Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • w08 12/15 pp. 3-7
  • Why Nao Iu Mas Faithful?

Disfala sekson no garem eni video.

Sorre, disfala video no savve plei distaem.

  • Why Nao Iu Mas Faithful?
  • Wastaoa wea Talemaot Kingdom Bilong Jehovah—2008
  • Subheding
  • Olketa Nara Article
  • Wanem Nao Hem Minim for Man Faithful?
  • 1. Faithful Fasin Bilong Iumi and Kwestin Abaotem Hu Nao Fit for Rul
  • 2. Wanem Nao Jehovah Lukluk for Hem Taem Hem Judgem Iumi?
  • 3. Iumi Mas Faithful Mekem Iumi Laef Olowe
  • Waswe, Bae Iu Gohed Faithful?
    Wastaoa wea Talemaot Kingdom Bilong Jehovah—2008
  • No Lusim Wei for Faithful!
    Wastaoa wea Talemaot Kingdom Bilong Jehovah (Study)—2019
  • Wakabaot Long Faithful Wei
    Wastaoa wea Talemaot Kingdom Bilong Jehovah—2004
  • Iumi Bae Gohed Faithful!
    Wastaoa wea Talemaot Kingdom Bilong Jehovah—2010
Samfala Moa
Wastaoa wea Talemaot Kingdom Bilong Jehovah—2008
w08 12/15 pp. 3-7

Why Nao Iu Mas Faithful?

‘Plis Jehovah, iu judgem mi followim wei wea mi faithful.’​—PS. 7:8.

1, 2. Wanem nao samfala samting wea savve mekem hem no isi for iumi faithful long God?

TINGIM thrifala story hia: Samfala skul pikinini tok spoelem wanfala boy and mekfani long hem. Olketa popokem hem for hem kros mekem hem tok swear go bak long olketa or faetem olketa. Waswe, boy hia bae duim nogud samting go bak long olketa, or waswe, bae hem go nomoa from olketa? Wanfala hasband stap seleva long haos and hem lukluk long Internet long computer. Seknomoa wanfala toktok kamap long screen wea switim hem for lukluk long olketa rabis piksa. Waswe, bae hem lukluk long datfala Web site for lukim olketa rabis piksa, or waswe, bae hem lukluk long nara samting? Wanfala sista hem story witim olketa nara sista gogo olketa story nogud abaotem wanfala sista long kongregeson. Waswe, bae sista hia talem nogud samting tu, or waswe, bae hem trae storyim nara samting?

2 Nomata thrifala story hia hem difren, wanfala samting nao evriwan semsem long hem. Evriwan hia mas trae hard for gohed faithful long God. Taem iu kasem hard taem, iu waka hard for kasem wanem iu needim, or iu disaedem wanem nao iu laek for duim long laef bilong iu, waswe, iu tingim wanem nao iu savve duim for gohed faithful long God? Evriday pipol savve tingim olketa samting olsem garden bilong olketa, price bilong olketa samting hem hae tumas, ples for olketa stap, and health bilong olketa. Maet iumi warim tumas olketa samting hia. Bat taem Jehovah hem lukluk long heart bilong iumi, wanem nao hem lukluk for hem? (Ps. 139:23, 24) Hem bae lukluk sapos iumi faithful long hem or nomoa.

3. Wanem nao Jehovah letem iumi wanwan for disaedem? Wanem nao bae iumi storyim long disfala study?

3 Jehovah nao givim “evri gudfala and perfect present.” Hem givim staka gud samting long iumi wanwan. (Jas. 1:​17) Hem nao givim body wea iumi garem, tingting, and savve for duim olketa difren samting. (1 Cor. 4:7) Nomata olsem, Jehovah no forcem iumi for faithful long hem. Hem letem iumiseleva nao for disaed sapos iumi laek faithful long hem or nomoa. (Deut. 30:19) So wanem nao hem minim for man faithful? Iumi bae storyim thrifala samting wea showimaot why nao iumi mas faithful.

Wanem Nao Hem Minim for Man Faithful?

4. Wanem nao hem minim for man faithful? Wanem nao iumi lanem from law bilong Jehovah abaotem olketa animal wea pipol givim for sakrifaes?

