KAVA SUBJECT: WASWE, IU SHUD FRAETEM END BILONG WORLD?

End Bilong World Pipol Fraet, Interest, and Taed Nao for Herem

Staka pipol tingse world bae finis long December 21, 2012, olsem datfala Maya kalenda showimaot. From end bilong world no kam long datfala day, samfala hapi tumas, bat samfala sorre and samfala no interest nao. Hao nao tingting bilong iu taem pipol talem olketa date abaotem end bilong world?

Hao nao tingting bilong iu abaotem “end bilong world” wea Bible storyim? (Matthew 24:3, King James Version) Samfala fraet from olketa tingse fire bae bonem earth. Olketa narawan barava laek lukim wanem maet happen long end bilong world. Staka pipol taed for herem pipol sei end bilong world hem klosap. Bat waswe, pipol garem kaen tingting olsem bikos olketa no savve long tru samting abaotem end bilong world?

Maet bae iu sapraes for savve wanem Bible talem abaotem end bilong world. Bible sei iumi shud luk forward for taem wea end bae kam. Bible storyim tu samfala bae taed for weitim end bilong world. Distaem bae iumi storyim ansa from Bible for samfala kwestin wea staka pipol askem abaotem end bilong world.

Waswe, fire bae bonem earth?

BIBLE SEI: “[God] wakem strongfala faondeson for disfala earth, and bae hem stap for olowe.”—PSALM 104:5.

Fire bae no bonem earth and no eni nara samting bae spoelem earth. Bible sei God givim earth for olketa man stap olowe long hem. Psalm 37:29 sei: “Olketa gudfala pipol nomoa bae stap long earth, and olketa bae stap long hem for olowe.”—Psalm 115:16; Isaiah 45:18.

Bihaen God wakem earth hem sei hem “barava gud tumas,” and tingting bilong hem no change. (Genesis 1:31) Hem no laek for spoelem earth, bat hem bae protectim earth bikos hem promis for “finisim olketa wea spoelem earth.”—Revelation 11:18.

Bat maet iu tingse 2 Peter 3:7 showimaot fire bae bonem earth. Datfala verse sei: ‘Skae and earth wea stap distaem mas finis long fire.’ Waswe, diswan pruvim fire bae bonem earth? Samfala taem Bible iusim olketa toktok olsem, “skae,” “earth,” and “fire” for piksarem samting. Olsem example, Genesis 11:1 sei: ‘Full earth garem wanfala languis.’ Long disfala verse “earth” hem minim olketa man.

Olketa verse wea stap raonem 2 Peter 3:7 showimaot skae, earth and fire hem piksarem olketa samting tu. Verse 5 and 6 hem storyim samting wea happen long Flood long taem bilong Noah. Long datfala taem, nogud pipol nao finis, bat disfala earth hem stap nomoa. “Earth” wea finis long Flood hem evri nogud pipol, and “skae” hem olketa wea rulim pipol long datfala taem. (Genesis 6:11) So 2 Peter 3:7 hem storyim wei wea olketa nogud pipol and olketa nogud gavman bilong olketa bae finis for olowe, olsem taem fire bonem samting hem finis for olowe nao.

Wanem nao bae happen long end bilong world?

BIBLE SEI: “World bae finis and evri samting wea pipol long world laekem bae finis tu, bat man wea duim wanem God hem laekem bae stap for olowe.”—1 JOHN 2:17.

“World” wea bae finis hem no disfala earth, bat hem minim evri pipol long world wea no duim samting wea God laekem. Olsem doctor operatim man wea garem cancer for aotem tumor for sevem laef bilong hem, God bae aotem rabis pipol, then pipol wea duim gud samting savve enjoyim laef long earth. (Psalm 37:9) So “end bilong world” bae mekem iumi kasem gud samting.

Datfala tingting hem stret witim olketa Bible transleison wea transleitim “end bilong world” olsem “end bilong wanfala sekson bilong taem” or “samting wea pipol duim and wei bilong olketa bae finis.” (Matthew 24:3; New International Version) Diswan minim earth bae gohed for stap and nogud pipol nomoa bae finis, so olketa wea stap bae gohed for enjoyim laef long earth. Bible kolem datwan “world wea bae kam.”—Luke 18:30.

Jesus sei long datfala taem ‘evri samting kamap niu moa.’ Hem bae mekem olketa man garem gudfala laef, wea datwan nao plan bilong God firstaem. (Matthew 19:28) Long datfala taem iumi bae kasem olketa gud samting hia

Paradaes long earth wea evriwan stap sef and garem gud living.—Isaiah 35:1; Micah 4:4.
Waka wea mekem man hapi and satisfae.—Isaiah 65:21-23.
No eniwan bae sik.—Isaiah 33:24.
Evriwan kamap young moa.—Job 33:25.
Evriwan wea dae finis bae laef bak.—John 5:28, 29.

Sapos iumi duim “wanem God hem laekem,” iumi no need for fraetem end, bat iumi savve luk forward long datwan.

Waswe, end bilong world hem barava klosap?

BIBLE SEI: “Taem iufala lukim olketa samting hia hem happen, iufala bae savve Kingdom bilong God hem klosap kam nao.”—LUKE 21:31.

Long buk The Last Days Are Here Again, wea Richard Kyle raetem, hem sei “taem seknomoa olketa samting change and evri samting olobaot, pipol tingse olketa samting hia showimaot end bilong world hem klosap.” Especially taem olketa no minim why evri samting hem happen.

Bat olketa profet wea raetem Bible no trae for explainim reason why olketa nogud samting happen long taem bilong olketa. Bat God iusim holy spirit for leadim olketa for talem olketa samting wea bae happen wea showimaot end bilong world hem klosap. Iumi bae storyim samfala long olketa profesi hia and iu savve lukim sapos olketa kamap tru long taem bilong iumi or nomoa.

