Wan Tru Christian Religion Hem Really Stap

JESUS CHRIST startim wanfala church nomoa, wanfala kongregeson. Datfala kongregeson hem wanfala spiritual sekson, wanfala spiritual famili. Diswan minim pipol wea hipap tugeta wea holy spirit bilong God chusim olketa and God ting long evriwan long olketa olsem “olketa pikinini” bilong hem.—Romans 8:16, 17; Galatians 3:26.

Jesus teachim hao God iusim wanfala wei nomoa for leadim pipol for kasem truth and laef. For minim klia disfala important tru teaching, Jesus hem sei wei for kasem laef olowe hem olsem wanfala road. Hem sei: “Go insaed long smolfala gate; bikos road wea lead go long dae hem big tumas and waed, and planti pipol nao go insaed long hem; bat gate hem smol and road wea lead go long laef hem no isi, and samfala nomoa faendem.”—Matthew 7:13, 14; John 14:6; Acts 4:11, 12.

Wanfala Kongregeson wea Wan Mind

The New Dictionary of Theology hem sei iumi shud no tingse first-century kongregeson hem “wanfala organization wea kasem evriwea long world olsem wei wea iumi distaem tingim catholic church.” Why nao iumi shud no duim datwan? Hem sei: “From wanfala simpol reason, no eni organization olsem, wea kasem evriwea long world, hem stap long datfala taem.”

No eniwan fit for againstim datfala tingting hao olketa first Christian kongregeson barava nating semsem witim olketa church organization distaem. Bat datfala first kongregeson hem organize. Olketa kongregeson wanwan nating duim samting seleva. Evriwan luksavve long position bilong governing body long Jerusalem. Datfala sekson—wea insaed hem olketa aposol and olketa older man bilong Jerusalem kongregeson—help for keepim wei for wan mind midolwan long olketa kongregeson wea hem nao datfala “wanfala body” bilong Christ.—Ephesians 4:4, 11-16; Acts 15:22-31; 16:4, 5.

Wanem nao happen long datfala wanfala tru kongregeson? Waswe, hem nao kamap disfala maeti Catholic Church? Waswe, gogo hem nao kamap evri Protestant church bilong distaem wea divaed? Or waswe, difren samting nao happen?

“Wheat” and “Rabis Grass”

For faendem ansa, iumi bae ting raonem wanem Jesus Christ talem bae happen. Maet iu sapraes for savve hao Jesus expectim kongregeson bilong hem for lus and hao hem letem disfala sorre samting go ahed for planti handred year.

Jesus markem kongregeson bilong hem witim “kingdom bilong heven,” taem hem sei: “Kingdom bilong heven hem kamap olsem wanfala man wea plantim gudfala seed insaed long field bilong hem. Taem olketa man sleep, enemy bilong hem kam and plantim rabis grass midolwan long wheat, and then hem go. Taem seed hem grow and garem frut, then rabis grass showaot tu. So olketa slave bilong man wea ownim haos kam and sei long hem, ‘Masta, waswe, iu no plantim nomoa gudfala seed long field bilong iu? So, hao nao hem garem rabis grass tu?’ Hem sei long olketa, ‘Wanfala enemy, wanfala man, duim diswan.’ Olketa sei long hem, ‘So waswe, iu laekem mifala for go aot and hipimap olketa?’ Hem sei, ‘Nomoa; nogud taem iufala hipimap rabis grass, maet iufala tek aotem wheat tu. Letem tufala evriwan grow tugeta go kasem taem bilong harvest; and long taem bilong harvest bae mi talem olketa wea duim harvest, Firstaem hipimap rabis grass and taemap long olketa bandol for bonem, then hipimap wheat insaed long stoahaos bilong mi.’”—Matthew 13:24-30.

Jesus explainim hao hem nao ‘man wea plant.’ Datfala “gudfala seed” hem piksarem olketa trufala disaepol bilong hem. “Enemy” bilong hem nao Devil Satan. “Rabis grass” hem nao olketa laea Christian wea gogo kam insaed long first Christian kongregeson. Hem sei hem bae letem “wheat” and “rabis grass” grow tugeta go kasem taem bilong “harvest,” wea bae kamap long “taem bilong end bilong wanfala system.” (Matthew 13:37-43) Wanem nao evriting hia minim?

Christian Kongregeson Kamap Nogud

No longtaem bihaen dae bilong olketa aposol, olketa apostate teacher insaed long kongregeson start for tekova. Olketa talem “olketa giaman samting for pullim olketa disaepol for followim olketa seleva.” (Acts 20:29, 30) From diswan, planti Christian “lusim faith.” Olketa “lisin long olketa giaman story.”—1 Timothy 4:1-3; 2 Timothy 4:3, 4.

