‘Iufala Mas Werem Long-safaring’

“Iufala mas werem fasin for kea . . . and long-safaring.”—COLOSSIANS 3:12.

1. Storyim wanfala gudfala example bilong wei for long-safaring.

RÉGIS, wea stap long southwest France, kamap wanfala baptaes Witness bilong Jehovah long 1952. For planti year waef bilong hem duim enikaen samting for trae stopem hem for servem Jehovah. Hem trae for mekem tyre long trak flat mekem hem no go long meeting, and wantaem hem followim Régis tu taem hem preachim Bible message from haos-tu-haos, mekfani long hem taem hem story long pipol abaotem gud nius bilong Kingdom. Nomata Régis kasem disfala wei for againstim hem, hem go ahed for long-safaring. So, Régis hem gudfala example for evri Christian, bikos Jehovah laekem evri worshiper bilong hem for garem long-safaring taem olketa deal witim nara pipol.

2. Wanem nao really mining bilong Greek word for “long-safaring,” and wanem nao word hia minim?

² Greek word for “long-safaring” hem really minim “longfala spirit.” Tenfala taem nao English New World Translation transleitim disfala word olsem “long-safaring,” thrifala taem “patient fasin,” and wanfala taem “showimaot patient fasin.” Olketa transleitim Hebrew and Greek word for “long-safaring” olsem word wea minim patient fasin, fasin for stand strong, and no kros kwiktaem.

3. Hao nao tingting bilong Christian abaotem long-safaring hem difren from olketa Greek long first century?

³ Greek pipol wea stap long first century no ting long-safaring hem wanfala gud fasin. Olketa Stoic savveman nating iusim datfala word. Man wea studyim Bible, William Barclay sei long-safaring “hem barava opposite long fasin bilong Greek pipol,” wea mekhae long wei for “no acceptim eni wei wea narawan spoelem iu.” Hem sei: “Long tingting bilong olketa long Greece, man wea top nao bae duim eni samting for pei bak. Long tingting bilong olketa Christian, top wan nao hem man wea nomata hem savve duim, hem no laek for duim.” Pipol long Greece maet ting long-safaring hem saen bilong man wea wik, bat long diswan, olsem long olketa nara samting, “wanfala krangge samting bilong God hem moa wise winim olketa man, and wanfala wik samting bilong God hem moa strong winim olketa man.”—1 Corinthians 1:25.

Example Bilong Long-Safaring Bilong Christ

4, 5. Wanem nambawan example bilong long-safaring nao Jesus showimaot?

⁴ Christ Jesus nao mek-tu long Jehovah long wei for showimaot gudfala example bilong long-safaring. Taem hem kasem bigfala hevi, Jesus showimaot strongfala fasin for kontrolem seleva. Profesi sei olsem abaotem hem: “Hem kasem barava hevi, and hem letem pipol spoelem hem; bat hem nating openem mouth bilong hem. Olketa leadim hem go olsem sheep for busarem; and olsem sheep wea no toktok front long olketa wea katem hair bilong hem, hem tu no openem mouth nao.”—Isaiah 53:7.

⁵ Jesus barava showimaot long-safaring long full ministry bilong hem long earth! Hem go ahed strong nomata olketa enemy askem olketa kwestin for giamanim hem and olketa wea againstim hem tokspoelem hem. (Matthew 22:15-46; 1 Peter 2:23) Hem patient witim olketa disaepol bilong hem, nomata taem olketa evritaem raoa abaotem hu nao nambawan. (Mark 9:33-37; 10:35-45; Luke 22:24-27) And Jesus barava kontrolem hemseleva long naet wea Judas givim hem go long enemy, taem Peter and John sleep bihaen hem talem tufala for “go ahed for lukaot”!—Matthew 26:36-41.

6. Hao nao Paul kasem gudfala samting from long-safaring bilong Jesus, and wanem nao iumi lanem from diswan?

⁶ Bihaen hem dae and resurrect, Jesus go ahed for showimaot long-safaring. Aposol Paul hem barava feelim diswan, bikos firstaem hem man for persecutim olketa Christian. Paul raet olsem: “Toktok abaotem wei wea Christ Jesus kam long world for sevem olketa sinner, hem faithful and fitim man for acceptim evribit. Mi nao main wan long olketa hia. Nomata olsem, reason why hem showimaot mercy long mi hem for thru long mi olsem main wan wea sin Christ Jesus savve showimaot long-safaring bilong hem olsem example for evriwan wea bae putim faith long hem for laef olowe.” (1 Timothy 1:15, 16) Nomata wanem kaen living iumi garem bifor, sapos iumi putim faith long Jesus, hem bae showimaot long-safaring long iumi—bat long semtaem hem expectim iumi for showimaot olketa “waka wea fitim wei for repent.” (Acts 26:20; Romans 2:4) Olketa message wea Christ sendem for sevenfala kongregeson long Asia Minor showimaot hao nomata hem long-safaring, hem expectim man for kamap moabeta.—Revelation, chapter 2 and 3.

Wanfala Frut Bilong Spirit

7. Hao nao long-safaring and holy spirit join tugeta?

⁷ Long mek-5 chapter long leta bilong hem for olketa long Galatia, Paul showimaot wei wea olketa waka bilong body hem difren from olketa frut bilong spirit. (Galatians 5:19-23) From long-safaring hem wanfala fasin bilong Jehovah, disfala fasin start witim hem and hem wanfala frut bilong spirit. (Exodus 34:6, 7) Tru nao, long-safaring hem mek-foa long list bilong Paul abaotem olketa frut bilong spirit, wea olketa narawan nao “love, hapi, peace, . . . kaenfala fasin, gudfala fasin, faith, kwaet fasin, fasin for kontrolem seleva.” (Galatians 5:22, 23) So, taem olketa servant bilong God showimaot patient fasin, or long-safaring, olketa duim diswan from paoa bilong holy spirit.

8. Wanem nao bae mekem iumi fit for mekem grow olketa frut bilong spirit, wea insaed diswan hem long-safaring?

⁸ Nomata olsem, diswan no minim Jehovah forcem spirit bilong hem long man. Iumi mas willing for letem diswan affectim iumi. (2 Corinthians 3:17; Ephesians 4:30) Iumi letem spirit hia for duim samting long laef bilong iumi taem iumi mekem grow olketa frut bilong hem long evri samting wea iumi duim. Bihaen hem listim olketa waka bilong body and frut bilong spirit, Paul sei moa: “Sapos iumi live followim spirit, iumi mas go ahed for wakabaot followim order long spirit tu. No giamanim iufala seleva: iufala no savve mekful long God. Eni samting man hem plantim, datwan nao bae hem harvestim; from man wea plantim samting saed long body bae kasem wei for rotten from body, bat man wea plantim samting saed long spirit bae harvestim laef olowe from spirit.” (Galatians 5:25; 6:7, 8) Sapos iumi want for win for mekem grow long-safaring, iumi mas mekem grow tu olketa nara frut wea olketa Christian showimaot thru long holy spirit.

“Love Hem Long-Safaring”

9. Why nao maet Paul talem olketa long Corinth hao “love hem long-safaring”?

⁹ Paul showimaot spesol wei wea love and long-safaring join tugeta taem hem sei: “Love hem long-safaring.” (1 Corinthians 13:4) Wanfala savveman bilong Bible, Albert Barnes, sei Paul strongim diswan from wei for raoa wea go ahed insaed Christian kongregeson long Corinth. (1 Corinthians 1:11, 12) Barnes sei: “Datfala word [for long-safaring] wea hem iusim long hia hem difren evribit long fasin for hariap: long strong toktok and tingting, and wei for isi for feel kros. Hem minim wei wea man savve STAND STRONG FOR LONGTAEM taem samting againstim hem, or mekem hem feel kros.” Love and long-safaring barava big part long wei for garem peace insaed Christian kongregeson.

10. (a) Long wanem wei nao love hem helpem iumi for long-safaring, and wanem kaonsel nao aposol Paul givim long diswan? (b) Wanem nao wanfala man wea studyim Bible sei abaotem long-safaring and kaeness bilong God? (Lukim footnote.)

¹⁰ “Love hem long-safaring and kaen. Love . . . no lukaotem samting bilong hemseleva nomoa, hem no savve kros.” So, long planti wei, love helpem iumi for long-safaring.a (1 Corinthians 13:4, 5) Love mekem iumi fit for patient witim each other and tingim hao iumi evriwan no perfect and garem olketa wik point. Hem helpem iumi for tingim narawan and forgive. Aposol Paul encouragem iumi for wakabaot “witim barava hambol mind and kwaet fasin, witim long-safaring, mas patient witim narawan long love, barava trae for followim wan mind bilong spirit wea joinim evriwan tugeta long peace.”—Ephesians 4:1-3.

11. Why nao hem important tumas for olketa Christian for long-safaring?

¹¹ Long-safaring wea olketa Christian member showimaot hem help for mekem peace and hapi kamap midolwan long olketa Christian, nomata long kongregeson, Bethel hom, missionary hom, construction team, or long olketa Christian skul. From wei wea evriwan garem difren fasin, laek, living, standard saed long wei for kaen, and saed long hygiene tu, samfala taem nogud feeling savve kamap. Diswan hem olsem tu insaed long olketa famili. Wei for no kros kwiktaem hem important tumas. (Proverbs 14:29; 15:18; 19:11) Long-safaring—wei for go ahed patient, from man hope for samting bae kamap moabeta—hem samting wea iumi evriwan needim.—Romans 15:1-6.