4 Staka pipol no barava savve gud wanem nao hem minim for man faithful. Tingim diswan, taem samfala member long parliament tok praod hao olketa faithful, staka taem olketa minim olketa no savve raverave. Hem tru, hem gud samting for man no raverave, bat datwan no minim man hia hem faithful. Taem Bible storyim man hem faithful, hem minim man hia hem garem olketa gudfala wei and tingting. Olketa word long Hebrew languis wea disfala word “faithful” hem kam from, hem minim wanfala samting wea barava gud or wea no eni samting nogud long hem. Wanfala long olketa Hebrew word hia olketa iusim for storyim olketa sakrifaes wea man givim long Jehovah. Jehovah bae hapi nomoa sapos datfala animal wea man givim for sakrifaes hem barava gud wan. (Readim Leviticus 22:19, 20.) Jehovah nating hapi long olketa wea givim animal for sakrifaes wea dae leg, sik, or blind.​—Mal. 1:​6-8.

5, 6. (a) Wanem example nao showimaot iumi tinghae long olketa barava gud samting? (b) Waswe, man mas perfect mekem hem faithful long God? Minim kam.

5 Iumi man savve laekem nomoa olketa barava gud samting and iumi tinghae long olketa samting hia. Tingim diswan. Wanfala man hem go long stoa and hem lukim wanfala naes kerosene lamp, batawea taem hem lukluk gud long hem, hem no garem eni wik. Man hem wiki nao and hem putim bak datfala lamp. Or tingim wanfala woman wea wakabaot long saed sea and hem lukluk for olketa sela. From staka difren kaen sela hem stap and evriwan luk naes, hem pikim wanfala sela, lukluk long hem, then hem gogo moa and pikim nara sela moa. Wanem kaen sela nao bae hem keepim? Olketa gudfala sela wea no brek. God hem olsem tu, hem lukluk for pipol wea worshipim hem witim full heart bilong olketa.​—2 Chron. 16:9.

6 Waswe, man mas perfect mekem hem faithful long God? Nomoa. From iumi evriwan sin and no perfect, maet iumi tingse iumi lelebet olsem datfala kerosene lamp wea no garem wik and olsem sela wea brek. Waswe, samfala taem iu garem tingting olsem? No wari long datwan. Jehovah no sei for iumi mas perfect. Hem no askem iumi for duim samting wea iumi no fit for duim.a (Ps. 103:14; Jas. 3:2) Nomata olsem, hem laekem iumi for faithful long hem. So waswe, wei for faithful hem difren from wei for perfect? Ia. Tingim diswan. Wanfala boy laekem tumas gele wea bae hem maritim. Boy hia no tingse gele mas perfect. Bat hem laekem nomoa gele hia for lovem hem witim full heart bilong hem. Jehovah hem olsem tu. Hem “God wea laekem iumi for worshipim hem nomoa.” (Ex. 20:5) Hem no sei iumi mas perfect, bat hem laekem iumi for lovem hem witim full heart bilong iumi and for worshipim hem nomoa.

7, 8. (a) Long wanem wei nao Jesus hem faithful long God? (b) Wanem nao mining bilong datfala word “faithful” long Bible?

7 Maet iumi tingim ansa wea Jesus talem long wanfala man wea askem hem wanem law nao winim olketa nara law. (Readim Mark 12:28-​30.) Jesus no talem ansa nomoa, bat hem duim tu wanem hem talem. Hem nao showim nambawan wei for lovem Jehovah witim full heart, full soul, full strong, and evri savve bilong hem. Jesus showimaot hem faithful long God, no long samting wea hem talem nomoa, bat long samting wea hem duim tu. So sapos iumi laek faithful long God, iumi mas followim wei bilong Jesus.​—1 Pet. 2:​21.

8 So mining bilong datfala word “faithful” long Bible hem olsem: Man worshipim Jehovah God witim full heart bilong hem and hem duim nomoa wanem Jehovah laekem and wea fitim plan bilong hem. Diswan minim nomata wanem samting iumi duim evriday, iumi bae trae hard for mekem Jehovah God hapi. Iumi bae garem sem tingting olsem Jehovah long olketa samting wea important. Distaem iumi bae storyim thrifala samting wea showimaot why nao iumi mas faithful long God.

1. Faithful Fasin Bilong Iumi and Kwestin Abaotem Hu Nao Fit for Rul

9. Wanem nao bae showimaot iumi laekem Jehovah for rulim iumi?

9 Nomata sapos iumi faithful long Jehovah or nomoa, Hem fit for rul. Hem rul long stretfala wei, hem rul for olowe, and hem fit for rulim full universe. Nomata wanem eni man or eni angel talem or duim, no eni samting savve stopem hem for gohed rul. Nomata olsem, samfala long heven and long earth sei God nating fit for rul. Dastawe evriwan hia mas luksavve hao Jehovah nao fit for rul and hem savve rulim olketa long stretfala wei. Iumi olketa Witness bilong Jehovah laek storyim long pipol hao God nomoa fit for rul. Bat taem iumi disaedem eni samting or duim eni samting, wanem nao bae showimaot iumi laekem Jehovah for rulim iumi? Hem nao sapos iumi faithful long hem.

