“Olketa Nambawan Samting Bilong God” Nao Muvim Iumi

“Iumi herem olketa toktok long languis bilong iumi abaotem olketa nambawan samting bilong God.”—ACTS 2:11.

1, 2. Wanem spesol samting happen long Jerusalem long Pentecost 33 C.E.?

WAN morning long end bilong spring season long year 33 C.E., wanfala spesol samting hem happen long wanfala grup bilong olketa man and woman, olketa disaepol bilong Jesus Christ wea hipap long wanfala haos long Jerusalem. “Seknomoa wanfala noise olsem bigfala wind wea blow strong kamaot from heven, and hem fulimap full haos wea olketa sidaon insaed. And olketa lukim samting wea luk olsem fire . . . , and olketa fulap witim holy spirit and start for toktok long olketa difren languis.”—Acts 2:2-4, 15.

² Bigfala crowd hipap front long datfala haos. Samfala nao olketa Jew, “olketa holy man” from difren ples wea kam long Jerusalem for celebratem festival bilong Pentecost. Olketa barava sapraes bikos each wan long olketa herem olketa disaepol story long languis bilong olketa seleva “abaotem olketa nambawan samting bilong God.” Hao nao hem olsem from evriwan wea story, olketa kam from Galilee?—Acts 2:5-8, 11.

3. Wanem nao message wea aposol Peter talem long datfala crowd long Pentecost?

³ Wanfala long olketa hia from Galilee hem aposol Peter. Hem explainim hao tu-thri week bifor, olketa man wea no raeteous killim dae Jesus Christ. Bat, God resurrectim Son bilong hem. Bihaen, planti disaepol witim Peter and samfala narawan wea stap long there lukim Jesus. Tenfala day bifor, Jesus go ap long heven. Hem nao wan wea pourimaot datfala holy spirit long olketa disaepol bilong hem. Waswe, diswan hem important for olketa hia wea celebratem Pentecost? Barava nao. Dae bilong Jesus redyim wei for olketa kasem forgiveness for sin bilong olketa and for kasem “free present bilong holy spirit” sapos olketa showimaot faith long hem. (Acts 2:22-24, 32, 33, 38) So hao nao “olketa nambawan samting bilong God” wea olketa herem affectim olketa? And hao nao diswan savve helpem iumi for ting raonem service bilong iumi long Jehovah?

Muvim Olketa for Duim Samting!

4. Wanem profesi bilong Joel nao fulfill long day bilong Pentecost 33 C.E.?

⁴ Bihaen olketa kasem holy spirit, stretawe olketa disaepol long Jerusalem start for sharem gud nius bilong salvation witim nara pipol, olketa first wan nao, crowd wea hipap long datfala morning. Preaching bilong olketa hem fulfillim wanfala spesol profesi wea Joel, son bilong Pethuel, raetem eit handred year bifor: “Mi bae pourimaot spirit bilong mi long evri difren kaen pipol, and olketa son bilong iufala and olketa dota bilong iufala bae talemaot profesi. And olketa olo man bilong iufala bae garem olketa dream. And olketa young man bilong iufala bae lukim olketa vision. And mi bae pourimaot spirit bilong mi tu long olketa man servant and girl servant long datfala taem . . . bifor bigfala day bilong Jehovah wea fit for mekem man fraet hem kam.”—Joel 1:1; 2:28, 29, 31; Acts 2:17, 18, 20.

5. Long wanem wei nao olketa Christian long first-century profesi? (Lukim footnote.)

⁵ Waswe, diswan minim God bae mekem kamap wanfala full genereson bilong olketa profet, olketa man and woman, wea olsem David, Joel, and Deborah, and iusim olketa for talemaot samting wea bae kamap long future? Nomoa. Wei wea olketa Christian ‘son and dota, olketa man servant and girl servant’ bae profesi hem minim spirit bilong Jehovah bae muvim olketa for talemaot “olketa nambawan samting” wea Jehovah duim finis and bae duim. So, olketa bae serve olsem olketa wea toktok for Most Hae.a Bat, hao nao diswan affectim datfala crowd?—Hebrews 1:1, 2.

