“Jehovah Hem Savve Gud Long Olketa Bilong Hem”
“Sapos eniwan lovem God, God hem savve gud long datfala man.”—1 COR. 8:3.
1. Storyim example bilong samfala pipol bilong God wea laea long olketa seleva. (Lukim piksa long start bilong study.)
WANFALA grup standap front long tabernacle, and olketa redi for offerim incense long Jehovah. Hae Priest Aaron hem standap long wansaed, and long narasaed hem Korah and 250 man wea sapotim hem. (Num. 16:16-18) Eniwan wea lukim olketa maet tingse evriwan hia faithful long God. Bat Korah and olketa man hia praod, bighed, and tingim olketa seleva nomoa. And tu, olketa trae for aotem Aaron from waka bilong hem mekem olketa nao kamap olketa priest. (Num. 16:1-11) Olketa laea long olketa seleva and tingse Jehovah bae acceptim worship bilong olketa. Bat Jehovah barava feel nogud long samting wea olketa duim. Hem savve finis wanem nao insaed long heart bilong olketa, and hem luksavve olketa laea nomoa long worship bilong olketa and laek for mekhae long olketa seleva.—Jer. 17:10.
2. Wanem nao Moses sei bae happen, and waswe, samting wea hem talem kamap tru?
2 Long day bifor diswan, Moses sei long olketa: “Long morning Jehovah bae showimaot klia hu nao bilong hem.” (Num. 16:5) Wanem nao Jehovah duim for showimaot hem savve hu nao olketa wea worshipim hem long stretfala wei, and hu nao olketa wea laea nomoa long worship bilong olketa? Jehovah sendem kam fire from heven and killim dae Korah and 250 man hia. (Num. 16:35; 26:10) Aaron nomoa hem no dae. Jehovah showimaot klia Aaron nomoa priest wea hem chusim and wea worshipim God long stretfala wei.—Readim 1 Corinth 8:3.
3. (a) Long taem bilong Paul, wanem nao happen insaed Christian kongregeson? (b) Wanem nao iumi savve lanem from samting wea Jehovah duim long olketa wea bighed long taem bilong Moses?
3 Winim 1,500 year bihaen datwan, long taem bilong Paul, semkaen samting happen insaed Christian kongregeson. Paul sei samfala wea sei olketa Christian olketa start for teachim olketa laea teaching. Nomata olsem, olketa still stap insaed long kongregeson. Maet samfala pipol long datfala taem tingse olketa apostate hia worshipim Jehovah. Bat olketa olsem olketa wild dog wea start for “spoelem faith bilong samfala.” (2 Tim. 2:16-18) Waswe, Jehovah lukim wanem olketa duim? Yes. Paul savve long wanem God duim long Korah and olketa man wea sapotim hem, so hem barava sure Jehovah hem savve long samting wea olketa apostate hia duim. Distaem bae iumi storyim interesting samting wea Paul raetem long Timothy and wanem iumi savve lanem from diswan.
“MI NAO JEHOVAH. MI NATING CHANGE”
4. Paul hem sure Jehovah savve long wanem samting, and wanem nao hem talem long Timothy?
4 Paul savve Jehovah luksavve long olketa wea laea nomoa long worship bilong olketa. And tu, hem sure Jehovah savve hu nao olketa wea worshipim hem long stretfala wei. Diswan showaot long wanem hem talem insaed leta wea hem raetem go long Timothy. Bihaen Paul storyim nogud samting wea olketa apostate duim for spoelem faith bilong samfala, hem sei olsem: “Nomata olsem, God nao putim strongfala faondeson wea no savve seksek and wea garem raeting long hem wea sei: ‘Jehovah hem savve gud long olketa bilong hem.’ Hem sei moa: ‘Evriwan wea trust long nem bilong Jehovah mas lusim olketa samting wea hem no stret.’”—2 Tim. 2:19.
5, 6. Wanem nao iumi lanem from disfala toktok bilong Paul “God nao putim strongfala faondeson,” and hao nao datwan helpem Timothy?
5 Wanem nao iumi lanem from disfala toktok bilong Paul “God nao putim strongfala faondeson”? Datfala toktok hem stap wanfala taem nomoa insaed Bible. Bible iusim datfala word “faondeson” for piksarem samfala difren samting. Olsem example, hem iusim datfala toktok for story abaotem Jerusalem, wea hem kapitol taon bilong Israel bifor. (Ps. 87:1, 2) And tu, hem iusim datfala toktok for story abaotem waka wea Jesus duim insaed plan bilong God. (1 Cor. 3:11; 1 Pet. 2:6) So taem Paul iusim datfala toktok “God nao putim strongfala faondeson,” hem storyim wanem samting?
