Marit Mas Olsem “Rope wea Garem Thrifala String”
“Wanfala rope wea garem thrifala string no savve brek kwiktaem.”—ECCL. 4:12.
1. Hu nao mekem firstfala man and woman for marit?
BIHAEN Jehovah God wakem olketa plant and animal, hem wakem firstfala man Adam. Gogo God mekem Adam deepim sleep, then Hem aotem wanfala bon from Adam and hem wakem Eve for helpem Adam. Taem Adam lukim Eve, hem sei: “Hem nao bon wea kamaot long bon bilong mi and body wea kamaot long body bilong mi.” (Gen. 1:27; 2:18, 21-23) Jehovah hem hapi long woman wea hem wakem for Adam, then hem mekem firstfala man and woman hia for marit.—Gen. 1:28; 2:24.
2. Wanem nao Satan duim for mekem Adam and Eve feel nogud long tufala?
2 Bat gogo, Satan laek spoelem marit wea God startim. Wanem nao hem duim? Satan hem laea long Eve, gogo Eve hem kaikaim frut from datfala tree wea God tambuim. No longtaem bihaen, Adam tu no obeyim Jehovah. From tufala duim olsem, olketa showimaot olketa les for God rulim olketa and for Hem talem olketa wanem nao olketa mas duim. (Gen. 3:1-7) Taem Jehovah askem tufala wanem nao tufala duim, Adam blamem waef bilong hem and hem sei: “Woman wea iu givim long mi for stap witim mi, hem nao givim kam frut bilong datfala tree long mi, dastawe mi kaikaim.” From Adam tok olsem, datwan showimaot marit bilong tufala start for kasem trabol nao.—Gen. 3:11-13.
3. Wanem tingting wea no stret nao samfala Jew garem?
3 Start kam long datfala taem, Satan hem iusim enikaen wei for spoelem marit bilong pipol. Samfala taem hem iusim olketa bigman bilong religion nao for mekem pipol no followim wanem olketa scripture talem abaotem marit. Samfala bigman bilong Jew religion no followim tingting bilong God bat olketa letem olketa hasband for lusim waef bilong olketa from olketa sismol samting, olsem wei for soltem tumas kaikai. Bat Jesus hem sei: “Eniwan wea lusim waef bilong hem and maritim narawan bae spoelem waef bilong hem bikos datwan hem adultery. Bat sapos waef hem durong, hem savve lusim hem.”—Matt. 19:9.
4. Wanem nao Satan duim distaem for spoelem tingting bilong pipol abaotem marit?
4 Satan gohed yet for spoelem tingting bilong pipol abaotem marit. Distaem staka man and woman stap tugeta nomoa bat no marit. Olketa man durong witim man and olketa woman durong witim woman. Hem isi tu for eniwan savve lusim hasband or waef bilong hem. Evri samting hia showimaot Satan spoelem tingting bilong pipol for tinghae long marit. (Readim Hebrews 13:4.) Wanem nao bae helpem iumi for no letem tingting bilong world for spoelem tingting bilong iumi abaotem marit? Distaem bae iumi storyim samfala samting wea savve mekem man hapi long marit bilong hem and for marit gohed gud.
Tingim Jehovah Evritaem Long Marit
5. Wanem nao datfala toktok abaotem “rope wea garem thrifala string” hem minim?
5 Iumi mas tingim Jehovah evritaem long marit bilong iumi. Sapos nomoa, marit bilong iumi savve kasem trabol. Bible sei: “Wanfala rope wea garem thrifala string no savve brek kwiktaem.” (Eccl. 4:12) Disfala toktok abaotem “rope wea garem thrifala string” hem wanfala tokpiksa. Hasband and waef nao olsem tufala string wea olketa taengem raonem wanfala string long midol, wea hem nao Jehovah God. Taem tufala tingim God evritaem long marit bilong tufala, datwan nao bae mekem tufala barava hapi. Hem bae helpem olketa tu for winim eni problem wea kasem olketa.
6, 7. (a) Wanem nao savve helpem hasband and waef for tingim God evritaem? (b) Wanem nao wanfala sista laekem tumas long hasband bilong hem?