The New Dictionary of Theology hem sei long mek-foa century C.E., “Catholic Christian religion hem kamap main . . . religion bilong Rul Bilong Rome.” Olketa “joinim tugeta church and community”—wei for joinim Church and Gavman hia hem samting wea barava againstim wanem olketa first Christian bilivim. (John 17:16; James 4:4) Datfala sem buk hem sei hao gogo, evri part long datfala church, and planti long olketa main teaching bilong hem, barava change “from wei wea olketa mixim olketa teaching bilong O[ld] T[estament] and teaching bilong Plato and samfala nara teaching.” Olsem Jesus Christ talem finis, olketa tru disaepol bilong hem no showaot klia from olketa giaman Christian nao kamap staka.

Olketa wea lisin long Jesus savve hao hem hard tumas for luksavve long trufala wheat midolwan rabis grass, olsem datfala grass wea olketa kolem bearded darnel wea hem poison, wea long season for olketa plant grow hem barava luk olsem wheat. So Jesus showimaot hao for lelebet taem, bae hem hard for luksavve long olketa tru Christian and olketa giaman Christian. Bat diswan hem no minim Christian kongregeson hem finis evribit, from Jesus promis for go ahed for leadim olketa spiritual brata bilong hem “evriday go kasem end bilong disfala system.” (Matthew 28:20) Jesus sei wheat bae go ahed for grow. And tru nao, insaed olketa handred year wea go pas, olketa tru Christian—olketa man wanwan or maet olketa grup—olketa barava trae for duim best for followim olketa teaching bilong Christ. Bat olketa no wanfala sekson, or organization wea showaot klia. Olketa barava nating olsem olketa apostate religion wea iumi lukim long history wea mekem nem bilong Jesus Christ kasem shame.—2 Peter 2:1, 2.

“Man for Brekem Law Hem Showaot”

Aposol Paul talemaot wanfala nara mark bilong olketa giaman religion. Hem raet olsem: “No letem eniwan switim iufala long eni wei, bikos [day bilong Jehovah] bae no kam sapos wei for apostate no kam firstaem and man for brekem law hem showaot.” (2 Thessalonians 2:2-4) Disfala “man for brekem law” hem nao olketa bigman bilong church wea apim olketa seleva for kasem position for rul ovarem datfala “Christian” kongregeson.a

Apostate fasin hem start long taem bilong aposol Paul. Bihaen olketa aposol dae and olketa no stap for kontrolem kaen fasin olsem hem kamap big kwiktaem nomoa. Paul hem sei diswan bae showaot thru long “waka bilong Satan witim olketa strongfala waka and olketa giaman saen and warning and witim evri laea wei wea no raeteous.” (2 Thessalonians 2:6-12) Datwan hem barava talem stret waka bilong planti leader bilong religion kam kasem distaem!

For saportim wei wea olketa sei Roman Catholic nomoa hem tru church, olketa Catholic leader sei olketa bishop “kasem appointment olsem olketa aposol from olketa firstfala aposol thru long wanfala laen wea go bak kasem start bilong Christian Wei.” Really, disfala wei wea olketa sei olketa kam from laen bilong olketa aposol hem no garem eni faondeson long history or long Bible. No eni pruv stap for showimaot hao bihaen olketa aposol dae holy spirit bilong God nao leadim olketa church wea kamap bihaen.—Romans 8:9; Galatians 5:19-21.

And waswe long olketa nara church wea kamap bihaen datfala samting wea olketa kolem Reformation? Waswe, olketa followim hao first Christian kongregeson duim samting? Waswe, olketa mekem olketa kamap klin olsem first Christian kongregeson? Hem tru hao bihaen datfala Reformation, olketa man nating tu fit for kasem Bible long languis bilong olketa. Bat, history showimaot hao olketa church hia go ahed for teachim olketa teaching wea no stret.b—Matthew 15:7-9.

Bat tingim diswan. Jesus Christ talemaot klia finis hao datfala wanfala tru kongregeson bilong hem bae kamap moa long taem wea hem kolem end bilong wanfala system. (Matthew 13:30, 39) Wei wea Bible profesi hem fulfill hem showimaot hao iumi distaem stap insaed datfala taem. (Matthew 24:3-35) From datwan hem tru, each wan long iumi need for askem iumiseleva, ‘Wea nao datfala wanfala tru church?’ Datfala church hem shud showaot moa and moa klia distaem.

Maet iu ting iu faendem finis datfala church, wea minim tu kongregeson. Hem important for iu mek sure. Why nao olsem? Bikos olsem long first century, only wanfala tru church nomoa stap. Waswe, iu enitaem lukluk gud long church bilong iu for mek sure sapos hem followim first-century Christian kongregeson and hem loyal for followim olketa teaching bilong Jesus Christ? Waswe sapos iu lukluk gud moa long church bilong iu? Olketa Jehovah’s Witness bae hapi for helpem iu for duim datwan.—Acts 17:11.

[Olketa Footnote]

[Olketa Piksa long page 5]

Wanem nao tokpiksa bilong Jesus abaotem wheat and rabis grass hem teachim iumi abaotem tru kongregeson?

[Olketa Piksa long page 7]

Waswe, church bilong iu followim example bilong olketa Christian long first century saed long wei for preach and study?