Wanem Iumi Lanem From Jehovah Hem Nambawan

“Mi willing for lusim evri samting bikos mi lanem olketa nambawan samting abaotem Lord bilong mi, Christ Jesus.”—PHIL. 3:8.

1, 2. Wanem nao samfala Christian disaed for no duim, and why nao olsem?

START long taem Robert hem skul, hem kleva tumas. Taem hem 8 year nomoa, wanfala teacher kam long haos bilong hem and talem Robert hem fit for duim eni samting long future. Teacher hia laekem hem for kamap doctor. From Robert tekem hae mark long secondary skul, hem fit for go long eni nambawan university long kantri bilong hem. Nomata datwan hem samting wea staka pipol tingse hem nambawan chance for hem, Robert disaed for no duim datwan bat hem regular pioneer.

² Staka Christian tu olsem Robert. Olketa garem chance for kasem bigfala education long world, bat samfala disaed for no duim datwan mekem olketa savve duim samfala samting moa for Jehovah. (1 Cor. 7:29-31) Wanem nao mekem olketa Christian olsem Robert laek waka hard for duim preaching waka? Main samting nao, olketa lovem Jehovah and olketa savve wanem olketa lanem from Jehovah hem nambawan. Waswe, enitaem iu tingim wanem nao bae iu duim sapos iu no lanem truth? Taem iumi ting raonem olketa nambawan samting wea iumi kasem from Jehovah lanem iumi, datwan bae helpem iumi for tinghae evritaem long gud nius and gohed strong for preachim datwan long pipol.

Hem Nambawan Samting Taem God Lanem Iumi

3. Why nao iumi savve Jehovah laekem tumas for lanem olketa man wea no perfect?

³ Jehovah laekem tumas for lanem olketa man wea no perfect. Isaiah 54:13 profesi olsem abaotem olketa anointed Christian: “Jehovah bae lanem evri son bilong iu, and bae hem mekem olketa garem peace olowe.” Nomata toktok hia hem for olketa anointed Christian, hem fitim tu “olketa nara sheepsheep” bilong Christ. (John 10:16) Wanfala profesi wea kamap tru distaem showimaot diswan. Isaiah lukim long vision hao pipol from staka kantri kam for worshipim Jehovah. Pipol hia tok olsem long narawan: “Iumi go ap long maunten bilong Jehovah, long haos bilong God bilong Jacob. Hem bae lanem iumi long olketa wei bilong hem, and iumi bae followim hem.” (Isa. 2:1-3) Hem nambawan samting taem God lanem iumi!

4. Sapos iumi laekem Jehovah for lanem iumi, wanem wei nao iumi mas garem?

⁴ Sapos iumi laekem Jehovah for lanem iumi, wanem wei nao iumi mas garem? Iumi mas hambol and willing for lane. David hem sei: “Wei bilong Jehovah hem stret and hem gud. . . . Hem bae lanem olketa wea hambol long olketa wei bilong hem.” (Ps. 25:8, 9) And Jesus hem sei: “Mi praisem iu Dadi, wea iu nao rulim heven and earth, bikos iu haedem gud olketa samting hia from olketa wea skul gud and garem bigfala savve, and iu showimaot long olketa wea no garem savve, wea olsem olketa smol pikinini.” (Luke 10:21) Iumi barava lovem God bikos hem kaen tumas long pipol wea hambol!—1 Pet. 5:5.

5. Wanem nao mekem iumi fit for savve abaotem God?

⁵ Waswe, savve wea iumiseleva garem nao mekem iumi lanem truth? Nomoa. Hard tumas for iumiseleva savve abaotem God. Jesus hem sei: “Hard for eniwan kam long mi sapos Dadi wea sendem mi kam hem no leadim hem kam long mi firstaem.” (John 6:44) Jehovah iusim preaching waka and holy spirit bilong hem for leadim pipol wea hambol kam long hem. Pipol hia nao olketa “spesol samting bilong olketa kantri.” (Hag. 2:7) Iumi shud hapi tumas from Jehovah leadim iumi kam long Son bilong hem!—Readim Jeremiah 9:23, 24.