10. Wanem nao Satan talem abaotem olketa man? Wanem nao bae iu laek tumas for showimaot?

10 Ting raonem why nao iu mas faithful long God. Long tingting bilong Satan, no eni man bae laekem God for rulim iumi. Hem tingse olketa man worshipim Jehovah from olketa laek kasem samting for olketa seleva nomoa. Staka angel herehere kam taem Satan tok olsem long Jehovah: “Man bae givim evri samting wea hem garem for sevem laef bilong hem.” (Job 2:4) Nomata Satan talem datfala nogud toktok abaotem gudfala man Job, datfala toktok hem minim for evri man tu. Dastawe Bible talem hao Satan hem “tok againstim olketa brata bilong iumi.” (Rev. 12:10) Hem tok spoelem Jehovah and talem hao no eni Christian, and iu tu, bae no faithful long God. Taem laef bilong iu stap long danger, Satan hem sei iu bae lusim Jehovah nao. Hao nao tingting bilong iu long samting wea Satan talem? Bae iu laek tumas for showimaot long laef bilong iu hao samting wea Satan talem hem nating tru nomoa! Taem iu faithful long God, datwan nao showimaot Satan hem laea.

11, 12. (a) Wanem nao samfala story wea showimaot iumi savve faithful long God evriday? (b) Why nao hem nambawan samting for faithful long God?

11 From iu luksavve why nao iu mas faithful, hem important for tingim wei bilong iu and samting wea iu disaedem evriday. Tingim moa thrifala story wea stap long paragraf wan. Wanem nao datfala boy, hasband, and sista mas duim for gohed faithful long Jehovah? Taem olketa skul pikinini tok spoelem datfala boy and mekfani long hem, hem laek tumas for kros go bak long olketa, bat hem tingim disfala toktok: “Olketa fren bilong mi, iufala no pei bak, bat letem God nao showimaot kros bilong hem, bikos Olketa Holy Raeting talem finis: ‘Mi nao bae pei bak, Jehovah hem talem.’ ” (Rom. 12:19) Boy hia go nomoa from olketa. Datfala hasband wea lukluk long Internet long computer savve lukluk long olketa rabis piksa sapos hem laekem, bat hem tingim disfala toktok bilong Job: “Mi mekem wanfala strongfala promis finis for no lukluk strong long eni gele and no tingting for durong witim hem!” (Job 31:1) Datfala hasband hem les for lukim olketa rabis piksa bikos hem tingim datwan hem olsem poison. Datfala sista wea story witim olketa nara sista hem no story nogud bikos hem tingim disfala toktok: “Evriwan long iumi mas helpem nara man and mas duim gudfala samting long hem wea bae strongim hem.” (Rom. 15:2) Sapos sista hia story long nara man abaotem nogud samting wea olketa sista hia talem, datwan bae no strongim man wea herem. Hem bae spoelem tu nem bilong disfala sista wea olketa story abaotem. Jehovah bae no hapi long diswan tu. So disfala sista no talem eni nogud samting, bat hem storyim nara samting.

12 Long thrifala story hia, taem olketa disaedem wanem olketa bae duim, olketa tingim diswan: ‘Jehovah nao rulim mi. Mi bae trae hard for duim samting wea hem hapi long hem.’ Taem iu disaedem wanfala samting, waswe, iu trae hard for duim samting wea Jehovah hapi long hem tu? Sapos iu duim olsem, iu followim nao disfala toktok long Proverbs 27:11: “Son bilong mi, duim samting wea wise, and mekem heart bilong mi hapi, mekem mi savve givim ansa long datwan wea tok daonem mi.” Hem nambawan samting for mekem God hapi! Dastawe hem gud for iumi trae hard for faithful long hem evritaem!

2. Wanem Nao Jehovah Lukluk for Hem Taem Hem Judgem Iumi?

13. Wanem nao Job and David talem wea showimaot taem Jehovah judgem iumi, hem lukluk sapos iumi faithful long hem or nomoa?

13 Taem iumi faithful long Jehovah, datwan showimaot iumi laekem hem nao for rulim iumi. Taem God judgem iumi, hem bae lukluk sapos iumi faithful long hem or nomoa. Job hem luksavve long diswan. (Readim Job 31:6.) Hem savve God judgem evri man long “stretfala wei” taem hem lukluk sapos iumi faithful long Hem or nomoa. David tu talem semkaen samting. Hem sei: “Jehovah, iu nao savve judgem evri pipol. Plis Jehovah, iu judgem mi followim stretfala samting wea mi duim and wei wea mi faithful. . . . Iu nao iu God wea stret tumas and iu luksavve long heart and olketa kidney bilong mi.” (Ps. 7:​8, 9) Iumi savve God fit for luksavve long wanem kaen man nao iumi. Diswan minim hem savve lukluk insaed long tokpiksa “heart and olketa kidney” bilong iumi. Bat iumi mas no forgetim wanem nao hem lukluk for hem. Olsem David hem talem, taem Jehovah judgem iumi, hem lukluk sapos iumi faithful long hem or nomoa.

