‘Bossim Iuseleva Taem Nogud Samting Happen’
‘Wanfala slave bilong Lord hem no need for faet, bat hem mas kaen long evriwan, and bossim hemseleva taem nogud samting happen.’—2 TIMOTHY 2:24.
1. Taem iumi duim Christian waka, why nao samfala taem iumi meetim pipol wea tok raf?
WANEM nao iu duim taem iu meetim pipol wea no laekem iu or religion bilong iu? Taem aposol Paul story abaotem olketa last day, hem sei pipol bae “tok daonem God, . . . no savve kontrolem seleva, raf tumas.” (2 Timothy 3:1-5, 12) Maet iu meetim pipol olsem long ministry or long olketa narataem.
2. Wanem nao olketa scripture wea savve helpem iumi for deal long wisefala wei witim pipol wea tok raf long iumi?
2 Wei wea man tok strong long iumi no evritaem minim hem barava no interest long samting wea stret. Barava hard living or feeling for no satisfae maet mekem pipol tok kros long eniwan wea olketa meetim. (Ecclesiastes 7:7) Staka savve tok raf olsem bikos olketa stap and waka long ples wea raf toktok hem normal samting. Diswan no minim iumi olketa Christian fit for iusim kaen toktok olsem, bat hem helpem iumi for minim why pipol duim datwan. Taem samwan tok raf kam long iumi, wanem nao iumi shud duim? Proverbs 19:11 sei olsem: “Fasin bilong man for luksavve barava katem daon kros bilong hem.” And Romans 12:17, 18 talem disfala advaes: “No peim bak nogud samting witim nogud samting long eniwan. . . . Sapos iufala fit for duim, keepim peace witim evri man.”
3. Hao nao wei for mek peace hem join witim message wea iumi talem long pipol?
3 Sapos iumi really man for mek peace, diswan bae showaot long wei wea iumi ting long samting. Bae hem showaot long samting iumi talem and duim, and tu, long feis and voice bilong iumi. (Proverbs 17:27) Taem Jesus sendem go olketa aposol bilong hem for preach, hem givim olketa disfala advaes: “Taem iufala go insaed long wanfala haos, sei hello long olketa long haos [“talem hao iufala laekem olketa long haos for garem peace,” The New English Bible]; and sapos pipol long datfala haos fit, letem peace wea iufala talem kasem olketa long haos hia; bat sapos olketa no fit, letem peace wea iufala talem kam bak moa long iufala.” (Matthew 10:12, 13) Message wea iumi talemaot hem gud nius. Bible kolem diswan “gud nius bilong peace,” “gud nius bilong kaeness bilong God wea man no fit for kasem,” and “gud nius bilong kingdom.” (Ephesians 6:15; Acts 20:24; Matthew 24:14) Goal bilong iumi hem no for tok againstim wanem nara man bilivim or argue witim hem, bat for sharem gud nius from Word bilong God.
4. Nomata iu no story yet bat haosholder sei: “Mi garem lotu finis,” wanem nao iu savve talem?
4 Nomata wanfala haosholder no herem yet wanem iu talem, maet hem kwiktaem tok olsem, “Mi garem lotu finis.” Staka taem, iu savve ansa olsem, “Mi laek for readim wanfala verse nomoa from Bible.” Maet bae hem willing for lisin. Long narawan iu savve sei olsem tu: “Mi laek storyim long iu hao long future no eniwan bae spoelem narawan and evriwan bae lane for lovem each other.” Sapos haosholder no kwiktaem for tok kam, maet iu sei moa: “Bat luk olsem iu busy distaem.” Nomata maet haosholder tok raf or no interest, waswe, fitim for iumi sei hem “no fit” for kasem peace? Iumi mas evritaem rememberim kaonsel bilong Bible for ‘kaen long evriwan, and bossim seleva taem nogud samting kamap.’—2 Timothy 2:24.
Raf Bat No Garem Stretfala Savve
5, 6. Wanem nao Saul duim long olketa follower bilong Jesus, and why nao hem duim olketa samting hia?
