Waswe, Evritaem Iu Laek Duim Wanem Iuseleva Laekem Nomoa?
TUFALA pikinini pleiplei tugeta. Gogo wanfala long olketa tekem toy bilong narawan and singaot big, “Hem bilong mi ia!” Nomata from taem iumi smol nomoa, iumi man savve tingim iumiseleva nomoa. (Gen. 8:21; Rom. 3:23) Staka pipol long world distaem tu tingim olketa seleva nomoa. Dastawe iumi mas waka hard for no garem wei olsem. Sapos nomoa, hem isi tumas for duim olketa samting wea mekem olketa narawan stambol and wea spoelem wei wea iumiseleva fren gud witim Jehovah.—Rom. 7:21-23.
Aposol Paul talem iumi for tingim olketa narawan taem iumi duim samting. Hem sei: “Evri samting hem stret nomoa, bat no evri samting helpem iumi evriwan. Evri samting hem stret nomoa, bat no evri samting savve strongim iumi evriwan.” Paul sei tu: ‘No duim eni samting wea mekem olketa narawan stambol.’ (1 Cor. 10:23, 32) So taem iumi disaedem samting, hem gud for tingim diswan: ‘Waswe, mi hapi for no duim wanem miseleva laekem mekem no eni samting spoelem peace insaed long kongregeson? Waswe, mi hapi for followim olketa toktok long Bible nomata sapos hem no isi for duim datwan?’
Waka wea Iumi Chusim
Staka pipol tingse waka wea iumi chus for duim for kasem selen bae no spoelem tingting bilong narawan. Bat tingim samting wea happen long wanfala bisnisman wea stap long wanfala smol taon long South America. Pipol long taon savve disfala man hem savve drunk olowe and gambol. Bat man hia study witim Olketa Jehovah’s Witness, gogo hem changem olketa nogud wei bilong hem. (2 Cor. 7:1) Taem hem laek for kamap pablisa long kongregeson, wanfala elder askem hem long kaenfala wei for tingim waka wea hem duim for kasem selen. For staka year finis, pipol long taon kam long datfala man nao for baem strongfala cane alcohol. Pipol savve iusim disfala alcohol for staka samting, bat long datfala taon, pipol mixim diswan witim olketa soft drink and olketa drinkim alcohol hia bikos olketa laek drunk.
Man hia luksavve hao sapos hem joinim preaching waka bat hem gohed salem disfala alcohol, bae pipol tok spoelem kongregeson and datwan savve spoelem wei wea hem fren gud witim God. Nomata hem garem big famili for lukaftarem, hem lusim waka bilong hem for salem alcohol. Distaem hem salem olketa nara samting for kasem selen for famili. Hem garem faevfala pikinini and distaem hem witim waef bilong hem and tufala dota bilong hem, olketa baptaes. Olketa gohed strong for preachim gud nius and no eniwan tok spoelem olketa.
Pipol wea Iumi Chus for Fren Witim
Sapos man laek fren witim olketa wea no Witness, waswe, datwan hem samting wea iumi wanwan disaedem, or waswe, iumi mas followim samfala toktok long Bible? Tingim diswan. Wanfala sista hem laek go long party witim wanfala young man wea hem no Witness. Nomata samfala talem hem datwan hem nogud samting for duim, disfala sista sei hemseleva savve disaed for go. So hem go nao long party. Bat taem hem go long datfala party, samwan givim hem wanfala drink wea olketa putim wanfala strong drug insaed drink hia for mekem hem sleep. Samfala hour bihaen, hem wekap, and hem luksavve hao disfala young man rapem hem finis.—Markem witim Genesis 34:2.
Maet nogud samting olsem no happen long iumi sapos iumi fren witim olketa wea no Witness. Nomata olsem, Bible hem sei: “Man wea fren witim pipol wea wise bae hem wise, bat man wea fren witim pipol wea krangge bae hem kasem trabol.” (Prov. 13:20) Iumi barava savve hao sapos iumi fren witim nogud pipol, bae iumi kasem nogud samting bihaen! Proverbs 22:3 hem sei: “Man wea garem savve hem lukim trabol and hem protectim hemseleva. Bat man wea no garem savve hem go nomoa and hem kasem problem.” Pipol wea iumi fren witim savve helpem iumi or spoelem iumi. Olketa savve helpem iumi fren gud witim God or spoelem datwan.—1 Cor. 15:33; Jas. 4:4.