6. Tok bilong Peter muvim planti long datfala crowd for duim wanem?

⁶ Bihaen Peter explainim finis mining bilong samting wea happen, datwan muvim planti long datfala crowd for duim samting. Olketa “acceptim word bilong hem witim full heart” and “baptaes, and long datfala day samting olsem thri thousand soul join insaed.” (Acts 2:41) From olketa nao olketa really Jew and Jew proselyte, olketa lelebet savve finis long olketa Scripture. Datfala savve witim faith bilong olketa long samting wea olketa lanem from Peter, hem kamap faondeson for olketa baptaes “long nem bilong Father and bilong Son and bilong holy spirit.” (Matthew 28:19) Bihaen olketa baptaes finis “olketa go ahed for followim teaching bilong olketa aposol.” Long semtaem, olketa start for sharem niufala faith bilong olketa witim nara pipol. Tru nao, “evriday olketa go ahed for stap long temple witim wan mind, . . . praisem God and olketa pipol go ahed for tinghae long olketa.” From disfala witnessing waka, “Jehovah hem go ahed for joinim witim olketa evri day olketa wea sev.” (Acts 2:42, 46, 47) Kwiktaem olketa Christian kongregeson kamap long olketa kantri bilong olketa niu wan hia. For sure, preaching bilong “gud nius” wea olketa strong for duim taem olketa go bak long hom hem help for mekem disfala increase kamap.—Colossians 1:23.

Word Bilong God Garem Paoa

7. (a) Wanem nao pullim pipol from evri nation long organization bilong Jehovah distaem? (b) Wanem increase nao iu ting maet kamap raonem world and long ples bilong iu long future? (Lukim footnote.)

⁷ Waswe long olketa wea laek for kamap olketa servant bilong God distaem? Olketa tu need for studyim gud Word bilong God. Taem olketa duim olsem, olketa start for savve long Jehovah olsem God wea “garem mercy and kaenfala fasin, slow for kros and wea fulap witim loving-kaeness and truth.” (Exodus 34:6; Acts 13:48) Olketa lane abaotem kaenfala samting wea Jehovah duim for provaedem ransom thru long Jesus Christ, wea blood wea hem pourimaot savve klinim olketa from olketa sin. (1 John 1:7) Olketa hapi tu for savve long purpose bilong God for ‘wanfala resurrection for olketa wea raeteous and wea no raeteous.’ (Acts 24:15) Love for Man wea Givim “olketa nambawan samting” hia muvim heart bilong olketa for preach abaotem olketa truth hia. Then olketa kamap olketa servant bilong God wea dedicate and baptaes and go ahed for “grow long stretfala savve bilong God.”b—Colossians 1:10b; 2 Corinthians 5:14.

8-10. (a) Hao nao experience bilong wanfala Christian woman pruvim Word bilong God “garem paoa”? (b) Wanem nao disfala experience teachim iu abaotem Jehovah and wei wea hem deal witim olketa servant bilong hem? (Exodus 4:12)

⁸ Savve wea olketa servant bilong God kasem taem olketa studyim Bible hem deep. Disfala savve hem muvim heart bilong olketa, changem wei for tingting, and hem kamap part bilong olketa. (Hebrews 4:12) Olsem example, wanfala woman wea nem bilong hem Camille, hem duim waka for lukaftarem olketa wea olo. Wanfala woman wea hem lukaftarem hem Martha, wanfala Jehovah’s Witness. From Martha garem bigfala sik long mind, hem needim samwan for lukaftarem hem full day and naet. Hem needim samwan for remindim hem for kaikai—and for swallowim datfala kaikai tu. Bat, bae iumi faendaot hao Martha barava nating forgetim wanfala samting.

⁹ Wanday, Martha lukim Camille hem krae from hem wari tumas abaotem samfala problem wea hem kasem. Martha holem Camille and invaetem hem for studyim Bible witim hem. Bat waswe, woman wea sik olsem Martha savve conductim wanfala Bible study? Yes, hem savve duim! Nomata Martha forgetim staka samting, hem nating forgetim nambawan God bilong hem and olketa truth wea hem lanem from Bible. Taem tufala study, Martha askem Camille for readim each paragraf, readim olketa Scripture insaed Bible, readim kwestin long botom long page, and then ansarem datwan. Tufala duim diswan for lelebet longtaem, and nomata Martha garem sik, Camille kasem savve bilong Bible. Martha hem luksavve hao Camille need for kaban witim nara pipol wea laek servem God. So hem givim shoe and wanfala dress long student bilong hem, mekem Camille garem kaleko wea fitim taem hem attendim first meeting bilong hem long Kingdom Hall.

¹⁰ Loving interest, example, and strong biliv bilong Martha hem muvim Camille. Hem luksavve hao samting wea Martha trae teachim hem from Bible hem barava important bikos Martha hem klosap forgetim evriting, bat no samting wea hem lanem from olketa Scripture. Bihaen, taem Camille go for waka long difren ples, hem luksavve hem mas duim samting. First chance wea hem kasem, hem werem datfala dress and shoe wea Martha givim for hem and hem go long Kingdom Hall and ask for wanfala Bible study. Camille barava muv ahed gud and hem baptaes.