6 Wanem nao savve helpem hasband and waef for tingim Jehovah evritaem? David sei: “God bilong mi, mi hapi tumas for duim samting wea iu laekem mi for duim. Law bilong iu hem stap insaed long heart bilong mi.” (Ps. 40:8) Sapos iumi lovem God, diswan bae mekem iumi worshipim hem long full heart bilong iumi. So hem gud for olketa wea marit mas fren gud witim Jehovah and hapi for duim samting wea hem laekem. Tufala mas helpem tufala tu for strongim go moa love wea tufala garem for God.—Prov. 27:17.
7 Sapos iumi tingim law bilong God evritaem, bae iumi showimaot iumi garem faith, hope, and love. Olketa samting hia bae strongim go moa marit bilong iumi. (1 Cor. 13:13) Sandra wea marit for 50 year finis, hem sei olsem: “Samting wea mi laekem tumas long hasband bilong mi nao, hem wei wea hem savve talem kam olketa toktok from Bible for helpem mi. Mi hapi tu bikos hem barava lovem Jehovah winim mi.” Waswe iufala hasband, waef bilong iu savve tok olsem abaotem iu tu?
8. Wanem nao hasband and waef mas duim sapos tufala laek kasem “gud samting” long marit?
8 Waswe, wei wea iutufala fren witim Jehovah and duim olketa Kingdom waka nao hem important samting long marit bilong iutufala? Waswe, iu tingim hasband or waef bilong iu olsem partner bilong iu for worshipim Jehovah? (Gen. 2:24) King Solomon hem talem: “Tufala nao gud winim wanfala, bikos tufala bae kasem gud samting from hard waka bilong tufala.” (Eccl. 4:9) Tru tumas, hasband and waef mas waka hard long marit bilong tufala sapos tufala laek kasem “gud samting,” wea hem nao for marit bilong tufala gohed strong and wea God hapi long hem.
9. (a) Wanem nao waka bilong hasband? (b) Olsem Colossians 3:19 talem, hasband mas hao long waef?
9 Samting wea showimaot hasband and waef tingim Jehovah evritaem nao hem wei wea tufala waka hard for duim olketa samting wea God laekem. Waka bilong hasband nao hem for givim material samting wea famili needim and for helpem famili fren gud witim God. (1 Tim. 5:8) Hasband mas tingim tu feeling bilong waef. Colossians 3:19 hem sei: “Iufala hasband, gohed for lovem waef bilong iufala and no kros tumas long olketa.” Wanfala savveman hem sei disfala toktok “kros tumas” hem minim “for barava tok nogud long olketa, and for no tingim olketa, no lukaftarem olketa, no givim wanem olketa needim, and no helpem olketa.” Tru tumas, olketa long famili mas no garem kaen wei olsem. Sapos hasband hem showimaot love, bae waef bilong hem hapi for stap anda long hem.
10. Wanem kaen tingting nao waef mas garem?
10 Olketa waef wea tingim Jehovah evritaem mas duim tu samting wea God laekem. Aposol Paul hem talem: “Olketa waef mas stap anda long hasband bilong olketa, from diswan nao Lord hem laekem. Hasband nao hem hed bilong waef olsem Christ tu hem hed bilong kongregeson.” (Eph. 5:22, 23) Satan hem laea long Eve. Hem mekem Eve tingse sapos God no rulim hem, bae hem hapi olowe. Staka pipol wea marit distaem tu garem kaen tingting olsem. Bat olketa woman wea garem sem tingting olsem God abaotem marit, olketa hapi for stap anda long hasband bilong olketa. Olketa no forgetim hao Jehovah wakem Eve olsem “partner” for Adam. Datwan showimaot God hem tinghae long olketa woman. (Gen. 2:18) Waef wea hapi for duim waka wea God givim long hem, hem olsem “wanfala crown” long hasband bilong hem.—Prov. 12:4.
11. Wanem nao wanfala brata talem wea savve helpem marit?
11 Nara samting wea bae helpem hasband and waef for tingim God evritaem hem for tufala studyim Bible tugeta. Gerald wea marit for 55 year finis, hem sei: “Samting wea barava helpem marit nao hem for tufala readim Bible and studyim tugeta.” Hem sei tu: “Sapos tufala evritaem duim olketa samting tugeta, olsem olketa samting wea iumi savve duim for Jehovah, datwan savve mekem tufala fren gud tugeta and witim Jehovah tu.” Taem hasband and waef studyim Bible tugeta, datwan bae helpem tufala for tingim olketa toktok bilong Jehovah evritaem, strongim wei wea tufala fren witim hem, and helpem tufala kamap strongfala Christian.