14. Why nao iumi mas no tingse hem hard for iumi faithful long God from iumi garem sin?

14 Jehovah God hem lukluk long heart bilong staka billion pipol wea stap distaem. (1 Chron. 28:9) Waswe, hem lukim staka pipol gohed faithful long hem? Nating staka nomoa! Nomata olsem, iumi mas no tingse hem hard for iumi faithful long God from iumi garem sin. Iumi fit for trustim Jehovah olsem David and Job tu trustim hem. Iumi savve nomata iumi garem sin, Jehovah bae luksavve sapos iumi faithful long hem. No forgetim hao sapos iumi perfect diswan no minim iumi bae faithful olowe. Thrifala perfect man nao stap long earth bifor, bat tufala long olketa, Adam and Eve, no faithful long God. Nomata olsem, long distaem staka man wea no perfect olketa faithful long God. Iu tu savve faithful long God.

3. Iumi Mas Faithful Mekem Iumi Laef Olowe

15. Wanem nao David duim wea showimaot man mas faithful mekem hem laef olowe?

15 Iumi savve taem Jehovah judgem iumi, hem bae lukluk sapos iumi faithful long hem or nomoa, dastawe sapos iumi laek laef olowe, iumi mas faithful long hem. David hem luksavve long diswan. (Readim Psalm 41:12.) Hem barava tinghae long gud samting wea God bae givim long hem for olowe. David garem hope for laef olowe olsem olketa tru Christian tu. Hem laek gohed fren gud witim Jehovah God. David luksavve sapos hem laek laef olowe, hem mas gohed faithful long God. Jehovah duim gud samting for iumi tu taem iumi faithful long hem. Hem lukaftarem iumi, lanem iumi, leadim iumi, and givim gud samting long iumi.

16, 17. (a) Why nao iu disaed strong for gohed faithful long God? (b) Wanem nao olketa kwestin wea iumi bae storyim long study bihaen?

16 From iumi garem hope for laef olowe, datwan mekem iumi hapi nomata sapos iumi kasem hard taem. Datfala hope for laef olowe savve mekem iumi garem gudfala tingting tu. Bible talem hope bilong iumi hem olsem wanfala strong hat. (1 Thess. 5:8) Strongfala hat wea soldia werem taem hem faet hem protectim hed bilong hem. Hope wea iumi garem hem olsem datfala strongfala hat. Hem protectim tingting bilong iumi for no followim olketa nogud tingting wea rabis world bilong Satan mekhae long hem. Sapos iumi no garem hope for laef olowe, laef bilong iumi hem iusles nomoa. Iumi mas lukluk gud long iumiseleva for savve sapos iumi gohed faithful long God mekem iumi savve laef olowe. No forgetim hao taem iu gohed faithful long God, iu showimaot iu laekem Jehovah nao for rulim iu and iu laek for laef olowe. Hem gud tumas sapos iu gohed faithful long God!

17 From hem important tumas for gohed faithful long God, iumi mas tingim olketa kwestin hia: Wanem nao savve helpem iumi for faithful? Wanem nao iumi mas duim mekem iumi gohed faithful? And sapos man no faithful long God for lelebet taem, wanem nao hem savve duim? Study bihaen diswan bae ansarem olketa kwestin hia.

[Footnote]

a Jesus talem olsem: “Iufala mas perfect, long sem wei wea Dadi bilong iufala long heven hem perfect tu.” (Matt. 5:​48) Jesus luksavve iumi man wea sin savve duim samfala samting long barava gudfala wei. Iumi savve obeyim law wea God talem for lovem pipol and God hem hapi taem iumi duim datwan. Bat Jehovah hem barava perfect long evri samting. Taem Bible sei Jehovah hem “faithful,” hem minim hem perfect tu.​—Ps. 18:30.

Wanem Nao Ansa Bilong Iu?

• Wanem nao hem minim for man faithful?

• Wanem nao bae showimaot iumi laekem Jehovah for rulim iumi?

• Taem iumi faithful long God, wanem hope nao bae iumi garem?

[Piksa long page 5]

Staka samting wea happen evriday savve mekem hem no isi for iumi faithful

    Solomon Islands Pidgin Pablikeson (1988-2024)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem