Iu Fit for Winim Wei for Feel Lonely

HU NAO no feelim pain wea kamap from wei for feel lonely? Planti samting savve mekem iumi feel lonely. Bat, wanfala wea barava strong hem lonely feeling bilong olketa woman wea no bin marit, or olketa wea kamap widow or wea divorce.

Olsem example, wanfala young Christian woman wea nem bilong hem Frances hem sei: “Taem mi kasem 23 year, klosap evri fren bilong mi marit finis bat mi nomoa still stap.”a Maet diskaen wei for feel olsem iu nomoa stap hem kamap moa big taem olketa year go pas and chance for marit hem gogo daon. “Mi no plan for stap singol, and sapos chance kamap mi still laek for marit,” hem nao toktok bilong Sandra wea distaem hem klosap 50 year. Angela, wea winim finis 50 year, hem sei: “Mi no bin disaed for stap singol, bat from no planti brata stap long area wea mi duim pioneer long hem, mi kanse nao.”

Iumi fit for praisem planti Christian woman wea chus for no marit from olketa loyal for followim kaonsel bilong Jehovah for marit “only insaed long Lord.” (1 Corinthians 7:​39) Samfala faendem isi for change fitim singol laef, bat for samfala narawan disfala feeling for laek marit and garem pikinini hem kamap moa strong taem olketa year go pas. Sandra talemaot hao “wanfala emti spes saed long feeling bilong mi, wea kamap from mi no garem marit partner, hem stap olowe witim mi.”

Samfala nara samting, olsem wei for lukaftarem parents wea olo, maet mekem disfala feeling for lonely hem kamap moa strong. “From mi no marit, famili expectim mi for lukaftarem olo parents bilong mifala,” Sandra hem sei. “For 20 year mi karem main responsibility long diswan, nomata sixfala pikinini nao insaed famili. Laef bae no hard tumas sapos mi bin garem wanfala hasband wea savve saportim mi.”

Frances talem nara samting wea savve mekem moa big feeling bilong hem for lonely. Hem sei: “Samtaem pipol savve askem mi stret, ‘Why nao iu no marit?’ Kaen toktok olsem savve mekem mi feel olsem wei wea mi singol hem rong bilong mi. Long klosap evri wedding wea mi attendim, samwan bae askem disfala kwestin wea mi barava no laek herem, ‘So wanem taem nao bae iu marit?’ Gogo mi start for ting, ‘Ating olketa brata wea strong long spiritual saed no interest long mi from mi no garem olketa important Christian fasin or maet hem just from mi no luk naes.’”

Hao nao man savve winim feeling for lonely and wei for stap seleva? Waswe, eni samting stap wea olketa narawan savve duim for help?

Depend Long Jehovah

Man for raetem psalm sing olsem: “Torowem hevi bilong iu long Jehovah, and hem nao bae strongim iu. Hem bae nating letem raeteous wan for seksek.” (Psalm 55:22) Datfala word “hevi” long Hebrew raeting hem really minim “share,” and hem story abaotem olketa wari and hevi wea iumi maet kasem from living bilong iumi. Jehovah hem luksavve long olketa hevi olsem winim eni narawan and hem savve givim iumi strong for deal witim olketa. Wei for depend long Jehovah God hem helpem Angela for deal witim feeling for lonely. Taem hem storyim full-taem ministry bilong hem, hem sei: “Taem mi start for pioneer, mitufala partner bilong mi stap farawe from kongregeson. Mitufala lane for depend evribit long Jehovah, and disfala wei for depend long hem nao helpem mi long full laef bilong mi. Taem mi start for ting long nogud saed bilong samting, mi savve story long Jehovah and hem helpem mi. Psalm 23 hem evritaem givim mi bigfala comfort, and mi savve readim staka taem.”

Aposol Paul karem wanfala bigfala hevi. Samting olsem thrifala taem nao hem ‘askem Lord for tekaotem datfala nila long body bilong hem.’ Paul no kasem eni mirakol for helpem hem, bat hem kasem promis hao bigfala kaeness bilong God bae strongim hem. (2 Corinthians 12:​7-9) Paul kasem tu secret bilong wei for satisfae. Bihaen hem raet olsem: “Long evri samting and long evri wei mi lanem secret long hao nao for fulap and hao nao for hangre, hao nao for garem planti samting and hao nao for garem need. Long evri samting mi kasem strong from dat wan wea givim paoa long mi.”​—⁠Philippians 4:​12, 13.

Hao nao man savve kasem strong from God taem hem feel wikdaon or lonely? Paul raet olsem: “No wari long eni samting, bat long evri samting thru long prea and wei for barava ask witim wei for sei thankiu, talem evri samting long God; and peace bilong God wea winim evri tingting bilong man bae protectim heart and tingting bilong iufala thru long Christ Jesus.” (Philippians 4:​6, 7) Sandra followim disfala kaonsel. Hem sei: “From mi singol, mi spendem staka taem seleva. Diswan mekem mi garem staka chance for prea long Jehovah. Mi barava feel klos long hem and mi feel free for storyim olketa problem and hapi bilong mi long hem.” And Frances sei: “For miseleva faet againstim wei for tingting long nogud saed hem barava hard tumas. Bat taem mi talemaot stret olketa feeling bilong mi long Jehovah, datwan barava helpem mi. Mi barava feel sure Jehovah interest long eni samting wea bae affectim mi long spiritual wei and saed long feeling.”​—⁠1 Timothy 5:⁠5.