Kasem Strong for Showimaot Olketa Standard Bilong Jehovah

11. Witim wei for strong long preaching waka, hao nao iumi savve showimaot Kingdom message hem muvim iumi?

¹¹ Distaem, winim six million Witness bilong Jehovah olsem Martha and Camille, preachim “gud nius bilong kingdom” evriwea long world. (Matthew 24:14; 28:19, 20) Olsem olketa Christian long first-century, “olketa nambawan samting bilong God” barava muvim olketa. Olketa hapi long privilege for karem nem bilong Jehovah and from hem pourimaot spirit bilong hem long olketa. From diswan, olketa trae hard for “wakabaot fitim Jehovah witim goal for mekem hem hapi evribit,” followim olketa standard bilong hem long evri part long living bilong olketa. Insaed diswan, hem respect for olketa standard bilong God saed long kaleko and lukluk.—Colossians 1:10a; Titus 2:10.

12. Wanem kaonsel saed long kaleko and lukluk hem stap long 1 Timothy 2:9, 10?

¹² Tru nao, Jehovah markem olketa standard saed long lukluk bilong iumi. Aposol Paul storyim samfala mark bilong God saed long diswan. “Mi wantem olketa woman for garem gudfala wei for werem kaleko, witim fasin wea showimaot respect and stretfala tingting, no long wei for staelem hair and gold or pearl and samting wea kostim tumas selen, bat long wei wea fitim olketa woman wea sei olketa honorim God, hem nao thru long olketa gudfala waka.”c Wanem nao iumi savve lanem from disfala toktok?—1 Timothy 2:9, 10.

13. (a) Wanem nao hem minim for garem “gudfala wei for werem kaleko”? (b) Why nao iumi savve sei olketa standard bilong Jehovah olketa no hard tumas for followim?

¹³ Toktok bilong Paul showim hao olketa Christian mas “garem gudfala wei for werem kaleko.” Lukluk bilong olketa mas klin and luk gud. Evriwan, nomata olketa wea poor, savve followim olketa standard olsem long wei for mek sure kaleko bilong olketa hem klin, stret, and luk fitim. Olsem example, evri year olketa Witness long wanfala kantri long South America wakabaot for planti kilometer thru long bush and then planti hour long kanu for attendim distrik convention bilong olketa. Long datfala gogo, planti taem samwan foldaon insaed river or kaleko bilong hem pas long tree and brek. So taem olketa arrive long area bilong convention, lukluk bilong olketa hem lelebet olabaot. So olketa spendem taem for sewim bak olketa button, fixim olketa zip, and wasim and ironim kaleko wea olketa bae werem long convention. Olketa barava tinghae long invitation for kaikai long tebol bilong Jehovah, and want for werem kaleko wea fitim.

14. (a) Wanem nao hem minim for werem kaleko wea “showimaot respect and stretfala tingting”? (b) Wanem nao insaed wei for werem kaleko ‘olsem pipol wea sei olketa honorim God’?

¹⁴ Paul talem tu hao iumi shud werem kaleko “wea showimaot respect and stretfala tingting.” Diswan minim lukluk bilong iumi shud no olsem man wea show-off, ova tumas, mekem pipol garem dirty tingting, showimaot body, or stael tumas. And tu, iumi shud werem kaleko long wei wea showimaot iumi ‘honorim God.’ Hem gud for iumi ting raonem datwan. Diswan no minim iumi werem kaleko long wei wea fitim long olketa kongregeson meeting bat long narataem, followim difren standard. Lukluk bilong iumi mas evritaem showimaot respect bikos iumi olketa Christian and minister 24 hour evriday. Hem tru, kaleko wea iumi werem long waka ples or skul mas fitim kaen waka wea iumi bae duim. Nomata olsem, iumi mas werem kaleko long wei wea showimaot respect and honor. Sapos kaleko bilong iumi evritaem showimaot iumi biliv long God, no enitaem bae iumi feel olsem iumi mas hol bak for givim witness from lukluk bilong iumi mekem iumi feel shame.—1 Peter 3:15.

‘No Lovem World’

15, 16. (a) Why nao hem important for iumi no followim world saed long kaleko and lukluk? (1 John 5:19) (b) Wanem nao gudfala reason for iumi no followim olketa stael wea kamap saed long kaleko and lukluk?

¹⁵ Kaonsel long 1 John 2:15, 16 savve helpem iumi tu saed long kaleko and lukluk. Hem sei: “No lovem world or olketa samting insaed long world. Sapos eniwan lovem world, love bilong Father no stap insaed long hem; bikos evriting long world—samting wea body wantem and samting wea eye wantem and wei for show-off witim samting wea man garem—hem no kam from Father, bat hem kam from world.”