12, 13. (a) Why nao hasband and waef mas prea tugeta? (b) Wanem samting moa hasband and waef savve duim for strongim marit?
12 Hasband and waef mas prea tugeta tu. Taem hasband hem prea and ‘barava askem’ God for helpem tufala, datwan bae strongim marit bilong tufala. (Ps. 62:8) Taem hasband and waef prea long Jehovah abaotem samting wea tufala no agree long hem, datwan bae helpem tufala for no tingim moa datfala samting! (Matt. 6:14, 15) Olketa duim samting followim prea bilong olketa tu. Olketa trae for helpem narawan and olketa ‘no kros bat olketa forgivim narawan.’ (Col. 3:13) Tingim tu hao taem iumi prea datwan showimaot iumi needim God. King David hem sei: “Evriwan luk go long iu.” (Ps. 145:15) Taem iumi prea long God for hem helpem iumi, iumi bae no wari tumas from iumi savve ‘hem lukaftarem iumi.’—1 Pet. 5:7.
13 Nara samting wea savve helpem hasband and waef for tingim Jehovah evritaem hem for tufala go long olketa meeting and waka tugeta long preaching. Taem tufala go long olketa meeting, olketa bae lane hao for winim “olketa trik” wea Satan iusim for spoelem famili. (Eph. 6:11) And taem hasband and waef waka tugeta olowe long preaching, diswan bae mekem tufala “stand strong and no seksek.”—1 Cor. 15:58.
Taem Hasband and Waef Kasem Hard Taem
14. Wanem nao savve mekem marit kasem hard taem?
14 Nomata hasband and waef savve finis long olketa point hia, hem gud for tufala storyim moa. Maet olketa luksavve olketa need for followim yet samfala samting. Bat Bible talem hao nomata hasband and waef wea tingim God evritaem, olketa tu “bae kasem trabol.” (1 Cor. 7:28) Olketa nogud samting long world, olketa trik bilong Satan, and from iumi born sin, datwan savve mekem olketa wea marit kasem hard taem. (2 Cor. 2:11) Bat Jehovah nao savve helpem iumi long taem olsem. Tingim Job. Hem lusim evri animal bilong hem, olketa wakman, and evri pikinini bilong hem. Nomata olsem, Bible hem sei: “Nomata evri samting hia kasem Job, hem no sin and hem no tok nogud long God.”—Job 1:13-22.
15. Taem pipol kasem hard taem, wanem nao olketa savve duim? Sapos hasband or waef bilong iu duim olsem, wanem nao hem gud for iu duim?
15 Bat waef bilong Job hem tok olsem long hem: “Hao nao iu faithful yet long God? Tok spoelem God and dae nomoa!” (Job 2:9) Tru tumas, taem nogud samting kasem man, datwan savve mekem hem no tingting gud firstaem bifor hem duim wanfala samting. Solomon hem sei: “Hard taem savve mekem man wea garem gudfala savve for duim krangge samting.” (Eccl. 7:7) Sapos hasband or waef bilong iu talem nogud samting long iu from “hard taem” kasem iutufala, no talem nogud samting go bak long hem. Sapos iu duim olsem, datwan bae mekem problem big go moa. (Readim Psalm 37:8.) So sapos hasband or waef bilong iu “tok olobaot” from hem feel nogud, forgivim hem.—Job 6:3.
16. (a) Hao nao hasband and waef savve followim toktok bilong Jesus long Matthew 7:1-5? (b) Why nao iumi mas garem gudfala tingting?
16 Olketa wea marit mas garem gudfala tingting. Maet iu lukim samfala wei bilong hasband or waef bilong iu wea iu no mas laekem. Maet iu garem tingting olsem, ‘Mi savve mekem hem lusim kaen wei olsem.’ Sapos iu lovem hasband or waef bilong iu and iu isi nomoa witim hem, maet iu helpem hem for lusim datfala wei bilong hem. Bat no forgetim toktok bilong Jesus. Hem sei man wea lukluk long smol mistek bilong narawan hem olsem hem lukim “smol grass” long eye bilong man hia bat hem forgetim nao “bigfala timba” long eye bilong hemseleva. Dastawe Jesus talem iumi: “Hem wei bilong iufala for judgem narawan. No duim olsem, mekem God no judgem iufala.” (Readim Matthew 7:1-5.) Bat sapos hasband or waef bilong iumi duim bigfala mistek, iumi mas stretem hem. Robert wea marit klosap 40 year finis, hem sei: “Sapos hasband and waef story gud tugeta, datwan savve mekem wanfala or tufala evriwan changem tingting bilong olketa and wei bilong olketa tu.” So garem gudfala tingting. Hapi long olketa gudfala wei wea hasband or waef bilong iu garem finis and no feel nogud sapos olketa no garem samfala wei wea iu laekem.—Eccl. 9:9.
