 7:1-3) For winim 100 year, olketa anointed Christian gohed strong for duim disfala waka for ‘helpem pipol long evri ples for fren bak witim God.’
11, 12. Wanem nao olketa anointed Christian duim bifor wea showimaot olketa luksavve olketa stap long taem wea important? (Lukim piksa long page 15.)
11 Olsem example, disfala buk Jehovah’s Witnesses—Proclaimers of God’s Kingdom, storyim hao winim 100 year go finis, “Charles Russell and olketa nara brata barava bilivim olketa stap long taem bilong harvest and pipol need for savve long truth wea mekem olketa free.” Wanem nao olketa duim? From olketa anointed brata hia luksavve olketa stap long taem bilong harvest and “taem for God blessim iumi,” olketa no talem pipol for kam service nomoa olsem olketa bigman bilong religion duim for longtaem finis, bat olketa traem olketa difren wei for mekem staka pipol herem gud nius. Olketa mekius long niu technology for mekem waka bilong olketa kamap big.
12 For mekem pipol herem gud nius abaotem Kingdom, smolfala grup hia iusim olketa tract, brochure, magasin, and buk. Olketa raetem tu staka sermon and article for printim long staka thousand niuspepa. Olketa givim olketa tok from Bible long olketa radio station wea pipol long America and olketa nara kantri herem. Olketa mekem movie wea garem saond, nomata pipol long datfala taem no mekem eni movie yet wea garem saond. Wanem nao kamaot from hard waka wea olketa duim? Distaem winim 7 million pipol gohed for talem nara pipol for “fren bak moa witim God.” Tru tumas, olketa anointed Christian hia showimaot gudfala example long wei for gohed strong nomata olketa no staka and no garem savve for duim samfala samting.
13. Iumi shud ting strong long wanem?
13 Toktok wea Paul talem, “distaem nao hem taem for God blessim iumi” hem barava fitim distaem. Jehovah kaen tumas and iumi tinghae long chance wea hem givim for iumi herem and acceptim message for fren bak witim hem. Iumi ting strong long disfala toktok bilong Paul: “Mifala askem iufala tu for no ting nating long why God hem kaen long iufala.” (2 Cor. 6:1) God hem kaen bikos hem laek for “mekem pipol savve fren bak witim hem.” Hem “iusim Christ” nao for duim datwan.—2 Cor. 5:19.
14. Wanem gud samting nao start for happen long staka kantri?
14 Satan blindim mind bilong staka pipol dastawe olketa no fren witim God and no savve why God hem kaen. (2 Cor. 4:3, 4; 1 John 5:19) Nomata olsem, from world hem nogud tumas staka pipol laek for fren witim God taem olketa savve wei for no fren witim God nao mekem pipol duim nogud samting and safa. Long olketa kantri wea plande pipol no interest for herem gud nius bifor, staka distaem acceptim gud nius and duim samting for fren bak moa witim God. So waswe, iumi luksavve distaem nao hem taem for gohed strong for talem pipol for “fren bak moa witim God”?
15. Winim wei for preachim message for mekem pipol feel gud, wanem nao iumi laekem pipol for savve long hem?
15 Waka bilong iumi hem no just for talem pipol sapos olketa worshipim God bae hem helpem olketa for stretem olketa problem and mekem olketa feel gud. Staka pipol go long church for herem kaen samting olsem and olketa bigman bilong olketa church teachim nomoa samting wea pipol laek herem. (2 Tim. 4:3, 4) Datwan hem no goal bilong iumi taem iumi duim ministry. Iumi preachim gud nius hao Jehovah lovem iumi dastawe hem willing for givim Son bilong hem for dae for iumi mekem iumi kasem forgiveness for olketa sin. From datwan, iumi wanwan savve fren bak moa witim God. (Rom. 5:10; 8:32) Bat disfala chance “for God blessim iumi” hem klosap finis nao.
“Letem Holy Spirit Mekem Iufala Strong for Duim Waka”
16. Wanem nao helpem Paul for gohed strong and no fraet?
16 So wanem nao iumi savve duim for gohed strong for sapotim tru worship? Maet samfala shame or no savve story tumas and maet hem no isi for olketa talemaot feeling bilong olketa or for laek fren witim staka pipol. Bat hem gud for tingim man wea strong for duim samting hem no from hem savve talemaot feeling bilong hem, hapi tumas, or from fasin wea hem garem. Paul talem wanem nao olketa brata and sista savve duim for gohed strong. Hem sei: “Letem holy spirit mekem iufala strong for duim waka.” (Rom. 12:11) Holy spirit barava helpem aposol Paul for no fraet and no givap for duim preaching waka. Start long taem wea Jesus showaot long Paul go kasem taem hem dae long Rome olsem prisoner, wea datwan hem winim 30 year, Paul barava gohed strong. Paul evritaem depend long God and God givim holy spirit for strongim hem. Paul sei: “Nomata wanem samting hem kasem mi, paoa wea mi kasem from God nao hem strongim mi for gohed.” (Phil. 4:13) Iumi savve kasem gud samting sapos iumi followim example bilong hem!
17. Hao nao iumi savve ‘letem holy spirit mekem iumi strong for duim waka’?
17 Iumi needim holy spirit evritaem for “mekem iumi strong for duim waka.” For kasem datwan, iumi mas iusim evri samting wea Jehovah givim for strongim wei wea iumi fren witim hem. Datwan minim iumi mas ting strong long wei for evritaem duim study seleva, famili worship, prea long Jehovah, and for go long olketa kongregeson meeting. Datwan showimaot iumi ‘letem holy spirit mekem iumi strong for duim waka.’—Readim Acts 4:20; 18:25.
18. Wanem nao iumi olketa Christian wea dedicate shud laek for duim evritaem?
18 Man wea disaed strong for duim wanfala samting hem tingim datwan evritaem and hem no letem eni samting spoelem wanem hem laek duim. Iumi olketa Christian wea dedicate evritaem laek for duim wanem Jehovah laekem, olsem Jesus duim. (Heb. 10:7) Jehovah laekem staka pipol moa for fren bak witim hem. So gohed strong for duim disfala barava important waka olsem Jesus and Paul duim.
Waswe, Iu Tingim Yet?
• Wanem waka nao Paul and olketa nara anointed Christian kasem from God?
• From hem “taem for God blessim iumi,” wanem nao olketa anointed Christian duim?
• Hao nao olketa Christian savve ‘letem holy spirit mekem olketa strong for duim waka’?
[Piksa long page 12]
Paul nating forgetim taem wea Lord Jesus Christ showaot long hem