5 Long first century, staka pipol savve hao Saul hem wanfala raf man wea toktok bilong hem nating showimaot respect. Bible sei hem “gohed for kros tumas and laek killim dae olketa disaepol bilong Lord.” (Acts 9:1, 2) Bihaen, hem story abaotem hemseleva, hao hem ‘man for againstim God and persecutim narafala pipol and hem wanfala bighed man.’ (1 Timothy 1:13) Nomata maet samfala relative bilong hem kamap Christian finis, hem sei olsem abaotem feeling bilong hemseleva for olketa follower bilong Christ: “From mi kros tumas long olketa, mi persecutim olketa nomata long olketa taon bilong difren pipol tu.” (Acts 23:16; 26:11; Romans 16:7, 11) No eni samting showimaot olketa disaepol trae for argue witim Saul taem hem duim olketa samting hia.
6 Why nao Saul duim olketa samting hia? Plande year bihaen, hem raet olsem: “Mi no garem savve and mi duim samting from mi no garem faith.” (1 Timothy 1:13) Hem wanfala Pharisee wea kasem education “long hao for followim evribit Law bilong olketa laen dadi” bilong hem. (Acts 22:3) Nomata hem luk olsem teacher bilong Saul, Gamaliel, hem man for acceptim tingting bilong nara pipol, man wea Saul kaban witim bihaen, Caiaphas, wea hem hae priest, hem man for ova tumas saed long religion. Caiaphas hem main wan insaed datfala plan for killim dae Jesus Christ. (Matthew 26:3, 4, 63-66; Acts 5:34-39) Bihaen datwan, Caiaphas mek sure olketa whipim olketa aposol bilong Jesus, and hem givim strongfala order for olketa mas no preach long nem bilong Jesus. Caiaphas tu tekem datfala kot case long Sanhedrin wea lead go long wei for olketa barava kros fogud and olketa sutim dae Stephen. (Acts 5:27, 28, 40; 7:1-60) Saul hem lukluk taem olketa sutim Stephen, and Caiaphas givim hem paoa for leadim wei for againstim olketa follower bilong Jesus taem hem arrestim olketa long Damascus. (Acts 8:1; 9:1, 2) From Saul tinghae long Caiaphas, hem tingse samting wea hem duim pruvim strong wea hem garem for God, bat really hem short long trufala faith. (Acts 22:3-5) Samting wea kamaot from diswan, Saul no luksavve hao Jesus nao hem trufala Messiah. Bat Saul luksavve long nogud fasin wea hem duim taem Jesus wea resurrect finis hem story long hem long road wea go for Damascus.—Acts 9:3-6.
7. Wanem nao happen long Saul taem Jesus story witim hem long datfala road wea go for Damascus?
7 No longtaem bihaen diswan, Jesus sendem disaepol Ananias for witness long Saul. Sapos iu nao Ananias, waswe, bae iu willing for go and witness long Saul? Ananias hem fraet lelebet, bat hem story witim Saul long kaenfala wei. Tingting bilong Saul hem change taem Jesus story long hem long mirakol wei long datfala road wea go for Damascus. (Acts 9:10-22) Bihaen datwan, hem kamap aposol Paul, wanfala strongfala Christian missionary.
Garem Kwaet Fasin Bat No Fraet
8. Long wanem wei nao Jesus followim fasin bilong Dadi bilong hem taem hem deal witim pipol wea duim olketa nogud samting?
8 Jesus hem strong for preach abaotem Kingdom and hem garem kwaet fasin, bat hem no fraet taem hem deal witim pipol. (Matthew 11:29) Hem showimaot sem tingting olsem Dadi bilong hem long heven, wea encouragem wicked pipol for lusim nogud wei bilong olketa. (Isaiah 55:6, 7) Taem hem deal witim olketa sinner, Jesus luksavve taem man change, and hem encouragem olketa. (Luke 7:37-50; 19:2-10) Jesus no judgem narawan from samting olketa duim, bat hem followim fasin bilong Dadi bilong hem for kaen, patient, and garem long safaring from hem laek helpem olketa for repent. (Romans 2:4) Will bilong Jehovah nao for evri difren kaen pipol for repent and sev.—1 Timothy 2:3, 4.