17, 18. Taem samfala hard samting kamap long laef bilong iumi, wanem nao savve helpem iumi?
17 Samfala hard samting savve kamap long laef bilong iumi. Maet hasband and waef kasem olketa hard samting taem olketa garem pikinini. Maet hasband or waef or pikinini hem kasem big sik. Maet tufala wea marit mas lukaftarem dadi and mami bilong olketa wea olo. Maet pikinini wea big finis hem go stap long nara ples wea farawe. Maet hasband kasem samfala waka long kongregeson. Evri samting hia savve mekem hasband and waef kasem hevi long marit bilong tufala.
18 Sapos iu kasem hevi long marit bilong iu and iu tingse iu no wei nao, wanem nao iu savve duim? (Prov. 24:10) Iu no givap! Satan hem laekem iu for no worshipim God. Hem bae barava hapi sapos hem mekem iutufala evriwan lusim Jehovah. So waka hard for tingim Jehovah evritaem long marit bilong iu. Bible storyim staka pipol wea faithful long God nomata olketa kasem barava hard taem. David hem storyim tingting bilong hem long Jehovah taem hem sei: “Plis God, iu tingim mi, bikos olketa man gohed for duim nogud samting long mi.” (Ps. 56:1) Waswe, enitaem wanfala “man” hem duim nogud samting long iu? Nomata wanem kaen hevi nao iu kasem, tingim diswan: David hem no givap. Iu tu savve duim sem samting. David hem sei: “Mi prea long Jehovah and hem herem mi. Hem sevem mi from evri samting wea mekem mi fraet.”—Ps. 34:4.
Gud Samting Hasband and Waef Kasem
19. Sapos iumi no laekem Satan for spoelem iumi, wanem nao iumi mas duim?
19 Olketa wea marit distaem mas “gohed helpem narawan and strongim narawan.” (1 Thess. 5:11) No forgetim hao Satan hem sei iumi faithful long Jehovah nomoa from iumi laek kasem gud samting. Satan bae duim eni samting for mekem iumi no faithful long God, olsem for spoelem marit bilong iumi. Sapos iumi no laekem Satan for spoelem iumi, iumi mas barava trustim Jehovah. (Prov. 3:5, 6) Paul hem sei: “Paoa wea mi kasem from hem, hem nao mekem mi strong for gohed nomoa nomata wanem kaen samting nao kasem mi.”—Phil. 4:13.
20. Sapos iumi tingim God evritaem long marit bilong iumi, wanem gud samting nao iumi savve kasem?
20 Staka gud samting nao iumi savve kasem sapos iumi tingim God evritaem long marit bilong iumi. Joel wea marit for 51 year finis hem sei olsem: “Mi thankiu long Jehovah evritaem from mi garem gudfala waef and mitufala hapi. Waef bilong mi barava fitim mi.” Wanem nao mekem marit bilong tufala gohed gud olsem? Joel hem sei: “Evritaem mitufala kaen long narawan, isi witim narawan, and lovem narawan.” No eniwan long iumi savve duim datwan long perfect wei distaem. Nomata olsem, iumi savve waka hard for followim olketa toktok long Bible and for tingim Jehovah evritaem long marit bilong iumi. Sapos olsem, marit bilong iumi bae olsem “wanfala rope wea garem thrifala string [wea] no savve brek kwiktaem.”—Eccl. 4:12.
Waswe, Iu Savve Long Ansa?
• Wanem nao hasband and waef savve duim for tingim Jehovah evritaem long marit bilong tufala?
• Wanem nao hasband and waef savve duim taem tufala kasem hard taem?
• Wanem nao bae mekem iumi luksavve sapos iumi tingim God evritaem long marit bilong iumi?
[Piksa long page 18]
Taem hasband and waef prea tugeta, datwan savve helpem tufala long hard samting wea kasem tufala