Long-Safaring Helpem Iumi for Stand Strong

12. Why nao long-safaring hem important insaed long olketa hardfala taem?

¹² Long-safaring helpem iumi for stand strong long hard samting wea luk olsem bae no finis kwiktaem. Diswan hem kasem Régis, wea iumi storyim finis. For planti year waef bilong hem againstim wei wea hem servem Jehovah. Nomata olsem, wanday hem krae long Régis and sei: “Mi savve diswan nao truth. Helpem mi. Mi laekem Bible study.” Gogo hem baptaes olsem wanfala Witness. Régis hem sei: “Diswan pruvim wei wea Jehovah blessim olketa year wea mi stragol, patient, and stand strong.” Long-safaring bilong hem kasem reward.

13. Wanem nao mekem Paul fit for stand strong, and hao nao example bilong hem savve helpem iumi for stand strong?

¹³ Long first century C.E., aposol Paul hem wanfala gud example bilong long-safaring. (2 Corinthians 6:3-10; 1 Timothy 1:16) Gogo for end long laef bilong hem, taem hem givim kaonsel long young fren bilong hem Timothy, Paul warnim hem hao evri Christian bae feisim hardfala taem. Paul talem example bilong hemseleva and talem olketa main Christian fasin wea man needim for stand strong. Hem raet olsem: “Iu barava followim teaching bilong mi, laef bilong mi, purpose bilong mi, faith bilong mi, long-safaring bilong mi, love bilong mi, fasin for stand strong bilong mi, persecution bilong mi, olketa problem bilong mi, evrikaen samting wea happen long mi long Antioch, long Iconium, long Lystra, evrikaen persecution wea mi kasem; bat from evriwan hia Lord sevem mi. Tru nao, evriwan wea laek stap witim wei for lovem God wea join witim Christ Jesus bae kasem persecution tu.” (2 Timothy 3:10-12; Acts 13:49-51; 14:19-22) For stand strong, iumi evriwan needim faith, love, and long-safaring.

Werem Long-Safaring

14. Paul hem showimaot hao olketa fasin bilong God olsem long-safaring hem olsem wanem samting, and wanem kaonsel nao hem givim for olketa Christian long Colossae?

¹⁴ Aposol Paul showimaot hao long-safaring and olketa nara fasin bilong God hem olsem olketa kaleko wea Christian mas werem bihaen hem tekaotem “oldfala fasin.” (Colossians 3:5-10) Hem raet olsem: “Olsem olketa wea God chusim, wea holy and wea hem lovem, iufala mas werem fasin for kea, kaenfala fasin, hambol tingting, kwaet fasin, and long-safaring. Go ahed for patient witim narawan and willing for forgivim narawan sapos eniwan garem reason for komplen againstim narawan. Olsem Jehovah hem willing for forgivim iufala, iufala mas duim olsem tu. Bat, witim evri samting hia, iufala mas werem love, from hem nao perfect wei for keepim wan mind.”—Colossians 3:12-14.

15. Wanem nao kamaot from wei wea olketa Christian ‘werem’ long-safaring and olketa nara fasin bilong God?

¹⁵ Taem olketa member bilong kongregeson ‘werem’ fasin for kea, kaenfala fasin, hambol tingting, kwaet fasin, long-safaring, and love, olketa fit for stretem problem and muv forward witim wan mind insaed service bilong Jehovah. Olketa Christian overseer tu barava need for showimaot long-safaring. Samfala taem maet olketa need for kaonselem narafala Christian, maet bae olketa difren wei stap for duim diswan. Paul storyim best wei taem hem raet olsem long Timothy: “Stretem, kaonselem, encouragem, witim full long-safaring and gudfala wei for teach.” (2 Timothy 4:2) Tru nao, mas evritaem deal witim olketa sheep bilong Jehovah witim long-safaring, honor, and kaenfala fasin.—Matthew 7:12; 11:28; Acts 20:28, 29; Romans 12:10.