Olketa war, bigfala hangre, earthquake, and barava nogud sik.—Matthew 24:7; Luke 21:11.
Plande pipol duim samting wea no stret.—Matthew 24:12.
Olketa man spoelem earth.—Revelation 11:18.
Pipol tingim olketa seleva nomoa, laekem tumas selen, interest nomoa for enjoyim seleva, and no lovem God.—2 Timothy 3:2, 4.
Famili brekdaon.—2 Timothy 3:2, 3.
Staka pipol ting nating long olketa saen wea showimaot end hem klosap.—Matthew 24:37-39.
Olketa bae preachim gud nius abaotem Kingdom bilong God evriwea long world.—Matthew 24:14.

Jesus sei taem iumi lukim “evri samting hia,” iumi savve end bilong world hem klosap. (Matthew 24:33) Olketa Jehovah’s Witness barava trustim olketa profesi hia and talemaot wanem olketa bilivim long pipol long 236 kantri.

From end no kam long olketa date wea samfala talem, waswe, datwan minim end bae no kam nao?

BIBLE SEI: “Long taem wea pipol sei: ‘Iumi garem peace and stap gud nao!’ then seknomoa olketa bae finis, olsem taem bigfala pain hem seknomoa kasem woman wea klosap for bornem pikinini, and bae hem hard for olketa ranawe from diswan.”—1 THESSALONICA 5:3.

Bible markem end bilong world witim woman wea bae seknomoa kasem bigfala pain taem hem klosap for bornem pikinini. Olketa last day hem olsem taem woman hem babule bikos woman hia luksavve long olketa saen wea showimaot taem wea bae hem bornem pikinini hem klosap. Doctor maet talem hem date wea bae hem bornem pikinini. Bat nomata hem no bornem pikinini long datfala date, hem savve hem bae klosap bornem pikinini. So nomata end bilong world no kam long date or taem wea pipol markem, datwan no changem olketa samting wea happen wea showimaot iumi stap long “olketa last day.”—2 Timothy 3:1.

Iu maet laek for savve, sapos olketa samting wea happen showimaot klia end hem klosap, why nao staka pipol no luksavve long datwan? Bible showimaot nomata end hem klosap, staka pipol bae no tinghae long olketa samting wea happen wea pruvim datwan. Olketa no bilivim olketa samting wea happen long world hem kamap worse. Olketa tok spoelem pipol wea bilivim datwan and sei: “Start kam long taem wea olketa grani bilong iumi dae no eni samting hem change. Evri samting gohed semsem nomoa start kam long taem wea God wakem olketa man.” (2 Peter 3:3, 4) So nomata saen wea showimaot iumi stap long olketa last day hem klia, staka pipol bae ting nating long datwan.—Matthew 24:38, 39.

Disfala article storyim samfala samting nomoa wea Bible talem wea showimaot end hem klosap.a Waswe, iu laek savve moa? Sapos olsem, iu savve askem Olketa Jehovah’s Witness for studyim Bible witim iu. Samwan savve study witim iu long haos bilong iu or long eni ples wea fitim iu. Bible study hem free nomoa, bat wanem iu bae lanem savve barava helpem iu.

a For kasem moa information, lukim chapter 9, “Waswe, Iumi Stap Long ‘Olketa Last Day’?” long datfala buk wea Olketa Jehovah’s Witness pablisim, Wanem Nao Really Samting wea Bible Teachim?

WASWE, ENITAEM OLKETA JEHOVAH’S WITNESS TALEM DATE WEA END BAE KAM BAT HEM NO HAPPEN?

Olketa Jehovah’s Witness tu markem samfala date wea olketa tingse end bae kam. Mifala duim olsem bikos samfala taem mifala laekem tumas olketa profesi for kam tru olsem olketa disaepol bilong Jesus long first century. Bat olketa date hia no followim taem wea God markem. (Luke 19:11; Acts 1:6; 2 Thessalonica 2:1, 2) Mifala agree witim samting wea Alexander Macmillan talem, wea hem Witness for longtaem finis. Hem sei: “Mi luksavve iumi mas talemaot mistek bilong iumi and gohed for studyim Bible for minim samting.”

So why nao mifala gohed talemaot long pipol end hem klosap? Mifala duim olsem bikos mifala savve hem important for obeyim toktok bilong Jesus. Hem sei: “Gohed for lukaot, gohed for wekap.” Sapos mifala no obeyim Jesus for preach abaotem end, hem olsem mifala “sleep,” and bae hem no hapi long mifala. (Mark 13:33, 36) Why nao olsem?

Tingim disfala example: Man wea waka bilong hem for lukluk long weather hem lukim olketa saen wea showimaot maet cyclone bae kam and hem go warnim evriwan, bat cyclone no kam long datfala taem. Nomata olsem, long narafala taem wea hem warnim pipol, cyclone hem kam nao. From hem gohed lukaot hem talemaot warning wea savve sevem laef bilong pipol.

Mifala tu markem samfala date wea mifala tingse end bae kam bat hem no happen. Maet pipol tok spoelem mifala, bat important samting nao for mifala obeyim toktok bilong Jesus and sevem laef bilong pipol. Mifala mas gohed warnim olketa nara pipol abaotem end bikos Jesus sei iumi mas “talem long evriwan” end bae kam.—Acts 10:42.

Mifala luksavve, winim wei for trae faendemaot barava taem wea end bae kam, iumi mas garem faith end bae kam and iumi mas redi for datwan. Mifala laek for followim Habakkuk 2:3 wea sei: “Nomata sapos iu tingse [end] bae no happen kwiktaem, iu gohed for weitim bikos hem bae kamap tru. Hem bae no leit.”