Leta From Governing Body

“MI PREA for iufala savve kasem kaeness wea iumi no fit for kasem and peace from Father bilong iumi, God, and from Lord Jesus Christ.” Paul talem toktok hia for startim plande leta bilong hem for olketa kongregeson. Hem barava talemaot samting wea mifala laekem iufala evriwan tu for kasem.—Eph. 1:2.

Iumi barava thankiu long kaeness bilong Jehovah wea iumi no fit for kasem wea showaot thru long ransom sakrifaes bilong Christ Jesus! Thru long ransom nao, iumi kasem wei for God appruvim iumi. Nomata maet iumi evritaem studyim Bible, preachim gud nius, or duim eni nara gudfala waka, iumi no savve kasem wei for God appruvim iumi from wei for duim olketa samting hia. Wei wea God forgivim olketa sin bilong iumi and laek givim iumi laef olowe, hem no olsem pei for gudfala waka wea iumi duim, bat really, diswan hem olketa present wea showimaot kaeness bilong hem wea iumi no fit for kasem, wea hem givim thru long Jesus Christ.—Rom. 11:6.

Paul hem sei long olketa brata bilong hem: “Mifala . . . ask strong long iufala for no garem wei for acceptim kaenfala fasin bilong God wea iumi no fit for kasem and long semtaem no tingim why nao iumi kasem datwan. From hem sei: ‘Long wanfala taem wea fitim mi herem iu, and long wanfala day bilong salvation mi helpem iu.’ Distaem nao hem barava taem wea fitim. Distaem nao hem day bilong salvation.” Long first century, wanfala “taem wea fitim” hem stap bifor Jerusalem hem finis evribit. Jehovah sevem pipol wea garem honest heart and lovem hem long spiritual wei. Gogo, diswan mekem wei for olketa faithful wan wea ranawe from Jerusalem bifor hem finis evribit long 70 C.E. for sev long physical wei tu.—2 Cor. 6:1, 2.

Distaem tu, iumi stap long wanfala “taem wea fitim” and wanfala “day bilong salvation.” Olketa wea Jehovah acceptim olsem servant bilong hem and wea sev long spiritual wei garem hope for sev long physical wei tu long “bigfala day bilong Jehovah” wea barava klosap for kam.—Zeph. 1:14.

From day bilong Jehovah hem klosap for kam, iumi garem wanfala important responsibility. Iumi mas warnim pipol abaotem diswan, and tu, helpem olketa wea garem honest heart for kasem gud samting from kaeness bilong Jehovah wea iumi no fit for kasem, mekem olketa tu savve sev. Paul hem luksavve diswan hem wanfala important responsibility. Hem raet olsem: “Tru nao, bae mi nogud nao sapos mi no talemaot disfala gud nius!” Hem talemaot feeling bilong hem tu taem hem sei: ‘Mi garem kaon long olketa wise man and long olketa man wea no tingting gud: dastawe mi barava interest for talemaot gud nius.’—1 Cor. 9:16; Rom. 1:14, 15.

Sapos iumi fail for duim disfala important waka for warnim pipol, iumi mas givim ansa long Jehovah. Iumi savve long wanem Jehovah hem talem long profet Ezekiel: “Son bilong man, mi mekem iu kamap man for lukaot for haos bilong Israel, and iu mas herem toktok from mouth bilong mi and iu mas warnim olketa from mi. Taem mi sei long samwan wicked, ‘Iu bae dae,’ and iu nating warnim hem and talem hem for lusim wicked wei bilong hem for sevem laef bilong hem, from hem wicked, hem bae dae, bat blood bilong hem mi bae askem bak from hand bilong iu.”—Ezek. 3:17, 18.

Olketa last day distaem barava hard tumas for deal witim. Hem no isi for balancem olketa samting saed long famili, waka, kongregeson, and preaching. And tu, plande long iufala deal witim sik, sorre feeling, wei for olo, and maet persecution tu. Staka long iufala barava “karem bigfala hevi.” Mifala want for talemaot feeling bilong mifala long iufala, wea join witim wanem Jesus hem sei: “Kam long mi, iufala evriwan wea stragol and karem bigfala hevi, and mi bae strongim iufala.” (Matt. 11:28) Mifala praisem iufala evriwan wea gohed for servem Jehovah long faithful wei nomata iufala kasem olketa big or smol problem.

From wei wea iufala strong for duim preaching and teaching waka and kasem blessing from Jehovah, evriwea long world 4,762 baptaes each week. Long 2005 service year, 1,375 niu kongregeson kamap. Mifala hope and prea for datfala niu buk What Does the Bible Really Teach?, wea olketa transleitim finis long winim 120 languis, bae helpem plande million pipol for kasem gud samting from peace bilong Jehovah and kaeness bilong hem wea iumi no fit for kasem insaed disfala “day bilong salvation.”

Iu savve feel sure hao Governing Body lovem and gohed prea for iufala. Mifala talemaot thankiu tu for olketa prea bilong iufala for mifala.

Olketa brata bilong iufala,

Governing Body bilong Olketa Jehovah’s Witness