“No Join Tugeta Long Wei wea No Fitim”
OLSEM iu savve lukim long disfala piksa, datfala camel and buluka wea digim graon tugeta tufala no fit for waka tugeta. Datfala yoke wea joinim tufala tugeta olketa mekem for tufala animal wea size and strong bilong tufala semsem—hem mekem tufala animal hia safa. Taem hem tingim strong bilong olketa animal wea olketa joinim tugeta olsem, God talem olketa Israelite: “Iu mas no digim graon witim wanfala buluka and wanfala donkey tugeta.” (Deuteronomy 22:10) Disfala principle hem fitim wanfala buluka and wanfala camel tu.
Planti taem, wanfala farmer bae no savve givim hard taem olsem long olketa animal bilong hem. Bat sapos hem no garem tufala buluka, hem maet iusim tufala animal wea hem garem. Luk olsem, hem nao wanem disfala mek-19 century farmer long piksa hia disaed for duim. From size and weight bilong tufala hem difren, datfala wik animal mas stragol for keepim sem speed and datfala strong animal bae kare hevi tumas.
Aposol Paul iusim datfala tokpiksa for join long wei wea no fitim for teachim iumi wanfala important leson. Hem raet: “No join tugeta witim olketa wea no biliv. From hao nao raeteous fasin hem join witim fasin for brekem law? Or hao nao laet hem share witim darkness?” (2 Corinthians 6:14) Hao nao wanfala Christian savve join long wei wea no fitim?
Wanfala wei hem sapos wanfala Christian chusim marit partner wea garem biliv wea no semsem witim hem. Wei for marit olsem bae hem hard for tufala, and tufala bae no agree long olketa samting wea important.
Taem Jehovah startim marit, waka wea hem givim waef hem “for balancem” or “wanfala helper” for hasband. (Genesis 2:18; footnote) And tu, thru long profet Malachi, God hem sei wanfala waef hem olsem wanfala “partner.” (Malachi 2:14) Creator bilong iumi wantem olketa hasband and waef for semsem saed long wei for followim olketa spiritual samting, karem olketa hevi and kasem olketa gud samting.
Taem wanfala Christian hem marit “only insaed long Lord,” hem showimaot respect for kaonsel bilong Father bilong iumi long heven. (1 Corinthians 7:39) Diswan redyim faondeson for wanfala marit wea waka tugeta, wea bae givim praise and honor long God taem tufala servem hem olsem ‘olketa wea waka gud tugeta’ long spesol wei.—Philippians 4:3.
[Piksa Credit Line long page 32]
Camel and ox: From the book La Tierra Santa, Volume 1, 1830