Wanem Iumi Lanem From God Barava Helpem Iumi

6. Taem pipol “lane abaotem Jehovah,” datwan mekem olketa duim wanem?

⁶ Profesi wea Isaiah talem mekem iumi tingim olketa gudfala samting wea happen distaem. Pipol barava changem wei bilong olketa. Olketa wea raf no raf nao. (Readim Isaiah 11:6-9.) Pipol wea heitim narawan from difren tribe, kantri, kala skin, or kastom olketa no heitim olketa nao bat olketa stap gud tugeta. Hem olsem olketa “hammerim naef for faet for kamap hou.” (Isa. 2:4) Wanem nao mekem olketa barava changem wei bilong olketa? Pipol “lane abaotem Jehovah” and followim wanem olketa lanem. Nomata pipol bilong God no perfect, evriwan olsem wanfala famili nomoa long full world. Staka pipol long world interest long gud nius and gud nius hem barava helpem pipol changem wei bilong olketa. Diswan showimaot wanem iumi lanem from Jehovah hem nambawan.—Matt. 11:19.

7, 8. (a) Taem pipol lane abaotem Jehovah, wanem nao samfala ‘strong samting’ wea datwan mekem olketa lusim? (b) Wanem experience nao showimaot diswan praisem Jehovah?

⁷ Aposol Paul hem sei taem iumi duim preaching waka, hem olsem iumi faet againstim Satan. Hem sei: “Olketa samting wea mifala iusim for faet hem no bilong man, bat hem garem paoa bilong God for aotem olketa strongfala samting. Mifala savve spoelem enikaen tingting wea no tru and mifala savve brekem daon enikaen praod tingting wea againstim savve abaotem God.” (2 Cor. 10:4, 5) Taem pipol lane abaotem Jehovah, wanem nao samfala ‘strong samting’ wea datwan mekem olketa lusim? Samfala nao hem olketa laea teaching, kastom biliv, and olketa idea bilong man. (Col. 2:8) Taem pipol lane abaotem Jehovah, olketa lusim nogud wei bilong olketa and olketa garem olketa gudfala wei wea Jehovah hapi long hem. (1 Cor. 6:9-11) Hem helpem famili bilong olketa and hem mekem olketa garem hope for future tu. Hem nao kaen education wea pipol needim distaem.

⁸ Wanfala gud wei wea Jehovah helpem pipol for garem nao hem for honest. Tingim disfala experience. (Heb. 13:18) Wanfala woman long India studyim Bible and gogo hem kamap pablisa wea no baptaes. Long wanfala day, bihaen hem finis waka long construction for wakem Kingdom Hall, hem faendem wanfala gold chain long graon klosap long bas stop wea kost bilong hem 800 dollar (U.S. dollar). Nomata hem poor, hem go long police station and givim chain hia long olketa. Policeman hem sapraes long wanem hem duim! Bihaen, nara policeman askem hem: “Why nao iu no tekem chain hia for iu?” Hem sei long hem: “From mi studyim Bible, mi changem wei bilong mi and distaem mi honest.” Policeman tinghae long hem and sei olsem long elder wea kam witim hem long police station: “Winim 38 million pipol stap long disfala province. Sapos iu helpem 10-fala man for olsem woman hia, datwan hem big samting.” Taem iumi tingim hao staka million pipol kasem gud samting from Jehovah lanem olketa, datwan shud mekem iumi barava praisem hem!