¹⁶ Datfala kaonsel hem barava fitim distaem! From distaem, winim enitaem bifor, pipol kasem hevi for followim olketa wea sem age, iumi mas no letem world bossim iumi saed long kaleko and lukluk. Stael bilong kaleko and lukluk hem gogo daon distaem. Nomata kaleko wea bisnis pipol werem hem no evritaem showimaot standard wea fitim for olketa Christian followim. Hem nara reason for iumi evritaem remember hao iumi mas “finis for followim disfala system” sapos iumi laek live followim olketa standard bilong God and “mekem teaching bilong Man Wea Sevem iumi, God, luk gud tumas long evri samting.”—Romans 12:2; Titus 2:10.

17. (a) Wanem nao olketa kwestin wea hem gud for iumi ting raonem taem iumi peim kaleko or chusim wanfala stael? (b) Why nao olketa famili hed mas interest long lukluk bilong each famili member?

¹⁷ Bifor iu disaed for peim wanfala kaleko, hem gud for askem iuseleva: ‘Why nao mi laekem diswan? Waswe, wanfala bigman bilong hapitaem werem kaleko olsem—samwan wea mi tinghae long hem? Waswe, hem stael bilong olketa member bilong wanfala street gang, or grup wea encouragem independent, bighed spirit?’ Iumi shud lukluk gud long datfala kaleko tu. Sapos hem wanfala dress or skirt, waswe, hem short tumas? Waswe sheip? Waswe, datfala kaleko hem fitim, showimaot respect and no ova tumas, or hem taet, mekem pipol garem dirty tingting, or luk nogud? Askem iuseleva, ‘Sapos mi werem disfala kaleko, bae hem mekem man stambol?’ (2 Corinthians 6:3, 4) Why nao iumi shud ting strong long datwan? Bikos Bible hem sei: “Christ tu no mekem hemseleva hapi.” (Romans 15:3) Olketa Christian famili hed mas lukluk gud long lukluk bilong olketa famili member. For showimaot respect long nambawan God wea olketa worshipim, olketa famili hed mas no hol bak for givim kaonsel wea strong bat loving taem need hem kamap.—James 3:13.

18. Wanem nao muvim iu for lukluk gud long kaleko and lukluk bilong iu?

¹⁸ Message wea iumi talemaot hem kam from Jehovah, nambawan example bilong honor and holy fasin. (Isaiah 6:3) Bible encouragem iumi for followim hem “olsem olketa pikinini wea hem lovem.” (Ephesians 5:1) Kaleko and lukluk bilong iumi savve mekem pipol tinghae or ting daonem Father bilong iumi long heven. For sure, iumi want for mekem heart bilong hem hapi!—Proverbs 27:11.

19. Olketa wanem gud samting nao iumi kasem from iumi talemaot “olketa nambawan samting bilong God” long nara pipol?

¹⁹ Hao nao iu feel abaotem “olketa nambawan samting bilong God” wea iu lanem? Iumi shud barava thankiu from iumi lanem truth! From iumi showimaot faith long blood wea Jesus Christ givim, iumi kasem forgiveness for olketa sin bilong iumi. (Acts 2:38) From diswan, iumi free for story long God. Iumi no fraetem dae olsem pipol wea no garem hope. Bat iumi kasem promis from Jesus hao wanday “evriwan wea stap long olketa memory grev bae herem voice bilong hem and kamaot.” (John 5:28, 29) Jehovah hem kaen tumas for mekem iumi savve long evri samting hia. And tu, hem pourimaot spirit bilong hem long iumi. So, wei wea iumi tinghae long evri gudfala present hia shud muvim iumi for respectim olketa hae standard bilong hem, praisem hem witim strong and talemaot olketa “nambawan samting” hia long nara pipol.

[Olketa Footnote]

Hao Nao Bae Iu Ansa?

• Wanem nao “olketa nambawan samting” wea pipol herem long Pentecost 33 C.E., and hem muvim olketa for duim wanem?

• Hao nao man savve kamap wanfala disaepol bilong Jesus Christ, and wanem nao insaed long diswan?

• Why nao hem important for iumi lukluk gud long kaleko and lukluk bilong iumi?

• Wanem nao samfala point for ting raonem for helpem iumi disaed sapos wanfala kaleko hem fitim?

[Piksa long page 15]

Peter talemaot hao Jesus resurrect finis

[Olketa Piksa long page 17]

Waswe, lukluk bilong iu mekem pipol tinghae long God wea iu worshipim?

[Olketa Piksa long page 18]

Christian parents mas lukluk gud long lukluk bilong olketa famili member