9. Wanem nao iumi savve lanem from wei wea Jesus fulfillim samting wea Isaiah 42:1-4 hem talem?
9 Matthew talem tingting bilong Jehovah abaotem Jesus Christ, taem hem talem moa disfala profesi toktok: “Lukim! Servant bilong mi wea mi chusim, datwan wea mi lovem, wea soul bilong mi appruvim! Mi bae putim spirit bilong mi long hem, and bae hem showimaot klia long olketa nation wanem nao justice. Hem bae no argue, or singaot big, and no eniwan bae herem voice bilong hem long olketa road. Bae hem no brekem smolfala bambu wea bend lelebet, and bae hem no killim dae laet wea klosap dae, go kasem taem wea hem win for givimaot justice. Tru nao, olketa nation bae hope long nem bilong hem.” (Matthew 12:17-21; Isaiah 42:1-4) Jesus fulfillim datfala profesi taem hem no join insaed eni wei for argue. Nomata taem hem kasem hevi, hem story abaotem truth long wei wea muvim olketa wea garem honest heart.—John 7:32, 40, 45, 46.
10, 11. (a) Nomata staka Pharisee barava strong for againstim Jesus, why nao hem witness long samfala long olketa? (b) Samfala taem, hao nao Jesus ansarem olketa wea againstim hem, bat wanem nao hem no duim?
10 Taem Jesus duim ministry, hem story witim staka Pharisee. Nomata samfala long olketa trae for iusim toktok bilong hem for trikim hem, Jesus no ting evriwan long olketa garem nogud tingting. Simon, wanfala Pharisee wea fasin bilong hem for luk daonem narawan, hem laek lukim Jesus and hem invaetem hem for kaikai witim hem. Jesus acceptim datfala invitation and witness long evriwan wea stap long there. (Luke 7:36-50) Narataem, wanfala Pharisee wea nem bilong hem Nicodemus, hem visitim Jesus long wei wea haed. Jesus no tok strong long hem from hem kam long naet. Winim datwan, hem witness long Nicodemus abaotem love wea God showimaot taem hem sendem Son bilong hem for sevem pipol wea showimaot faith. Jesus storyim tu wei wea hem important tumas for obeyim arrangement bilong God. (John 3:1-21) Bihaen, Nicodemus talem toktok for sapotim Jesus taem olketa Pharisee tok daonem wanfala gudfala report abaotem Jesus.—John 7:46-51.
11 Jesus luksavve long hypocrite fasin bilong olketa wea trae for trikim hem. Hem no letem olketa wea againstim hem for pullim hem for join insaed olketa iusles wei for argue. Bat, long taem wea fitim, hem givim shortfala ansa wea garem bigfala mining thru long wei for talem wanfala principle, tokpiksa, or toktok from wanfala scripture. (Matthew 12:38-42; 15:1-9; 16:1-4) Long olketa narataem, Jesus no givim eni ansa taem hem luksavve no eni gud samting bae kamaot from datwan.—Mark 15:2-5; Luke 22:67-70.
12. Nomata taem pipol raosem Jesus, hao nao hem helpem pipol?
12 Samfala taem pipol wea stap anda long paoa bilong olketa nogud spirit singaotem Jesus. Taem datwan happen, hem bossim hemseleva and samfala taem iusim paoa wea God givim long hem for helpem olketa tu. (Mark 1:23-28; 5:2-8, 15) Sapos samfala pipol kros and raosem iumi taem iumi duim ministry, iumi tu need for bossim seleva, and iumi shud traem best for deal long gud and kaenfala wei witim olketa.—Colossians 4:6.
Insaed Long Famili
13. Taem wanfala famili member hem start for studyim Bible witim Olketa Jehovah’s Witness, why nao olketa narawan insaed famili againstim hem samfala taem?