“Showimaot Long-Safaring Long Evriwan”

16. Wanem nao maet kamaot from wei wea iumi “showimaot long-safaring long evriwan”?

¹⁶ Long-safaring bilong Jehovah for olketa man hem mekem iumi garem responsibility for “showimaot long-safaring long evriwan.” (1 Thessalonians 5:14) Diswan minim for patient witim famili member wea no Witness, witim olketa neiba, pipol iumi waka witim, and skul witim. Planti nogud feeling hem finis taem olketa Witness patient witim wei wea pipol long skul or long waka talem nogud toktok or againstim olketa nomata samfala taem diswan go ahed for planti year. (Colossians 4:5, 6) Aposol Peter hem raet olsem: “Keepim fasin bilong iufala gud midolwan long olketa nation, mekem, long samting wea olketa tok againstim iufala olsem nogud pipol, olketa savve lukim gudfala waka bilong iufala and givim glory long God long day for hem duim inspection.”—1 Peter 2:12.

17. Hao nao iumi savve showimaot love and long-safaring bilong Jehovah, and why nao iumi shud duim olsem?

¹⁷ Wei wea Jehovah showimaot long-safaring bae sevem planti million pipol. (2 Peter 3:9, 15) Sapos iumi followim love and long-safaring bilong Jehovah, bae iumi patient for go ahed preachim gud nius bilong Kingdom bilong God and teachim nara pipol for stap anda long Kingdom rul bilong Christ. (Matthew 28:18-20; Mark 13:10) Sapos iumi stop for preach, hem bae olsem iumi holem bak long-safaring bilong Jehovah and fail for luksavve long purpose bilong hem, wea hem for leadim pipol for repent.—Romans 2:4.

18. Wanem nao prea bilong Paul for olketa long Colossae?

¹⁸ Long leta bilong hem for olketa Christian long Colossae, Asia Minor, Paul raet olsem: “Hem tu reason why mifala, start long taem wea mifala herem diswan, no stop for prea for iufala and ask mekem iufala savve kamap full witim stretfala savve long will bilong hem witim evri wisdom and spiritual savve, mekem iufala savve wakabaot fitim Jehovah witim goal for mekem hem hapi evribit taem iufala go ahed for garem frut long evri gudfala waka and grow long stretfala savve bilong God, kasem strong witim bigfala paoa bilong hem, mekem iufala savve barava stand strong and showimaot long-safaring witim hapi.”—Colossians 1:9-11.

19, 20. (a) Hao nao iumi savve stap klia long wei for tingim long-safaring bilong Jehovah olsem wanfala test? (b) Wanem gudfala samting nao bae kamaot from wei wea iumi long-safaring?

¹⁹ Wei wea Jehovah hem long-safaring, or patient, bae no olsem wanfala test long iumi sapos iumi “fulap witim stretfala savve long will bilong hem” wea hem nao for “evri difren kaen man mas sev and kasem stretfala savve bilong truth.” (1 Timothy 2:4) Iumi bae “go ahed for garem frut long evri gudfala waka,” main wan nao for preachim “gud nius bilong kingdom.” (Matthew 24:14) Sapos iumi faithful for go ahed duim diswan, Jehovah bae mekem iumi “strong witim bigfala paoa,” mekem iumi fit for “barava stand strong and showimaot long-safaring witim hapi.” Taem iumi duim olsem, bae iumi “wakabaot fitim Jehovah,” and bae iumi garem peace wea kam from iumi savve iumi “mekem hem hapi evribit.”

²⁰ Iumi mas barava biliv strong hao long-safaring bilong Jehovah hem wise samting. Hem for salvation bilong iumi and bilong olketa wea lisin long preaching and teaching bilong iumi. (1 Timothy 4:16) Wei for mekem grow frut bilong spirit—love, kaenfala fasin, gudfala fasin, kwaet fasin, and fasin for bossim seleva—bae mekem iumi fit for hapi for showimaot long-safaring. Iumi bae fit for stap long peace witim olketa famili member and tu olketa brata and sista insaed kongregeson. Long-safaring bae helpem iumi for patient tu witim olketa wakfren and skulfren. And long-safaring bilong iumi bae garem purpose, hem nao for sevem olketa wea duim rong and givim glory long God bilong long-safaring, Jehovah.

[Footnote]

Iu Savve Explainim?

• Wanem nao olketa wei wea Christ hem nambawan example bilong long-safaring?

• Wanem nao bae helpem iumi for mekem grow long-safaring?

• Hao nao long-safaring helpem olketa famili, olketa Christian, and olketa elder?

• Hao nao long-safaring bilong iumi bae givim gud samting long iumiseleva and long nara pipol?

[Piksa long page 15]

Nomata taem hem kasem bigfala hevi, Jesus patient witim olketa disaepol bilong hem

[Piksa long page 16]

Olketa Christian overseer kasem encouragement for showim gud example bilong long-safaring taem olketa deal witim olketa brata

[Piksa long page 17]

Sapos iumi followim love and long-safaring bilong Jehovah, bae iumi go ahed for preachim gud nius

[Piksa long page 18]

Paul prea for olketa Christian showimaot “long-safaring witim hapi”