6 Taem Paul talem datfala toktok “God nao putim strongfala faondeson,” hem talem tu toktok wea Moses talem long Numbers 16:5 abaotem Korah and olketa wea sapotim hem. Taem Paul duim datwan, hem helpem Timothy for tingim wei wea Jehovah savve long olketa samting wea happen insaed long kongregeson. God bae no letem olketa apostate for spoelem kongregeson. Samting wea Korah duim no stopem plan bilong Jehovah, and Jehovah bae no letem olketa apostate long kongregeson tu for spoelem plan bilong hem. Paul no explainim evri samting abaotem disfala toktok “God nao putim strongfala faondeson.” Nomata olsem, samting wea Paul talem helpem Timothy for trustim Jehovah.
7. Hao nao iumi savve Jehovah bae evritaem raeteous and faithful?
7 Olketa principle bilong Jehovah no savve change. Psalm 33:11 sei: “Olketa disison bilong Jehovah stap for olowe. Tingting bilong hem bae stap for olowe.” Jehovah hem King, hem garem bigfala love, hem raeteous, and hem faithful. Bible sei evri samting hia bae gohed for olowe. (Ex. 15:18; Ps. 106:1; 111:3; 117:2) Long Malachi 3:6 hem sei: “Mi nao Jehovah. Mi nating change.” And tu, James 1:17 sei Jehovah “no olsem wanfala shadow wea savve change.”
WANFALA RAETING WEA STRONGIM FAITH LONG JEHOVAH
8, 9. Wanem nao iumi savve lanem from tufala raeting wea stap long “strongfala faondeson” wea Paul storyim?
8 Long bifor, pipol savve raetem samfala toktok long faondeson ston bilong olketa building. Olketa duim diswan for showim hu nao buildim or ownim datfala building. Paul nao first man wea raetem Bible wea iusim diswan long wanfala tokpiksa.a Tufala raeting nao stap long “strongfala faondeson” wea Paul storyim long 2 Timothy 2:19. Tufala hia nao: (1) “Jehovah hem savve gud long olketa bilong hem.” (2) “Evriwan wea trust long nem bilong Jehovah mas lusim olketa samting wea hem no stret.” Diswan mekem iumi for tingim toktok wea stap long Numbers 16:5.—Readim.
9 Wanem samting nao olketa wea lovem Jehovah savve lanem from tufala raeting wea stap long “strongfala faondeson” wea Paul storyim? Evri standard and wei bilong Jehovah hem garem faondeson long tufala main principle hia: (1) Jehovah lovem olketa wea faithful long hem. (2) Jehovah heitim olketa samting wea no stret. Bat why nao Paul storyim diswan taem hem raet long Timothy abaotem wei for apostate insaed long kongregeson?
10. Hao nao olketa samting wea olketa apostate duim hem affectim olketa wea faithful long taem bilong Paul?
10 Timothy and olketa narawan wea faithful barava wari abaotem olketa samting wea olketa apostate duim. Maet samfala Christian no savve why nao Jehovah letem olketa apostate hia gohed stap insaed kongregeson. Maet samfala no sure sapos Jehovah tinghae long wei wea olketa faithful and luksavve long olketa apostate wea laea nomoa long worship bilong olketa.—Acts 20:29, 30.
Olketa nogud samting wea olketa apostate duim no spoelem faith bilong Timothy (Lukim paragraf 10-12)
11, 12. Hao nao leta bilong Paul strongim faith bilong Timothy?
11 Masbi leta bilong Paul strongim faith bilong Timothy. Hem helpem Timothy for tingim moa samting wea Jehovah duim long Korah and olketa wea sapotim hem. Jehovah luksavve olketa laea nomoa long worship bilong olketa, and hem rejectim and killim olketa dae, bat hem showimaot hem hapi long Aaron. So Paul helpem Timothy for luksavve Jehovah bae showimaot klia hu nao olketa bilong hem, nomata samfala laea Christian stap long kongregeson long datfala taem.