13 Barava bigfala need stap for olketa follower bilong Jesus bossim olketa seleva insaed long famili. Man wea truth insaed Bible barava muvim hem, bae laek tumas for famili bilong hem olsem tu. Bat Jesus sei olketa famili member maet againstim man. (Matthew 10:32-37; John 15:20, 21) Samfala reason stap why diswan savve happen. Olsem example, nomata olketa teaching from Bible savve helpem iumi for kamap honest, waka gud, and showimaot respect, Bible teachim tu hao Creator nao main wan wea iumi mas obeyim. (Ecclesiastes 12:1, 13; Acts 5:29) Maet wanfala famili member feel nogud from hem tingse datwan wea studyim Bible no tinghae long hem, bat hem moa loyal long Jehovah. Taem iumi deal witim kaen samting olsem, hem important tumas for followim example bilong Jesus for bossim seleva!—1 Peter 2:21-23; 3:1, 2.
14-16. Wanem nao mekem samfala wea bifor olketa againstim famili member bilong olketa for change?
14 Staka wea servem Jehovah distaem garem marit partner or nara famili member wea againstim olketa taem olketa change from olketa studyim Bible. Maet olketa herem rabis story abaotem Olketa Jehovah’s Witness, and maet olketa fraet nogud diswan affectim famili bilong olketa long nogud wei. Wanem nao mekem olketa changem tingting bilong olketa? Staka taem hem gudfala example bilong datwan wea study. From datwan wea biliv hem gohed strong for followim advaes bilong Bible, olsem wei for evritaem attendim olketa Christian meeting, share insaed ministry, duim olketa famili responsibility, and bossim hemseleva taem famili tok spoelem hem, gogo diswan daonem wei wea famili againstim hem.—1 Peter 2:12.
15 Maet man wea againstim iumi no laek for lisin long samting iumi laek showim hem from Bible bikos long nogud tingting wea hem garem finis, or from hem praod. Datwan nao wei bilong wanfala man from United States wea talem hao hem lovem tumas kantri bilong hem. Wantaem, taem waef bilong hem go long wanfala convention, man hia tekem evriting bilong hem and go nao. Narataem, hem tekem wanfala gun and sei bae hem sutim hemseleva dae. Hem blamem religion bilong waef for eni krangge samting wea hem duim. Bat waef bilong hem traem best for followim kaonsel from Bible. Twenti year bihaen taem wea waef hem baptaes, hasband bilong hem kamap wanfala Witness tu. Long Albania, wanfala woman hem kros fogud bikos dota bilong hem studyim Bible witim Olketa Jehovah’s Witness and hem baptaes. Hem distroem Bible bilong dota hia 12-fala taem. Wanday, hem tekem wanfala niu Bible wea dota bilong hem leavim long tebol, and scripture wea hem open long hem, hem Matthew 10:36. Hem luksavve hao samting wea verse hia talem barava fitim hem. Nomata olsem, from hem wari abaotem dota bilong hem, mami hia go lusim hem long ship taem hem redi for go long wanfala convention long Italy witim olketa nara Witness. Tingting bilong hem start for change taem hem lukim hao grup hia smile and hapi and showimaot love. No longtaem bihaen, hem agree for studyim Bible. Distaem hem trae for helpem nara pipol wea againstim iumi.
16 Wantaem, taem wanfala sista kakam for Kingdom Hall hasband bilong hem showim naef long hem and accusim hem long enikaen samting. Sista hia tok isi olsem long hem: “Iu kam insaed Kingdom Hall, and lukim seleva.” Hem go insaed, and gogo hem kamap wanfala Christian elder.