9. Wanem nao savve mekem pipol barava changem wei bilong olketa?

⁹ Bible witim holy spirit bilong Jehovah savve mekem pipol barava changem wei bilong olketa. (Rom. 12:2; Gal. 5:22, 23) Colossians 3:10 hem sei: “Iufala mas werem olsem kaleko disfala niu wei wea iufala lanem. Iufala garem disfala niu wei taem iufala lanem stretfala savve abaotem God and wea followim olketa wei bilong God wea wakem iufala.” Message long Bible savve showimaot wanem kaen wei nao man garem, and hem savve changem tingting bilong hem abaotem olketa samting. (Readim Hebrews 4:12.) Taem man lanem stretfala savve long Bible and followim olketa haefala mark bilong Jehovah, hem fren gud witim God and garem hope for laef olowe.

Jehovah Redyim Iumi for Future

10. (a) Why nao Jehovah nomoa savve redyim iumi for future? (b) Wanem big samting nao klosap for happen long earth?

¹⁰ Jehovah nomoa savve redyim iumi for future bikos hem savve long samting wea klosap for happen. Hem nao disaedem wanem bae happen long olketa man long future. (Isa. 46:9, 10) Bible talem profesi hao “bigfala day bilong Jehovah hem klosap.” (Zeph. 1:14) Samting wea Proverbs 11:4 talem abaotem datfala day bae kamap tru. Hem sei: “Taem God judgem pipol, olketa richfala samting bae no savve sevem man, bat stretfala wei bilong man nao bae mekem hem laef.” Taem Jehovah judgem world bilong Satan, important samting wea iumi mas garem nao hem for iumi fren gud witim God. Selen bae no savve helpem iumi. Ezekiel 7:19 hem sei: “Pipol bae torowem silver bilong olketa long road, and olketa bae tingim gold bilong olketa olsem barava rabis samting nao.” From iumi savve hem nao samting wea bae happen, datwan helpem iumi for tingting gud firstaem bifor iumi disaedem eni samting.

11. Wanem nao wanfala wei wea Jehovah redyim iumi for future?

¹¹ Jehovah lanem iumi mekem iumi redi for day bilong hem. Wanfala wei hem duim datwan nao, hem helpem iumi for duim olketa samting wea important. Aposol Paul sei long Timothy: “Talem olketa wea rich long world for no praod tumas. Olketa mas trustim God and no olketa richfala samting wea savve finis.” Nomata sapos iumi no garem staka selen, iumi savve kasem gud samting from datfala kaonsel. Wanem nao iumi mas duim? Iumi no waka hard for kasem staka material samting, bat iumi mas trae hard “for duim gudfala samting” and “for duim staka gudfala waka.” Taem iumi duim firstaem olketa samting for worshipim Jehovah, iumi ‘wakem gudfala faondeson for future.’ (1 Tim. 6:17-19) Taem iumi duim olsem, datwan showimaot iumi garem gudfala tingting. Jesus hem sei: “Wanem gud samting nao man bae garem sapos hem kasem evri samting long disfala world bat hem lusim laef bilong hem?” (Matt. 16:26, 27) From day bilong Jehovah klosap tumas, hem gud for tingim diswan: ‘Wanem nao mi waka hard for hem? Waswe, mi waka hard for worshipim God or mi busy tumas for kasem staka selen?’—Matt. 6:19, 20, 24.

12. Why nao iumi mas gohed preach nomata samfala barava les long message?

¹² Important “waka” wea iumi olketa Christian mas duim nao hem for preach abaotem Kingdom and teachim pipol for kamap disaepol. (Matt. 24:14; 28:19, 20) Maet samfala pipol barava les long preaching waka wea iumi duim, olsem hem happen long first century. (Readim 1 Corinthians 1:18-21.) Nomata olsem, message wea iumi talemaot hem important and evriwan mas garem chance for showimaot faith long datfala message taem hem no tu leit yet. (Rom. 10:13, 14) Taem iumi helpem narawan for lane abaotem Jehovah and kasem gud samting from datwan, iumi tu bae kasem staka gud samting.