Kaleko and Lukluk Bilong Iumi
Stael bilong kaleko savve change olowe. Bat olketa Bible principle abaotem kaleko and lukluk bilong iumi no savve change. Paul strongim olketa Christian sista for “werem kaleko wea showimaot respect and wea no ova tumas.” Datfala principle hem fitim olketa brata tu. (1 Tim. 2:9) Paul no talem for iumi mas werem kaleko wea nating stael nomoa or for evri Christian mas werem semkaen kaleko. Bat hem sei for iumi mas werem kaleko wea showimaot respect and wea no ova tumas.
Hem gud for iumi tingim diswan: ‘Sapos mi werem kaleko for mekem pipol luk kam long mi nomoa, waswe, datwan showimaot mi hambol? Waswe, kaleko wea mi werem mekem pipol garem rong tingting abaotem wanem kaen man nao mi or wei bilong mi?’ Sapos iumi no laek “duim eni samting wea mekem olketa narawan stambol,” iumi mas “no tingim nomoa samting wea [iumiseleva] laekem, bat [iumi] mas tingim tu samting wea olketa narawan laekem.”—2 Cor. 6:3; Phil. 2:4.
Taem Iumi Duim Bisnis
Taem olketa bigfala problem kamap long kongregeson long Corinth bikos samfala duim bisnis wea no stret and no honest, Paul hem sei: “Hem gud sapos iufala letem nomoa nara man for spoelem iufala. Hem gud sapos iufala letem nomoa nara man for tekem samting bilong iufala.” Paul talem olketa Christian hem gud sapos olketa willing for lusim samting winim wei for tekem wanfala brata long kot. (1 Cor. 6:1-7) Wanfala brata long America barava ting strong long disfala kaonsel wea Paul givim. Hem waka for wanfala brata, bat tufala no agree abaotem pei wea hem shud kasem. Tufala followim advaes long Bible for story tugeta. Tufala story tugeta staka taem bat tufala no savve stretem datfala problem. Gogo tufala go story nao long olketa elder long “kongregeson.”—Matt. 18:15-17.
Bat sorre nao, olketa no stretem datfala problem. Datfala brata wea waka for nara brata hem prea evritaem long Jehovah. Gogo hem disaed for no warim nao datfala selen wea brata bilong hem shud givim long hem. Why nao hem disaed olsem? Hem sei: “Disfala problem bilong mitufala mekem mi no hapi and hem mekem mi weistim taem bilong mi wea mi savve iusim for duim olketa Christian waka.” Bihaen datwan, brata hia hapi moa and hem luksavve Jehovah blessim wanem hem duim for Jehovah.
Nomata Long Olketa Smol Samting
Sapos iumi tingim narawan firstaem, iumi bae kasem gud samting nomata sapos samting wea iumi duim hem smol samting nomoa. Tingim diswan. Long firstfala day bilong wanfala distrik convention, wanfala hasband and waef wea pioneer kam early long convention mekem olketa savve sidaon long ples wea olketa laekem. Bat taem program hem start, wanfala big famili kam lukaotem ples for sidaon. Tufala pioneer hia lukim hao datfala famili lukaotem ples for evriwan savve sidaon tugeta. So disfala hasband and waef go sidaon long nara ples mekem famili hia savve sidaon tugeta. Tu-thri day bihaen convention, datfala hasband and waef kasem leta from datfala famili for sei thankiu. Famili talem long leta hao olketa barava feel wikdaon bikos olketa kam taem program hem start finis. Bat from disfala hasband and waef kaen tumas long olketa, olketa barava hapi tumas.
Sapos chance kamap, hem gud for iumi tu tingim olketa narawan firstaem. Taem iumi showimaot love and ‘no tingim iumiseleva nomoa,’ iumi bae stap gud witim olketa long kongregeson and olketa neiba bilong iumi. (1 Cor. 13:5) Bat important samting nao, hem mekem iumi gohed fren gud witim Jehovah.
[Piksa long page 20]
Waswe, iu chusim kaleko followim tingting bilong iuseleva nomoa?
[Piksa long page 21]
Waswe, iu hapi for muv mekem narawan savve sidaon?