Kwestin From Reader
Why nao Paul raet olsem abaotem olketa Christian waef: “Hem bae stap sef thru long wei for garem pikinini”?—1 Timothy 2:15.
Hao nao olketa verse wea stap bifor and bihaen diswan helpem iumi for minim samting wea Paul hem story abaotem? Holy spirit bilong God muvim hem for givim kaonsel abaotem waka bilong Christian woman insaed long kongregeson. Hem raet olsem: “Mi laekem olketa woman for garem gudfala wei for werem kaleko, witim fasin wea showimaot respect and stretfala tingting, no long wei for staelem hair and gold or pearl and samting wea kostim tumas selen, bat long wei wea fitim olketa woman wea sei olketa honorim God, hem nao thru long olketa gudfala waka.” (1 Timothy 2:9, 10) Paul encouragem olketa Christian sista for no ova tumas, for balance saed long lukluk bilong olketa, and for letem gudfala samting wea olketa duim nao mekem olketa luk naes.
Then, Paul explainim hedship arrangement insaed long kongregeson taem hem sei: “Mi no letem woman for teach, or for garem paoa ovarem man, bat woman mas stap kwaet.” (1 Timothy 2:12; 1 Corinthians 11:3) Hem talem why nao diswan mas olsem, taem hem sei hao Satan no trikim Adam bat Eve nao “Devil barava trikim . . . and hem duim sin.” Hao nao wanfala Christian woman savve stap klia from wei for duim sin olsem Eve? Paul givim disfala ansa: “Hem bae stap sef thru long wei for garem pikinini, sapos olketa gohed long faith and love and holy fasin witim gudfala tingting.” (1 Timothy 2:14, 15) Wanem nao Paul minim?
Luk olsem samfala wea transleitim Bible givim idea hao woman mas garem pikinini for kasem salvation. Olsem example, Today’s English Version sei olsem: “Woman bae sev sapos hem bornem pikinini.” Bat disfala wei for transleitim toktok bilong Paul hem no stret. Staka scripture showimaot hao man savve kasem salvation sapos hem savve long Jehovah, biliv long Jesus, and showimaot faith thru long olketa samting wea hem duim. (John 17:3; Acts 16:30, 31; Romans 10:10; James 2:26) Nara samting tu, long hia Paul no minim olketa Christian woman bae stap sef taem olketa bornem pikinini. Nomata olketa woman Christian or nomoa, samfala stap sef taem olketa bornem pikinini, and sorre samting tu, samfala dae taem olketa bornem pikinini.—Genesis 35:16-18
Long leta hia wea Paul raetem, hem talem samfala moa kaonsel for olketa woman, and diswan helpem iumi for savve long mining bilong wanem hem talem. Hem givim warning abaotem samfala young widow woman wea “no duim eniting, liu olobaot long olketa haos; tru nao, olketa no duim eniting nomoa, bat olketa gossip tu and poke-nose long bisnis bilong nara pipol, story abaotem samting wea olketa shud no storyim.” Wanem nao advaes bilong Paul? Hem sei: “Dastawe mi laekem olketa young widow woman for marit, for garem pikinini, for lukaftarem wanfala famili, for no mekem enemy tok nogud abaotem olketa.”—1 Timothy 5:13, 14.
Paul mekhae long waka bilong woman insaed long famili. Sapos wanfala woman gohed for busy long ‘faith and love and holy fasin witim gudfala tingting taem hem garem pikinini and lukaftarem famili,’ bae hem no garem feeling for laek duim samting wea no buildimap narawan. Spiritual saed bilong hem “bae stap sef.” (1 Timothy 2:15) For followim kaen wei olsem bae helpem staka young woman for stap klia long olketa trap bilong Satan.
Toktok bilong Paul for Timothy hem mekem iumi evriwan, olketa man and woman, for busy for duim olketa gudfala samting. Word bilong God givim disfala advaes long evri Christian: “Gohed for luk aot gud mekem wei wea iufala wakabaot hem no olsem man wea no wise bat olsem man wea wise.”—Ephesians 5:15.