“Go Ahed for Karem Hevi Bilong Each Other”

Midolwan olketa Christian brata, man no need for karem seleva olketa hevi. Aposol Paul encouragem iumi: “Go ahed for karem hevi bilong each other, and there nao fulfillim law bilong Christ.” (Galatians 6:⁠2) Thru long wei for kaban tugeta witim olketa nara Christian, iumi savve kasem “gudfala toktok” wea givim encouragement wea savve mekem hevi bilong wei for lonely no kamap hevi tumas.​—⁠Proverbs 12:⁠25.

Tingim tu samting wea Bible talem abaotem dota bilong Jephthah, datfala judge bilong Israel. Bifor hem winim enemy army bilong Ammon, Jephthah promis for givim long Jehovah first wan wea kamaot from haos bilong hem for meetim hem. First wan wea kam nao dota bilong hem. (Judges 11:​30, 31, 34-​36) Nomata diswan minim bae hem mas stap singol and missim wei for garem famili, dota bilong Jephthah hem willing for stap anda long datfala promis and for go serve long ples bilong worship long Shiloh for full laef bilong hem. Waswe, no eniwan tingim sakrifaes bilong hem? Samfala tingim “Long evri year olketa dota bilong Israel savve go and praisem dota bilong Jephthah datfala man from Gilead, fofala day insaed long year.” (Judges 11:40) Yes, wei for givim praise savve encouragem olketa wea kasem datwan. Dastawe, iumi mas no fail for givim praise long olketa wea fit for kasem.

Hem gud for iumi tingim example bilong Jesus. Nomata hem no fitim kastom bilong olketa Jew for olketa man story witim olketa woman, Jesus story witim Mary and Martha. Luk olsem tufala maet widow woman or maet no marit. Jesus laekem tufala for mas kasem spiritual help from wei for fren witim hem. (Luke 10:​38-​42) Iumi tu savve followim example bilong Jesus taem iumi invaetem olketa spiritual sista wea no marit for join insaed olketa hapitaem and mekem arrangement for duim preaching witim olketa. (Romans 12:13) Waswe, olketa hapi long kaen wei for tingim olketa olsem? Wanfala sista sei: “Mi savve olketa brata lovem and tinghae long mi, bat mi barava thankiu tumas taem olketa savve showimaot wei for interest long mi.”

“From mifala no garem wanfala famili,” Sandra sei, “mifala garem bigfala need for kasem love and for feel olsem mifala part long famili bilong olketa spiritual brata and sista.” Hem klia tumas hao Jehovah kea for pipol olsem, and iumi savve waka tugeta witim hem taem iumi showim hao iumi needim and lovem olketa. (1 Peter 5:​6, 7) Jehovah lukluk long kaen wei for showimaot interest olsem, from “man wea showaot kaenfala fasin long poor man hem give long Jehovah, and Hem [Jehovah God] bae peim bak long hem.”​—⁠Proverbs 19:⁠17.

“Evri Man Bae Karem Lod Bilong Hemseleva”

Nomata nara pipol savve help and saport bilong olketa savve barava encouragem man, “evri man bae karem lod bilong hemseleva.” (Galatians 6:⁠5) Bat taem iumi karem lod bilong wei for feel lonely, iumi need for lukaot long samfala danger. Olsem example, feeling for lonely savve winim iumi sapos iumi stap seleva and no talemaot feeling. Bat long narasaed iumi savve winim feeling for lonely witim love. (1 Corinthians 13:​7, 8) Wei for give and sharem samting hem best wei for kasem hapi​—⁠nomata wanem kaen living iumi garem. (Acts 20:35) “Mi no garem planti taem for ting raonem wei for feel lonely,” hem nao toktok bilong wanfala sista wea waka hard olsem pioneer. “Taem mi feel olsem pipol needim mi and mi busy, mi no savve feel lonely.”

Iumi mas careful for no letem wei for lonely for kamap hevi long iumi gogo diswan mekem iumi startim wei for fren wea no wise. Olsem example, bae hem sorre samting tumas sapos iumi letem feeling for laek marit mekem iumi no lukim olketa problem wea kamap from wei for maritim samwan wea no biliv and tu for no lukim wise kaonsel from Bible wea warnim iumi long kaen wei for fren olsem! (2 Corinthians 6:​14) Wanfala Christian woman wea divorce hem sei: “Samting wea moa worse winim wei for singol hem wei for maritim rong man.”

Wanfala hard finis maet hem samting wea iumi mas go ahed for feisim distaem nomoa. Witim help bilong God, iumi savve stand strong for feisim feeling for lonely. Taem iumi go ahed servem Jehovah, iumi savve feel sure hao long future bae hem satisfaem evri need bilong iumi long best wei.​—⁠Psalm 145:⁠16.

[Footnote]

[Olketa Piksa long page 28]

Iumi savve winim feeling for lonely taem iumi givim and sharem samting