Olketa Kingdom Blessing Iu Savve Kasem
CHRISTIAN aposol Paul savve tumas long samfala main languis long taem bilong hem. Hem kasem wanem iumi kolem distaem, university education. Hem kasem evri privilege and freedom bilong wanfala citizen bilong Rome. (Acts 21:37-40; 22:3, 28) Diswan fit for mekem hem rich and garem bignem. Bat, hem sei: “Nomata olketa samting hia gud long mi, mi lusim evribit for saed bilong Christ . . . and mi tingim olketa olsem rabis samting nomoa, mekem mi savve kasem Christ.” (Philippians 3:7, 8) Why nao Paul tok olsem?
Bifor, pipol savve long Paul olsem Saul bilong Tarsus and olsem man for persecutim olketa “wea followim Datfala Wei.” Hem kamap man wea biliv bihaen hem lukim Jesus wea resurrect and kasem glory long vision. (Acts 9:1-19) For Paul, disfala experience long road for Damascus pruvim evribit long hem hao Jesus nao datfala promis Messiah, or Christ, future ruler bilong datfala promis Kingdom. Diswan kosim bigfala change tu long laef bilong Paul, olsem strongfala toktok bilong hem showimaot antap. For talem long nara wei, honest heart bilong Paul mekem hem repent.—Galatians 1:13-16.
Insaed Bible, olketa transleitim word “repent” planti taem from Greek word wea really minim “savve bihaen,” olsem opposite bilong “savve firstaem.” So, insaed wei for repent hem wei for changem mind, wei for tingting, or purpose, wei for rejectim living bilong bifor olsem hem nogud. (Acts 3:19; Revelation 2:5) Long example bilong Paul, hem nating letem datfala spesol samting wea happen long road for Damascus for olsem spiritual experience nomoa. For hem, diswan mekem hem lukim hao laef bilong hem bifor, wea no luksavve long Christ, hem iusles. Hem luksavve tu hao, for hem kasem gud samting from disfala niu savve abaotem Christ, hem mas duim samting for stretem laef bilong hem.—Romans 2:4; Ephesians 4:24.
Wanfala Change wea Givim Olketa Blessing
Bifor, main wan for teachim savve abaotem God long Paul hem olketa Pharisee, wea hem tu wanfala. Biliv bilong olketa garem staka teaching and kastom bilong man. Strong for religion mekem hem faithful and strong bat followim rong wei. Nomata hem tingse hem servem God, really hem faet againstim Hem.—Philippians 3:5, 6.
Bihaen hem kasem stretfala savve abaotem Christ and waka bilong hem insaed purpose bilong God, Paul luksavve hao hem mas mekem wanfala disison: Waswe, hem shud go ahed olsem wanfala Pharisee and enjoyim hae position and bignem, or hem shud changem laef bilong hem and start for duim eniting wea God laekem hem for duim? Paul chusim stret samting, from hem sei: “Mi no shame long gud nius; tru tumas, hem nao paoa bilong God for givim salvation long evriwan wea garem faith, long Jew firstaem and long Greek tu.” (Romans 1:16) Paul kamap strongfala man for preachim gud nius abaotem Christ and datfala Kingdom.
Staka year bihaen, Paul talem olketa Christian brata bilong hem: “Mi no tingse mi kasem diswan finis; bat wanfala samting abaotem diswan: Forgetim evri samting long bihaen and barava trae hard for kasholem olketa samting long front, mi aftarem datfala goal for kasem prize bilong hope for go ap, wea God givim thru long Christ Jesus.” (Philippians 3:13, 14) Paul kasem gud samting from datfala gud nius bikos hem willing for lusim samting wea muvim hem awe from God and witim full heart aftarem olketa goal wea wan mind witim purpose bilong God.
Wanem Nao Bae Iu Duim?