17. Sapos samfala taem nogud feeling kamap insaed Christian famili, wanem kaonsel from Bible nao savve help?
17 Nomata sapos evriwan insaed famili bilong iu hem Christian, samfala taem nogud feeling savve kamap, and from iumi no perfect, samfala taem iumi savve tok raf long each other. Olketa Christian long Ephesus bifor kasem disfala kaonsel: “Aotem from iufala evri wei for barava feel nogud and kros and fasin for singaot and tok spoelem narawan witim evri nogud fasin.” (Ephesians 4:31) Luk olsem samting wea affectim olketa hem living long Ephesus, wei wea olketa no perfect, and samting wea olketa duim bifor olketa kamap Christian. Wanem nao bae helpem olketa for change? Olketa need for “kamap niu long paoa wea muvim mind bilong [olketa].” (Ephesians 4:23) Taem olketa studyim Word bilong God, ting raonem wei wea diswan shud affectim laef bilong olketa, kaban witim olketa nara Christian, and prea strong, olketa frut bilong spirit bilong God bae showaot moa klia long laef bilong olketa. Olketa bae lane for “kaen long narawan, garem fasin for kea, willing for forgivim narawan olsem God tu thru long Christ hem willing for forgivim [olketa].” (Ephesians 4:32) Nomata wanem nara pipol duim, iumi need for bossim seleva, showimaot kaenfala fasin, garem fasin for kea, and willing for forgive. Tru tumas, iumi mas “no peim bak nogud samting witim nogud samting long eniwan.” (Romans 12:17, 18) For followim example bilong God saed long wei for showimaot trufala love hem nao stretfala samting for duim evritaem.—1 John 4:8.
Kaonsel for Evri Christian
18. Why nao kaonsel long 2 Timothy 2:24 hem fitim wanfala elder long Ephesus bifor, and hao nao datwan savve helpem evri Christian?
18 Disfala kaonsel for “bossim [iumiseleva] taem nogud samting kamap,” hem fitim evri Christian. (2 Timothy 2:24) Fastaem, Paul givim disfala kaonsel hia for Timothy, wea needim diswan taem hem serve olsem wanfala elder long Ephesus. Samfala insaed long datfala kongregeson no hol bak for talemaot tingting bilong olketa and teachim rong samting. From olketa no luksavve long goal bilong Law Bilong Moses, olketa fail for minim wei wea faith, love, and gudfala conscience hem important. Praod fasin hem mekem olketa argue abaotem olketa word, and olketa fail for luksavve long main point bilong teaching bilong Christ, and hao fasin for lovem God hem important. For Timothy deal witim diswan, hem need for strong for truth wea stap insaed Bible, bat long semtaem, hem mas showimaot kaenfala fasin taem hem deal witim olketa brata bilong hem. Olsem olketa elder distaem, Timothy savve olketa sheep hia no bilong hem and hem mas deal witim nara pipol long wei wea bae apim Christian love and wan mind.—Ephesians 4:1-3; 1 Timothy 1:3-11; 5:1, 2; 6:3-5.
19. Why nao hem important for iumi evriwan “luk aotem kwaet fasin”?
19 God encouragem pipol bilong hem for “luk aotem kwaet fasin.” (Zephaniah 2:3) Hebrew word wea olketa transleitim olsem “kwaet fasin” hem minim for patient nomata pipol spoelem man, and for no feel nogud and no pei bak. Iumi mas gohed for prea long Jehovah for helpem iumi bossim seleva and duim waka bilong hem nomata taem iumi feisim olketa hard samting.
Wanem Nao Iu Lanem?
• Taem samwan tok raf long iu, wanem nao olketa scripture wea savve helpem iu?
• Why nao Saul hem garem raf fasin?
• Long wanem wei nao example bilong Jesus helpem iumi for deal long stretfala wei witim difren kaen pipol?
• Wanem nao olketa gud samting wea savve kamaot from wei for bossim seleva insaed famili?
[Piksa long page 26]
Nomata plande pipol savve long fasin bilong Saul, Ananias deal witim hem long kaenfala wei
[Piksa long page 29]
Wei wea Christian faithful for fulfillim olketa responsibility savve mekem wei wea famili againstim hem katdaon
[Piksa long page 30]
Olketa Christian showimaot love and wan mind