12 Jehovah nating savve change, so iumi savve trustim hem evritaem. Hem heitim olketa samting wea no stret and hem bae panisim olketa wea duim nogud samting and no repent. From “evriwan wea trust long nem bilong Jehovah” mas lusim olketa samting wea no stret, Paul showimaot long Timothy hem garem responsibility for againstim olketa laea Christian.b
OLKETA WEA FAITHFUL EVRITAEM KASEM REWARD
13. Wanem nao iumi barava sure long hem?
13 Toktok wea Paul talem for Timothy savve encouragem iumi tu. Jehovah hem luksavve long wei wea iumi faithful long hem. Bat Jehovah no luksavve nomoa long datwan, hem barava tinghae tu long olketa wea faithful long hem. Bible sei: “Jehovah hem lukluk gud evriwea long earth for iusim strong bilong hem for helpem olketa wea lovem hem long full heart.” (2 Chron. 16:9) Iumi barava sure Jehovah bae nating forgetim worship bilong iumi wea “kam from gudfala heart.”—1 Tim. 1:5; 1 Cor. 15:58.
14. Jehovah rejectim worship bilong hu?
14 Jehovah heitim and rejectim olketa wea laea nomoa long worship bilong olketa. Hem savve lukluk long heart bilong evriwan and luksavve hu nao olketa wea no “lovem hem long full heart.” Jehovah barava heitim man wea obey nomoa taem pipol lukluk long hem bat wea gohed for duim sin taem hem stap seleva. (Prov. 3:32) Man olsem maet trikim olketa narawan, bat Jehovah luksavve long wanem hem duim. Bible sei: “Man wea haedem sin bilong hem bae no savve win long datwan.” Diswan hem bikos Jehovah garem bigfala paoa and hem God wea evritaem duim stret samting.—Prov. 28:13; readim 1 Timothy 5:24; Hebrew 4:13.
15. Wanem nao iumi shud no duim, and why nao olsem?
15 Klosap evriwan wea worshipim Jehovah lovem hem long full heart bilong olketa. Wei wea samwan laea nomoa long worship bilong hem, hem no samting wea happen staka taem. Nomata olsem, from diswan happen long taem bilong Moses and long first century, hem savve happen distaem tu. (2 Tim. 3:1, 5) Waswe, diswan minim iumi shud garem rong tingting abaotem olketa brata and sista bilong iumi, and daotem wei wea olketa faithful long Jehovah? Nomoa! Hem no stret for daotem wei wea olketa brata and sista faithful sapos iumi no garem eni pruv long datwan. (Readim Rome 14:10-12; 1 Corinth 13:7.) And sapos iumi daotem olketa brata and sista, datwan savve spoelem wei wea iumiseleva fren witim Jehovah.
16. (a) Wanem nao bae helpem iumi for mek sure iumi no worshipim God for olketa reason wea no stret? (b) Wanem nao iumi savve lanem from box “Gohed for Lukluk Gud Long Iufala Seleva”?
16 Evri Christian shud “lukluk gud long wanem hemseleva duim.” (Gal. 6:4) From iumi no perfect, maet iumi no luksavve iumi start for worshipim Jehovah for olketa reason wea no stret. (Heb. 3:12, 13) So hem important samfala taem for ting raonem why nao iumi worshipim Jehovah. Iumi shud ting raonem olketa kwestin hia: ‘Why nao mi worshipim Jehovah? Waswe, mi worshipim hem bikos mi lovem hem and luksavve hem garem raet for rul? Or waswe, mi tingim nomoa olketa gudfala samting wea mi laek for kasem long Paradaes?’ (Rev. 4:11) Taem iumi ting raonem olketa kwestin hia, datwan bae helpem iumi for mek sure iumi no worshipim God for olketa reason wea no stret.
OLKETA WEA FAITHFUL BAE HAPI
17, 18. Why nao iumi shud worshipim God long stretfala wei?
17 Iumi bae kasem staka blessing sapos iumi mek sure iumi no worshipim God for olketa reason wea no stret. Man wea raetem psalm sei: “Hapi nao man wea Jehovah no tingim sin bilong hem, and wea hem no man for laea.” (Ps. 32:2) Sapos iumi worshipim God long stretfala wei, iumi bae hapi distaem and iumi bae barava hapi long future.
18 Klosap nao Jehovah bae judgem pipol wea duim nogud samting and no laek for repent, and tu pipol wea duim sin haed. Hem bae showimaot “man wea raeteous hem difren from man wea no raeteous,” and “man wea worshipim God hem difren from man wea no worshipim hem.” (Mal. 3:18) Go kasem datfala taem, iumi kasem comfort from iumi savve “Jehovah hem lukluk long olketa wea raeteous and hem herem prea bilong olketa.”—1 Pet. 3:12.
a Revelation 21:14 tu storyim “twelvfala ston” wea olketa nao “faondeson for wall” bilong Niu Jerusalem. Hem sei nem bilong twelvfala aposol stap long twelvfala ston hia.
b Long next study bae iumi storyim hao iumi savve followim example bilong Jehovah and lusim olketa samting wea no stret.