Maet iu just firstaem herem samting abaotem disfala Kingdom gud nius. Waswe, iu laekem disfala hope for laef olowe long wanfala perfect paradaes? Hem shud olsem from iumi evriwan born witim feeling for laek stap laef long peace and sef living. Bible sei God hem putim “taem olowe” insaed long heart bilong iumi. (Ecclesiastes 3:11) So hem wei bilong man nao for hope for taem wea pipol bae laef olowe witim peace and hapi. And diswan nao samting wea Kingdom gud nius hem offerim.
Bat, for iu kasem disfala hope, iu need for lukluk gud and faendaot wanem nao insaed disfala gud nius. Aposol Paul givim kaonsel: “Pruvim long [iuseleva], gudfala and stretfala and perfect will bilong God.” (Romans 12:2) So, olsem Paul, bihaen iu kasem savve and wei for minim samting, iu mas chus.
Long narasaed, maet iu garem finis samfala biliv abaotem future bilong iu. Remember hao Saul garem samfala idea abaotem will bilong God bifor hem kamap aposol Paul. Bat winim wei for expectim God for showim iu wei thru long mirakol, hao sapos iu faendaot seleva long honest wei? Askem iuseleva: ‘Waswe, mi really savve wanem nao will bilong God for olketa man and disfala earth? Wanem pruv nao mi savve givim for saportim olketa biliv bilong mi? Waswe, olketa pruv bilong mi stret fitim Word bilong God, Bible?’ Gud samting nomoa savve kamaot from wei for lukluk gud olsem long olketa biliv bilong religion bilong iu. Iu shud want for duim olsem bikos Bible encouragem iumi for: “Mek sure long evri samting; hol strong long samting wea gud.” (1 Thessalonians 5:21) Waswe, hem no God nao wea iu really laek for mekem hapi?—John 17:3; 1 Timothy 2:3, 4.
Olketa leader bilong religion maet promis for givim iumi wankaen laef olowe. Bat sapos datfala promis no kam from teaching bilong Bible, hem bae no helpem iumi for kasem olketa blessing bilong Kingdom bilong God. Long Sermon bilong hem long Maunten wea staka savve abaotem, Jesus givim strongfala warning: “No evriwan wea kolem mi, ‘Lord, Lord,’ bae go insaed long kingdom bilong heven, bat man wea duim will bilong Father bilong mi long heven bae go insaed.”—Matthew 7:21.
Lukim hao Jesus strongim wei for duim will bilong Father bilong hem olsem mark for kasem olketa blessing from Kingdom bilong God. Hem minim, God no acceptim evriwan wea maet luk olsem olketa followim God. Tru nao, Jesus go ahed for sei: “Planti pipol bae sei long mi long datfala day, ‘Lord, Lord, waswe, mifala no talem profesi long nem bilong iu, and aotem olketa demon long nem bilong iu, and duim planti mirakol long nem bilong iu?’ And long datfala taem mi bae talem olketa: Mi nating savve long iufala! Klia from mi, iufala man for brekem law.” (Matthew 7:22, 23) Hem klia, important samting nao hem for iumi mek sure iumi minim stret wanem nao gud nius bilong Kingdom hem really minim and then duim samting followim.—Matthew 7:24, 25.
Help Hem Stap
For winim 100 year, Olketa Jehovah’s Witness bin preachim gud nius abaotem Kingdom bilong God. Thru long olketa buk and wei for talemaot, olketa helpem pipol raonem world for kasem stretfala savve abaotem disfala Kingdom, olketa blessing hem bae bringim, and wanem man mas duim for kasem olketa blessing olsem.
Mifala encouragem iu for acceptim message wea Olketa Jehovah’s Witness preachim. Taem iu acceptim and duim samting followim disfala gud nius, iu savve kasem olketa nambawan blessing no long distaem nomoa bat tu long future taem Kingdom bilong God rulim full earth.—1 Timothy 4:8.
Duim samting distaem, bikos olketa blessing from Kingdom bilong God hem klosap!
[Piksa long page 7]
Thru long olketa buk and wei for talemaot, Olketa Jehovah’s Witness preachim gud nius abaotem Kingdom bilong God