Jehovah Blessim Iumi Taem Iumi Willing for Lusim Samting

13. From aposol Paul tinghae long gud nius, wanem nao hem willing for lusim?

¹³ Bifor aposol Paul kamap Christian, hem lane for kamap bigman bilong Jew religion. Taem hem samting olsem 13 year, hem lusim Tarsus and hem go long Jerusalem for Gamaliel lanem hem. Staka pipol barava tinghae long Gamaliel wea teachim Law. (Acts 22:3) Gogo Paul savve tumas winim olketa narawan wea olketa skul tugeta. Sapos hem gohed olsem, maet hem kamap bigman bilong Jew religion. (Gal. 1:13, 14) Bat taem hem tinghae long gud nius and duim preaching waka, hem willing for lusim olketa samting hia. Waswe, Paul sorre from hem duim olsem? Nomoa. Hem sei: “Mi willing for lusim evri samting bikos mi lanem olketa nambawan samting abaotem Lord bilong mi, Christ Jesus. From mi followim hem, mi willing for lusim evri samting and mi tingim evri samting hia olsem rabis nomoa.”—Phil. 3:8.

14, 15. Wanem nao olketa gudfala samting wea iumi kasem from iumi “waka witim God”?

¹⁴ Olketa Christian distaem tu willing for lusim samfala samting mekem olketa preachim gud nius. (Mark 10:29, 30) Waswe, bae iumi kasem gud samting from iumi duim olsem? Robert, wea iumi storyim finis, hem garem sem tingting olsem staka narawan. Hem sei: “Mi nating sorre from mi duim full-taem ministry. Hem mekem mi hapi, and mekem mi for ‘trustim Jehovah and for lukim hao hem gud tumas.’ Taem mi willing for lusim olketa material samting mekem mi duim samfala samting moa for Jehovah, Jehovah evritaem givim mi samting wea winim wanem mi lusim. Hem olsem mi no lusim eni samting nomoa bat mi kasem staka samting!”—Ps. 34:8; Prov. 10:22.

¹⁵ Sapos iu duim waka for preach and teach for longtaem lelebet, datwan mekem iu tu for trustim Jehovah and for lukim hao hem gud tumas. Waswe, iu luksavve hao staka taem holy spirit helpem iu taem iu preachim gud nius? Waswe, enitaem iu lukim pipol hapi tumas taem Jehovah openem heart bilong olketa for bilivim message from Bible? (Acts 16:14) Waswe, Jehovah helpem iu for winim olketa problem wea mekem iu savve duim samfala samting moa long ministry? Waswe, hem helpem iu taem iu kasem hard taem mekem iu savve gohed worshipim hem nomata iu feel olsem iu no strong nao? (Phil. 4:13) Taem iumi lukim hao Jehovah helpem iumi long ministry, datwan savve mekem iumi trustim hem and fren gud witim hem. (Isa. 41:10) Hem nambawan privilege for “waka witim God” for teachim pipol abaotem hem!—1 Cor. 3:9.

16. Hao nao tingting bilong iu abaotem waka wea iu duim for lanem pipol abaotem God and wei wea iu willing for lusim samfala samting for duim datwan?

¹⁶ Staka pipol long world laek duim bigfala samting wea bae helpem pipol for longfala taem. Nomata olketa duim bigfala samting olsem, gogo pipol forgetim nomoa wanem olketa duim. Bat waka wea Jehovah duim distaem for mekem nem bilong hem stap holy, datwan nao waka wea iumi bae nating forgetim. (Prov. 10:7; Heb. 6:10) So tinghae long privilege wea iumi garem for teachim pipol abaotem Jehovah. Disfala waka nao iumi bae no forgetim.

Wanem Nao Ansa Bilong Iu?

• Sapos iumi laekem Jehovah for lanem iumi, wanem wei nao iumi mas garem?

• Taem pipol lane abaotem Jehovah, long wanem wei nao datwan barava helpem olketa?

• Wanem nao olketa gudfala samting wea iumi kasem taem iumi helpem pipol for lane abaotem God?

[Piksa long page 23]

Pipol wea Jehovah lanem, olketa olsem wanfala famili nomoa long full world

[Piksa long page 24]

Hem privilege for “waka witim God”!